Sa Atubang Mismo sang Aton mga Mata

Mga kauturan, nagapasalamat gid ako nga makaupod kamo. Palangga namon kamo, nagapasalamat kami tungod sa inyo, kag ginabugayan kami sang inyo mga pangamuyo.

Hambal ni Pangulong Russell M. Nelson sang nagligad naton nga komperensya: “Nakita bala ninyo ang nagakatabo sa atubang mismo sang aton mga mata? Ginapangamuyo ko nga indi naton pag-ibalewala ang pagkahalangdon sini nga tion! Ginapadali na gid sang Ginuo ang Iya buluhaton.”

Pagpadasig sang Iya buluhaton. Ang “pagpadasig” isa ka tinaga nga may importansya. Nagakahulugan ini nga maggiho sing madasig, nagaabante, kag mas nagadali. Sa pagtubo sa Simbahan kag sa plano ni Cristo, nagakatabo ang pagpadasig. Kag tanan kita may bahin diri.

Sang Abril 1834 sa Kirtland, Ohio, gintipon ni Propetang Joseph Smith ang tanan nga nagakapot sang priesthood sa isa ka gamay nga eskwelahan nga mga 14 ka tapak (4.3 m) kuwadrado ang kadakuon. Makaigo ang dinosena sina nga mga eskwelahan sa sining Conference Center, kay maligwa pa. Siling ni Joseph Smith, “Pila lang kabilog ang Priesthood nga nakita ninyo sini nga gab-i, pero pun-on sining Simbahan ang Norte kag Sur nga Amerika—pun-on sini ang kalibutan.”

Ina nga propesiya nagakatuman “sa atubang mismo sang aton mga mata.” Ang Simbahan ni Jesucristo sang mga Santos sa Ulihing mga Adlaw nagadako sa miyembro kag mga pamilya, mga misyon kag misyonero, mga meetinghouse kag templo, kag sa enrolment sa aton mga seminary, institute, kag mga unibersidad sa bilog nga kalibutan.

Nagapasalamat kita nga ari kita sa duta sang nagadako ang Simbahan sa numero kag impluwensya, pero mas importante sa mga tagipusuon kag kabuhi sang mga miyembro sini. Ginakilala kita bilang mga disipulo ni Jesucristo. Ginapakigbahin naton ang aton mga testimonya parte sa Iya, sa Iya Simbahan, sa Iya pamaagi, kag sa Iya dalan sang kasugtanan. Iya kita katawhan, kag Sia ang aton Manluluwas.

Nagadayaw ako sa ginatawag ni Pangulong Nelson nga “pagkahalangdon sini nga tion” kag nagapahayag sang dako nga pagpasalamat sa Ginuo sa Iya buluhaton. Ginapaisog ko nga kita tanan magpanindugan bilang Iya mga disipulo, mga saksi sa katumanan sang propesiya, nga dumaan kag moderno.

May mga nagakontra nga nagasinggit, “Ari diri kag ato didto,” pareho sa ginhimo nila sang panahon ni Propetang Joseph Smith. Pero, subong kag sa ulihi ini sila gamay lang ang epekto sa sining halangdon nga buluhaton. Tandai ang mga pulong ni Joseph Smith: “Wala sing mahigko nga kamot nga makapugong sining buluhaton sa pagsulong; mahimo nga magpangibabaw ang pagpamigos, … pero ang kamatuoran sang Dios magasulong sing mabaskog, dalayawon, kag hilway tubtob makasulod ini sa tagsa ka kontinente, makaabot sa tagsa ka lugar, makalabay sa tagsa ka pungsod, kag mabatian sang tagsa ka dulunggan tubtob nga ang mga katuyoan sang Dios matuman, kag ang Dakong Jehova magasiling ang buluhaton tapos na.”

Sa akon mga tulumanon sini nga tuig, ara gid ako nagapungko sa atubang sang Ginuo nga ginapadasig ang Iya buluhaton. Ang Simbahan nagapatindog sang mga templo sa indi matupungan nga kadasigon, nga nagahatag sa mas madamo nga miyembro sang oportunidad nga makasimba sa balay sang Ginuo. Ikaduha, ang misyonaryo nga buluhaton nagatipon sang kadamuon nga wala pa malab-ot sadto pasulod sa panong sang Maayong Manugpahalab, si Jesucristo. Kag ikatatlo, ang edukasyon sa Simbahan sa lainlain nga paagi nagalab-ot sang indi matupungan nga kadamuon sa pagtudlo sang mga “nagapangita sining Jesus.”

Sa karon ang Simbahan may 367 ka templo sa lainlain nga lebel sang pagdisenyo, konstruksyon, ukon pag-usar. Kag para sa ano nga tuyo? Ang sabat ginaproklamar sa tagsa ka templo: “Balaan sa Ginuo.” Ginabuksan sang templo ang alagyan sang pinakamataas nga mga bugay nga ginatigana sang aton Amay sa Langit sa kada isa sa aton. Mga kauturan, ginapadasig naton ang aton pagkabalaan kon nagapangabuhi kita nga angayan magsulod sa templo, samtang nagasimba kita sa balay sang Ginuo, kag samtang nagahimo kita sang mga kasugtanan upod sa Dios para sa aton kaugalingon kag para sa aton mga katigulangan sa pihak nga bahin sang kinabuhi.

Siling ni Pangulong Nelson: “Ang mga pag-atake sang kaaway madasig nga nagadugang sa kabaskugon kag klase. Ang aton kakinahanglan nga magkadto sa templo sing regular mas nagdako pa gid karon. Nagapangabay ako sa inyo nga rebyuhon ninyo sing mainampuon kon paano ninyo ginausar ang inyo oras.” Sa Iya balay mabatyagan naton ang balaan nga presensya sang Ginuo kag indi matupungan nga kalinong.

Nagligad nga tuig nakaangkon ako sang pribelihiyo nga pamunoan ang dedikasyon sang Mendoza Argentina Temple. Sa akon mensahe, ginsambit ko ang propesiya ni Elder Melvin J. Ballard sang 1926 nga ang buluhaton sang Ginuo mangin mahinay anay ang pagtubo sa South America, “pareho sang mahinay nga pagtubo sang kahoy nga oak halin sa acorn. Indi indi magsumpit sa pagtubo sa isa ka adlaw,” pero linibo ang magasulod sa Simbahan, kag ang mga nasyon sa South America mangin “gahum sa Simbahan.” Nakita ko ina nga propesiya nga natuman sa atubang mismo sang akon mga mata.

Ang Mendoza, nga sadto isa ka gamay nga acorn, nangin dako na nga oak. Ina nga pagtubo nagakatabo man sa mga kontinente kag mga isla sang kadagatan.

Makita naton nga ginapadali sang Ginuo ang Iya buluhaton sa mga misyon. Sang 2024, 80,000 ka misyonero ang nagaserbe sa 450 ka misyon. Trayntay-sais sina bag-o nga mga misyon. Nagligad nga tuig ang buluhaton sang misyonero nagdala sang 308,000 ka bag-o nga miyembro sa Simbahan. Masobra pa sa numero, ang espiritu sang pagtipon nagadala sang mga kalag kay Jesucristo kag sa Iya ebanghelyo.

Madumduman ko si Apostoles Brigham Young kag Heber C. Kimbal, nga sang 1839 naglakat bilang mga misyonero sa British Isles. Nagamasakit sila; ginbayaan nila ang ila mga pamilya nga nagamasakit kag pigado kaayo. Wala sapayan sini, nagsakay ining duha sa karosa, kag mientras makita pa ang ila mga pinalangga, nagsiling si Heber, “Magtindog kita kag papagsikon sila.” Nagakurog-kurog sila nga nagtindog kag nagsinggit, “Hurrah, hurrah para sa Israel.”

Makita ko ang pareho nga kapagsik para sa buluhaton sang Ginuo sa Lima, Peru, sang nakigkita ako sa mga misyonero sa missionary training center kag mga misyon sa Lima. Kanami tan-awon! Nakita ko ang pagpadasig sa atubang mismo sang akon mga mata. May pito na karon ka misyon sa siyudad lang mismo sang Lima.

Sa katapusan sang amon miting, may espesyal nga sorpresa ang mga misyonero para sa akon. Nagtindog sila kag nagsinggit, “Hurrah para sa Israel.” Indi ko gid malimtan ina nga tion; kuntani ara man kamo tanan didto. Sa atubang mismo sang akon mga mata ang mga misyonero nga nagpahigad sang “mga butang sining kalibutan” para magserbisyo sa Ginuo kag magbulig sa pagpadasig sang Iya pag-abot.

Makita naton nga ginapadasig sang Ginuo ang mga oportunidad para sa edukasyon sang aton mga miyembro kag bisan indi miyembro sa bilog nga kalibutan. Isa sa mga butang nga nagapakilala sa aton bilang simbahan amo ang aton paghatag bili sa edukasyon. Ang Ginuo nagsugo sa aton sang bag-o pa lang ang Pagpanumbalik nga “magtinguha sa pag-angkon sang ihibalo, bisan pa paagi sa pagtuon kag paagi man sa pagtuo.” Nagakatabo ina sa karon kag bagay gid hatagan sang mabaskog nga “hurrah.”

Sa karon masobra 800,000 ka estudyante sa bilog nga kalibutan ang naenroll sa seminary kag institute, ang pinakataas nga enrollment sa kasaysayan sang Simbahan. Nagatipon ang aton mga lamharon sa lainlain nga paagi, temprano pa sa aga, sa adlaw, kag sa mga klase sa gab-i hasta sa online kag pagtuon sa balay. Ini sila mabaskog kag matarong nga batalyon, nga nagaagom sang kusog halin sa kada isa samtang nagatuon sila parte kay Jesucristo, nagasunod, kag nagapamatuod sa Iya bilang Anak sang Dios.

Sang nagligad nga fall naghambal ako sa isa ka debosyonal sa arena nga puno sang mga estudyante sa seminary kag institute kag sang ila mga ginikanan sa University of Utah. Ang pagtambong nila nagapamatuod sa ila handum nga kilalahon kag sundon si Jesucristo. Klaro ang mensahe ko sa sining mga estudyante: Hatagi ang Ginuo sang pareho nga oras. Ginlaygayan ko sila nga updan ang ila pagtuon sang matuod, mas mataas nga pagtuon, nga amo ang pagtuon parte sa “Anak sang buhi nga Dios.”

Amo man sini ang pamangkot ko sa tanan sini nga adlaw: Bisan ano ang ara sa inyo listahan sang hilimuon, hatagi sang pareho nga tiyempo, indi sang bakante nga tiyempo, ang Ginuo sa personal nga pagtuon sang balaan nga kasulatan, pagtuon bilang pamilya sang Dali, Magsunod sa Akon, pangamuyo, mga calling sa Simbahan, ministering, pag-ambit sang sakramento, pagsimba sa templo, kag pagbinagbinag sang mga butang sang Dios. Siling sang aton Ginuo kag Manluluwas, “Magtuon kamo sa akon … kag makakita kamo sang kapahuwayan sa inyo mga kalag.” Saligi ang Iya pulong. Kag hatagi Sia sang pareho nga tiyempo.

Siling ni Pangulong Nelson: “Ginapangabay ko sa inyo nga tugoti ang Dios nga magpangibabaw sa inyo kabuhi. Hatagi Sia sang nagakaigo nga parte sang inyo tiyempo. Samtang ginahimo ninyo ini, pat-ini kon anong matabo sa inyo positibo nga espirituhanon nga buylo.”

Makita naton ina nga buylo nga nagadako sa mga seminary, institute, kag mga unibersidad sang Simbahan. Sa sining mga lugar, prayoridad ang Ginuo. Kag amo man dapat Sia sa tagsa naton ka kabuhi.

Isa pa ka aspeto nga nagapakita sang nagalapad nga malab-utan sang edukasyon sa Simbahan amo ang BYU-Pathway Worldwide. Sa bilog nga kalibutan, ang enrollment naglab-ot na 75,000 kag padayon nga madasig nga nagadako. Kalabanan mga miyembro, kag masobra one-third ara sa Africa. Ang Pathway parte sa pag-access sang edukasyon. Ang pagtapos sa mga kurso nagakahulugan nga mas mabaton kamo sa trabaho, kag kon mabaton kamo sa trabaho mas maayo ang pagpangabuhi sang mga pamilya kag mas nagadamo ang oportunidad sa pagserbisyo sa Ginuo.

Sang nagmiting ako upod sa mga lider sang stake sa Uganda, nabatian ko nga ang bilog nga stake presidency nag-enrol sa BYU-Pathway. Kon mas preparado kita sa temporal kag espiritwal, mas makabato kita sa tuso nga pagpang-atake sang kaaway. Tandai ang mga pulong ni Pedro: “Ang yawa, subong sa isa ka nagangurob nga leon, nagalibot-libot, kag nagapangita sang tulukbon.”

Nahibal-an ko nga sa tunga sang maayong balita sang ebanghelyo, may ara sang mga ginabudlayan, may mga hangkat ang ila pagtuo, pagduda, kag mga pamangkot nga daw wala sang sabat. Mga kauturan, si Jesucristo ang sabat. Magsugod nga kaupod Sia. Pangitaa ang Iya impluwensya sa inyo kabuhi. Pamatii Sia. “Indi kamo matublag,” siling Niya sa Iya mga disipulo sa ulihi Niya nga inoras antes sa Getsemani, antes Niya ginpas-an ang Iya krus sa tunga sang kadalanan sang Jerusalem, antes sang Golgota, kon diin ginkompleto Niya ang nagabayad-sala Niya nga sakripisyo, nga Sia lamang, ang Anak sang Dios, ang makahimo.

Hibaloa nga nakaintiendi Sia. Gindala Niya sa Iya Kaugalingon ang tanan naton nga sala, kasaypanan, pag-antos, kag mga kabudlayan para makaestar kita liwat upod sa aton Amay sa Langit sa wala katapusan. Siling Niya, “Magtulok sa akon sa tagsa ka panghunahuna; indi magduhaduha, indi magkahadlok.” Ang pagtuo kay Jesucristo makabayaw sa imo kag makaayo sang imo pilason nga kalag. Magsalig sa Iya kag magadasig ang imo pagbalik sa “mga butkon sang iya gugma.”

Suliton ko liwat ang mga pulong sang aton buhi nga propeta: “Nakita bala ninyo ang nagakatabo sa atubang mismo sang aton mga mata? Ginapangamuyo ko nga indi naton pag-ibalewala ang pagkahalangdon sini nga tion! Ginapadali na gid sang Ginuo ang Iya buluhaton.” Kabay nga kita bilang mga disipulo sa aton panahon magasinggit, “Hurrah para sa Israel,” samtang nagahanda kita para sa pagbalik sang aton Ginuo kag Manluluwas. Sa ngalan ni Jesucristo, amen.