Nadiosan a Turay, Natan-ok nga Agtutubo a Lallaki

Agyamanak, Elder Andersen, para iti dayta naisangsangayan a panangipeksa iti bileg ti priesthood ken ti bileg ti Pannubbot ti Mangisalakan.

Maysa a Domingo iti daytoy Enero, bayat ti panagtugawko iti miting iti sakramento, nasurok a sangadosena a babbarito ti nakanunongan a ma-advance iti Aaronic Priesthood. Nariknak ti panangbalbaliw ti lubong.

Nabigbigko nga iti intero a lubong, iti kada time zone, kadagiti miting ti sakramento, kas iti dayta, pinullo a ribu a deacon, teacher, ken priest—kas iti gayyem ni Presidente Holland itoy a bigat, ni Easton—ti makankanunongan tapno maordenanda kadagiti priesthood ministry iti tungpal biag a mangsakup iti kabayag ken kadakkel ti panaguummong ti Israel.

Tunggal Enero, maipatay dagiti ima iti ulo ti agarup 100,000 nga agtutubo a lallaki, a mangikonekta kadakuada babaen ti ordinansa iti naraniag a linia ti turay nga agsubli iti panawen ti Pannakaisubli kada Joseph ken Oliver ken ni Juan Bautista, ken ni Jesucristo.

Ita, ti simbaantayo saan a kanayon a demonstratibo a simbaan. Ditoy, agaramidtayo a di mangawis imatang ti kaaduan.

Ngem kaskasdi, ti pannakakitak kadagiti kaor-orden a priesthood holder a nagwaras iti intero a daga, napanunotko—iti “simbaan ti rag-o” a kita ti wagas—no di koma maipukkaw daytoy manipud iti atep. “Ita,” panagkunak, “adda koma dagiti trumpeta ken piangpiang ken sumsumged a kandela ti Roma. Adda koma dagiti parada!”

Gapu ta ammotayo ti bileg ti Dios no ania a talaga dayta, saksikami ti pannakasinga dagiti mismo a pagtuladan daytoy a lubong babaen ti nadiosan a turay a mangpunno iti daga.

Dagitoy a panagorden ti mangirugi kadagitoy a babbarito iti tungpal biag a panagserbi bayat ti panangsapulda iti bagbagida iti agsasaruno a panawen ken lugar a ti presensia ken kararagda ken dagiti bileg ti priesthood ti Dios nga iggemda ket nalaus ti pategna.

Daytoy a panagsasaganad ti pasamak ket nangrugi iti agserserbi nga anghel nga imbaon ti Dios. Nagparang ti nagungar a Juan Bautista idi un-unana kada Joseph ken Oliver, impatayna dagiti imana iti uloda, ket kinunana, “Kadakayo padak a katulongan, iti nagan ti Mesias italekko ti Kinasaserdote ni Aaron, a mangiggem iti tulbek iti panagserserbi dagiti anghel, ken ti ebanghelio ti panagbabawi, ken ti panagbuniag babaen ti pannakaipabatok para iti pannakaugas ti basbasol” (Doktrina ken Katulagan 13:1).

Inawagan ni Juan daytoy a turay ti “Kinasaserdote ni Aaron,” mayannurot iti nagan ti kabsat ni Moises ken kaduana iti priesthood. Idi un-unana, dagiti addaan iti daytoy a priesthood ni Aaron nasken a mangisuro ken tumulong kadagiti ordinansa—ordinansa a mangipamaysa iti kinadisipulo iti masanguanan a Mesias, ni Apo Jesucristo (kitaen iti Deuteronomio 33:10).

Silalawag nga ituding ti libro ti Dagiti Numero kadagiti addaan iti kinasaserdote ni Aaron dagiti trabaho a mangasikaso kadagiti alikamen (vessel) dagiti ordinansa. “Ket tudingamto ni Aaron ken dagiti annakna … ket pagrebbengandanto … ti lamisaan … ken dagiti alikamen ti santuaro a pangserbianda” (Dagiti Numero 3:10, 31).

Natungpal ken nasukatan ti ordinansa ti Daan a Tulag iti panagidaton iti animal babaen ti biag ken Pannubbot ti Mangisalakan. Nasukatan dayta kadaanan nga ordinansa iti ordinansa nga awagantayo itan iti sakramento ti Pangrabii ti Apo.

Italek ti Apo dagiti agdama nga agikut iti Kinasaserdote ni Aaron nga aramidenda dagiti isu met laeng a banag nga inaramidda idi un-unana: mangisuro ken mangannong kadagiti ordinansa—amin tapno ipalagip kadatayo ti Pannubbotna.

No tumulong dagiti deacon, teacher, ken priest iti sakramento, awatenda dagiti bendisionna a kas met laeng iti amin: babaen ti panagtungpalda iti katulagan nga aramidenda bayat ti saggaysa a pannakiranud iti tinapay ken danum. Ngem babaen ti panangannongda kadagitoy sagrado nga rebbengen, ad-adu pay ti masursuroda maipapan kadagiti akem ken pagrebbenganda iti priesthood.

Naawagan ti Aaronic Priesthood kas pangisagana a priesthood gapu ta ipalubos dagiti ordinansana a makapadas iti dagsen ken rag-o ti kaadda iti panangibaon ti Apo, a mangisagana kadakuada para iti masanguanan a panagserbi iti priesthood, inton mabalin a maawaganda nga agserbi kadagiti di mapakpakadaan a wagas—a pakairamanan ti panangibalikas iti naparegta a bendision kadagiti panawen a dagiti namnama ken arapaap, ken uray ti biag ken ipapatay, ket agpannuray iti di natalged a kinatimbeng.

Kasapulan ti napasnek a panagsagana dagiti kasta a napasnek a namnama.

Ilawlawag ti Doktrina ken Katulagan a dagiti deacon ken teacher ket “mangballaag, mangilawlawag, mangigunamgunam, ken mangisuro, ken mangawis iti amin nga umasideg ken ni Cristo” (Doktrina ken Katulagan 20:59). Dagiti priest, kas nayon kadagitoy a gundaway, ket “mangasaba … ken mamuniag” (Doktrina ken Katulagan 20:50).

Bueno, kasla adu amin dagita, ngem iti pudno a lubong, gagangay a mapasamak dagitoy a banag, a gagangay ken iti intero a lubong.

Insuro ti maysa a bishop ti baro a panguluenna a deacons quorum dagitoy a pagrebbengan. Rinugian ti panagsarita ti baro a panguluen maipapan no ania ti maaramidda iti korumda ken iti ward-da. Inkeddengda a nasken a sarungkaranda dagiti nataengan a miembro ti ward tapno maammuan ti kasapulanda ken kalpasanna aramiden dayta.

Karaman dagidiay a nagserbianda ket ni Alan, maysa a naulpit, masansan a narugit, ken no dadduma natangsit a kaarruba. Nagbalinen a miembro ti Simbaan ti asawa ni Alan, ni Wanda, ngem ni Alan, kas kunatayo, maysa a narikut a tao.

Kaskasdi, napan nagtrabaho dagiti deacon, a sikakatawa a dida inkankano dagiti insultona, bayat panagpalada iti niebe ken agiruar iti basura. Mabalin a narigat a guraen dagiti deacon, ket idi agangay nangrugin nga impateg ida ni Alan. Adda idi panawen nga inawisda iti simbaan.

“Diak magustuan ti simbaan,” insungbatna.

“Bueno, magustuannakami,” kinunada. “Isu a kumuyogka kadakami. Umayka laeng iti mitingmi iti korum no kayatmo.”

Ket babaen ti anamong ti bishop, immay—ket nagtultuloy iti yaayna.

Nagbalin a teacher dagiti deacon, ket bayat ti panagserbida kenkuana, insurona ida nga ag-repair kadagiti kotse ken agaramid iti bambanag. Idi panawen a nagbalin a priest dagiti deacons-turned-teacher, inawagan ida ni Alan a “babbarok.”

Sipapasnek nga agsagsaganada itan para kadagiti mision ket dinamagda kenkuana no mabalinda ti agsanay kadagiti adalen ti misionario a kaduada isuna. Insapatana a dinto pulos dumngeg wenno mamati, ngem, wen, mabalinda ti agsanay iti balayna.

Ket kalpasanna nagsakit ni Alan. Ket limmukneng ti pusona.

Ket iti maysa nga aldaw iti miting ti korum, sidudungngo a kiniddawna kadakuada nga ikararaganda nga isardengnan ti agsigarilio, ket isu nga inkararaganda. Ket kalpasanna simmurotda kenkuana nga agawid ket imbellengda ti amin a makitada a tabako.

Iti panagkapuy ti salun-atna, naipan iti ospital ken rehab center ni Alan, nagserbi “dagiti babbarona” kenkuana, a siuulimek a mangipakpakita iti bileg ti priesthood ken pudno nga ayat (kitaen iti Doktrina ken Katulagan 121:41).

Nagtultuloy ti milagro idi kiniddaw ni Alan nga agpabuniag—ngem kalpasanna pimmusay sakbay a napasamak daytoy. Iti kiddawna, dagiti deacon-na a nagbalin a priest ti nangkarga iti lungonna ken nagsarita iti pumponna, a sadiay—maitunos—a nangballaag, nangilawlawag, nangigunamgunam, nangisuro, ken nangawisda iti amin ken Cristo.

Idi agangay, iti templo, maysa kadagiti “babbaro ni Alan” a nangbuniag iti dayta sigud a presidente ti korum dagiti deacon kas proxy ni Alan.

Amin a kinuna ni Juan Bautista nga aramidenda, inaramidda. Inaramidda ti aramiden dagiti deacon, teacher, ken priest iti intero daytoy a Simbaan ken iti intero a lubong.

Maysa kadagiti banag a rebbengen dagiti addaan iti priesthood ni Aaron ket mairaman ti ordinansa ti sakramento.

Idi napan a tawen, naam-ammok ti maysa a bishop ken ti nasingpet nga asawana. Iti kallabes abigat ti Sabado, agbibiaheda a mapan iti buniag ti anakda a lalaki ken sinagabada ti nakalkaldaang ken kellaat a pannakapukaw ti patpatgenda a dua-ti-tawenna nga anakda a babai, ni Tess.

Kabigatanna naguummong dagiti miembro ti ward-da para iti miting ti sakramento a napnuan pannakipagrikna, nga agladladingit gapu iti ipupusay daytoy nasingpet a bassit nga ubing. Awan ti nangnamnama nga addan iti simbaan ti pamilia ti bishop iti dayta a bigat, ngem dua a minuto sakbay a mangrugi ti miting, siuulimek a simrekda a napan iti tugawda.

Napan ti bishop iti sango ket nilabsanna ti gagangay a tugawna iti baet dagiti mamagbagana ket nagtugaw ketdi iti baet dagiti priest-na iti lamisaan ti sakramento.

Iti dayta a rabii ti panagladingit ken di pannaturog a panagsapsapulna iti pannakaawat ken talna, immawat iti impresion a ti kasapulan unay ti pamiliana—ken ti kasapulan unay ti wardna. Nangngeganda iti timek ti bishop-da, ti presidente ti Aaronic Priesthood ti wardda, ken ti agladladingit nga amada, a mangisawang kadagiti kari ti katulagan iti sakramento.

Isu nga, iti umno a tiempo, nakipagparintumeng kadagiti priest ket nakisao iti Amana. Buyogen ti nalaus a panagladingit iti dayta a gundaway, insawangna ti sumagmamano a kabibilgan a balikas a maisao ti asino man iti napigsa iti daytoy a biag.

Dagiti balikas nga agnanayon ti banagna.

Dagiti balikas ti ordinansa.

Dagiti balikas ti katulagan.

Ti pammilin a mangisilpo iti mismo a panggep daytoy a biag—ken iti katan-okan a pagbanagan ti plano ti Nailangitan nga Ama para kadatayo.

Mailadawanyo kadi ti nangngeg ti kongregasion iti dayta a kapilia iti dayta nga aldaw—no ania ti nariknada kadagiti balikas a mangngegtayo iti tunggal Domingo iti kapiliatayo?

“O Dios, Agnanayon nga Ama, dawatenmi kenka iti nagan ti Anakmo, ni Jesucristo, a bendisionan ken pasantuem daytoy a tinapay kadagiti kararua dagiti amin a mairanud iti daytoy; tapno lak-amenda a silalagip iti bagi ti Anakmo, ken paneknekanda kenka, O Dios, Agnanayon nga Ama, tapno siaayatda a mangawat iti nagan ti Anakmo, ken kanayon a laglagipenda, ken tungpalenda dagiti bilin nga intedna kadakuada, tapno kanayon nga agtaeng kadakuada ti Espirituna. Amen” (Doktrina ken Katulagan 20:77).

Ket kalpasanna: “O Dios, Agnanayon nga Ama, dawatenmi kenka, iti nagan ti Anakmo, ni Jesucristo, a bendisionan ken pasantuem daytoy a danum kadagiti kararua dagiti amin nga uminum iti daytoy, tapno aramidenda a silalagip iti dara ti Anakmo, a nagsayasay gapu kadakuada; tapno paneknekanda kenka, O Dios, Agnanayon nga Ama, tapno kanayon a laglagipenda, tapno agtaeng kadakuada ti Espirituna. Amen” (Doktrina ken Katulagan 20:79).

Paneknekan daytoy naimbag nga ama ken ina a natungpal dayta a kari. Kinapudnona, aramidenda, iti agnanayon a liwliwada, “agtaeng kadakuada ti Espirituna.”

Paneknekak a dagiti addaan iti Aaronic Priesthood, nga addaan kadagiti bileg, ordinansa, ken pagrebbenganna, ket bendisionandatayo amin babaen kadagiti tulbek ti mismo a “panagserserbi dagiti anghel, ken ti ebanghelio ti panagbabawi, ken ti panagbuniag babaen ti pannakaipabatok para iti pannakaugas ti basbasol” (Doktrina ken Katulagan 13:1). Iti nagan ni Jesucristo, amen.