Diosnon nga Awtoridad, Dalayawon nga mga Pamatan-on nga Lalaki

Salamat, Elder Andersen, sa talalupangdon nga pahayag parte sa gahum sang pagkapari kag parte sa gahum sang Pagbayad-sala sang Manluluwas.

Isa ka Domingo sang aga sining Enero, samtang nagapungko ako sa sakramento nga miting, masobra isa ka dosena ka pamatan-on ang gin-sustain nga magbaton sang Aaronic Priesthood. Nabatyagan ko ang kalibutan nga nagabag-o sa aton ginatindugan.

Narealisar ko nga sa bilog nga kalibutan, sa tagsa ka time zone, sa sakramento nga mga miting pareho gid sina, linibo ka deacon, teacher, kag priest—pareho sa abyan ni Pangulong Holland sining aga nga si Easton—ang ginasakdag nga ordinan sa bug-os kabuhi nga mga pag-alagad sa priesthood nga nagakatabo sa bilog nga kalibutan sa pagtipon sang Israel.

Kada Enero, ginatakdong ang mga kamot sa ulo sing halos 100,000 ka pamatan-on, nga ginaangot sila paagi sa ordinansa sa masanag nga linya sang awtoridad pabalik sa panahon sang Pagpanumbalik kay Joseph kag Oliver, kay Juan Bautista, kag kay Jesucristo.

Karon, ang aton Simbahan wala masyado nagapasundayag sang aton ginapatihan. Diri, gamay lang ang aton ginapakita.

Pero sa gihapon, kon makita ko ining mabaskog kaayo nga bag-ong ordin nga mga nagakapot sang priesthood nga nagalapta sa bilog nga kalibutan, nagahunahuna ako—sa pamaagi sang “simbahan sang kalipay” kon indi bala ini dapat isinggit halin sa mga atop. “Sa karon,” akon nahunahuna, “dapat may mga trumpeta kag matagsing nga mga simbal kag mga pasirit. Dapat may mga parada!”

Bilang mga nakahibalo kon ano gid ang gahum sang Dios, ari kita para saksihan ang pagkatublag sang mga pamaagi sining kalibutan paagi sa diosnon nga awtoridad nga nagalapnag sa bilog nga kalibutan.

Ining mga ordinasyon nagapahamtang sining mga pamatan-on sa bug-os-kabuhi nga pag-alagad tungod makita nila ang ila mga kaugalingon sa tiyempo kag lugar kon diin ang ila presensya kag mga pangamuyo kag ang mga gahum sang priesthood sang Dios nga ila ginakaptan mangin importante kaayo.

Ining kontrolado nga pasunod sang mga hitabo nag-umpisa sa ministering angel nga ginpadala sang Dios. Ang nabanhaw nga si Juan Bautista sang dumaan nga panahon nagpakita kay Joseph kag Oliver, nagbutang sang iya mga kamot sa ila mga ulo, kag nagsiling, “Sa inyo kapareho ko nga mga alagad, sa ngalan sang Mesias ginahatag ko ang Pagkapari ni Aaron nga nagakapot sang mga yabi sang pag-alagad sang mga anghel, kag sang ebanghelyo sang paghinulsol, kag sang bunyag paagi sa pagtugmaw para sa kapatawaran sang mga sala” (Doktrina kag mga Kasugtanan 13:1).

Gintawag ni Juan ining awtoridad nga “Priesthood ni Aaron,” sunod sa ngalan sang utod kag kaupod ni Moises sa priesthood. Sang una, ang mga nagakapot sang priesthood ni Aaron dapat magtudlo kag magbulig sa mga ordinansa—mga ordinansa nga nagatutok sa pagkasumulunod sang palaabuton nga Mesias, ang Ginuong Jesucristo (tan-awa sa Deuteronomio 33:10).

Ang libro sang Numeros maathag nga nagahatag sa mga nagakapot sang priesthood ni Aaron sang mga hilikuton sa pagtatap sang mga galamiton sa mga ordinansa. “Pilion mo si Aaron kag ang iya mga anak nga lalaki … sila ang gintugyanan … sang lamesa … kag sang mga gamit sang santuario nga ginagamit nila sa pag-alagad” (Numeros 3:10, 31).

Ang ordinansa sa Daan nga Katipan nga paghalad sang mga sapat gintuman kag gin-islan paagi sa kabuhi kag Pagbayad-sala sang Manluluwas. Inang dumaan nga ordinansa ginbuslan sang ordinansa nga ginatawag naton karon nga sakramento sang Panihapon sang Ginuo.

Ginasalig sang Ginuo sa mga nagakapot sang priesthood ni Aaron sa karon nga himuon ang mismo mga butang nga ila ginhimo sang una: nga magtudlo kag maghikot sang mga ordinansa—tanan agud pahanumdumon kita sang Iya Pagbayad-sala.

Kon ang mga deacon, teacher, kag priest magbulig sa sakramento, mabaton nila ang mga bugay sini pareho man sa iban: paagi sa pagtuman sang kasugtanan nga ila ginahimo samtang nagaambit sila sang tinapay kag tubig. Apang paagi sa paghikot sining sagrado nga mga tulumanon, matun-an pa gid nila ang ila mga papel kag mga responsibilidad sa priesthood.

Ang Aaronic Priesthood ginatawag nga nagapanghanda nga priesthood tungod ginatugot sang mga ordinansa sini nga maeksperiyensyahan nila ang kabug-at kag ang kalipay sang pag-alagad sa Ginuo, para mahanda sila sa pag-alagad sa priesthood sa palaabuton, kon tawgon sila sa wala ginapaabot nga mga pag-alagad—lakip na sa paghambal sang inspirado nga mga bendisyon sa tinion nga ang mga paglaum kag mga handum, kag bisan pa ang kabuhi kag kamatayon, yara sa peligro.

Ang amo ka seryoso nga mga ginalauman kinahanglan sing seryoso nga pagpanghanda.

Ang Doktrina kag mga Kasugtanan nagapaathag nga ang mga deacon kag mga teacher “dapat magpaandam, magpaathag, maglaygay, kag magtudlo, kag mag-agda sa tanan nga magkari kay Cristo” (Doktrina kag mga Kasugtanan 20:59). Dugang sa sining mga oportunidad, ang mga priest dapat “magwali … kag magbunyag” (Doktrina kag mga Kasugtanan 20:50).

Te, daw kadamo sina pamatian, pero sa matuod-tuod, ining mga butang natural nga nagakatabo sa bilog nga kalibutan.

Gintudloan sang isa ka bishop ang bag-o niya nga deacons quorum presidency sining mga tulumanon. Gani ang hubin nga pangulohan nagsugod sa paghambalanay kon paano nila ina himuon sa ila korum kag sa ila ward. Nagdesisyon sila nga dapat nila sugdan sa pagbisita sang tigulang nga mga miyembro sa ward agud mabal-an kon ano ang ila kinahanglan kag dayon himuon ina.

Isa sang ila ginserbisyohan amo si Alan, isa ka wala sing pasunaid, masami palabuyayaw, kag kon kaisa palapangakig nga kaingod. Ang asawa ni Alan nga si Wanda nangin miyembro sang Simbahan, pero si Alan, masiling naton nga, daw mabudlay nga tawo.

Bisan pa nga amo sini, padayon ang mga deacon sa pag-obra, nga ginabalewala ang iya mga pag-insulto, samtang ginapala nila ang snow kag ginapagwa ang basura. Indi ka gid maakig sa mga deacon, kag si Alan sang ulihi nanamian na sa ila. May bes nga gin-agda nila sia nga magkadto sa simbahan.

“Indi ko namian sang simbahan,” iya sabat.

“Te, nanamian ka man sa amon,” siling nila. “Upod ka bala sa amon. Pwede ka man magkadto sa amon lang nga quorum meeting kon gusto mo.”

Kag sa pagsugot sang bishop, nag-abot sia—kag sige-sige sia nga nagakadto.

Ang mga deacon nangin mga teacher, kag sang padayon sila nga nagaserbisyo sa iya, gintudloan niya sila kon paano magkay-o sang mga kotse kag magpasad sang kon ano nga mga bagay. Sang ining mga deacon nga nahimo mga teacher nangin mga priest na, ginatawag na sila ni Alan nga “akon mga anak.”

Nagahanda na sila karon nga maglakat sa misyon kag nagpangabay kon makapraktis sila sang pang-misyonaryo nga mga leksyon sa iya. Nagpanumpa sia nga indi gid sia mamati kag indi gid magpati, pero, sige, pwede sila magpraktis sa iya balay.

Kag dayon nagmasakit si Alan. Kag nagbuot na sia.

Kag isa ka adlaw sa korum meeting, malulo niya nga ginpangabay sila nga mangamuyo nga mag-untat na sia panigarilyo, kag ginhimo nila. Pero dayon nag-upod sila sa iya balay kag ginpanguha ang tanan nga tabako nga ginpangtago niya.

Sang si Alan nagakaospital kag ginarehab tungod sa iya nagalala nga kondisyon, ginserbisyohan sia sang “iya mga anak”, malinong nga ginapakita ang mga gahum sang priesthood kag sang matuod nga gugma (tan-awa sa Doktrina kag mga Kasugtanan 121:41).

Ang milagro nagpadayon sang nagpangabay si Alan nga mabunyagan—pero nagtaliwan sia antes ini matabo. Sa iya pangabay, ang iya mga deacon nga nangin mga priest ang nagbitbit sang iya lungon kag ang naghambal sa iya lubong, kon sa diin sila—bagay gid—nga nagpaandam, nagpaathag, naglaygay, nagtudlo, kag nag-agda sa tanan nga magkari kay Cristo.

Kag sang ulihi, sa templo, isa sang nangin “mga anak ni Alan” ang nagbunyag sang anay quorum president sang mga deacon bilang proxy para kay Alan.

Ang tanan nga ginsiling ni Juan Bautista nga himuon, ginhimo nila. Ginhimo nila kon ano ang ginahimo sang mga deacon, mga teacher, kag mga priest sa bilog nga Simbahan kag sa bilog sining kalibutan.

Isa sang mga butang nga ginsugo sa mga nagakapot sang priesthood ni Aaron may kaangtanan sa ordinansa sang sakramento.

Sang nagligad nga tuig nakilala ko ang isa ka inspirado nga bishop kag iya mabuot nga asawa. Sa isa ka Sabado sang aga sang sini lang, nagabiyahe sila pakadto sa bunyag sang ila bata nga lalaki kag gulpi sila napatyan sang pinalangga nila nga duha-ka-tuig nga bata nga si Tess.

Pagkaaga ang mga miyembro sang ila ward nagtipon para sa sakramento nga miting nga puno sing kaluoy, nga nagkasubo man sa pagkadula sining manami nga diutay nga bata. Wala gid sang nagpaabot nga makadto ang pamilya sang bishop sina nga aga, pero pila ka minutos antes nagsugod ang miting, mahipos sila nga nagsulod kag nagpungko.

Ang bishop nagsaka sa ibabaw kag ginlabyan lang ang iya kinaandan nga ginapungkoan sa tunga sang iya mga manuglaygay kag sa baylo nagpungko sa tunga sang iya mga priest sa pang-sakramento nga lamesa.

Sadtong nagligad nga gab-i sang tuman nga kasakit kag walay katulogon sa pagpangita sang paghangop kag kalinong, nakabaton sia sang pagpabatyag sang kon ano ang labing kinahanglanon sang iya pamilya—kag kon ano ang labing kinahanglanon sang iya ward. Ini amo nga pamatian ang ila bishop, ila Aaronic Priesthood president sang ward, ila tatay nga nagapangalisud, nga magpahayag sang mga promisa sang pang-sakramento nga kasugtanan.

Gani, pag-abot sang tion, nagluhod sia upod sang mga priest kag nakighambal sa iya Amay. Sa kasubo sang sina nga okasyon, ginpahayag niya ang pila sang labing gamhanan nga mga pulong nga may pahanugot sia nga ihambal sing mabaskog sa sining kabuhi.

Mga pulong sang wala katapusan nga konsikwensya.

Mga pulong sang ordinansa.

Mga pulong sang kasugtanan.

Pagtudlo nga nagaangot sa aton sa mismo nga mga katuyoan sining kabuhi—kag sa labing halangdon nga mga resulta sang plano sang Amay nga Langitnon para sa aton.

Mahunahuna bala ninyo kon ano ang nabatian sang kongregasyon sa sina nga chapel sina nga adlaw—ang ila nabatyagan sa mga pulong nga mabatian naton kada Domingo sa aton mga chapel?

“O Dios, ang Walay Katapusan nga Amay, nagapangabay kami sa imo sa ngalan sang imo Anak, nga si Jesucristo, sa pagpakamaayo kag pagpakabalaan sining tinapay sa mga kalag sang tanan sadtong magaambit sini, agud sila makakaon bilang pagpanumdum sang lawas sang imo Anak, kag magsaksi sa imo, O Dios, ang Walay Katapusan nga Amay, nga handa sila sa pagdala sa ila kaugalingon sang ngalan sang imo Anak, kag dalayon nga magdumdum sa iya kag magtuman sang iya mga kasugoan nga iya ginhatag sa ila; agud ila dalayon nga maangkon ang iya Espiritu sa pag-upod sa ila. Amen” (Doktrina kag mga Kasugtanan 20:77).

Kag dayon: “O Dios, ang Walay Katapusan nga Amay, nagapangabay kami sa imo sa ngalan sang imo Anak, nga si Jesucristo, sa pagpakamaayo kag pagpakabalaan sining [tubig] sa mga kalag sang tanan sadtong magainom sini, agud ila ini mahimo bilang pagpanumdum sang dugo sang imo Anak, nga ginpaagay para sa ila; agud sila makasaksi sa imo, O Dios, ang Walay Katapusan nga Amay, nga ila sia dalayon nga ginadumdum, agud ila maangkon ang iya Espiritu sa pag-upod sa ila. Amen” (Doktrina kag mga Kasugtanan 20:79).

Ining maayo nga amay kag iloy nagapamatuod nga natuman inang promisa. Sa pagkamatuod, sa ila dayon nga kasulhay, ila “naangkon ang iya Espiritu sa pag-upod sa ila.”

Padayon ako nga nagapasalamat nga ang mga nagakapot sang Aaronic Priesthood, upod ang iya sini mga gahum, mga ordinansa, kag mga tulumanon, nagabugay sa aton tanan paagi sa mga yabi sang mismo “pag-alagad sang mga anghel, kag sang ebanghelyo sang paghinulsol, kag sang bunyag paagi sa pagtugmaw para sa kapatawaran sang mga sala” (Doktrina kag mga Kasugtanan 13:1). Sa ngalan ni Jesucristo, amen.