Ang Plano sang Kaluoy

Sang nagligad nga Abril, pagkatapos sang malipayon nga balita nga nabakal sang Simbahan ang Kirtland Temple, gin-imbitar kita ni Pangulong Russell M. Nelson nga tun-an ang pangamuyo sa dedikasyon sang Kirtland Temple, nga narekord sa seksyon 109 sang Doktrina kag mga Kasugtanan. Ang pangamuyo sa dedikasyon, siling ni Pangulong Nelson, “isa ka pagtudlo parte sa kon paano ang templo espirituhanon nga nagapabaskog sa inyo kag sa akon agud maatubang ang mga hangkat sang kabuhi sa sining katapusan nga mga adlaw.”

Sigurado ako nga ang pagtuon ninyo sang seksyon 109 nagbunga sa mga ihibalo nga nakabugay sa inyo. Sini nga gab-i, ipakigbahin ko sa inyo ang duha ka butang nga natun-an ko sang ginsunod ko ang imbitasyon sang aton propeta. Ang dalan nga nagahatag kalinong nga ginpadulungan sang akon pagtuon nagpadumdom sa akon nga maluluy-on ang Ginuo kag ang plano sang kaluwasan sang aton Amay nga Langitnon matuod gid nga plano sang kaluoy.

Sa nabal-an na ninyo, ang “bag-ong tawag nga mga misyonero ginapaisog nga magbaton dayon sang endowment sa templo kag magkadto sa templo pirme kon itugot sang sirkumstansya.” Kon ma-endow na sila, pwede man sila “magserbisyo bilang mga temple … worker antes magsugod ang ila misyon.”

Ang dugang nga oras sa templo antes magsulod sa missionary training center (MTC) mangin matahum nga bugay para sa bag-o nga misyonero samtang ginatun-an pa gid nila ang parte sa pagpakigbahin sina mga kasugtanan sa kalibutan.

Pero sa pagtuon sang seksyon 109, natun-an ko nga sa templo, ginapabakod sang Dios ang bag-o nga mga misyonero—ang matuod, tanan kita—sa dugang nga sagrado nga paagi. Sa pangamuyo sa dedikasyon, nga ginhatag paagi sa rebelasyon, nangamuyo si Propetang Joseph Smith nga “kon maggwa ang imo mga alagad sa imo balay … agud magpamatuod sang imo ngalan,” ang “mga tagipusuon” sang “tanan nga tawo” “mapahumok”—alangay ang “mga bantug sang duta” kag “tanan nga imol, mga nagakinahanglan, kag [ang] mga nagaantos.” Nangamuyo sia nga “ang ila mga tiko nga pagpati mabuslan sang kamatuoran, kag mangin makahamuot ang imo katawhan sa panulok sang tanan; agud nga ang tanan nga punta sang kalibutan makahibalo nga kami nga imo mga alagad nakabati sang imo tingug, kag ginpadala mo kami.”

Isa ini ka matahum nga promisa sa bag-ong tawag nga misyonero—nga ang mga tiko nga pagpati “mabuslan sang kamatuoran,” nga “mangin makahamuot sa panulok sang tanan,” kag ipahibalo sa kalibutan nga ginpadala sila sang Ginuo. Ang kada isa sa aton sigurado nagakinahanglan sang amo man sini nga mga bugay. Daw ano nga bugay kon mapahumok naton ang mga tagipusuon sa aton inter-aksyon sa mga kasilingan kag upod sa trabaho. Wala ginpaathag sa pangamuyo sang dedikasyon kon paano pahumukon sang aton oras sa templo ang mga tagipusuon sang iban, pero kumbinsido ako nga may labot ini sa kon paano pahumukon sang aton oras sa balay sang Ginuo ang aton mismo mga tagipusuon paagi sa pagsentro sa aton kay Jesucristo kag sa Iya kaluoy.

Samtang ginatun-an ko ang pangamuyo sang pagdedikar sang Kirtland, nakadayaw ako nga si Joseph liwat-liwat nga nagpangayo sang kaluoy—para sa mga miyembro sang Simbahan, sa mga kaaway sang Simbahan, sa mga lider sang pungsod, para sa mga nasyon sang kalibutan. Kag, sa personal mismo, nagpangabay sia sa Ginuo nga dumdumon sia kag kaluy-an ang pinalangga niya nga si Emma kag ang ila kabataan.

Ano ayhan ang nabatyagan ni Joseph sang, pagligad sang isa ka semana, sang Adlaw sang Easter, Abril 3, 1836, sa Kirtland Temple, nagpakita ang Manluluwas sa iya kag kay Oliver Cowdery kag, sa nasulat sa sekson 110 sang Doktrina kag mga Kasugtanan, nagsiling, “Ginbaton ko ining balay, kag magapabilin diri ang akon ngalan; kag magapakita ako sa akon katawhan sa kaluoy sa sining balay.” May ara gid sang espesyal nga kahulugan ining promisa sang kaluoy kay Joseph. Kag sa gintudlo ni Pangulong Nelson sang nagligad nga Abril, ini nga promisa “para sa tagsa ka gindedikar nga templo karon.”

Kadamo sang paagi kon paano makakita ang tagsa sa aton sang kaluoy sa balay sang Ginuo. Amo na ini halin sang primero nga ginsugo sang Ginuo ang Israel nga magpatindog sang tabernakulo kag ibutang sa tunga ang “[pulungkuan sang kaluoy].” Sa templo, masalapuan naton ang kaluoy paagi sa mga kasugtanan nga aton ginahimo. Ina nga mga kasugtanan, upod sa kasugtanan sang bunyag, nagabugkos sa aton sa Amay kag sa Anak kag nagahatag sa aton sang mas dako nga kinamatarong sa gintudlo ni Pangulong Nelson nga “espesyal nga klase sang gugma kag kaluoy … nga ginatawag hesed” sa Hebreo.

Makita naton ang kaluoy sa oportunidad nga maselyohan sa aton mga pamilya sa wala katubtuban. Sa templo, mas klaro naton nga maintiendihan nga ang Pagtuga, Pagkahulog, ang nagabayad-sala nga sakripisyo sang Manluluwas, kag ang aton ikasarang nga makasulod liwat sa presensya sang aton Amay nga Langitnon—sa matuod, ang tagsa ka bahin sang plano sang kaluwasan—mga pagpahayag sang kaluoy. Masiling nga ang plano sang kaluwasan isa ka plano sang kalipayan tungod isa gid ini ka “plano sang kaluoy.”

Nagapasalamat ako sa matahum nga promisa sa seksyon 110 nga ipahayag sang Ginuo ang Iya Kaugalingon sa Iya mga templo. Nagapasalamat man ako sa ginapahayag sini parte sa kon paano ipahayag sang Ginuo ang Iya Kaugalingon sa kaluoy tagsa nga kita, pareho kay Joseph, magpakitluoy para sa kapatawaran.

Ang pagpakitluoy ni Joseph Smith para sa kapatawaran sa seksyon 109 indi ang una nga bes nga ang iya mga pagpakitluoy para sa kapatawaran nagbukas sang rebelasyon. Sa Sagrado nga Kakahuyan, nangamuyo ang lamharon nga si Joseph indi lamang para mabal-an kon diin nga Simbahan ang matuod, kundi siling man niya nga sia “nagdangop sa Ginuo para sa kaluoy, kay wala na sang iban pa nga akon madangpan para makabaton sang kaluoy.” Ang pagkilala niya nga kinahanglan niya sang kaluoy nga ang Ginuo lang ang makahatag, nagbulig bukas sang mga bintana sang langit. Pagligad sang tatlo ka tuig nagpakita si anghel Moroni, pagkatapos sang siling ni Joseph nga iya “pagpangamuyo kag pag-ampo “sa Dios nga Makagagahum” para sa kapatawaran sang tanan ko nga sala kag mga kabuangan.”

Ining paghatag sang rebelasyon pagkatapos sang pag-ampo para sa kaluoy pamilyar sa balaan nga kasulatan. Nabatian ni Enos ang tingug sang Ginuo pagkatapos lamang nga magpangamuyo para sa kapatawaran. Ang pagbag-o sang tatay ni Haring Lamoni nagsugod sa iya pangamuyo: “Talikdan ko ang tanan ko nga sala agud makilala ka.” Mahimo nga indi kita mabugayan sang pareho sini kadako nga mga eksperiyensya, pero sa mga ginabudlayan kon kaisa nga mabatyagan ang mga sabat sa pangamuyo, ang pagpangayo sang kaluoy sang Ginuo isa sa pinakamabaskog nga pamaagi para mabatyagan ang pagsaksi sang Balaan nga Espiritu.

Matahum nga ginatudlo ang pareho nga prinsipyo sa Moroni 10:3–5. Kasami ginapalip-ot lang naton ining mga bersikulo para itudlo nga paagi sa sinsero nga pangamuyo, matun-an naton kon bala matuod ang LIbro ni Mormon. Pero ining pagpalip-ot makabale-wala sang importante nga papel sang kaluoy. Pamatii kon paano ginsugdan ni Moroni ang iya laygay: “Ginalaygayan ko kamo nga kon mabasa ninyo ining mga butang, kon ini mangin kinaalam sa Dios nga mabasa ninyo ang mga ini, nga inyo dumdumon kon nangin daw ano kamaluluy-on ang Ginuo sa mga anak sang katawhan, halin pa sa pagtuga kay Adan bisan tubtob sa tion nga mabaton ninyo ining mga butang, kag binag-binagon ini sa inyo mga tagipusuon.”

Ginapaisog kita ni Moroni indi lamang para basahon ining mga butang—ang mga sinulatan nga buot niya selyohan—kundi para binagbinagon man sa aton mga tagipusuon ang ginapahayag sang Libro ni Mormon “kon nangin daw ano kamaluluy-on ang Ginuo sa mga anak sang katawhan.” Ang pagbinagbinag sang kaluoy sang Ginuo nagahanda sa aton nga “mamangkot kamo sa Dios, ang Wala’y Katapusan nga Amay, sa ngalan ni Cristo, kon ining mga butang indi matuod.”

Sa pagbinagbinag naton sang Libro ni Mormon, makapamangkot kita: Matuod gid bala, sa gintudlo ni Alma, nga ang plano sang kaluoy sang Dios nagaseguro nga ang tagsa ka tawo nga nabuhi sa sining kalibutan mabanhaw kag igapanumbalik sa ila kinaandan kag perpekto nga lawas? Husto bala si Amulek—masabat bala sang kaluoy sang Manluluwas ang tanan nga mapait nga ginapangayo sang hustisya nga obligado kuntani kita sa pagbayad kag sa baylo “[ginalikupan kita] sa mga butkon sang kasigurohan”?

Matuod bala, sa ginpamatuod ni Alma, nga magaantos si Cristo indi lamang para sa aton mga sala kundi para sa aton “mga kasakit kag mga pag-antos” para Iya “mahibal-an … kon paano buligan ang iya katawhan suno sa ila mga kahuyangan”? Maluluy-on gid bala kaayo ang Ginuo, sa gintudlo ni Haring Benjamin, nga bilang libre nga regalo, Iya ginbayran ang “mga kasal-anan sinang mga … nagkalamatay nga wala nakahibalo sang kabubut-on sang Dios parte sa ila, ukon nga wala’y hinalung-ong nga nakasala”?

Matuod bala, sa ginhambal ni Lehi, nga “si Adan nahulog agud ang tawo mabuhi; kag ang tawo nagakabuhi agud makaangkon sila sing kalipay”? Kag matuod gid bala, sa ginpamatuod ni Abinadi, nga ginasambit si Isaias, nga si Jesucristo “ginpilas tungod sang aton mga kalapasan, ginhanog sia tungod sang aton mga kalainan; ang silot sang aton paghidaet yara sa iya; kag paagi sa iya mga lapdos ginpaayo kita”?

Sa kabilogan, ang plano sang Amay nga gintudlo sa Libro ni Mormon amo gid sini ka maluluy-on? Nagasaksi ako nga matuod ini kag ang nagahatag-kalinong kag puno sang paglaum nga mga pinanudlo parte sa kaluoy sa Libro ni Mormon matuod.

Sa gihapon, ginahunahuna ko nga mahimo may mga ginabudlayan, wala sapayan sang matutom ninyo nga pagbasa kag pagpangamuyo, sa pagbaton sang promisa ni Moroni nga ang Amay nga Langitnon “ipakita niya ang kamatuoran sini sa inyo, paagi sa gahum sang Balaan nga Espiritu.” Nabal-an ko gid ini nga kabudlayan tungod nabatyagan ko ini, madamo na nga tinuig ang nagligad, sang ang primero ko nga mga pagbasa sang Libro ni Mormon wala magbunga sang insigida kag klaro nga mga sabat sa akon mga pangamuyo.

Kon ginabudlayan kamo, ginaimbitar ko kamo nga sundon ang laygay ni Moroni nga binagbinagon ang madamo nga paagi nga nagatudlo ang Libro ni Mormon “kon nangin daw ano kamaluluy-on ang Ginuo sa mga anak sang katawhan”? Base sa akon ekperiyensya, kabay nga kon himuon ninyo ini, ang kalinong sang Balaan nga Espiritu magasulod sa inyo tagipusuon, kag mabal-an ninyo, magpati, kag mabatyagan nga ang Libro ni Mormon kag ang plano sang kaluoy nga ginatudlo sini matuod.

Ginapahayag ko ang akon pagpasalamat sa dako nga plano sang kaluoy sang Amay kag sa kahanda sang Manluluwas nga tumanon ini. Kabalo ako nga ipahayag Niya ang Iya Kaugalingon sa kaluoy sa Iya balaan nga templo kag sa tagsa ka parte sang aton kabuhi kon pangitaon naton Sia. Sa ngalan ni Jesucristo, amen.