Pagpakamahal sang Kabuhi

Padayon niya: “Nakabaton ako sing daku gid nga pagpalangga kag suporta halin sa akon ward nga pamilya. Nangin makatalandog gid ini. Ang [akon] bishop kag Young Women president naghimo sing sobra sa ginapaabot para ipakita ang ila pagpalangga kag suporta. … Nakita ko ang impluwensya sang Ginuo … nga nagagiya sa akon kag sa akon pamilya. Ang ward nga pareho sang akon amo ang pamilya nga kinahanglan sang tanan, labi na gid [para sa] isa ka lamharon nga babayi sa akon sitwasyon.”

Mapinalanggaon nga ginbaton niya kag sang iya pamilya kag ward ang iya lapsag nga lalaki sining nagligad nga Pebrero.

Si Pangulong Russell M. Nelson nagsiling, “Tanda sang matuod kag buhi nga Simbahan sang Ginuo ang plastado … nga pagpangalagad sa indibidwal nga mga anak sang Dios … [nga nagaalagad nga may mapinalanggaon nga kaayo] sa isa, pareho gid sa Iya ginhimo.”

Kon mahibal-an sang isa ka dalaga nga nagabusong sia, ang kabalaka sa ikaayong lawas, espirituhanon nga pagkatublag, kahuy-anan, problema-pinansyal, libog sa pag-eskwela, pagduhaduha sa kasal, kag kasubo tungod sa nawasak nga mga damgo mahimo nga, sa tion sang kalisod kag kagumon, magtulod sa isa ka babayi nga maghimo sang mga tikang nga magadala sang daku nga kasakit kag paghinulsol.

Sa bisan sin-o nga nagapamati nga nakaaagi sang tuman nga kasakit kag paghinulsol sa pagpakigbahin sa aborsyon, palihog dumduma: Bisan pa indi naton mabag-o ang nagligad, ang Dios sarang mag-ayo sang nagligad. Ang kapatawaran mahimo matigayon paagi sa milagro sang Iya nagabayad-sala nga grasya kon magdangop kamo sa Iya nga may mapainubuson kag mahinulsulon nga tagipusuon.

Duha ka tinaga ang masami ginaangot sa kasagrado sang mortal nga pagkatawo: kabuhi kag pagpili. Ang kabuhi labing malahalon nga bahin sang perpekto nga plano sang aton Amay, kag paagi sa Iya mando ginapakamahal naton ang kabuhi kag ginaamligan ang kabuhi; kag ginapili ang pagpadayon sang kabuhi kon ginpanamkon na. Ginapakamahal man naton ang regalo sang pagpili, sang moral nga pagbuot—nga nagabulig pabakod sang matarong nga mga pagpili nga aprobado sang Dios kag nagadala sing wala katapusan nga kalipay.

Kon ang babayi kag lalaki ara sa sensitibo nga tion, nga nagapangatubang sa serioso nga pagpili, ang aton mga ginahambal, ginahimo, ginabatyag—sa espiritwal, emosyonal, kag pinansyal—makabugay sa ila nga mabatyagan ang pagpalangga sang Manluluwas kag sa ginsiling ni Pangulong Henry B. Eyring, magbag-o sang paghangop sang ila espirituhanon nga mga mata halin sa “kon ano sa banta nila ang ila makita” pakadto sa “kon ano ang indi pa nila makita.”

Si Pangulong Dallin H. Oaks nagsiling: “Ang aton pagtamod sa aborsyon wala nabase sa ginpahayag nga ihibalo sang kon san-o nagasugod ang mortal nga kabuhi. … Ginabase ini sa aton ihibalo nga … tanan nga espiritu nga anak sang Dios dapat magkadto sa sining kalibutan para sa mahimayaon nga katuyoan, kag ang indibidwal nga pagkatawo nagsugod madugay na antes pa sang pagpanamkon kag magapadayon sa magaabot nga bilog nga wala katapusan.”

Ang pulong sang Ginuo parte sa mga wala pa natawo, nga ginpahayag paagi sa Unang Pangulohan kag Korum sang Dose ka Apostoles, wala gid nagliwat kag ginasulit sini ang mga pulong sang mga propeta sa bilog nga kasaysayan, nga nagahatag kaathag sa ginapangayo sang Ginuo sa aton.

“Ang Simbahan ni Jesucristo sang mga Santos sa Ulihing mga Adlaw nagapati sa kasagrado sang tawhanon nga kabuhi. Gani, ginapamatukan sang Simbahan ang boluntaryo nga aborsyon para sa personal ukon pang-sosyedad nga bentaha, kag ginalaygayan ang mga miyembro nga indi magpaidalom, maghikot, magpaisog, magbayad, ukon magpatigayon sang sining mga aborsyon.

“Ang [Ginuo] nagatugot sang posible nga mga eksepsyon … kon:

• “Ang pagbusong resulta sang pagpanglugos ukon pagpakighilawas sa kapamilya, ukon

• “Isa ka eksperto nga doktor ang nakasayod nga ang kabuhi ukon ikaayong-lawas sang iloy ara sa seryoso nga peligro, ukon

• Isa ka eksperto nga doktor ang nakasayod nga ang fetus may malubha nga mga depekto nga indi magtugot sa bata nga mabuhi matapos nga mabun-ag.”

Ang Unang Pangulohan nagapadayon: “Ang aborsyon isa ka seryoso katama nga butang. [Bisan sa sining tumalagsahon nga mga sitwasyon] dapat lang ini pamensaron sang responsable nga mga tawo pagkatapos nga makabaton sang kumpirmasyon paagi sa pangamuyo” kag nagkonsulta sa iban.

Treinta katuig ang nagligad, ang mga propeta sang Ginuo nagpagwa sang proklamasyon sa kalibutan. Nagalakip ini sining mga pulong:

“Amon … ginapahayag nga ang Dios nagsugo nga ang sagrado nga mga gahum sang pagtuga sang anak pagagamiton lamang sa tunga sang lalaki kag babayi, nga legal nga ginkasal bilang bana kag asawa.

“Ginapahayag namon nga ang mga pahito nga sa amo nga paagi gintuga ang mortal nga kabuhi, diosnon nga ginpanulin. Nagapamatuod kami sa pagkabalaan sang kabuhi kag sang iya sini importansya sa wala’y katapusan nga plano sang Dios.”

Ang pagtatap kag pag-amlig sang kabuhi nga wala pa natawo indi panindugan sa politika. Moral ini nga kasugoan nga ginpalig-on sang Ginuo paagi sa Iya mga propeta.

Isa ka pahayag ni Pangulong J. Reuben Clark Jr., nga nag-alagad sa Unang Pangulohan, matahum nga nagalaragway sang aton mga lamharon sa karon: “Ang mga lamharon sang Simbahan luyag gid sang espirituhanon nga mga prinsipyo; nalangkag sila nga matun-an ang ebanghelyo, kag gusto nila nga itudlo ini sa ila nga direkta kag puro. Gusto nila makahibalo parte sa … aton mga ginapatihan; gusto nila makaangkon sang panaksihon sang kamatuoran. Sila … nagapamangkot, nagapangita sang kamatuoran.” Maghambal kita pirme nga may pagtuo kag kaluoy sa aton mga lamharon sa balay kag sa isa kag isa sa aton mga miting sa Relief Society kag elders korum, parte sa layi sang kaputli sang Ginuo, sa kasagrado sang kabuhi, kag sa pagtatap sang wala pa matawo kag sa ila mga iloy.

Isa ka pinalangga nga sister ang nagsulat sa akon parte sa iya eksperiyensia pila ka dekada ang nagligad: “Sang 17 anyos … , nagbusong ako nga diutay lang ukon wala gid sang suporta halin sa akon nobyo. Nahuya ako kag nagaisahanon [pero] wala gid ako nagpamensar nga [magpahulog]. … [Ara] ang akon mapinalanggaon nga pamilya kag bishop, nga regular ko nga ginakonsulta para sa giya. … Nagdangop ako sa Dios. Gintun-an ko ang balaan nga mga kasulatan … kag nangamuyo [kag] nakakita sang kusog paagi sa akon Manluluwas kag sa proseso sang paghinulsol. … Nakabaton ako sang sabat [sa akon mga pangamuyo] nga indi ko mapanginwala. … Masubo gid, pero nakahibalo ako nga ipaadoptar ko ang akon bata pagkatawo. … Nagpangamuyo ako para sa kaisog [kag] nabatyagan ang pagpalangga sang Manluluwas sing tuman kaathag paagi sa paghinulsol, nakahibalo ako nga ang Dios … nagasabat sang mga pangamuyo kag nagapabakod sa aton.”

Isa ka mapinalanggaon nga mag-asawa ang nag-adoptar sang pinalangga nga lapsag nga babayi kag nagtudlo sa iya sang ebanghelyo. Subong may bana na sia kag may manami nga kaugalingon nga pamilya.

Kon kis-a, ang pagprotekta sang kabuhi ginaupdan sing tama kabudlay kag masakit nga kawalay-kasegurohan.

Sang sini lang isa ka hubin nga mag-asawa nga palangga namon ni Kathy ang nagsulat sa akon parte sa ginapakamahal nga lapsag nga ila ginapaabot.

Ang tatay nagsulat: “[Sang ang akon asawa] nagabusong sing 10 ka semana, nadiskubrehan namon nga ang amon lapsag may genetic nga kondisyon nga trisomy 21, nga mas kilala bilang Down syndrome. May mga pagsugyot sa amon … halin sa patag sang medisina nga pamensaron ang pagpahulog sang bata. Pagligad sang pila ka semana natukiban namon nga … ang wala pa matawo namon nga lapsag … magakinahanglan sang madamo nga operasyon sa korason sa una nga tuig sang iya kabuhi. Sa bilog sining proseso samtang hugot kami nga nagapangamuyo para sa bulig sang Dios, … nabatyagan namon ang Espiritu nga nagahatag sa amon sang kasulhay. Nakabaton kami sang rebelasyon kag paghangop nga ang amon bata pinasahi nga anak sang Amay nga Langitnon kag may tama kadaku nga handum nga makaupod sa amon pamilya kag magkadto sa kalibutan.”

Ang nanay sang lapsag nagsulat: “Nakibot gid [kami], naligban, kag matuod lang naglalain sa balita. … Sang 14 ka semana na ang akon ginabusong, nahibal-an namon nga ang amon lapsag may madamo nga congenital nga depekto sa korason, nga mahimo makamamatay. Nagkonsulta kami sa madamo nga espesyalista nga mga doktor sugod sang 10-18 ka semana ang akon ginabusong. … Sa kada appointment namon, ginapamangkot kami kon gusto namon sigehon ang pagbusong ukon ipahulog. … Gin-ayo sang Manluluwas ang akon balatyagon kag ginhatagan ako sang kalinong kag kakunyag para sa amon lapsag nga babayi. … Sulit-sulit nga ginpakita sa akon sang [Amay nga Langitnon] nga may perpekto sia nga plano para sa akon [kag] nagasalig ako sa Iya.”

Nakunyag nila nga ginbaton ang ila lapsag nga babayi ensakto isa ka semana ang nagligad. Ila sia kag iya sila sa katubtuban.

Ang wala-kahadlok nga pagtuo kag dalayawon nga kaisog mga pinasahi nga kinaiya sang mga disipulo ni Jesucristo.

Sa sulod sang mga tinuig, may pribilihiyo ako nga makakilala sang mga tawo nga mapainubuson nga nagtinguha sa pagbalik sa dalan sang kasugtanan kag sa ila mga bugay sang priesthood kag templo, madamo nga tinuig pagkatapos ginbawi ang ila pagkamiyembro.

Sa isa ka okasyon, may dapat ako interbyuhon nga isa ka tawo para sa Unang Pangulohan agud ipanumbalik ang iya mga bugay sang priesthood kag templo.

Pagkatapos nga makasal sa balaan nga templo, kag pagkatapos nga makaangkon sing tatlo ka manami nga kabataan, ang tawo nagluib sa iya asawa kag sa iya sagrado nga mga kasugtanan. Isa ka dalaga ang nagbusong kag gusto magpahulog.

Ang mabuot nga asawa sang bana nagpakitluoy sa babayi nga iya na lang ang bata kag nagpromisa nga padakuon niya ang bata kon matawo na, upod sa iya kaugalingon nga kabataan.

Nagsugot ang dalaga nga indi pag-ipahulog ang bata.

Karon, pulo na ka tuig ang nakaligad. Ginpalangga sang mapainubuson nga sister nga nagapungko sa akon atubangan ang bata nga lalaki nga daw iya gid mismo ini kag ginsugiran ako sang mga pagtinguha sang iya bana nga magpasag-uli kag palanggaon kag atipanon sia kag ang pamilya. Naghibi ang tatay samtang nagahambal sia.

Paano mainakop sining dungganon nga babayi sang Dios ang isa ka bata nga daw iya gid ini mismo bisan adlaw-adlaw sia nga ginapadumdum sini sang pagluib sang iya bana? Paano? Tungod nakakita sia sang kusog paagi kay Jesucristo kag nagapati sia sa kasagrado sang kabuhi, sa kabalaan sang kabuhi. Nakahibalo sia nga ang wala pa matawo nga bata, anak sang Dios, inosente kag putli.

Pinalangga kong mga kauturan, ang nagabuhin nga pagpalangga para sa wala pa matawo nga kabataan sa bilog nga kalibutan daku nga problema. Ginapakamahal sang Dios ang kabuhi. Iya buluhaton kag Iya himaya ang ipahanabo ang pagkawala’y kamatayon kag kabuhi nga wala’y katapusan sa Iya mga kabataan. Bilang mga disipulo ni Jesucristo, ginapakamahal naton ang kabuhi. “Sa sini ang tanan nga tawo makahibalo nga kamo mga disipulo ko, kon maghigugmaanay kamo.” Kabay nga ipakigbahin naton ang aton pagpalangga sing mas bugana sa mga nagakinahanglan gid sa aton. Ginapahayag ko ang akon pagpalangga sa inyo kag ang pagpalangga sang Amay nga Langitnon para sa Iya kabataan nga nagaabot sa kalibutan. Sa ngalan ni Jesucristo, amen.