Tampad sa Pagtuluohan nga Ginpakamahal sang aton Katigulangan

Sang nagbisita ako sa Nashville Tennessee Temple para sa temple review, may pribelihiyo ako nga liboton ang bilog nga templo bilang kabahin sining buluhaton, agud tan-awon kon plastado na ang tanan sa sining matahum nga balay sang Ginuo. Nagdayaw gid ako sa painting ni Mary Wanlass nga ginatig-ulohan Carry On [Magpadayon] nga nasab-it sa dingding sa opisina sang matron.

Ini ang istorya sa likod sang painting:

“Sa Missouri sang 1862 ang 14-anyos nga si Mary Wanlass nagpromisa sa iya tagumatayon nga madrasta nga siguruhon niya nga makalab-ot sa Patag sang Great Salt Lake ang iya baldado nga amay kag apat ka magagmay nga manghod. … Si Mary nagabakiro kag nagagatas sang mga baka nga nagaguyod sang karo sa diin nagahigda na lang ang iya amay, kag ginaatipan man niya ang iya … mga utod. Pagkatapos sang biyahe kada adlaw, ginapakaon niya ang pamilya paagi sa pagpanipon sang mga tanom, bulak, kag mga berry nga pwede makaon. Ang iya lang gid giya amo ang nabaton niya nga instruksyon nga magpadayon biyahe pa-weste ‘hasta nga ang mga panganod sa unhan mangin mga bukid sa iya panulok.’

“Nag-abot sila sa Patag sang Utah sang Septyembre, nga nagbiyahe bilog nga tigpamulak kag tig-ilinit. Napatay ang iya amay wala madugay nga nakaplastar ang pamilya sa Utah County, sa diin nagpamana si Mary sang ulihi kag ginpadaku ang iya [kaugalingon] nga pamilya.”

Dalayawon ini nga sugilanon sang pagtuo kag kabakod sang isa ka 14-anyos nga lamharon nga babayi nga makabulig sa kada isa sa aton sa karon nga “magpadayon lang.”

“Magpadayon lang”—ukon sa akon tumandok nga lengguahe nga Dutch, Gewoon doorgaan—nga amo man ang bilog-kabuhi nga prinsipyo sang akon amay kag iloy.

Ang akon ginikanan kag mga ugangan ang mga pionero sa amon pamilya. Gintabok nila ang ila kaugalingon nga “mga patag” pareho sang tanan nga nagapamiyembro sa Simbahan, ang panong sang Ginuo, adlaw-adlaw. Ang ila mga istorya wala sang labot sa mga baka kag mga karo pero may pareho lang nga epekto sa palaabuton nga mga henerasyon.

Ginbaton nila ang ebanghelyo kag ginbunyagan sang hamtong na sila. Nangin mabudlay ang pagkabata sang akon mga ginikanan. Nagdaku ang akon amay sa isa ka isla sang Java sa Indonesia. Sang Ika-duhang Inaway Kalibutanon, pilit sia nga ginseparar sa iya pamilya kag ginpriso sa concentration camp, sa diin nag-antos sia sang indi malaragway nga mga kabudlayan sa linghod nga pangidaron.

Ang akon iloy nagdaku sa pamilya nga separado ang ginikanan kag nag-antos man sa kagutom kag mga kabudlayan sang Ikaduhang Inaway Kalibutanon. Kon kis-a nagakaon na lang sia sang unod sang tulip. Tungod sang mga ginhimo sang iya amay, kag sa nagsunod nga pagdiborsyo niya sa iya iloy, kon kis-a mabudlay para sa iya nga makita ang Amay nga Langitnon nga isa ka mapinalanggaon nga Amay.

Nagkilal-anay ang akon ginikanan sa isa ka kahiwatan sang Simbahan kag wala magdugay nagdesisyon nga magpakasal kag ginselyohan sa Bern Switzerland Temple. Samtang nagahulat sa estasyonan sang tren, nga naubos na ang diutay nila nga sinuptan sa biyahe nila patemplo, nagpanumdum sila kon paano sila mabuhi pero may kompiyansa nga mangin maayo ang tanan. Kag natabo gid man!

Ginsugdan nila ang ila pamilya sa kubos nga isa ka kwarto sa attic sang apartment sa sentro sang Amsterdam. Pagligad sang pila ka tuig nga mano-mano nga pagpanglaba sang ila mga bayo, nakasupot gid man sila sing husto nga kwarta para ibakal sang washing machine. Antes sila makabakal, nagbisita ang bishop, nga nagapangayo sang amot para ipatindog sang meetinghouse sa Amsterdam. Nagdesisyon sila nga ihatag ang tanan nila nga nasupot para sa washing machine kag nagpadayon sa mano-mano nga pagpanglaba.

Bilang pamilya nag-agi kami sa pila ka mga kabudlayan pareho sang iban nga pamilya. Ang mga ini nagpabakod lamang kag nagpadugang sang amon pagtuo kay Ginuong Jesucristo, pareho sang si Alma nagsugid sang iya istorya sa iya bata nga si Helaman, sa diin ginhambalan niya sia nga “ginsakdag sia sa mga pagtilaw kag mga kabudlayan sang tagsa ka sahi tungod ginbutang niya ang iya salig kay Ginuong Jesucristo.

Paano nga ang duha ka tawo nga nag-agi sa tama kadamo nga mga pagtilaw sang bataon pa sila nangin ang pinakamaayo nga mga ginikanan nga akon mahandum? Ang sabat simple: lubos nila nga ginbaton ang ebanghelyo kag gintuman ang ila mga kasugtanan hasta subong nga adlaw!

Pagkatapos sang masobra 65 anyos nga pag-asawahay, ang akon iloy, nga nag-antos sa Alzheimer’s disease, napatay sang Pebrero. Ang akon amay, sa edad nga 92 kag nagaistar pa sa balay, nagabisita sa iya pirme sa iya masarangan hasta nga napatay sia. Sang nagligad, nagmuno sia sa akon mga manghod nga ang makahaladlok nga mga eksperiyensia sa kampo sa Indonesia sang Ika-duhang Inaway Kalibutanon nagpreparar sa iya nga pasensyoso nga maatipan ang iya asawa sa madamo nga tinuig sang nagmasakit sia kag naglubha sa sining terible nga masakit kag sa masubo man nga adlaw nga kinahanglan na niya itugyan ang pag-atipan sa iya sa iban kag mahamulag sa iya tupad. Ang ila prinsipyo sadto kag sa gihapon amo ang “Magpadayon lang,” nga may perpekto nga paglaum kay Cristo nga pagabangonon sa katapusan nga adlaw agud magpuyo upod sa Iya sa himaya sa wala’y katapusan.

Ang ila pagtuo kag mga testimonya ang inspirasyon nga nagahatag sang kusog sa mga henerasyon nga nagsunod sa ila.

Sa baryo nga gindak-an sang akon asawa, ang iya ginikanan, nga maayo nga mga sumilimba, nagbaton sang ebanghelyo bilang hubin nga mag-asawa kag ang akon asawa ang ila duha-ka-tuig nga bugtong nga bata sadto nga tion. Ang ila desisyon nga mangin mga miyembro sang Ang Simbahan ni Jesucristo sang mga Santos sa Ulihing mga Adlaw may daku nga epekto sa ila mga kabuhi kay ginsikway sila sang mga pumuluyo kag sang ila pamilya. Ginkinahanglan ang madamo nga tinuig, pagpadala sang mapinalanggaon nga mga sulat sa mga miyembro sang pamilya, kag pag-alagad sa komunidad antes sila ginbaton liwat.

Isa ka bes, sang ang amay sang akon asawa nagaserbe bilang bishop, gin-akusahan sia sang isa ka butang nga indi matuod kag sa gilayon ginrelease. Ang ugangan ko nga babayi nasakitan gid katama nga ginpamangkot niya ang iya bana kon masimba pa sila. Nagsabat sia nga siyempre masimba sila gihapon kay indi ini simbahan sang mga tawo, kundi iya ini Simbahan ni Jesucristo.

Madugay pa kag nahibal-an ang kamatuoran kag ang pagpangayo sang pasaylo ginhimo. Ang ila kuntani kasandaran nagdugang lang sa ila kabakod kag pagpati.

Ngaa bala nga ang iban sa aton ginapasapayan ang pagtuo kag testimonya sang aton mga ginikanan nga paagi sa ila mga kabudlayan nagpabilin nga matutum? Abi bala naton nga wala sila sing klaro nga paghangop sang mga butang? Indi kag wala sila nadaya! May tama lang sila kadamo nga eksperiyensia sa Espiritu kag makasiling pareho kay Propetang Joseph, “Nahibaloan ko ini, … kag indi ko ini mapanghiwala.”

Wala bala kamo nanamian sang kanta parte sa mga soldado ni Helaman nga makita sa Children’s Songbook?

Bisan nga basi indi amo sini ang kaso, pareho sa naagyan sang akon iloy sang bata pa, sarang kamo mangin isa sinang “maayong ginikanan nga gapalangga sa Ginuo” kag magpakita sang matarong nga ehemplo sa iban.

Mabatyagan bala naton nga matuod gid ini samtang ginakanta naton? Mabatyagan bala ninyo nga kamo “pareho sa mga soldado ni Helaman” kag kamo “mangin mga misyonero sang Ginuo nga magadala sang iya kamatuoran sa kalibutan”? Nabatyagan ko ini sa madamo nga okasyon samtang ginakanta ini sa pila ka FSY kag iban pa nga mga pagtilipon sang mga lamharon.

Ukon ano bala ang nagakabatyagan naton kon kantahon naton ang himno nga “True to the Faith”?

Sa mga ulihing tubo kon diin man kamo kag kon ano man ang sitwasyon ninyo, palihog magtuon kag magbaton sang kusog sa pagtuo kag mga testimonya sang mga nauna sa inyo. Mabulig ini sa inyo nga maintiendihan nga para makaangkon ukon magpatubo sang testimonya, dapat maghimo sang mga sakripisyo kag ang “sakripisyo nagadala sang mga bugay sang langit.”

Kon nagapanumdum kamo sang sakripisyo nga matuod gid nga magabugay sang inyo kabuhi, palihog binagbinaga kag pangamuyoi ang imbitasyon sang aton pinalangga nga propeta, si Pangulong Nelson, sang ginpangabay niya ang “tagsa ka takos, makasarang nga pamatan-on nga maghanda kag maglakat sa misyon. Para sa mga pamatan-on nga mga Santos sa Ulihing mga Adlaw, ang pagserbisyo sa misyon isa ka responsibilidad sang priesthood. …

“Para sa … lamharon kag makasarang nga mga sisters, ang misyon isa man ka mabaskog, pero opsyunalnga oportunidad.”

Mahimo kamo tawgon bilang service ukon teaching missionary. Ining duha ka klase sang mga misyonero nagabulig sa pareho lang nga katuyoan sa pagdala sang mga kalag kay Cristo, ang kada isa sa ila pinasahi kag gamhanan nga paagi.

Sa pareho nga klase sang pagserbisyo, mapakita ninyo sa Ginuo nga palangga ninyo Sia kag nga gusto ninyo nga mas makilala Sia. Dumduma, “Kay paano makilal-an sing isa ka tawo ang amo nga wala niya maalagaran, kag isa ka estranghero sa iya, kag malayo sa mga panghunahuna kag mga tinutuyo sang iya tagipusuon?”

Tanan kita, bisan una man kita nga henerasyon sa ebanghelyo ukon ika-lima, dapat magpamangkot sa aton kaugalingon, Ano nga mga istorya sang pagtuo, kabakod, kag selestiyal nga pangako ang akon ipasa sa madason nga henerasyon?

Padayunon naton tanan ang aton pagpaninguha nga makilala ang aton Manluluwas, si Jesucristo, sing mas maayo kag himuon Sia nga sentro sang aton mga kabuhi. Sia ang bato nga sa diin dapat kita magpasad agud nga kon mangin mabudlay ang panahon, makatindog kita sing malig-on.

Dapat kita mangin “tampad sa pagtuluohan nga ginpakamahal sang aton katigulangan, tampad sa kamatuoran nga ginpanginmatyan sang mga martir, sa sugo sang Dios, kalag, tagipusuon, kag kamot, matutum kag tampad kita magpabilin.” Sa ngalan ni Jesucristo, amen.