Kag Nagahambal Kita parte kay Cristo

Pagkatapos sang malawig nga asaynment sa iban nga pungsod, ako kag ang akon asawa nga si Lesa nagkadto sa airport para sa isa pa gid ka biyahe—sa alang-alang nga oras—para makapauli. Samtang nagatindog kami sa mahinay kag malaba nga pila upod sa iban, mabatyagan namon ang nagadugang nga pag-aliwasa sang pareho namon mga pasahero nga makahingabot sa mga flight, matapos ang pagtsekyar sang passport kag visa, kag makapasar sa pag-usisa sa seguridad.

Sang ulihi nakalab-ot kami sa pwesto sang opisyal sa customs nga daw indi apektado sang dako nga presyur kag di-pagkahim-os sa kwarto. Halos awtomatik, nga wala nagatulok sa mata, ginkuha niya ang akon mga dokumento, gin-usisa ang akon litrato, ginbukad ang kada pahina, kag pagkatapos nagalagpok niya nga ginstampahan ang akon passport.

Dayon ginkuha niya ang papeles ni Lesa. Nga wala sing emosyon, nagaduko kag nakatutok sa iya obra, maid-id niya nga gin-usisa ang mga dokumento sing masipat, nga nagatutok sa mga detalye sang dokumento sa iya atubang. Medyo nakibot kami sang gulpi lang nagpundo sia, nagtangla, kag gintulok si Lesa sa mata sing hungod kag mainabyanon. Nga may mapinalanggaon nga yuhum, mahinay niya nga ginstampahan ang passport ni Lesa kag ginbalik sa iya ang mga dokumento. Nagbalos yuhum ang akon asawa, ginbaton ang mga dokumento, kag nagbaylohanay sila sang mapinalanggaon nga mga pulong sang pagpaalam.

“Ano ang natabo?” Pamangkot ko sa iya nga daw indi makapati.

Ginpakita niya dayon sa akon kon ano ang nakita sang agent—gamay nga kard nga may litrato sang Manluluwas. Indi hungod nga nahulog ini halin sa kahita ni Lesa kag nagsuksok sa pilo sang iya passport. Amo ini ang nakita sang opisyal sang customs. Amo ini ang nagbag-o sang bilog niya nga panggiho.

Grace and Truth [Grasya kag Kamatuoran], ni Simon Dewey, sa maayong kabubut-on sang altusfineart.com, © 2025, gingamit nga may pahanugot

Ining gamay nga litrato sang Manluluwas nagkonekta sang mga tagipusuon sang duha ka tawo nga indi kilalahay. Ginahimo sini nga personal ang relasyon nga indi personal, nga ginatigayon ang katahum, milagro, kag pagkamatuod sang Kasanag ni Jesucristo. Sa nabilin sadto nga adlaw kag pirme halin sadto, ginbinagbinag ko ang manami, simple nga tion nga may kahalawhaw kag nagkalipay sa mahimayaon nga epekto sang Kasanag ni Cristo sa mga anak sang Dios.

Mga sumulunod kita ni Jesucristo, kag nagatinguha kita nga mabaton kag mapakigbahin ang Iya kasanag. Ginapahangop sang ngalan sang Simbahan ang aton ginapatihan nga “si Jesucristo mismo ang pangulong bato.” Paagi sa dumaan kag buhi nga mga propeta, ang aton Amay nga Langitnon nagsugo sa aton nga “pamatii Sia!” kag “magpalapit kay Cristo.” “Nagahambal kita parte kay Cristo, nagakasadya kita kay Cristo, nagawali kita parte kay Cristo, [kag] nagapropesiya kita parte kay Cristo.”

Nagatudlo kita nga si Jesucristo ang Anak sang Dios, kag sa tion sang Iya dutan-on nga pag-alagad, si Jesus nagtudlo sang Iya ebanghelyo kag nagpahamtang sang Iya Simbahan.

Nagasaksi kita nga sa katapusan sang Iya kabuhi, si Jesus nagbayad para sa aton mga sala sang nag-antos Sia sa Hardin sang Getsemani,ginlansang sa krus, kag dayon nabanhaw.

Nagakalipay kita nga tungod sa nagabayad-sala nga sakripisyo sang Manluluwas, sarang kita mapatawad kag matinloan sang aton mga sala kon maghinulsol kita. Nagadala ini sa aton sang kalinong kag paglaum samtang ginahimo nga posible nga makabalik kita sa presensya sang Dios kag magbaton sang kabug-osan sang kalipay.

Nagapropesiya kita nga tungod sang Pagkabanhaw ni Jesus, ang kamatayon indi ang katapusan kundi isa ka importante nga tikang paabante. “Tanan kita mabanhaw pagkatapos kita mapatay. Nagakahulugan ini nga ang espiritu kag lawas sang kada tawo magaupod liwat kag mabuhi sa katubtuban.”

Ang buhi nga mga propeta sa aton panahon—nga nagabaton sang rebelasyon halin sa Dios para tudloan kag tuytuyan kita—nagasige pa gid imbitar sa aton nga magpalapit kay Cristo. Ginabuligan nila kita nga isentro ang aton igtalupangod kag mga handum sing mas lubos sa Iya. Mahimo kita maghingalan sang madamo nga mga halimbawa sang mga pagbag-o kag pagpanami nga gin-anunsyo sang Unang Pangulohan nga gindisensyo agud itutok kita kay Jesucristo. Ang pila sini nagalakip sang:

• Ang desisyon nga indi na paggamiton ang “Mormon Church” kag islan ini sang husto nga ngalan nga, Ang Simbahan ni Jesucristo sang mga Santos sa Ulihing mga Adlaw.

• May ara sang bag-o, inspirado nga natuon-kay-Cristo nga tema sang art para i-display sa mga meetinghouse.

• Mga tema sa Young Women kag Young Men nga korum kag musika nga nakatutok kay Jesucristo, pareho sang “Disipulo ako ni Jesucristo” kag “Magtulok kay Cristo.”

• Mas dako nga pagtalupangod sa Pagbayad-Sala kag literal nga Pagkabanhaw ni Jesucristo bilang ang pinakamahimayaon nga mga hitabo sa kasaysayan.

• Ang pagselebrar sang Easter bilang kahiwatan nga nagalawig sing pila ka semana kag indi lang isa ka adlaw nga selebrasyon nga nagahatag importansya kay Jesucristo.

• Ang pagpresentar sang logo sang Simbahan ni Jesucristo kag ang iya sini simboliko nga kinaiya.

Tan-awon naton sing maayo ang epekto sang pila sini sa ila. Una, ang simbolo sang Simbahan.

Sang 2020, ginpakilala ni Pangulong Nelson ang bag-o nga logo sang Simbahan. Ining simbolo nagapakita sang kamatuoran nga si Cristo ara sa sentro sang Iya Simbahan kag dapat mangin sa sentro ang aton mga kabuhi. Makita naton karon ining pamilyar nga simbolo sa mga temple recommend, website kag mga magasin sang Simbahan, bilang simbolo sang Librarya sang Ebanghelyo nga app, kag bisan sa mga military ID tag sang mga miyembro sang Simbahan nga nagaserbisyo sa armado nga kusog. Ang simbolo nagalakip sang ngalan sang Simbahan sa sulod sang sadsaran nga bato, isa ka pahanumdum nga si Jesucristo ang sadsaran nga bato, nga ginapakita diri sa Cambodian kag ginagamit sa 145 ka mga lengguahe.

Ang sentro sang simbolo kopya sang ginapakamahal nga estatwa nga Christus ni Albert Bertel Thorvaldsen, nga lapnagon nga naangot sa Simbahan kag makita sa mga visitors’ center kag sa mga ugsaran sang templo sa bilog nga kalibutan. Ang kaimportante sini sa simbolo sang Simbahan nagapanugyan nga si Cristo dapat ara sa sentro sang tanan nga aton ginahimo. Sa amo man, ang nagauntay nga mga butkon sang Manluluwas nagapakita sang Iya promisa nga hakson ang tanan nga magpalapit sa Iya. Ini nga simbolo nagapakita sang pagpalangga sang Manluluwas nga si Jesucristo kag dalayon nga pahanumdum sang buhi nga Cristo.

Sa akon pagkamausisaon, nagpamangkot ako sa madamo nga mga pamilya kag mga abyan parte sa isa ka importante nga elemento sang simbolo sang Simbahan. Makakilibot nga madamo ang wala nakahibalo sang sagrado nga kinaiya nga iya sini ginarepresentar. Si Jesucristo nagatindog sa idalom sang arko. Nagarepresentar ini sang nabanhaw nga Manluluwas nga nagagwa sa lulubngan. Matuod gid nga ginaselebrar naton ang nabanhaw, buhi nga Cristo, bisan sa paggamit sang simbolo sang Simbahan.

Karon pamalandongan naton ang kahulugan sang Paskwa sang Pagkabanhaw (Easter). Sang sini lang nga mga mensahe sang Unang Pangulohan parte sa Easter, ginpanawagan kita nga “i-selebrar ang Pagkabanhaw sang buhi nga Manluluwas paagi sa pagtuon sang Iya mga pinanudlo kag pagbulig pahamtang sang mga tradisyon sa Easter sa aton sosyedad sa kabilogan, labi na gid sa aton mga pamilya.” Sa malip-ot, ginapaisog kita nga magsaylo sa mas mataas kag mas balaan nga paagi sa pagselebrar sang Easter.

Nanamian ako sang padayon nga rebelasyon parte sa Easter kag nalipay sa madamo ninyo nga mga pagtinguha nga himuon ang Easter nga sagrado kag balaan nga okasyon. Dugang pa sa paghiwat sang isa-ka-oras nga sacrament meeting sa Domingo sang Easter, ang iban nga mga halimbawa sang nagakadapat nga mga aktibidades nagalakip sang mga debosyonal sa ward kag stake, kag mga aktibidades sa Domingo de Ramos kag amo man sa tion sang Semana Santa. Ining mga pagdumdum nagalakip sang mga aktibidades upod ang kabataan kag mga lamharon kag masami nagalakip sang mga koro sang lainlain nga mga pagtuluohan. Ang iban nagahiwat sang “Buhi nga Cristo” nga mga open house para sa mga miyembro kag mga abyan kag nagaentra sa mga kahiwatan sa Easter upod ang mga miyembro sang iban nga relihiyon.

Ining mga aktibidades nagasalamin sang kadam-an sa siyudad sang Jerusalem nga nagtingob sang ila mga tingug sa pagdayaw sang Manluluwas sa tion sang Iya madinalag-on nga pagsulod. Pareho man kanami ang mga report sang inyo mga pagresponde sa pangagda sang Unang Pangulohan nga magsimba sa balay bilang mga pamilya agud saulogon ining pinakaimportante nga pista opisyal.

Nagapati ako nga ang pagsimba sang pamilya sa tion sang Easter nag-uswag sing dako. Duha ka tuig ang nagligad, naghambal ako parte sa determinasyon sang amon pamilya nga mas kaayohon ang paagi nga ginaselebrar namon ang Easter. Sa matuod, ginatinguhaan pa namon ina subong. Pirme gid kami may espesyal nga pagkaon sa Domingo de Paskwa, mga Easter basket kag Easter egg hunt, hasta subong. Ugaling, ang pagdugang sang ginhungod nga espirituhanon nga aspeto nga nagatutok kay Jesucristo kag sa Iya Pagbayad-Sala sa amon selebrasyon nagdala sang manami nga balanse sa amon pagdumdum sining pinakabalaan sa tanan nga hitabo.

Ini nga tuig mangin ang amon ika-tatlo nga pagtinguha nga himuon ang Easter nga mas nakasentro kay Cristo. Pareho sang Pagkabun-ag kon Paskwa, ang amon drama-drama sa pamilya kon Easter nagalakip sang simple nga mga costume, pagbasa sang balaan nga mga kasulatan halin sa Bag-ong Katipan kag Libro ni Mormon, musika, mga larawan nga pang-Easter, lukay (sang lubi)—kag diutay nga kinaburigal, sa prangka lang. Ang pagbasa kag pagrecite sang amon mga bata kag mga apo sang Domingo de Ramos nga mga pagdayaw sang “Hosana … Pagdayawon ang ngalan sang nagakari sa ngalan sang Ginuo; Hosana sa kahitaasan” kag, “Ini amo si Jesus … sang Galilea” daw pareho ka nagakaigo sa “paghidait sa duta sa tunga sang mga tawo nga iya nahamut-an” sa tion sang Paskwa.

May ara na kami karon sang miskla sang mga dekorasyon. Ang sang una halos mga kuneho (bunnies) lang kag Easter eggs, karon nabalanse na sa Christus kag mga imahe sang wala unod nga lulubngan, nabanhaw nga Manluluwas nga nagapakita sa hardin sa gwa sang lulubngan, kag pagpakita sang Manluluwas sa mga Nefinhon. Nagatinguha man kami nga himuon ang Easter nga malawig nga tion imbes nga isa lang ka adlaw. Ginatinguhaan namon nga may mas madamo sing nahibal-an, madinumdumon kag masaulogon sang Domingo de Ramos kag Biernes Santo kag sang sagrado nga mga hitabo sa tion sang bilog nga Semana Santa.

Ang Easter nagatugot sa aton nga pasidunggan ang nagabayad-sala nga sakripisyo ni Jesucristo kag ang natabo gid kag malipayon nga Iya Pagkabanhaw. Mabug-at ang aton mga tagipusuon samtang ginahunahuna naton ang pag-antos sang Manluluwas sa Hardin kag sa Kalbaryo, pero nagakalipay ang aton mga tagipusuon kon ginapanan-aw naton ang wala unod nga lulubngan kag ang langitnon nga pahayag nga “Nabanhaw Sia!”

Ang pagpaisog sang sini lang sang Unang Pangulohan nga “kalangkagan ang Easter kag ang Pagkabanhaw ni Jesucristo—ang pinakamanami sa tanan nga mensahe sa katawhan” nagatalupangod sang importansya sini nga tiempo. Bisan pa nga daw may nagabaskog nga huyog sa lainlain nga Kristiyano nga mga teologo nga kabigon ang Pagkabanhaw nga paanggid ukon simboliko lang, ginapamatud-an naton ang aton doktrina nga “ang Pagkabanhaw nagakahulugan nga ang tanan nga nagkabuhi mabanhaw, kag ang Pagkabanhaw natabo gid.” “Kay subong nga kay Adan ang tanan nagakalamatay, amo man kay Cristo ang tanan buhion.” Ginbugto ni Jesucristo ang mga gapos sang kamatayon para sa tagsa ka buhi nga kalag.

Matuod gid nga kita nagakahalawhaw sa grasya nga ginatanyag ni Jesus sa aton. Hugot naton nga ginabaton ang Iya mga pulong nga “walay tawo nga may gugma nga dako pa sini, nga ihatag sang isa ka tawo ang iya kabuhi tungod sa iya mga abyan.”

Si C.S Lewis nagsiling nga “ang pagwali sang Kristiyanismo nagakahulugan [para sa mga Apostoles] una sa tanan sang pagwali sang Pagkabanhaw. … Ang Pagkabanhaw ang sentro nga tema sang tagsa ka Cristohanon nga sermon nga nasulat sa Mga Binuhatan. Ang Pagkabanhaw, kag ang iya sini mga resulta, amo ang ‘ebanghelyo’ ukon ang maayong balita nga gindala sang mga Kristiyano.”

Ginapahayag ko nga “may yara sang pagkabanhaw, … ang lulubngan wala sing kadalag-an, kag ang kasakit sang kamatayon nadaug tungod kay Cristo.”

Sa paghingapos, nagasaksi ako nga ang tanan nga nagabaton sang mga imbitasyon sang aton buhi nga propeta kag iya mga manuglaygay nga iselebrar sing mas may katuyoan ang sagrado nga mga kahiwatan nga ginarepresentar sang Easter makasalapo nga ang ila kaangtanan kay Jesucristo mas nagabakod.

Pila lang ka adlaw ang nagligad, may nagsugid sa akon parte sa isa ka lola nga gintudlo ang istorya sang Easter sa iya apat-ka-tuig nga apo nga lalaki paagi sa paggamit sang simple nga mga replika sang lulubngan, bato nga nagtabon sa lulubngan, ni Jesus, Maria, mga disipulo kag anghel. Ang gamay nga bata naglantaw kag nagpamati sing maayo samtang ang iya lola nag-istorya parte sa lubong, pagtakop kag pagbukas sang lulubngan, kag ang eksena sa hardin sang Pagkabanhaw. Dayon, tama ka detalyado nga ginsulit niya ang istorya samtang sia mismo ang nagagiho sang mga pigura. Pagkatapos sining manami nga tion, ginpamangkot sia kon nakahibalo sia kon ngaa may ara sang Easter. Nagtangla ang bata kag sa iya gid sang bata nga panghunahuna nagsabat, “Kay nabuhi Sia.”

Ginadugang ko ang akon testimonya sa iya—kag sa inyo, kag sa iya sang mga anghel kag mga propeta—nga nabanhaw Sia kag buhi Sia, nga sa sini nagasaksi ako, sa ngalan ni Jesucristo, amen.