Ikaw ang Cristo
(Mateo 16:16)
Gusto naton ang aton kabataan nga magpati kay Jesucristo, mangin iya ni Jesucristo kag sang Iya Simbahan paagi sa kasugtanan, kag magtinguha nga mangin pareho kay Jesucristo.
Sang ang amon bata nga si Eli ara sa ikaapat nga grado, naghimohimo ang iya klase sang kuno abi gobyerno kon diin ginpili sia sang iya nga mga upod nga mangin husgado sang klase. Isa ka adlaw ang nagapungko nga husgado sang Utah Second District Court nagbisita, ginpasul-ob ang iya opisyal nga biste kay Eli, kag dayon ginpasumpa ang ila klase. Ginpukaw sini sa lamharon, madali maimpluwensyahan nga kalag ni Eli ang handum nga magtuon sang abogasiya kag sang Manughatag Layi Mismo, si Jesucristo.
Pagkatapos sang tinuig nga katutom, nakabaton si Eli sang imbitasyon nga interbyuhon sang isa sa iya ginapilian nga eskwelahan sa abogasiya. Siling niya, “Ma, ginpamangkot ako sang 10 ka pamangkot. Ang katapusan nga pamangkot, ‘Diin mo ginakuha ang imo moral nga giya?’ Ginhambal ko nga sa bilog nga kasaysayan ang katawhan nagakuha sang mga sistema sang moralidad paagi sa pagsunod sang ila mga kabuhi sa mga ehemplo. Ang ehemplo sang moralidad nga ginatinguhaan ko nga sundan sang akon pagpangabuhi amo si Jesucristo. Ginhambal ko nga kon ang tanan nga katawhan magsunod sa mga pinanudlo ni Jesucristo sa Wali sa Bukid, ang kalibutan mangin mas maayo, mas malinong nga lugar.” Dayon natapos ang interbyu, kag napensar niya, “Tapos gid ang handum ko sa kabuhi. Waay daan sang gusto mamati sa sekular nga akademya sang parte kay Jesucristo.”
Duha ka semana ang nagligad, nabaton si Eli nga may scholarship. Antes magpasugot, ginbisitahan namon ang campus. Ang hitsura sang eskwelahan daw kastilyo kag nahamtang sa ibabaw sang bungyod nga nagatamwa sa matahum nga linaw. Ang manami, kay sang nagalabay kami sa matahum nga librarya kag mga pasilyo, nakita namon sa mga karatula kag ginkurit sa bato ang mga kinaiya halin sa Wali sa Bukid.
Ang Wali sa Bukid amo ang pinakamatahum nga diskurso nga nahambal, una sa mga pinanudlo sini. Wala sang iban nga wali nga makabulig sa aton nga mas maintiendihan ang karakter ni Jesucristo, ang Iya diosnon nga mga kinaiya, kag ang aton pinakatuyo nga mangin pareho sa Iya.
Ang bug-os kabuhi nga pagkadisipulo ni Jesucristo nagasugod sa aton mga balay—kag sa Primary sa pinakahubin nga edad nga 18 ka bulan. Gusto naton ang aton kabataan nga magpati kay Jesucristo, mangin iya ni Jesucristo kag sang Iya Simbahan paagi sa kasugtanan, kag magtinguha nga mangin pareho kay Jesucristo.
Magpati kay Jesucristo
Una, magpati kay Jesucristo.
Pagkatapos sang wali parte sa tinapay sang kabuhi, “madamo sang mga gintutun-an [sang Ginuo] ang ginbudlayan sa pagbaton sang Iya mga pinanudlo kag doktrina, kag “nag-isol sila, kag wala na magpakig-upod sa iya.” Dayon nagbalikid si Jesus sa Dose kag namangkot sang masubo kaayo nga pamangkot: “Kamo man bala luyag magbiya sa akon?”
Si Pedro nagsabat:
“Ginuo, kay sin-o bala kami makadto? ikaw may mga pulong sang kabuhi nga wala katapusan.
“… Kami nagatuo, kag nagakilala, nga ikaw [inang Cristo, ang Anak sang buhi nga Dios].”
Sa ginpakita ni Pedro, ang pagpati amo ang “pag-angkon sang pagtuo sa isa ka tawo ukon pagbaton sang isa ka butang nga matuod.” Kag para ang aton pagtuo magpadulong sa kaluwasan, kinahanglan ini masentro kay Ginuong Jesucristo. Nagapakita kita sang pagtuo kay [Jesucristo] kon may pagsalig kita nga buhi Sia, [may pag-intiendi] sang Iya [tunay] nga karakter [kag kinaugali], kag ihibalo nga nagapanikasog kita nga magpangabuhi suno sa Iya pagbuot.”
Ang pinalangga naton nga propeta nga si Pangulong Russell M. Nelson, naghambal, “Ang pagtuo kay Jesucristo amo ang pundasyon sang tanan nga pagtuluohan kag ang alagyan sang diosnon nga gahum.”
Paano naton buligan ang kabataan nga pabakuron ang ila pagtuo kay Jesucristo kag malab-ot ang Iya diosnon nga gahum? Indi naton kinahanglan magtulok sa layo kundi sa aton Manluluwas Mismo.
“[Ang Ginuo] naghambal sa katawhan nga nagasiling:
“Tan-awa, ako si Jesucristo. …
“Bangon kag magpalapit sa akon. …
“… Ang kadam-an nagpalapit, kag ginkab-ot ang ila mga kamot sa iya kilid, kag ginhikap ang mga agi sang mga lansang sa iya mga kamot kag sa iya mga tiil; kag ini ila ginhimo, nga nagapalapit sing tinag-isaisa … kag nakita sa ila mga mata kag nahikap sang ila mga kamot, kag nahibal-an sing pat-od kag nagpamatuod, nga amo ini sia.”
Ginaagda ko kamo nga binagbinagon kon daw ano ini sa kabuhi sang magagmay nga kabataan. Makabati bala sila sang mga testimonya ni Jesucristo kag sang Iya ebanghelyo? Makakita bala sila sang talahuron, dalayawon nga mga imahe sang Iya pag-alagad kag pagka-Dios? Mabatyagan bala nila kag makilala ang Balaan nga Espiritu nga nagasaksi sang pagkamatuod kag pagkadios Niya? Kabalo bala sila sang Iya mensahe kag misyon?
Mangin iya ni Jesucristo kag sang Iya Simbahan
Ikaduha, mangin iya ni Jesucristo kag sang Iya Simbahan.
Nakaeksperiyensya ang katawhan ni Haring Benjamin sang isa ka dako nga pagbag-o sang tagipusuon kag paagi sa kasugtanan nagdedikar sang ila mga kabuhi sa paghimo sang pagbuot sang Dios. Tungod sang kasugtanan nga ila ginhimo sa Dios kag kay Jesucristo, sila “[gintawag] nga mga anak ni Cristo, iya mga anak nga lalaki, kag iya mga anak nga babayi.” Bilang mga miyembro sang Ang Simbahan ni Jesucristo sang mga Santos sa Ulihing mga Adlaw, may responsibilidad kita sa kasugtanan nga tukuron ang Iya ginharian kag maghanda para sa Iya pagbalik.
Paano naton mabuligan ang mga kabataan nga maghimo kag magtuman sang sagrado nga mga kasugtanan? Sa Dali, Magsunod sa Akon nga manwal, sa appendix A kag B makakita kita sang mga panugod sang diskusyon kag mga leksyon nga magabulig sang mga pamilya kag magasuporta sa mga manunudlo kag mga lider sa ila sagrado nga responsibilidad para ihanda ang mga kabataan para sa bilog-kinabuhi nga paglakat sa dalan sang kasugtanan sang Dios.
Mangin pareho kay Jesucristo
Ikatatlo, mangin pareho kay Jesucristo.
Sa Libro ni Mormon, ginlaygayan sang Manluluwas ang bag-ong tawag Niya nga mga disipulo nga sundon Sia sing maid-id sa ila masarangan: “Ano nga klase sang mga tawo kamo mangin dapat? Sa pagkamatuod ginasiling ko sa inyo, bisan pareho sa akon.”
Paano naton buligan ang ginbunyagan kag ginkumpirma nga kabataan nga tumanon ang ila responsibilidad sa kasugtanan nga tipunon ang ila kaugalingon kag ang iban kay Jesucristo? Ang bilog-kinabuhi nga pagkadisipulo nagapangayo nga kita “mangin … manugtuman sang pulong, kag [indi] manugpalamati lamang.”
Kon magtanyag sang mga imbitasyon sa pinakabata nga mga disipulo sang Ginuo, palihog gamita ang tanan nga oportunidad para pangunahan sila, giyahan sila, updan sila, kag buligan sila nga makita ang Dalan. Makighambal sa sining pinalangga nga mga kabataan samtang nagapreparar sila nga magtudlo, magpamatuod, magpangamuyo, ukon magserbisyo para may kompiyansa sila kag makaeksperiyensya sang kalipay sa pagtuman sang ila mga responsibilidad. Magpangita sang inspirado nga mga paagi para buligan sila nga mabal-an nga ila ini Simbahan kag may importante sila nga tulumanon sa paghanda para sa pagbalik sang Manluluwas.
Kon si Jesucristo ang mangin tutok sang aton kabuhi, ang aton handum, kag kon paano naton ini ginahandum, magaliwat sa katubtuban. Ang pagbag-o makaliwat sang tanan! Ginaliwat sini ang aton kinaiya “sa bagay nga wala na kita sing huyog nga maghimo sing malain, kundi dalayon nga maghimo sing maayo.” Ginaliwat sini kon paano naton ginagamit ang aton oras, ang aton mga ginapanag-iyahan; kon ano ang aton ginabasa, ginapamatian, kag gina-share. Ginaliwat man gani sini kon paano kita magsabat sa dumalagko nga mga interbyu sa eskwelahan ukon sa ulobrahan nga magapat-od sang direksyon sang aton karera.
Kinahanglan naton nga ipasilak ang Kasanag ni Jesucristo sa tagsa ka aspeto sang aton mga kabuhi. Kon wala kita nagapamatuod parte sa kamatuoran sang Iya pagka-dios antes pa sa duta, sang Iya diosnon nga misyon, kag sang Iya Pagkabanhaw nga nagahilway sa aton tanan sa aton mga balay kag sa tagsa ka miting sining Simbahan, ang aton mga mensahe sang pagpalangga, pagserbisyo, katampad, pagpaubos, pagpasalamat, kag kaluoy wala sing matuod nga gahum kundi mangin pareho lang sa makapaisog nga istorya sang madinumdumon nga pagpangabuhi. Kon wala si Jesucristo wala kita sang gahum sa pagbag-o, wala sang katuyuan nga handumon, kag wala sang kahulugan ang mga kabudlayan sa kabuhi. Kon mangin kaswal kita sa aton pagkadisipulo ni Jesucristo, mabutang sa peligro ang aton mga kabataan.
Kon ginahambalan naton ang aton kabataan nga palangga naton sila, ginahambalan man bala naton sila nga palangga sila sang ila Amay sa Langit kag sang Manluluwas nga si Jesucristo? Ang aton pagpalangga pwede nga magpaumpaw kag mag-inspirar, pero ang Ila pagpalangga nagapakabalaan, nagapahitaas, kag nagapaayo.
Ining Jesus indi dapat Jesus sa istorya lang, ukon simple nga Jesus, ukon Jesus nga wala lawas, ukon kaswal nga Jesus, ukon indi kilala nga Jesus, kundi ginhimaya, makagagahum, nabanhaw, ginpahitaas, dapat simbahon, gamhanan, Bugtong nga Anak sang Dios, nga gamhanan sa pagluwas. Kag pareho sa makatalandog nga ginpamatuod sa akon sang isa ka bata sa Pilipinas sang isa ka adlaw, “Bagay kami luwason!” Sa sagrado kag balaan nga ngalan Niya nga “ginpahayag sang Dios nga [amo ang dako nga] katumbasan,” nga si Jesucristo, amen.