Sika ti Cristo
(Mateo 16:16)
Kayattayo kadagiti annaktayo a mamati ken Jesucristo, agkameng ken Jesucristo ken iti Simbaanna babaen ti katulagan, ken agregget nga agbalin kas ken Jesucristo.
Idi adda iti maikapat a grado ti baromi a ni Eli, nangipasdek ti klasena iti mock government a nangpilian dagiti kapatadana nga agserbi kas hues iti klase. Maysa nga aldaw, simmarungkar ti agdama a hues iti Utah Second District Court, inkawesna ken Eli ti opisial a roba, ket kalpasanna nagsapata iti opisina iti klaseda. Daytoy ti nanglukat iti ubing a panunot ni Eli tapno agessem nga agadal iti abogasia ken ti Mismo a Mangmangted iti Linteg, ni Jesucristo.
Kalpasan ti adu a tawen a napasnek a panagregget, nakaawat ni Eli iti imbitasion nga aginterbyu iti maysa kadagiti kangatuan a pilina para iti law school. Kinunana, “Nanang, nadamag kaniak ti 10 a saludsod. Daytoy ti maudi a saludsod, ‘Sadino ti pangalaam iti moral a kompasmo?’ Kinunak nga iti unos ti pakasaritaan ti sangkataw-an ket nakagun-od kadagiti sistema ti moralidad babaen ti panangitulad iti biagda kadagiti arketipo (archetypes). Ti arketipo ti moralidad, ikarigatak ti mangitulad iti biagko iti biag ni Jesucristo. Kinunak a no tungpalen ti amin a sangkataw-an dagiti pannursuro ni Jesucristo iti Kaskasaba iti Bantay agbalin a nasaysayaat, nataltalna a lugar ti lubong.” Kalpasanna, naggibus ti interbyu, ket napanunotna, “Awanen dagiti arapaapko idi ubingak. Awan iti sekular nga akademia ti agtarigagay a dumngeg maipapan ken Jesucristo.”
Kalpasan ti dua lawas, na-admit ni Eli nga adda iskolarsipna. Sakbay ti panagkumitna, binisitami ti kampus. Kasla maysa a kastilio ti law school ken masarakan iti nangato a turod a mangbuybuya iti napintas a dan-aw. Nakaskasdaaw ta bayat pannagnami iti napintas a library ken nangayed a pasilio, nakitami kadagiti bandera ken naikitikit iti batbato dagiti kababalin manipud iti Kaskasaba iti Bantay.
Ti Kaskasaba iti Bantay ket di mapagduaduaan a kalatakan a diskurso a naisawang. nangyuna kadagiti pannursuro daytoy. Awan sabali a kaskasaba a mangipaawat a nasaysayaat kadatayo iti kinatao ni Jesucristo, dagiti nadiosan a kababalinna, ken ti ultimo a panggeptayo nga agbalin a kas Kenkuana.
Mangrugi ti tungpal biag a kinadisipulo ni Jesucristo iti taengtayo—ken iti Primary, uray pay iti 18 a bulan ti edad. Kayattayo kadagiti annaktayo a mamati ken Jesucristo, agkameng ken Jesucristo ken iti Simbaanna babaen ti katulagan, ken agregget nga agbalin kas ken Jesucristo.
Mamati ken ni Jesucristo
Umuna, mamati ken ni Jesucristo.
Kalpasan ti kaskasaba ti tinapay ti biag, “adu kadagiti disipulo [ti Apo]” ti narigat nga umawat iti pannursuro ken doktrinana, ket “nagsublida, ket saanda a kimmuyog kenkuana.” Kalpasanna, timmaliaw ni Jesus iti Sangapulo-ket-dua ket dinamagna ti makasair-puso a saludsod: “Kayatyo met ti pumanaw?”
Insungbat ni Pedro:
“Apo, siasino pay ti papananmi? adda kenka dagiti balikas ti biag nga agnanayon.
“… Mamatikami ken ammomi a sika ti Cristo, ti Anak ti sibibiag a Dios.”
Kas impakita ni Pedro, ti panamati ket “kaadda ti pammati iti maysa a tao wenno panangawat iti maysa a banag kas pudno.” Ket tapno ti pammatitayo ti mangiturong iti pannakaisalakan, nasken a naisentro ken Apo Jesucristo. Aramatentayo ti pammati ken Jesucristo no addaantayo iti pammatalged a sibibiag Isuna, [pannakaawat] iti [pudno] a kbabalin ken [kinataona], ken pannakaammo nga ikarkarigatantayo ti agbiag a mayannurot iti pagayatanna.
Impakdaar ti ay-ayatentayo a propeta, ni Presidente Russell M. Nelson, “Ti pammati ken ni Jesucristo ti pundasion ti amin a pammati ken ti pagayusan ti nadiosan a bileg.”
Kasano a matulongantayo dagiti ubbing a mangpapigsa iti pammatida ken Jesucristo ken magun-od ti nadiosan a bilegna? Ditay kasapulan ti kumita iti sabali pay no di iti Mangisalakantayo Mismo.
“Nagsao [ti Apo] kadagiti tao, a kunkunana:
“Adtoy, siak ni Jesucristo. …
“Bumangon ket umaykayo. …
“… Immasideg ti ummong, ket indapadapda dagiti imada iti bakrangna, ken riniknada ti lamma ti lansa kadagiti ima ken sakana; ket daytoy ti inaramidda, saggaysada a napan … ket nakitada kadagiti matada ken nariknada kadagiti imada, ket naammuanda a sitatalged ket nagpaneknekda, nga isu.”
Awisenkayo a mangutob no ania ti mabalin a langa daytoy iti biag ti babassit nga ubbing. Mangngegda kadi dagiti pammaneknek ken ni Cristo ken ti ebangheliona? Makitada kadi dagiti naraeman, nadayaw a ladawan ti ministro ken kinadiosna? Marikna ken mabigbigda kadi ti Espiritu Santo a mangpampaneknek iti kinapudno ken kinadiosna? Ammoda kadi ti mensahe ken misionna?
Agkameng ken ni Jesucristo ken iti Simbaanna
Maikadua, agkameng ken ni Jesucristo ken iti Simbaanna.
Napadasan dagiti tao ni Ari Benjamin ti naindaklan a panagbalbaliw ti puso ket babaen ti katulagan indatonda ti biagda iti panangaramid iti pagayatan ti Dios. Gapu iti katulagan nga inaramidda iti Dios ken ni Jesucristo, “naawaganda nga annak ni Cristo, annakna a lallaki, ken babbai.” Kas miembro ti Ti Simbaan ni Jesucristo dagiti Santo iti Ud-udina nga Aldaw, addaantayo iti katulagan a pagrebbengan a mangbangon iti pagarianna ken agsagana para iti panagsublina.
Kasano a matulongantayo dagiti annaktayo nga agaramid ken agtungpal iti sagrado a katulagan? Iti manual nga Umaykayo, Sumurot Kaniak iti apendiks A ken B, makitatayo dagiti pangrugian a pagsasaritaan ken adalen a mangpabileg kadagiti pamilia ken mangsuporta kadagiti mannursuro ken lider iti sagrado a panagaywanda a mangisagana iti ubbing para iti tungpal biag iti dana ti katulagan ti Dios.
Agbalin a kas ken ni Jesucristo
Maikatlo, agbalin a kas ken ni Jesucristo.
Iti Libro ni Mormon, binalakadan ti Mangisalakan dagiti kaaw-awag a disipulona a tumulad Kenkuana agingga a mabalin: “Ania a kita ti tao ti rumbeng a pagbalinanyo? Pudno kunak kadakayo, kas kaniak.”
Kasano a matulongantayo dagiti nabuniagan ken nakumpirmaan nga ubbing a mangtungpal iti natulagan a pagrebbenganda a mangummong iti bagbagida ken iti dadduma ken Jesucristo? Agkasapulan ti tungpal biag a kinadisipulo nga “agbalin a … managtungpal iti sao, ket saan laeng a managdengngeg.”
No aw-awisenyo dagiti kaubingan a disipulo ti Apo, alaenyo koma ti tunggal gundaway nga dauluan ken iwanwan ida, magna iti sibayda, ken tumulong kadakuada a mangsapul iti Dalan. Makiuman kadagitoy napateg a babassit nga ubbing no agsaganada a mangisuro, agpaneknek, agkararag, wenno agserbi tapno agtalekda ken mapadasda ti rag-o iti panangtungpalda iti pagrebbenganda. Agsapul iti naparegta a wagwagas a tumulong kadakuada nga ammuen a daytoy ti Simbaanda ken napateg ti akemda iti panagsagana iti panagsubli ti Mangisalakan.
No ni Jesucristo ti agbalin a pokus ti biagtayo, agnanayon a mabalbaliwan no ania ti tarigagayantayo, ken no kasano a tarigagayantayo. Balbaliwan ti kumbersion ti amin! Balbaliwanna ti kinataotayo “nga awanen ti tarigagaytayo nga agaramid iti dakes, ngem ti ketdi agtultuloy nga agaramid iti naimbag.” Balbaliwanna no kasano a bubosentayo ti orastayo, ti resources-tayo; no ania ti basaen, buyaen, denggen, ken ibinglaytayo. Balbaliwanna pay no kasano a sungbatantayo ti nalatak, akademiko, career-on-the line interview.
Nasken a yunegtayo ti Lawag ni Jesucristo iti tunggal suli ti biagtayo. No ditay paneknekan ti kinapudno ti premortal a Kinadiosna, ti nadiosan a misionna, ken ti Panagungarna a manglettat iti pagbaludan iti taengtayo ken iti tunggal miting daytoy a Simbaan, ken dagiti mensahetayo ti ayat, serbisio, kinapudno, pakumbaba, panagyaman, ken asi ket makapagbalin a mangparparegta a bitla maipapan ti napudnuan a panagbiag. No awan ni Jesucristo awan ti bileg nga agbalbaliw, awan ti panggep a tarigagayan, ken awan ti panagkappia dagiti rigat ti biag. No kasualtayo iti kinadisipulotayo ken Jesucristo, mabalin a makadadael kadagiti annaktayo.
No ibagatayo iti annaktayo nga ay-ayatentayo ida, ibagbagatayo met kadi kadakuada nga ay-ayaten ida ti Amada iti Langit ken Mangisalakan a ni Jesucristo? Mabalin a liwliwa ken makaparegta ti ayattayo, ngem ti ayatda makapasanto, makaitan-ok, ken makaagas.
Saan koma a parparbo a Jesus daytoy a Jesus, wenno narabaw a Jesus, wenno awan bagina a Jesus, wenno kasual a Jesus, wenno di am-ammo a Jesus, ngem nadayag, mannakabalin amin, nagungar, naitan-ok, madaydayaw, nabileg Bugtong nga Anak ti Dios, a nabileg nga isalakan. Ket kas maysa nga ubing iti Pilipinas a nagpaneknek kaniak iti maysa nga aldaw, “Maikaritayo nga isalakan!” Iti sagrado ken nasantuan a Naganna “nga inkeddeng ti Dios nga agbalin [a naindaklan] a mamagkappia,” . ni Jesucristo, amen.