Kasubong sang Gamay nga Bata

Ginsugdan ni Jesus ang katapusan nga tuig sang Iya mortal nga kabuhi sa maid-id nga paghanas sang Iya mga Apostoles. Agud nga ang Iya mensahe kag ang Iya Simbahan magpadayon bisan wala na Sia, madamo pa gid ang dapat itudlo sa dose ka ordinaryo nga tawo nga nakilala Niya halos 24 pa lang ka bulan.

Isa ka adlaw nasaksihan ni Jesus ang pagbaisay sang dose kag namangkot Sia, “Ano bala ang inyo ginbaisan sa dalanon?” Maathag nga nahuya, “naghipos sila,” siling sang kasulatan. Pero ining pinakahalangdon sa tanan nga manunudlo nakahibalo sang ila mga ginahunahuna kag nakamutik sang pagsugod sang personal nga bugal. Gani “nagkuha sia sing isa ka bata, …

“Kag nagsiling, Dumdoma ninyo ini! Kon indi kamo magbaylo kag manginkaangay sang mga kabataan, indi gid kamo makasulod sa ginharian sang langit.

“Ang bisan sin-o nga nagapaubos sang iya kaugalingon kaangay sini nga bata, sia amo ang labing daku sa ginharian sang langit.”

Dapat tandaan nga bisan antes pa matawo si Cristo, ang sermon ni Haring Benjamin sa iya pagpaalam nagalakip man sining makahulugan nga komento sa pagkamapainubuson sang bata. Nagasiling ini, “Ang kinaandan nga tawo kaaway sang Dios, … kag mangin amo sini, sa wala’y katapusan, luwas lang nga … sia mangin isa ka santos paagi sa pagbayad-sala ni Cristo nga Ginuo, kag mangin pareho sing isa ka bata, nga masinulundon, … mapainubuson, … puno sang gugma, … bisan pareho sing isa ka bata nga [magsabat] sa iya amay.”

Karon, hayag nga may pila ka binata-bata nga mga huyog nga wala naton ginakunsinti. Beinte-singko anyos ang nagligad, ginkagat sang akon tatlo ka tuig nga apo ang iya lima ka tuig nga magulang (nga babayi) sa butkon. Ang akon umagad nga lalaki, nga nagaatipan sa kabataan sina nga gab-i dalidali nga gintudloan ang iya bata nga babayi sang tanan nga leksyon sa pagpatawad nga iya madumduman, kag naghingapos nga basi wala kahibalo ang iya manghod kon daw ano ang makagtan sa butkon. Ang wala ginpensar sing maayo nga komento nangin epektibo sing mga isa ka minuto, o basi, isa ka minuto kag tunga hasta nga may todo nga paghibi halin sa kwarto sang kabataan, sa diin nagsinggit ang apo ko nga babayi, “Kahibalo na ina sia subong.”

Gani ano ang maayo nga dapat naton talupangdon sa kabuhi sang kabataan? Ano ang nagpahibi kay Cristo Mismo sa pinakamakatalandog nga eksena sa bilog nga Libro ni Mormon? Ano ang ginatudlo ni Jesus sang ginpapanaog Niya ang langitnon nga kalayo kag nagaprotekta nga mga anghel agud palibotan ang kabataan, kag ginsugo ang mga dalagku nga “[tan-awon ang ila] magagmay nga kabataan”?

Wala kita kahibalo kon ano ang kabangdanan sina tanan, pero sa panumduman ko may labot ina sa ila kaputli kag pagkainosente, sa ila duna nga pagkamapainubuson, kag kon ano ang sarang dal-on sini sa aton mga kabuhi kon huptan naton ini.

Ngaa nga ang mga adlaw sang kawala-paglaum gintawag sang isa ka propeta nga “kadayawan sang mga kadayawan?” Paano bala nga ang “wala’y kapuslanan nga mga imahinasyon kag bugal sang mga anak sang katawhan” amo ang mga pulong nga nagalaragway sang daku kag maligwa nga bilding, nga tama kapatay sa espirituhanon sa panan-awon ni Lehi? Kag ang mga Zoramnon, inang grupo nga nagpangamuyo sing may tuman nga bugal? Si Alma nagsiling parte sa ila, “O Dios, [nagapangamuyo] sila sa imo sa ila mga baba, samtang nagahambog sila … sa wala’y pulos nga mga butang sang kalibutan.”

Sa kabaliskaran, may mas manami pa bala, mas putli, ukon mas mapainubuson sangsa pangamuyo sang isa ka bata? Daw pareho ini nga ang langit ara sa kwarto. Ang Dios kag si Cristo tunay gid para sa ila, pero para sa iban sa ulihi, ang experiyensia mahimo nga mangin mas hapaw.

Sa ginsambit ni Elder Richard L. Evans mga 60 ka tuig ang nagligad: “Madamo sa aton ang nagaako nga mga Kristiyano kita, pero … wala naton Sia ginaserioso. … Ginatahod naton Sia, pero wala naton Sia ginasunod. … Ginasambit naton ang Iya mga ginpanghambal, pero wala naton ginapangabuhi ang mga ini .” “Ginadayaw naton Sia, pero wala naton Sia ginasimba.”

Daku tani ang kinalain sang kabuhi kon ginatahod sang mga tawo si Jesus kag ginagamit ang Iya ngalan indi lang sa binastos nga pagpamuyayaw.

Pero palangga gid Sia sang kabataan, kag inang pagpalangga mahimo nila madala sa iban pa nila nga mga relasyon sa patag sang kabuhi. Sa kabilogan, bisan gamay pa gid sila, ang kabataan dali magpalangga, hapos magpatawad, kag ang ila kadlaw makapukaw sang positibo nga balatyagon bisan pa sa tawo nga wala-balatyagon kag tama katig-a sang tagipusuon.

Ang lista nagapadayon. Kaputli? Pagsalig? Kaisog? Integridad?

Updi ako para lantawon ang pagpaubos sa Dios sang isa ka lamharon, pinalangga ko nga abyan.

Sang Enero 5, 2025,—91 ka adlaw ang nagligad—si Easton Darrin Jolley ginhatagan sang Aaronic Priesthood kag gin-ordin nga deacon sa Ang Simbahan ni Jesucristo sang mga Santos sa Ulihing mga Adlaw.

Madugay na gid ginhandum ni Easton ang magpasa sang sakramento sang Panyapon sang Ginuo. Pero ining sagrado nga oportunidad ginaupdan sang grabe nga kahadlok nga mapaslawan sia, nga matumba sia, nga sunlogon sia ukon mahuy-an sia kag ang iya pamilya.

Kahibalo kamo, si Easton may tumalagsahon kag makahalalit nga masakit halin pa sang ginbata sia, ang Ullrich muscular dystrophy. Dalayon ini nga nagdala sang dalagku nga mga hangkat sa iya pagkabata samtang ginwasak ang iya mga paglaum kag mga handum sa palaabuton. Sa indi madugay permanente sia nga magagamit sang wheelchair. Wala ginahambalan sa iya pamilya kon ano ang matabo sa iya pagkatapos sina.

Sa Domingo pagkatapos sang iya ordinasyon, si Easton mapasa sang sakramento sa una nga tion. Kag ang iya sekreto nga inspirasyon amo nga mapresentar niya ang iya kaugalingon kag ining sagrado nga mga simbolo sa iya tatay nga bishop sang ward. Sa pagpaabot sinang hilikuton nagpakitluoy sia kag nagpangabay, naghibi kag nagpakitluoy, para sa pasalig nga wala ni isa, wala ni isa, nga mabulig sa iya. Sa madamo nga rason nga sia lang ang nakahibalo, kinahanglan niya himuon ini nga isahanon kag wala sang bulig.

Pagkatapos nasipad-sipad kag nabendisyonan sang priest ang tinapay—simbolo sang gintipik-tipik nga lawas ni Cristo—si Easton, sa lawas nga may kasablagan, kiangkiang nga nagpalapit para batunon ang iya tray. Ugaling, may tatlo ka dalagku nga halintang halin sa salog sang meetinghouse pasaka sa stand. Gani, pagkabaton sang iya tray, gin-untay niya ang iya lawas para maglab-ot sa pinakataas nga iya masarangan kag ginbutang ang iya tray sa tulungtungan sa ibabaw sang uluyatan sa hagdan. Dason, nagpungko sa isa sang mas mataas nga halintang, ginbatak sang duha ka kamot ang iya tuo nga batiis sa una nga halintang. Dayon ginbatak ang iya wala nga batiis sa amo man nga halintang, kag liwat naman hasta nga, bisan makapoy, nadaug niya ang tama kabudlay nga personal nga hangkat.

Dayon nag-amat-amat palapit sa isa ka poste nga iya mahambuyan agud makatindog. Ginbalikan niya ang tray. Pila pa ka tikang kag nagatindog na sia sa atubang sang bishop nga iya tatay, nga nagahibi todo kag nagkinahanglan nga punggan ang iya kaugalingon sa paghakos sining tama kaisog kag katutum nga anak. Kag si Easton, nga nahawasan kag may daku nga yuhum sa iya guya, siguro nagsiling, “Ginhimaya ko [ang akon amay kag] natapus ko ang buluhaton nga [ginhahatag niya] sa akon nga himoon.”

Pagtuo, katampad, kaputli, pagsalig, integridad, kag, sa katapusan, gugma para sa amay nga ginhandum gid niya nga lipayon. Ini kag madamo nga iban pa nga kinaiya rason nga makasiling man kita nga “Ang bisan sin-o … nga magpaubos sang iya kaugalingon subong sining bata nga diutay, sia amo ang labing daku sa ginharian sang langit.”

Nagapamatuod ako nga pinakaibabaw sa listahan sang pinakanami nga mga larawan nga nakita ko amo ang iya sang mga lapsag kag kabataan kag mga lamharon nga pareho katutum kag kamalahalon sa mga ginmitlang sini nga adlaw. Nagapamatuod ako nga mga larawan sila sang ginharian sang Dios nga nagauswag sa duta sa bilog sini nga kusog kag katahum.

Sa amo man nga espiritu sang pagpamatuod, nagasaksi ako nga sang lamharon pa sia, nakita ni Joseph Smith ang ginsiling niya nga iya nakita kag nakigsugilanon sa iya ginsiling nga iya ginpakigsugilanon. Nagasaksi ako nga ang mapainubuson kag putli nga si Russell M. Nelson ang gin-ordin kag maalam nga propeta kag manugpanan-aw sang Dios. Sa kadamuon sang akon nabasa sa bilog ko nga kabuhi, nagasaksi ako nga ang Libro ni Mormon ang pinakamakalilipay nga libro nga akon nabasa kag ang sadsaran sang diutay ko nga balay sa ginharian nga may madamo nga mansyon. Nagapamatuod ako nga ang priesthood kag pangamuyo nagapanumbalik sang akon kabuhi—ang priesthood ni Cristo kag inyo mga pangamuyo. Nakahibalo ako nga tanan ini matuod kag nagasaksi sini sa inyo sa ngalan sang labing tampad kag mapainubuson sa tanan nga mga anak sang Dios—ang Alfa kag Omega, Ang Dakong Jehova, ang ginlansang sa krus, ang matutum nga saksi—nga amo ang Ginuong Jesucristo, amen.