Pagtuo: Pag-isa sang Pagsalig kag Katampad
Tandai nga ang pagtuo nagatubo kon magsalig kita kay Jesucristo kag nagauswag kon matutum kita kag tampad sa Iya.
Sang disisiete anyos ako, nagsugtanay kami sang amigo ko nga si José Luis nga tudloan ko sia maglangoy. Gani isa ka aga nagpain kami sang tiempo nga magpraktis. Pagkatapos sang amon leksyon kag nagatakas na ako sa pool, nabatian ko ang akon amigo nga nagasinggit tabang. Nagakalumos sia sa madalom nga bahin sang pool.
Naglukso ako sa tubig kag naglangoy pakadto sa iya samtang nagapangamuyo para sa bulig. Pagkadakop ko sang iya kamot para butongon sia paibabaw, nagtaklas sa akon likod ang nataranta ko nga amigo kag ginbuyotan ako sa liog nga daw makuga ako. Karon, duha na kami ang nagakalumos. Sa grabe ko nga pagtinguha nga makabutwa, nangamuyo ako sa bilog ko nga kusog sang milagro halin sa Dios. Dayon, amat-amat pero tayuyon, ang gahum sang Dios nakita sang nabatyagan ko nga may kamot nga nagatulod sa akon pakadto sa manabaw nga bahin sang pool, nga nagluwas sa amon.
Ining eksperiyensia nagpamatuod sang daku nga leksyon nga gintudlo ni Pangulong Russel M. Nelson: “Kon maglab-ot ka paibabaw para sa gahum sang Ginuo sa imo kabuhi nga may pareho nga kabaskog sa nagakalumos nga tawo kag nagapunga-punga, maangkon mo ang gahum ni Jesucristo.”
Pinalangga nga kabataan kag mga lamharon, subong gusto ko maghambal sa inyo parte sa importante gid nga prinsipyo sang pagtuo kay Jesucristo.
Ang Pagtuo kay Cristo Nagakahulugan nga Magsalig sa Iya
Ano ang buot silingon sang magtuo kay Cristo? Nagakahulugan bala ini nga magpati sa Iya ukon may panaksihon nga matuod Sia? Pwede ina nga mangin panugod, pero sobra pa ini dira. Nakapanumdum man bala kamo sang pagtuo bilang pagsalig? Pamensara ang isa ka tawo nga ginasaligan ninyo kaayo— ayhan isa ka miyembro sang pamilya ukon abyan. Ngaa nagasalig kamo sa ila? Basi siguro nakita ninyo ang ila tayuyon nga pagpalangga kag bulig.
Kon may pagtuo kita kay Cristo, ginakilala naton ang Iya mga bugay kag ginapatubo ang relasyon sang pagsalig sa Iya.
Paano Ninyo Dugangan ang Inyo Pagsalig kay Cristo?
Sa isa ka youth devotional sang sini lang, gin-imbitar kamo nga “magpamalandong parte sa isa ka tion sa inyo kabuhi sang nakabaton kamo sang silak sang langitnon nga kasanag.” Tilawi nga himuon ini!
Magsugod paagi sa pagpamalandong parte kay Cristo kag sa kalipay nga ginadala sang Iya Pagbayad-Sala kag ebanghelyo sa inyo kabuhi. Kag, i-rekord ang “makahulugan nga espirituhanon nga mga hitabo” sa diin ang Dios nagsuporta sa inyo, sa inyo mga pinalangga, kag sa mga tawo sa balaan nga mga kasulatan. Karon, ining mga testimonya indi magdala sang gahum sa inyo kabuhi hasta nga isulat ini sang Espiritu sa “tapitapi nga unod” sang inyo tagipusuon. Gani binagbinaga kag irekord ang tanan nga ginapatigayon sang Dios para sining mga milagro nga matabo sa nagakaigo nga tion.
Dason, gamita ining pagpamalandong nga oportunidad para mas maglapit pa gid sa Dios. Magpangamuyo sa inyo Amay nga Langitnon nga daw ini ang una nga tion. Ipahayag ang inyo pagpalangga kag kapasalamatan para sa Iya mga bugay. Pamangkota pa gid Sia kon ano ang Iya balatyagon para sa imo kag kon ano ang padulongan sang imo kabuhi.
Kon sinsero ka kag mapainubuson, mabatian mo ang Iya sabat kag masugdan ang suod kag dalayon nga relasyon sa Amay nga Langitnon kag kay Jesucristo. Indi lang ina, kundi ang inyo relihiyoso nga mga gawi mangin makahulugan! Halimbawa, kalangkagan ninyo ang inyo mga pagpangamuyo, personal nga pagtuon, kag pagsimba sa templo bilang mga oportunidad nga makilala Sila kag makaupod Sila.
Ang Pagtuo Nagadaku kon may Katampad
Tandai nga ang pagtuo nagatubo kon magsalig kita kay Jesucristo kag nagauswag kon matutum kita kag tampad sa Iya. Kon gusto ninyo sang tunay nga relasyon kay Cristo, ipakita sa Iya paagi sa paghimo sang mga kasugtanan kag pagtuman sang mga ini nga may katutum kag katampad. Ang paghimo sang mga kasugtanan kay Jesucristo nagapabakod sang paglaum. Ang pagtuman sang mga ini nagapabakod sang pagtuo.
Tugoti ako nga maggamit sang personal nga halimbawa: Sang bata pa ako, nakita ko si nanay nga nagahibi isa ka adlaw. Pagpamangkot ko sa iya kon ngaa, malulo sia nga nagsiling, “Gusto ko nga mangin mabuot ka nga bata.” Bisan pa nahibal-an ko nga indi ako ang rason sang iya kasubo, palangga ko kag nagasalig ako sa akon nanay labaw sa bisan kay sin-o kag gusto ko nga pahaposon ang iya pangabuhi. Gani, nga may luha sa akon mga mata kag lubos nga kaserioso bilang bata nga siyam katuig, nagpromisa ako sa iya sadto nga adlaw nga pirme ako matinguha nga mangin ang pinakamaayo nga anak nga iya mapabugal.
Mahunahuna bala ninyo ang gahum sinang promisa sadto—kag bisan subong—sa akon?
Ang promisa ko sa iya naggiya sang akon kabuhi. Antes magdesisyon, ginapanumdum ko anay kon ang akon himuon magapalipay sa iya. Ang kalig-on sining promisa kag ang relasyon ko sa akon nanay amo ang basehan sang akon panggawi sa bilog ko nga kabuhi.
Pagligad sang tinuig, sang mas nakilala ko si Jesucristo, nakahibalo na ako kon paano ko i-angkla ang akon pagtuo sa Iya. Naghimo ako sang mga kasugtanan sa Ginuo, kag sa akon pagtinguha nga tumanon ang mga ini, ginpatawad Niya ang akon mga sala, gingiyahan ang akon kabuhi, kag “ginpuno ako sang Iya gugma” sing lubos. Si Cristo nagtanom sa akon sing daku nga pagpalangga, respeto, kag katutum sa Iya.
Nahangpan bala ninyo kon ngaa “ang pagtuo isa ka prinsipyo nga nagapangayo sang paghulag” kag nga “wala sang tawo nga makapahamuot sa [Dios] kon wala ang pagtuo?”
Kon magtinguha kamo nga himuon ang makapahamuot sa Iya, masiling kamo pareho kay Jose sa Egipto sang gintentar sia sang asawa ni Potifar: “Ano karon ang pagkahimo ko sining malaut nga butang, kag magpakasala sa Dios?” Kag kon nagapangatubang sang oposisyon, masiling kamo pareho sang lamharon nga propetang si Joseph: “Nahibaloan ko ini, kag nahibaloan ko nga nahibaloan ini sang Dios, kag indi ko ini mapanghiwala; … nahibaloan ko nga sa paghimo sini masaklaw ko ang Dios.”
Gani ang pagtuo kay Jesucristo isa ka kaangtanan sang pagsalig nga ginpasad sa katampad kag pagpalangga. Buot silingon, sa pagpasalamat sa maluluy-on nga gugma sang Dios (hesed), ginapakita naton ang aton tampad nga pagpalangga (emunah) paagi sa pagtuman sang Iya mga kasugoan.
Si Cristo nagapromisa: “Ang nagahuput sang akon mga sogo kag nagatuman sa ila … higugmaon sang akon Amay, kag ako magahigugma sa iya kag magapahayag sang akon kaugalingon sa iya.” Kon magpangako ka nga mangin tampad sa Iya, ipakita Niya ang Iya pagpalangga sa imo.
Pagtuo kon Nagaagi sa Kabudlayan
Pero paano ka dapat mag-akto sa sinang mabudlay nga mga sitwasyon nga nagakinahanglan sang Iya mga milagro? Bisan pa nga ang mga kabudlayan indi malikawan kag kon kis-a makahaladlok, magpadayon lang nga may kaisog, pakadto sa Iya, pareho sang ginapangagda sang tema sang FSY 2025: “Magtulok sa akon sa tagsa ka panghunahuna; indi magduhaduha, indi magkahadlok.”
Paano Kamo Magpadayon nga may Kaisog Pakadto sa Iya?
Hunahunaa nga kuno abi eksplorer ka sa wala masunari nga lugar. Para malampuwasan ang mga upang sa unhan, kinahanglan mo sang kasanag. Ang imo katampad sa Dios kag ang imo sige-sige nga pagpakig-angot sa Iya amo ang gatong sa imo parol. Gani kon makasalapo ka sang madulom kag peligroso nga mga sitwasyon, imbes nga maglakat pakadto didto nga daw bulag, pasigaha ang imo suga nga puno sang lana sang pagtuo kay Cristo agud maghatag sing igpat sang paglaum sa indi pat-od nga alagyan. Ang nagliligad mo nga mga eksperiyensia magadugang sang imo paglaum nga ang Ginuo magasakdag sa imo sa imo pagpanglakaton.
Ano Kadaku ang Imo Pag-uswag Gamit ang Imo Paglaum kag Pagtuo kay Cristo?
Nadumduman ninyo ang akon istorya sa pool? Sa sadtong tion sang pagkadesperado, ang milagro nag-abot sa paagi nga akon ginpaabot, pero ang Dios wala nagagarantiya nga matabo ini pirme suno sa aton pagbuot. Ang aton pagtuo dapat masentro kay Cristo kag ang aton paglaum sa Iya mga bugay, suno sa Iya gusto nga ipadala ang mga ini. “Magpaabot sang mga milagro,” pero “tugoti ang Dios nga magpangibabaw sa aton mga kabuhi.”
Ang mga Promisa sang Dios sa Iya Tampad nga Katawhan
Lamharon ko nga mga abyan, palangga kag ginasaligan gid namon kamo! Naisip kamo sa panimalay sang Dios kag mga anak sang kasugtanan. Magpati kag magsalig kay Jesucristo. Buligan Niya kamo nga mangin tunay Niya nga mga disipulo.
Ginaagda ko kamo nga sugdan subong ang pagtatap sang inyo relasyon kay Jesucristo. Magpangako nga indi gid sia pagtalikdan.
Ang inyo katampad, pagpalangga, kag pagsalig kay Cristo magaporma sang inyo panimuot kag pagkatawo sunod sa Iya. Makaangkon kamo sang kompiyansa kag kusog nga madaug ang mga pagpang-atake ni Satanas. Kag kon makahimo kamo sang sala, magahandum kamo sang Iya kapatawaran. Sa ulihi, ang inyo paglaum para sa palaabuton mangin masanag. Saligan Niya kamo sang Iya gahum nga matigayon ang bisan ano nga ginapaabot Niya sa inyo, lakip na ang gahum nga magbalik sa Iya presensya.
Nagapamatuod ako sa inyo sang kalipay nga nagaabot sa pagkanta sang “ambahanon sang nagatubos nga gugma” kag “wala katapusan nga nalikupan sa mga butkon sang iya gugma.” Sa sagrado nga ngalan ni Jesucristo, amen.