“Sa Sini ang Tanan nga Tawo Makahibalo nga Kamo mga Gintutun-an Ko”

Mahal kong mga kauturan, mahal kong mga abyan, palangga ko ang Simbahan ni Jesucristo sang mga Santos sa Ulihing mga Adlaw. Ini ang matuod kag buhi nga Simbahan sang Manluluwas, kag nagatudlo ini sang ginpanumbalik nga kabug-osan sang ebanghelyo ni Jesucristo. Ari diri ang gahum kag awtoridad sang Iya priesthood. Si Jesucristo ang personal nga nagapanguna sa sining Simbahan, paagi sa mga alagad nga Iya gintawag kag ginhatagan sang awtoridad, kag paagi sa buhi nga propeta, nga si Pangulong Russell M. Nelson. Ginhatagan sang Manluluwas ang mga Santos sa Ulihing mga Adlaw sang pinasahi nga misyon para tipunon ang mga anak sang Dios kag ihanda ang kalibutan para sa Ika-duha nga Pagkari sang Manluluwas. Nagasaksi ako nga ini tanan matuod.

Pero importante nga tandaan nga kasami sa primero nga nagakadto ang mga tawo sa Simbahan ni Jesucristo, wala ini sila nagapamensar parte sa awtoridad sang priesthood ukon sa mga ordinansa ukon sa pagtipon sang Israel. Laban gid nga ila matalupangdan, labaw sa tanan, ang ila nabatyagan kon upod nila kita kag kon paano naton ginatrato ang kada isa.

“Maghigugmaanay kamo,” siling ni Jesus. “Sa sini ang tanan nga tawo makahibalo nga kamo mga gintutun-an Ko.” Kasami, ang una nga testimonya sang tawo parte kay Jesucristo nagaabot kon mabatyagan niya ang pagpalangga sa tunga sang mga disipulo ni Jesucristo.

Ginhambal sang Manluluwas nga ginpanumbalik Niya ang Iya Simbahan agud “ang pagtuo … magdugang sa duta.” Gani, kon magbisita ang mga tawo sa mga miting naton sa Simbahan, gusto sang Manluluwas nga magpauli sila nga may mas mabaskog nga pagtuo sa Iya! Ang pagpalangga nga mabatyagan sang aton mga abyan sa tunga naton magaalsa sa ila palapit kay Jesucristo! Amo ina ang simple naton nga tuyo tagsa nga magtipon kita.

Ang bisan sin-o nga nagahandum sang mas dako nga pagtuo kay Cristo ukon sang mas malapit nga koneksyon sa Amay nga Langitnon dapat makabatyag nga him-os sa Ang Simbahan ni Jesucristo sang mga Santos sa Ulihing mga Adlaw. Ang paghagad sa ila sa aton mga miting pwede nga mangin normal kag natural pareho sa pag-imbitar naton sa ila sa aton mga balay.

Karon, narealisar ko nga ginalarawan ko ang dapat kuntani. Kag sa sining mortal nga kabuhi, halos naton maeksperiyensyahan ang dapat kuntani. Kag “tubtob nga mag-abot ang perpekto nga adlaw” malayo gid ang dapat kuntani kag ang matuod. Gani, ano ang dapat naton himuon kon ang Simbahan daw indi perpekto nga adlaw sa pamatyagan? Kon, sa ano man nga rason, ang aton ward wala pa nagapatubo sang perpekto nga pagtuo ukon pagpalangga? Ukon sa pamatyag naton daw indi kita parte sang grupo?

Isa sa indi naton dapat himuon amo ang magpangampo!

Ang tig-ulo nga pahina sang Libro ni Mormon may importante nga paandam, “Kag karon, kon may kasaypanan,” siling diri, “ini mga sayop sang tawo; gani indi pagpakalaina ang mga butang nga iya sang Dios.”

Pwede bala nga ang isa ka libro—ukon simbahan ukon tawo—may “mga kasaypanan” kag “mga sala” kag buhat gihapon ini sang Dios?

Ang sabat ko isa ka mabaskog nga huo!

Gani, samtang ginatinguhaan naton nga lab-uton ang talaksan sang Ginuo, magmangin pasensyoso man kita sa kada isa. Indi pa kita perpekto, kag tanan kita nagasalig sa Manluluwas sa bisan ano nga progreso nga aton malab-ot. Amo man ina sa aton bilang mga indibidwal, kag amo man sini ang ginharian sang Dios sa duta.

Ginaimbitar kita sang Ginuo indi lang para mag-entra sa Iya ginharian kundi mangin mapisan sa pagpakigbahin sa pagtukod sini. Ginapanan-aw sang Dios ang katawhan nga “isa sing tagipusuon kag isa sing panghunahuna.” Para mangin isa sing tagipusuon, kinahanglan may putli kita nga mga tagipusuon, kag nagapangayo ina sang dako nga pagbag-o sang tagipusuon.

Pero wala ina nagakahulugan nga bag-uhon ko ang akon tagipusuon para mag-ugyon sa imo. Kag wala man ina nagakahulugan nga bag-uhon mo ang imo tagipusuon para mag-ugyon sa akon. Buot silingon sini nga bag-uhon naton tanan ang aton mga tagipusuon para mag-ugyon sa Manluluwas.

Kon wala pa naton ina malab-ot, tandai: sa bulig sang Ginuo, wala sang imposible.

Kag kon pamatyag mo indi ka bagay, palihog hibaloa nga wala ka nagaisahanon. Indi bala kita tanan nakaagi na sang mga sitwasyon sa kabuhi nga pamatyag naton nagaisahanon kita sa kadam-an? Naagyan ko na ini masobra sa kaisa. Sang 11 anyos ako, napilitan ang amon pamilya nga maghalin sa amon ginaestaran kag magsaylo sa indi namon kabisado nga rehiyon. Ang tanan lain sangsa naandan ko. Kag sa tono sang akon paghambal maathag gid sa iban nga kabataan nga lain ako sangsa ila naandan. Sang panahon nga kinahanglan ko gid kaayo sang mga abyan kag grupo, nagaisahanon ako kag wala sang kagrupo.

Diri sa duta, kalabanan sang aton matalupangdan—ang mga diperensya nga ginagamit sang iban sa aton para bahin-bahinon ang kada isa—maangot sa dutan-on nga mga butang: pisikal nga hitsura, nasyonalidad, lenggwahe, pamiste, mga kustombre, kag madamo pa. Pero “ang Dios wala nagatan-aw pareho sang panan-aw sang tawo. Ang mga tawo nagatulok sa guwa nga dagway, apang ang Ginuo nagatulok sa tagipusuon.”

Sa Iya perspektibo, isa lang ka kategorya ang nagapangibabaw sa tanan: anak sang Dios. Kag bagay kita tanan sa diri.

Natural lang nga maghandum nga makigsimpon sa mga tawo nga pareho sa aton tulukon, maghambal, maggiho, kag mamensar. May lugar para dira.

Pero sa Simbahan sang Manluluwas, ginatipon naton ang tanan nga anak sang Dios nga handa tipunon kag nagapangita sang kamatuoran. Indi ang aton pisikal nga hitsura, aton panan-aw sa politika, aton kultura, ukon aton rasa ang nagatingob sa aton. Indi ang aton palareho nga ginhalinan ang nagaisa sa aton. Kundi ang aton katuyuan, ang aton pagpalangga sa Dios kag pagpalangga sa aton isigkatawo, ang aton debosyon kay Jesucristo kag sa Iya ginpanumbalik nga ebanghelyo. Kita “isa kay Cristo.”

Ang pag-isa nga ginahandum naton indi para ang tanan magtindog sa pareho nga lugar; kundi nga ang tanan mag-atubang sa isa ka direksyon—padulong kay Jesucristo. Isa kita indi tungod sa aton ginhalinan kundi sa ginatinguhaan naton nga padulungan, indi tungod sa kon sin-o kita kundi kon sino ang ginahandum naton nga mangin.

Amo ina ang buot silingon sang matuod nga Simbahan ni Cristo.

Kon palangga mo ang Dios, kon gusto mo nga mas makilala Sia paagi sa pagsunod sa Iya Anak, naentra ka dira. Kon hugot ka nga nagahandum nga sundon ang mga kasugoan sang Manluluwas—bisan nga indi ka pa perpekto dira—bagay ka gid kaayo sa Ang Simbahan ni Jesucristo sang mga Santos sa Ulihing mga Adlaw.

Paano kon lain ka sangsa mga tawo sa imo palibot? Indi buot silingon nga indi ka na pwede—kundi kinahanglanon ka nga parte sang lawas ni Cristo. Ang tanan kinahanglanon sa lawas ni Cristo. Ang dulunggan makabati sang mga butang nga indi maobra sang mga mata. Mahimo sang mga tiil ang mga butang nga indi mahimo sang mga kamot.

Wala nagakahulugan nga ang imo obra amo ang bag-uhon ang tanan para mangin pareho sa imo. Pero nagakahulugan ini nga may importante ka nga maamot—kag may importante ka nga matun-an!

Sa tagsa ka sesyon sang pangkabilogan nga komperensya, ginabugayan kita sang makainspirar nga musika halin sa talentado nga mga koro. Kon pamatian mo, matalupangdan mo nga ang mga manugkanta indi palareho ang ginakanta nga nota. Kon kaisa isa ka seksyon ang nagakanta sang melody, kon kaisa iban man. Pero tanan sila nagaamot sa matahum nga tunog, kag nagaisa gid sila. Ang tagsa ka miyembro sang koro may isa ka mayor nga tuyo: nga dayawon ang Dios kag alsahon ang aton mga tagipusuon sa Iya. Ang kada isa kinahanglan magtutok sang iya hunahuna kag tagipusuon sa isa ka diosnon nga katuyuan. Kag kon matabo ina, mangin isa gid sila matuod ka tingug.

Kon indi ka pa miyembro sang Ang Simbahan ni Jesucristo sang mga Santos sa Ulihing mga Adlaw, ginaimbitar ka namon nga mag-upod sa amon samtang nagakalipay kami sa “ambahanon sang nagatubos nga gugma” sang Manluluwas.” Kinahanglan namon kamo. Palangga namon kamo. Mangin mas maayo ang Simbahan sa inyo pagpanikasog nga serbisyohan ang Ginuo kag ang Iya mga anak.

Kon ginpakita mo na, paagi sa bunyag, paagi sa paghimo sang mga kasugtanan sa Dios, ang imo handum nga “magsulod sa panong sang Dios, kag tawgon nga iya katawhan,” salamat sa pagpakigbahin sa sining dako kag diosnon nga buluhaton kag sa pagbulig sa Simbahan ni Jesucristo nga mangin suno sa gusto sang Manluluwas.

Sa natun-an ko sa akon abyan sa Germany, ang aton pagpalangga sa Dios kag sa Iya mga anak isa ka mabaskog nga testimonya sa kalibutan nga amo ini matuod ang Simbahan sang Manluluwas.

Kabay nga bugayan kita sang Dios nga pasensyoso pero mapisan nga handumon nga ipangabuhi ang mga dapat kuntani nga ginpahamtang sang aton Manluluwas, Manunubos, kag Manunudlo—para tanan makahibalo nga kita iya mga disipulo. Sa sagrado nga ngalan ni Jesucristo, amen.