Ang Pagpalangga Ko sa Manluluwas Ang Akon “Rason”

Nakapiyar bala kamo nga ang aton mahal nga propeta, si Pangulong Russell M. Nelson, pirme may ginahatag nga imbitasyon sa aton? Sa ginapaabot, gin-imbitar niya kita nga tun-an kag binagbinagon ang mga mensahe nga ginhatag sa nagliligad nga duha ka komperensya. Sang Abril 2024, nagsiling sia, “Ginalauman ko nga sulit-sulit ninyo nga tun-an ang mga mensahe sini nga komperensya sa palaabuton nga binulan.” Dayon, sang Oktobre 2024, nagsiling sia, “Ginahangyo ko kamo nga tun-an ang mga mensahe sang [mga manughambal]. Gamita ang mga ini bilang litmus test [pag-testing] kon ano ang matuod kag kon ano ang indi sa masunod nga anom ka bulan.”

Ining mga imbitasyon pwede idugang sa mga pangagda sang mga propeta nga aton nabaton sa bilog naton nga kabuhi, lakip kag ilabi na inang mga nabaton naton sang sining nagliligad lang nga tinuig. Mahimo nga magbatyag ukon manumdum kita nga ining mga imbitasyon dugang pa sa listahan sang aton mga dapat himuon tungod lang nga gin-agda kita ukon ginpangabay nga obrahon ini. Pero may ara ayhan nga mas importante sa sini?

Sa pagbinagbinag sini kag sang iban pa nga imbitasyon nga aton nabaton, madumduman ko ang isa ka butang nga natun-an ko kag gindesidihan madugay na. Ginatinguhaan ko nga himuon ining mga butang nga importante sa akon tungod palangga ko Sia; palangga ko ang aton Manluluwas. Ini ang pinakatunay kag pinakabaskog nga rason kon ngaa ginahimo ko ang akon ginahimo, kag dayon angot sa sini ang akon pagpalangga sa inyo, akon mga kauturan.

Bilang inyo utod, nagalaum ako nga kabigon ninyo ang akon mga pulong bilang sinsero nga pangagda nga tinguhaan nga hangpon ang oportunidad nga iangot ang tanan nga aton ginahimo sa aton pagpalangga sa Manluluwas.

Ang paghimo sini magabulig sa aton nga maintiendihan ang matuod nga “rason” sa tanan nga aton ginahimo bilang mga disipulo sang Manluluwas. Magabulig ini sa aton nga pabakuron ang aton kaangtanan sang kasugtanan sa Dios, hangpon ang Iya diosnon kag wala katapusan nga mga kamatuoran—Iya wala katapusan kag bug-os nga kamatuoran nga indi gid magbaylo. Wala katapusan nga mga kamatuoran pareho sang “Kay ginhigugma gid sang Dios ang kalibutan sa bagay nga ginhatag niya ang iya bugtong nga Anak, agud nga ang tagsatagsa nga nagatuo sa iya indi na mapatay, kundi may kabuhi nga wala sing katapusan.”

Interesante nga kon kis-a tungod liwat-liwat naton nga ginahimo ang mga butang sa bagay nga nangin tradisyon na ang mga ini, ginatugotan naton ining mga tradisyon ukon mga aktibidades nga diktahan ang aton mga pagtinguha nga pabakuron ang pagtuo kay Jesucristo. Daw ginahimo naton ining mga butang tungod nahimo na naton ang mga ini sa madamo nga tinuig, nga wala na ginapanumdum ang ila epekto sa aton kaangtanan sang kasugtanan sa Manluluwas.

Sa aton sosyedad, masami nagatutok kita sa kon ano ang aton ginahimo kag sa dalayon nga pagkumpleto sang mga hilimuon kag mga lalab-uton. Sa espirituhanon nga bahin, may kahigayonan kita nga lampasan ang paghimo lang sang mga buluhaton ukon paglab-ot sang mga katuyoan paagi sa pag-intiendi kon ngaa ginahimo naton ang mga ini. Kon mahangpan naton kag maangot nga ang rason sang aton mga aksyon may labot sa aton pagpalangga sa Manluluwas kag sa aton Amay nga Langitnon, paagi sa paghingalit sining mga oportunidad, mahangpan naton nga bisan pa ang paghimo sang matarong nga mga butang pareho sang pagpatigayon sang mga aktibidades ukon mga tradisyon sa Simbahan kag husto nga paghimo sini maayo, kon ikonekta naton ang mga ini sa kon “ngaa,” mabugayan kita nga maintiendihan ang rason. Indi lang ini paghimo sang maayo ukon paghimo sini sang husto; himuon man naton ini sa husto nga rason.

Halimbawa, kon naghimo kamo sang lalab-uton nga magbasa sang balaan nga kasulatan, mangamuyo sing sinsero, ukon maghanda sang aktibidades para sa inyo pamilya ukon ward, ang matuod-tuod bala nga lalab-uton amo lang ang pagtuman sining mga hilikuton? Ukon ining mga buluhaton bala amo ang paagi, ang kagamitan nga pwede ninyo usaron, agud matigayon ang matuod nga lalab-uton? Ang katuyoan bala para lang maghiwat sang aktibidades tungod nahimo na naton ini sa madamo nga tinuig kag dayon tsekan ang kahon nga nakumpleto na naton ini? Ukon, sa liwat, mga paagi bala ini nga aton gamiton para magtuon, mabatyagan, kag makig-angot sa Manluluwas?

Palihog indi paghangpa sing sayop ang akon punto parte sa pagpatigayon sang mga aktibidades kag mga tradisyon ukon pagpahamtang sang mga lalab-uton kag pagtinguha nga matuman ang mga ini; wala sang malain diri. Pero, ginaagda ko kamo nga buksan ang inyo mga tagipusuon kag kaisipan sa oportunidad kag bugay nga hangpon kon ngaa ginahimo naton ining mga butang kag kon paano naton ginapangabuhi ang aton pagtuo.

Isa ka panguna nga halimbawa sang nasentro-kay-Cristo nga mga tradisyon amo ang hangkat nga ginhatag sa aton tanan ni Pangulong Dallin H. Oaks para sa Unang Pangulohan. Si Pangulong Oaks nagsiling, “Sa pagsugod naton sining bag-o nga tuig, maghanda kita sa Easter nga selebrasyon sang nagabayad-sala nga sakripisyo ni Jesucristo. … Bisan ano pa man ang ginapatihan ukon ginahimo sang iban, dapat naton i-selebrar ang Pagkabanhaw sang aton buhi nga Manluluwas paagi sa pagtuon sang Iya mga panudlo kag pagbulig pahamtang sang mga tradisyon sa Easter sa aton sosyedad sa kabilogan, ilabi na gid sa aton mga pamilya.” Sa makita ninyo, indi lang ini imbitasyon nga magpahamtang sang mga tradisyon. Kundi, ginagamit naton ining mga tradisyon bilang paagi nga magtuon pa gid parte sa Manluluwas kag dumdumon ang Iya Pagkabanhaw.

Kon mas ginakonekta naton ang rason sa aton pagpalangga sa Manluluwas, mas labi nga mabaton naton ang aton ginakinahanglan ukon ginapangita. Si Pangulong Russell M. Nelson nagsiling, “Bisan ano pa ang imo pamangkot ukon problema, ang sabat makita gid pirme sa kabuhi kag pinanudlo ni Jesucristo.” Kag dayon gintanyag niya ining imbitasyon: “Magtuon pa gid parte sa Iya Pagbayad-Sala, Iya gugma, Iya kaluoy, Iya doktrina, kag Iya ginpanumbalik nga ebanghelyo sang pagpang-ayo kag pag-uswag. Magdangop sa Iya! “Sunda Sia!”

Binagbinaga ini sa inyo mga tagipusuon kag mga kaisipan: Nagapati bala kamo nga ang tuyo sang imbitasyon ni Pangulong Nelson amo nga buligan kita nga maghimo sang listahan para magtipon kita sang dugang nga kaalam kag kumpletohon ang mga buluhaton para mamarkahan naton nga human na ang iya imbitasyon sa aton listahan sang mga dapat himuon? Ukon ginaagda bala niya kita nga kabigon ang mga aspeto sining wala katapusan nga mga kamatuoran kag mga prinsipyo bilang oportunidad nga hangpon ang rason kag iangot ang gugma sa kasugtanan sang Manluluwas para sa aton sa bilog-kabuhi naton nga pagpanglakaton sa pagkadisipulo?

Tugoti ako nga ipakita ang prinsipyo nga ginatinguhaan ko nga ipabutyag. Isa ka opsyon, nga siguro sobra-sobra, amo ang ubuson dayon basa ang tanan nga mensahe sa pangkabilogan nga komperensya, kag kon tapos ko na, tsekan ko ining imbitasyon sa akon listahan sang dapat himuon nga wala sang kon ano nga obrahon sa akon ginbasa. Naintiendihan ko nga indi ini kinaandan nga kaso, pero posible gid ini. Siguro, madamo sa aton ang ara sa punto nga sa tunga-tunga sini kag sang nagakadapat.

Ang imbitasyon amo nga tun-an kag binagbinagon ang mga mensahe sa pangkabilogan nga komperensya kag gamiton ang mga ini agud hibaluon kag hangpon ang kon ano ang dapat nga mas kay-ohon sang tagsa sa aton.

Kon batunon naton ang imbitasyon, nga ginaintiendi ang “katuyoan” sini, mas magadamo ang aton oportunidad nga maglapit pa gid sa Manluluwas. Masugdan naton nga maintiendihan nga tungod palangga ko ang Manluluwas, gusto ko nga makahibalo pa gid parte sa Iya paagi sa pagtuon sang mga pulong sang buhi nga mga propeta. Kag tungod palangga ko ang akon isigkatawo, ipaambit ko ang mga panudlo sang mga propeta, mga manugtulok, kag manugpahayag sang rebelasyon sa iban, sumugod sa akon mga pinalangga.

Sa duha ka halimbawa, ginahimo ninyo ang matarong. Sa isa, ang lalab-uton daw nagagamit sang paagi nga ginhatag sang Amay nga Langitnon kag sang Manluluwas, nga amo ang mga mensahe nga ginpaambit sa pangkabilogan nga komperensya. Ang ika-duha nga bersyon nagalakip sang daku nga bugay sa paghibalo sang basehan nga mga rason, nga nagahatag sang paagi nga maintiendihan ang wala katapusan nga mga kamatuoran kag mga bugay nga ginpromisa sa tanan nga nagahimo sang mga panudlo kag kabuhi sang aton Manluluwas nga si Jesucristo, nga sentro sang ila mga kabuhi.

Mahal ko nga kauturan, nagalaum ako nga mabatyagan kag makita ninyo ang importansya sang pagkonekta sang aton mga aksyon sa aton pagpalangga sa Manluluwas. Sa kalibutan nga ang tanan nagainangot, madamo nga tingug ang matinguha nga impluwensiyahan kamo kag, kon posible, papatihon nga ang pila ka panguna nga mga kamatuoran sang ginpanumbalik nga ebanghelyo ni Jesucristo indi kinahanglanon. Ining mga tingug magaumpisa sa importante nga kamatuoran sang kakinahanglanon sang pagpanumbalik sa sining katapusan nga mga adlaw, lakip na ang kakinahanglanon sang ginharian sang Dios sa duta, nga ginarepresentar sang ginapanumbalik nga Simbahan ni Jesucristo sang mga Santos sa Ulihing mga Adlaw.

Mahimo nga makabati kamo sang mga tingug nga nagainsister nga bastante na ang personal lang nga relasyon ukon pag-intiendi sa Manluluwas kag nga ang relihiyon ukon ang ginpanumbalik nga Simbahan indi kinahanglanon ukon indi importante. Ginaimbitar ko kamo nga mangin mahinay sa paghunahuna ukon bisan pa gani indi magpaimpluwensya sa sinang nagapatalang nga mga ideya kag mangin maabtik sa pagdumdum kon ano ang ginahambal kag ginatudlo sang Manluluwas halin pa sang dumaan nga panahon—sumugod sa gugma sang Amay nga Langitnon kag ni Jesucristo para sa aton kag iangot ang aton gugma para sa Ila bilang ang rason nga sundon Sila.

Ang Dios nga Amay kag ang Iya Anak nagkari kag nakighambal kay Joseph Smith agud ipanumbalik ang Simbahan ni Jesucristo kag agud sugdan ang dispensasyon sang kabug-osan sang panahon, ang Iya ginharian sa duta. Gani, Ang Simbahan ni Jesucristo sang mga Santos sa Ulihing mga Adlaw amo ang paagi nga ginpahamtang sang Amay nga Langitnon para matigayon ang mga kasugtanan nga nagabulig sa aton nga magbalik pauli. Gani, kinahanglan naton indi lang ang personal nga relasyon sa Amay nga Langitnon kag Iya Anak; kinahanglan man naton ang mga ordinansa sang priesthood nga paagi sa mga ini nagahimo kita sang kasugtanan sa Ila. Nagahatag ini sang kaangtanan sa kasugtanan upod sa Ila kag nagapatigayon sa aton sang Ila gugma sang kasugtanan, nga nagahimo nga posible nga malab-ot naton ang pinakamataas nga ginharian sang himaya nga ginhanda para sa mga tampad kag matutum sa ila mga kasugtanan.

Sa bilog nga ikasarang sang akon kalag, nagapamatuod ako sa kamatuoran kag pagkadiosnon sang aton Manluluwas nga si Jesucristo. Palangga Niya kamo. Nakahibalo Sia kon ano ang nagakatabo sa inyo kabuhi. Ang Iya mga butkon bukas, nga nagatanyag sang imbitasyon, “Kari sa akon, … kag papahuwayon ko kamo.”

Palangga ko ang Manluluwas, kag ang akon pagpalangga sa Iya ang akon “rason.” Sa ngalan ni Jesucristo, amen.