Espirituhanon nga Nahimpit sa Iya

Ang napulo ka aruon nagsinggit sa Manluluwas, “Kaluoyi kami.” Kag ginhimo ni Jesus. Ginhambalan Niya sila nga ipakita ang ila kaugalingon sa pari kag, sang nagalakat sila, nag-ayo sila.

Kag ang isa sa ila, sang nakita niya nga nag-ayo sia, naghimaya sa Dios sa mabaskog nga tingug. Nagbalik sia sa Manluluwas, naghapa sa iya tiilan kag nagpasalamat.

Kag ang Manluluwas nagsiling sa tawo nga mapasalamaton, “Ang imo pagtuo nag-ayo sa imo.”

Gin-ayo ni Jesucristo ang napulo ka aruon. Pero ang isa, nga nagbalik sa Manluluwas, nakabaton sing dugang pa. Ginhimpit sia sa espirituhanon.

Ang siyam ka aruon naayo sa pisikal.

Ang isa naayo sa pisikal kag nahimpit sa espirituhanon.

Sa pagbinagbinag sining istorya, ginhunahuna ko kon matuod ang baliskad sini. Kon indi pareho ang pag-ayo kag pagkahimpit, pwede bala Niya mahimpit ang isa ka tawo, pero wala pa naayo sa pisikal kag emosyonal?

Ang Dakong Manugbulong magaayo sang tanan naton nga kasakit—pisikal kag emosyonal—sa Iya tion. Pero sa paghulat nga mag-ayo, pwede bala mahimpit ang isa ka tawo?

Ano ayhan ang buot silingon sang mahimpit sa espirituhanon?

Himpit kita kay Jesucristo kon ginagamit naton ang aton kahilwayan sa pagpili nga sundon Sia nga may pagtuo, itugyan ang aton mga tagipusuon sa Iya agud mabag-o niya ini, tumanon ang Iya mga kasugoan, kag magsulod sa kaangtanan sang kasugtanan sa Iya, nga mapainubuson nga nagapadayon kag nagatuon halin sa mga kabudlayan sining dutan-on nga kahimtangan hasta nga makabalik kita sa Iya presensya kag mapaayo sa tanan nga aspeto. Mahimo ako mahimpit, samtang nagahulat sang pag-ayo, kon sinsero ako sa akon relasyon sa Iya.

Ang pagtuo kay Jesucristo nagaresulta sa paglaum. Masalapoan ko ang paglaum sa pagtinguha nga mahimpit—kahimpit nga bunga sang pagtuo kay Jesucristo. Ang pagtuo sa iya nagadugang sang akon paglaum sa pag-ayo, kag inang paglaum nagapabakod sang akon pagtuo kay Jesucristo. Gamhanan ini nga siklo.

Ginhambalan sang Ginuo si Enos nga ang iya pagtuo “nagpa-ayo sa iya.” Ang kahimpit nag-abot sang ginpanumdum ni Enos ang mga pulong sang iya propeta nga amay nga si Jacob, sang naghandum sia nga mahangpan ang oportunidad para sa kabuhi nga wala katapusan, sang nagpakitluoy sia sa Dios sa hugot nga pangamuyo. Sa sinang kahimtangan sang handum kag pagpaubos, ang tingug sang Ginuo naghambal sa iya nga ang iya mga sala napatawad. Kag ginpamangkot ni Enos ang Ginuo, “Paano ini nahimo?” Kag nagsabat ang Ginuo, “Tungod sang imo pagtuo kay Cristo, … ang imo pagtuo ang nagpaayo sa imo.”

Paagi sa aton pagtuo kay Jesucristo, mahimo kita magtinguha nga mangin himpit sa espirituhanon samtang nagahulat kag nagalaum kita sang pisikal kag emosyonal nga pag-ayo.

Paagi sa Iya nagabayad-sala nga sakripisyo, kag kon sinsero kita nga nagahinulsol, ginapaayo kita sang Manluluwas halin sa sala, pareho sang Iya ginhimo kay Enos. Ginasakop sang Iya wala dulonan nga Pagbayad-Sala ang aton mga kalisod kag mga kasubo.

Pero mahimo nga indi Sia maghatag sang pag-ayo sa mga masakit kag balatian—nagabalik-balik nga sakit, autoimmune nga mga balatian pareho sang multiple sclerosis, cancer, anxiety, depresyon, kag iban pa. Ina nga klase sang pag-ayo nagakatabo suno sa plano sang Ginuo. Kag samtang wala pa, makapili kita nga mahimpit sa espirituhanon paagi sa paggamit sang aton pagtuo sa Iya!

Ang mahimpit nagakahulugan nga mangin kumpleto kag puno. Pareho sa lima ka maalam nga dalaga nga puno ang ila mga suga sang lana pag-abot sang nobyo, mahimo kita nga mahimpit kay Jesucristo kon pun-on naton ang aton mga suga sang nagasustiner nga lana sang pagbag-o (conversion) padulong sa Iya. Sa sina nga paagi, handa kita sa simboliko nga panyapon sa kasal, ang Iya Ika-duha nga Pagkari.

Sa paanggid, tanan sang napulo ka dalaga ara sa husto nga lugar, nga nagahulat sa nobyo. Ang kada isa may suga.

Pero pag-abot Niya, wala ginapaabot nga sa tungang-gab-i, ang lima nga indi maalam kulang ang lana sa ila mga suga. Wala sila ginlaragway nga malain, kundi bilang indi maalam. Ang mga indi maalam wala nakahanda sing husto para padayon nga mapasiga ang ila mga suga gamit ang lana sang pagbag-o.

Kag gani, bilang sabat sa ila pangabay nga tugotan nga magsulod sa panyapon sa kasal, ang nobyo nagsabat nga wala sila kakilala sa Iya.

Ini nagapahangop, nga ang lima ka maalam nga dalaga nakakilala gid sa Iya. Himpit sila sa Iya.

Ang ila mga suga puno sang malahalon nga lana sang pagbag-o nga nagtugot sining maalam nga mga dalaga nga magsulod sa punsyon sa kasal sa tuo nayon sang nobyo.

Sa ginpahayag sang Manluluwas, “Mangin tampad kag magpangamuyo pirme, kag ihanda ang inyo mga suga nga nagasiga, kag lana nga dala ninyo agud nga mangin handa kamo sa pagkari sang Nobyo.”

Five Wise Virgins [Lima ka Maalam nga Dalaga], ni Ben Hammond

Isa ka matahum nga iskultura nga nagapakita sang five wise virgins [lima ka maalam nga dalaga] ginpahamtang sang sini lang sa Temple Square sa gwa gid sang pwertahan sang Relief Society Building kag malapit lang sa Salt Lake Temple.

Bagay gid ini nga lugar para ipakita ang leksyon sang paanggid. Tungod kay kon maghimo kita kag magtuman sang mga kasugtanan, labi na gid inang mga matigayon sa balay sang Ginuo, mapuno naton ang aton mga suga sang lana sang pagbag-o.

Bisan nga ang mga babayi nga ginarepresentar sang lima ka maalam nga dalaga wala nagpanghatag sang ila lana sang pagbag-o, ginpaambit nila ang ila kasanag sa pagpataas sang ila suga nga puno sang lana kag masanag nga nagasiga. Talalupangdon nga ginapakita sila nga nagasuporta sa isa kag isa—updanay, nagaagbayanay, nagatulokay kag ginapaypay ang iban nga magkadto sa kasanag.

Matuod gid, “[kita] ang suga sang kalibutan.” Ang Manluluwas nagsiling:

“Ginahatag ko sa inyo nga mangin suga sining katawhan. Ang isa ka siyudad nga nahamtang sa isa ka bungyod indi malipdan.

“…Nagasindi [bala kita] sang kandila kag ibutang man lang ini sa idalom sang sulokban? Wala, kundi sa ibabaw sang isa ka tulongtungan; kag ini nagahatag sing kasanag sa tanan nga yara sa sulod sang balay;

“Gani pasigaha ang inyo suga sa atubang sining katawhan agud makita nila ang inyo maayo nga mga buhat kag himayaon ang inyo Amay [nga yara] sa langit.”

Ginasugo kita nga ipakigbahin ang Iya kasanag. Gani tipigi nga puno ang inyo suga sang lana sang pagbag-o kay Jesucristo kag mangin handa nga tatapon ang suga agud padayon kita nga maghimo sang mga butang nga nagapreparar kag nagapabakod sa aton sa espirituhanon. Dayon gamita inang kasanag nga mag-impluwensya sa iban. Kon ginapakigbahin naton ang aton kasanag, ginadala naton ang pagpaumpaw ni Jesucristo sa iban, ang aton pagbag-o padulong sa Iya nagadalom, kag mahimo kita nga mahimpit samtang nagahulat sang pag-ayo. Kon ginapasiga naton sing masanag ang aton suga, mahimo kita mangin malipayon bisan samtang nagahulat.

Isa ka ehemplo sa balaan nga kasulatan ang mapuslanon sa pagpabakod sang prinsipyo nga sarang kita mahimpit kon magbag-o kita padulong kay Jesucristo kag magkuha sang kusog sa Iya, bisan samtang nagahulat kita sang pag-ayo.

Si Apostoles Pablo may ginabatyag—ang iya gintawag nga “tunok sa unod,” nga katatlo niya ginpangabay sa Ginuo nga kakason. Ang Ginuo nagsiling kay Pablo, “Ang akon [grasya] tuman sa imo, kay ang akon gahum ginahimpit sa kaluyahon.” Nga sa sini si Pablo nagsabat:

“Sa labing dako nga kalipay … magapabugal ako sa akon mga kaluyahon, agud nga ang gahum ni Cristo magpabilin sa akon.

“Nagakalipay ako sa mga kaluyahon, … sa mga kasakitan, tungod kay Cristo; kay kon maluya ako, niyan gamhanan ako.”

Ang ehemplo ni Pablo nagapakita nga bisan sa aton kaluyahon, ang aton kusog kay Jesucristo sarang mangin perpekto—buot silingon, kumpleto kag himpit. Inang mga nagapakigbato sa mga hangkat sang kabuhi, kag nagadangop sa Dios nga may pagtuo pareho kay Pablo, makabaton sang mga bugay sang pagkilala sing suod sa Dios.

Wala napaayo si Pablo sa iya masakit, pero espirituhanon sia nga nahimpit kay Jesucristo. Kag bisan sa iya pagtilaw, ang iya ehemplo kag impluwensya nga resulta sang iya pagbag-o kag kusog halin kay Jesucristo nagasiga, kag malipayon sia. Sa iya sulat sa mga Taga-Filipos nagsiling sia, “Magkalipay sa gihapon sa Ginuo; sa liwat magasiling ako, Magkalipay.”

Mga kauturan, ang sabat huo, mahimo kita nga mahimpit sa espirituhanon, bisan samtang nagahulat kita sang pisikal kag emosyonal nga pag-ayo. Ang pagkahimpit wala lang nagakahulugan sang pagpanumbalik sang pisikal kag emosyonal nga ikaayo sa sini nga kabuhi. Ang pagkahimpit resulta sang pagtuo kag pagbag-o kay Jesucristo kag sa pagtugot sang kasanag sinang pagbag-o nga magsiga.

“Madamo ang ginatawag, apang pila lamang ang [luyag nga] pilion.”

Ang tanan pisikal kag emosyonal nga magaayo sa Pagkabanhaw. Pero pilion mo bala subong nga mahimpit sa Iya?

Malipayon ko nga ginapahayag nga nagbag-o ako padulong kay Ginuong Jesucristo. Nagatinguha ako nga mahimpit sa Iya. Sigurado ako nga ang tanan nga butang mapanumbalik kag ang pag-ayo magaabot, sa Iya nga tion, tungod buhi Sia.

Si Maria Magdalena babayi nga napaayo ni Jesucristo. Kag babayi sia nga nahimpit kay Jesucristo. Bilang Iya disipulo, nagsunod sia sa Manluluwas sa bilog nga Galilea kag nag-alagad sa Iya.

Ara sia sa tiilan sang krus, saksi sa Iya kamatayon.

Nagkadto sia sa Iya lulubngan para kumpletuhon ang mga preparasyon sa lubong kag nakita nga ang takop nga bato nabuksan, kag wala na ang lawas sang Ginuo. Si Maria ara sa lulubngan nga nagahibi sang ginpamangkot sia, una sang mga anghel kag dayon sang Manluluwas Mismo, “Babayi, ngaa bala nagahibi ka? Sin-o ang imo ginapangita?”

si Maria nagsabat, “Bangud nga ginkuha nila ang akon Ginuo, kag wala ako makahibalo kon diin ginpahamtang sia nila.”

Malulo sia nga gintawag ni Jesus sa iya ngalan, “Maria.” Kag nakilala niya Sia kag matinahuron nga nagsabat, “Rabboni … Manunudlo.”

Nga nagapropesiya parte sa Manluluwas, si Isaias nagsiling: “Ginlamon niya sing dayon ang kamatayon, kag pahiran sang Ginuong Dios ang luha sang tanan nilang nawong.”

Ang Iya Pagkabanhaw nagtugot nga ang kalisod kag kasubo ni Maria madula. Pat-od gid nga dulaon man Niya ang inyo.

Si Maria ang una nga saksi sang nabanhaw nga Manluluwas. Kag sia ang una nga nagsaksi sa iban kon ano ang iya nakita.

Mapainubuson ko nga ginadugang ang akon panaksihon sa iya ni Maria. Nabanhaw Sia. Si Jesucristo buhi. Sa ulihi, ang tanan pisikal kag emosyonal nga magaayo, sa Iya. Kag sa paghulat sinang pag-ayo, ang pagtuo sa Dakong Manugbulong magahimpit sa aton sa espirituhanon. Sa ngalan ni Jesucristo, amen.