“Magbalik sa Akon … Agud nga Mapaayo Ko Kamo”

Nakaistar kami anay sa isa ka puluy-an nga napalibutan sing matahum nga mga kahoy. Sa tupad sang entrada may isa ka matahum nga kahoy nga willow. Isa ka masubo nga gab-i may mabaskog nga bagyo, kag ang willow natumba. Nagahigda ini sa duta nga nalukat ang mga gamot kag nanugunan gid ko.

Nagahanda na ako nga paandaron ang de-makina nga lagari kag utdon ang kahoy para igatong sang nagdalagan sa akon ang amon kaingod para punggan ako. Ginsaway niya ako kay daw wala na pulos ang kahoy sa akon kag ginlaygayan kami nga indi ini pag-utdon. Gintudlo niya ang isa ka gamot nga naungot pa sa duta kag nagsiling nga kon itanom namon kag tukuran ang kahoy, utdon ang mga sanga, kag saguron ini, manguyapot liwat ang mga gamot sini.

Nagduhaduha ako kon paano ang isa ka kahoy nga natumba na kag may diperensya posible pa nga mabuhi liwat. Nagrason ako nga bisan pa nga magtubo ini liwat, sigurado nga matumba ini liwat sa magaabot naman nga bagyo. Pero kay kahibalo ako nga ang amon kaingod nagapati nga ang kahoy maumpawan pa kag matubo liwat, gani nagpasugot kami.

Kag ang resulta? Pagligad sang panahon, nakita namon nga daw mabuhi ang kahoy kay nagsugod ini nga manggamot. Karon, 12 ka tuig na ang nagligad, nagdabong ang kahoy kag nagtin-ad, nga may mabakod nga mga gamot, kag ginpatahum sini liwat ang palibot.

Samtang nagapakigkita ako sa mga Santos sa bilog nga kalibutan, madumduman ko ining kahoy nga willow nga may paglaum gihapon bisan pa nga daw wala na sing mahimo pa. Ang iban may ara sang mga testimonya sang ebanghelyo nga mabakod kag matin-ad pareho sang willow. Dayon, tungod sa personal nga mga rason, yadtong mga testimonya nagluya, nga nagresulta sa pagkadula sang pagtuo. Ang iban naman nagapanghawid sa pinakagamay nga mga gamot nga nagaungot sa duta sang ebanghelyo.

Apang liwat-liwat nga nainspirar ako sang mga istorya sinang madamo kaayo nga nagpili nga ipadayon ang ila pagkadisipulo kag magbalik sa ila puluy-an nga Simbahan. Imbes nga isikway ang ila pagtuo kag pagpati pareho sa wala pulos nga inuggatong, ginbaton nila ang espiritwal nga mga pagpabatyag kag mapinalanggaon nga mga pangagda nga magbalik.

Nagtambong ako sa isa ka komperensya sang stake sa Korea sa diin ang isa ka nagbalik nga miyembro nagsiling: “Nagapasalamat ako sa mga brother sa ila kahanda sa pagbaton sang akon kakulang sa pagtuo kag akon kahuyang, sa pagbulig sa akon, kag sa mga miyembro nga pirme maayo sa akon. Madamo pa ako sang mga abyan nga indi gawa aktibo. Makahalam-ot kay gatudlanay sila nga magbalik sa Simbahan agud magbalik ang ila pagtuo. Siguro tanan sila nagahandum sang pagtuo.”

Sa tanan nga nagahandum sang pagtuo, ginaagda kamo namon nga magbalik. Ginapromisa ko nga magabakod ang inyo pagtuo kon magsimba kamo liwat upod sang mga Santos.

Isa anay ka misyonero halin sa Africa nagsulat sa senior nga lider sang Simbahan, nga nagapangayo sing pasaylo kay naakig sia sang iya mga panudlo parte sa pat-od nga kultural nga tradisyon, rason nga naghalin sia sa Simbahan. Mapainubuson niya nga ginsiling: “Masubo nga tungod nasaklaw ako nagligad nga 15 ka tuig, nagdangat ini sa akon malubha nga pag-antos. Dako gid ang nadula sa akon—masobra pa sangsa akon ginhunahuna. Nahuya gid ako sa halit nga posible nahimo ko tungod sini, apang labaw sa tanan nalipay ako nga nakabalik ako.”

Sa tanan nga nakahibalo kon ano ang nadula sa inyo, ginaagda kamo namon nga magbalik agud matilawan ninyo liwat ang makalilipay nga bunga sang ebanghelyo.

Isa ka sister sa Estados Unidos nadula sa Simbahan madamo na nga tinuig. Ang iya istorya sang pagbalik nagalakip sing gamhanan nga mga leksyon para sa mga ginikanan kag mga miyembro sang pamilya nga nagaantos tungod sa mga pinalangga nila nga nagpalayo sa Simbahan. Iya ginsulat:

“Malista ko ang madamo nga rason kon ngaa nagpalayo ako sa Simbahan, sa ebanghelyo, kag halos man sa akon pamilya. Pero indi na ini importante. Wala ako naghimo sing isa lang ka dako nga desisyon sa paghalin sa Simbahan—ayhan naghimo ako sing linibo ka desisyon. Pero isa lang ka butang nga nabal-an ko gid, ang akon mga ginikanan naghimo sing isa ka dako nga desisyon, kag gintindugan nila ini. Nagdesisyon sila nga palanggaon ako.

“Wala ako kabalo kon pila na ka luha ang nagtulo, pila na ka gab-i nga wala sing tinulugan, ukon pila na ka pagpakitluoy sa pangamuyo ang ginhimo para sa akon. Wala nila ko ginsukmatan sa akon mga sala; kundi, ginbuligan nila ako bisan nagapakasala ako. Wala nila ginpabatyag sa akon nga wala ako ginabaton sa ila balay kag sa mga pagtipon-tipon sang pamilya; inang mga balatyagon akon hinimoan. Pero, padayon nila ako nga ginaabi-abi. Ayhan nakita nila ang akon kasanag nga nagpiraw na sang ulihi. Apang nakahibalo sila nga kon ano ako sadto landong lamang sang mangin ano ako sa ulihi.

“Pareho nga ang akon dalanon nga layo sa Simbahan nangin komplikado, amo man ini sa akon pagbalik. Pero isa ka butang nga indi mabudlay sa pagbalik amo ang balatyagon nga nakapauli na ako kon diin ako dapat.”

Ang akon mensahe subong ilabi na para sa tanan nga nakabatyag sadto sang Espiritu pero nagaduhaduha kon makabalik pa ukon may lugar pa para sa inyo sa ginpanumbalik nga Simbahan ni Jesucristo. Ini para man sa bisan sin-o nga halos indi na makapadayon ukon mga natentar nga maghalin sa Simbahan.

Ining mensahe indi isa ka hangkat, kag indi ini pagkondenar. Isa ini ka pangagda, nga ginapalab-ot nga may gugma kag sinsero nga handum nga abi-abihon kamo sa inyo pagbalik sa inyo espiritwal nga puluy-an.

Ginpangamuyo ko nga mabatyagan ninyo ang pagpamatuod sang Balaan nga Espiritu sa inyo pagpamati sining mapinalanggaon nga pangagda kag matahum nga promisa halin sa aton Manluluwas, nga si Jesucristo:

“Indi bala kamo subong magbalik sa akon, kag maghinulsol sang inyo mga sala, kag mahaylo, agud nga mapaayo ko kamo?”

Kada semana madamo ang nagasabat sa pangagda sang Manluluwas paagi sa pagbalik sa pagkadisipulo kag pagkaaktibo sa Simbahan, nga mahipos kag mapainubuson nga ginapangayo ang pag-ayo nga ginapromisa ni Jesus. Kag kabaliskaran sa mga sugilanon nga nagalibot kon kaisa, ang rekord nagapakita sang kadamuon sang aton mga pamatan-on nga ginapili ang magpabilin nga mabakod kag patubuon ang ila pagtuo kay Jesucristo.

Sang ang pila sa mga sumulunod ni Jesus sa Capernaum nabudlayan sang Iya mga panudlo kag naghalin, gintulok Niya ang Iya mga Apostoles kag namangkot, “Buot man bala kamo maghalin?”

Amo ining pamangkot nga dapat sabton sang kada isa sa aton kon nagaatubang kita sang aton tinion sang pagtilaw. Ang sabat ni Pedro kay Jesus wala nagalubad kag mabaskog: “Kay sin-o bala kami makadto? ikaw may mga pulong sang kabuhi nga walay katapusan.”

Sa inyo pagbinagbinag sang pangagda sang Manluluwas nga magbalik sa Iya, ano ang inyo matun-an sa istorya parte sa kahoy nga willow?

1. Ang alagyan pabalik masami nga indi mahapos ukon komportable, pero indi gid kamo maghinulsol. Sang ginpatindog liwat ang amon willow, ang tanan nga sanga sini ginpang-utod. Indi ini nami tan-awon. Kita man mahimo magluya kon isikway naton ang aton daan nga pangginawi kag mahuksan sang bugal. Ang pagtutok sang inyo pagtuo kay Jesucristo kag sa Iya ebanghelyo—ang kahoy kag ang mga gamot—magahatag sa inyo sing paglaum kag sing kaisog nga maghimo sinang una nga tikang pabalik.

2. Tinuig pa kag nagbalik ang kabakod kag katahum sadto sang amon willow. Karon mas mabakod kag mas matahum pa gani ini sangsa sang una. Maghulat samtang nagatubo man ang inyo pagtuo kag testimonya. Nagalakip ini sang indi pagpangakig sa wala pasunaid nga mga komento pareho sang “Diin ka halin ngaa lawig ka man nadula?”

3. Wala gid kuntani nabuhi ang willow kon wala sing dalayon nga pag-atipan kag pagsagod. Masagod ninyo ang inyo pagtuo kag inyo testimonya kon mag-ambit kamo sang sakramento kada semana kag kon magsimba kamo sa balay sang Ginuo.

4. Pareho nga ang willow nagkinahanglan sang silak sang adlaw para sa mga sanga kag mga dahon sini agud magtubo liwat, amo man ang inyo testimonya nga magatubo kon mangin sensitibo kamo sa mga pagpabatyag kag sa pagpamatuod sang Espiritu. Magtuon kay Amulek, nga naglaragway sang iya tion bilang di-gawa aktibo nga miyembro sa pagsiling, “Gintawag ako sa madamo nga beses kag indi ako mamati.”

5. Ang akon kaingod nakahibalo kon mangin ano ang willow sa liwat. Nakahibalo man ang Ginuo sang inyo diosnon nga potensyal kag kon mangin ano ang inyo pagtuo kag inyo testimonya. Indi gid Sia magpangampo sa inyo. Paagi sa Pagbayad-sala ni Jesucristo, ang tanan nga napaslawan mahimo mapaayo.

Nagapamatuod ako nga nagasinadya sa langit sa mga nagabalalik. Ginakinahanglan kamo, kag ginapalangga kamo. Nagapamatuod ako nga si Jesucristo aton Manluluwas kag bugayan Niya ang tanan nga magbalik sa Iya sing mas dako nga paghidaet kag sing dako nga kalipay. Ang iya mga butkon sang kaluoy wala nakakursimano kundi bukas ini kag nagalab-ot sa inyo. Indi pa ulihi agud makabalik kamo. Ginaabi-abi namon kamo sa inyo pagbalik nga may bug-os nga pagpalangga sa amon mga tagipusuon. Sa ngalan ni Jesucristo, amen.