Ti Nailangitan a Sistema a Mangiwanwan Kadatayo
Bayat nga ipokustayo ti biagtayo ken ni Jesucristo, masarakantayo ti dalantayo nga agsubli, agibtur ken agrag-o agingga iti panungpalan.
Binalbaliwan ni Jesucristo ti biagko idi nabuniaganak iti edad a 26 iti patpatgek a Frutillar, Chile. Dayta a panawen, gapu iti trabahok nakapagdaliasatak kadagiti taaw, karayan, ken dan-aw iti Patagonia ti Chile. Kalpasan ti panagbuniagko, naaddaanak iti baro ken naiduma a pannirigan iti trabahok ken iti biagko, a mabigbigko a pudno nga “ipamatmat amin dagiti banag nga adda Dios.”
Iti nakaparsuaan, mayanak dagiti salmon iti nagtaudan dagiti karayan. Addanto tiempo iti biagda a masapul nga aglangoyda nga agpababa iti karayan tapno makadanonda iti taaw, a sadiay masarakanda ti taraon ken aglawlaw a kasapulan iti panagdakkelda.
Ngem ti taaw ket napeggad met, a sadiay aglemlemmeng dagiti mangnganup ken mangngalap a mangtiliw kadagiti salmon babaen iti narangrang a banniit (hook) a mangtulad iti maysa a makan ngem saan a mangtaraon kadakuada. No makalasat ti salmon kadagitoy a peggad, nakasaganadan a mangusar iti nabileg a sistema a mangiwanwan kadakuada tapno agsublida iti mismo a lugar a nakayanakanda, a pakasuotanda kadagiti baro ken pamiliar a karit. Adun a tawen nga inadal dagiti sientista ti panagakar-akarda ket natakuatanda nga agus-usarda iti magnetic map, a kas iti GPS, a mangiturong kadakuada iti maudi a destinasionda a di nakappapati ti kinaeksaktona.
Makapagsublitayonto amin iti maysa nga aldaw iti nailangitan a pagtaengan a naggapuantayo. Ket kas iti salmon, addaantayo iti bukod a magnetic map, wenno Silaw ni Cristo, a mangiwanwan kadatayo sadiay. Insuro ni Jesus kadagiti disipulona, “Siak ti dalan, ti kinapudno, ken ti biag: awan ti umay iti Ama, no di magna kaniak.”
Bayat nga ipokustayo ti biagtayo ken ni Jesucristo, masarakantayo ti dalantayo nga agsubli, agibtur ken agrag-o agingga iti panungpalan. Insuro ni Presidente Russel M. Nelson a “ti rag-o a mariknatayo ket bassit ti pakainaiganna iti kasasaad iti biagtayo ngem ti amin ket mainaig no ania ti pokus iti biagtayo.”
Ti Nadiosan a Kababalin ken ti Pagtungpalantayo
Manipud iti waragawag ti kaamaan mabasatayo a “tunggal maysa ket maipatpateg nga espiritu nga anak dagiti nailangitan a nagannak, ket, iti kasta, tunggal maysa ket addaan iti nadiosan a kababalin ken pagtungpalan. … Iti premortal a lubong, ammo dagiti espiritu nga annak ken nagdaydayawda iti Dios kas Agnanayon nga Amada ken inawatda ti planona a pakagun-odanda iti nagtagilasag a bagida ken padas iti daga tapno dumur-asda nga agturong iti pannakaan-anay ket maragpatdanto ti nadiosan a pagtungpalanda a kas agtawid iti agnanayon a biag.”
Sakbay ti pannakayanakna, nagparang ni Jesucristo ken ni Moises ket nakisarita kenkuana iti biang ti Ama. Imbagana ken Moises nga adda naindaklan a paaramidna kenkuana. Bayat dayta a panagsaritada, namin-adu nga inawagan ti Apo isuna iti “anakko”.
Kalpasan dayta a pasamak, dimteng ni Satanas a nangsulsulisog kenkuana, a nagkuna, “Moises, anak ti tao, agdaydayawka kaniak.”
Simmungbat ni Moises iti sulisog babaen ti pananglagipna iti nadiosan a kababalinna, a kinunana, “Asinoka? Ta adtoy, siak ti anak ti Dios.” Ti kinapudno ti nangwayawaya ken Moises manipud iti panangraut ti kabusor.
Kakabsatko, pudno dagiti banniit (hook) ti mortalidad. Masansan a makaallukoyda, ngem maymaysa laeng ti panggepda: ti mangiyadayo kadatayo iti pagayusan ti sibibiag a danum nga agturong iti Ama ken iti biag nga agnanayon.
Ammok no kasano ti kinapudno dagiti banniit (hook) ti mortalidad. Maysa a Domingo, kas baro a convert, mangisursuroak idi iti maysa a klase ti priesthood idi timmaud ti di makaay-ayo a saritaan. Narigatannak a nangileppas ti leksionko. Tinagidakesko ket nariknak a siak ti biktima. Awan pulos ti nasaok, nagturongak iti pagruaran ket napanunotko a saanakto pay laeng nga agsubli iti simbaan.
Iti dayta a kanito maysa a maseknan a priesthood holder ti nagtakder iti sanguanak. Siaayat nga inawisnak nga agpokus ken Cristo ken saan nga iti pasamak a napasaranmi iti klase. Iti pananglagipko iti dayta a padas, imbagana kaniak a nakangngeg iti timek a nangibaga kenkuana, “Surotem; napateg isuna kaniak.”
Patpatgek a gagayyemko, napategtayo amin Kenkuana. Insuro ni Presidente Nelson a, “gapu iti katulagantayo iti Dios, saanto a pulos a mabannog kadagiti panagreggetna a tumulong kadatayo, ken pulos a dinanto maibus ti naasi nga anusna kadatayo.” Ti nadiosan a kababalintayo ken ti naitulag a relasiontayo iti Dios ket mangted iti karbengantayo nga umawat iti nadiosan a tulong.
Ti Pannakasapul a Mataraonan
No kasano a kasapulan a mataraonan ti salmon iti taaw tapno dumakkel, kasapulan met a mataraonan ti bagitayo iti naespirituan tapno maliklikan iti matay iti naespirituan a malnutrision. Ti kararag, dagiti nasantuan a kasuratan, ti templo, ken ti regular a panagdar-ay kadagiti miting iti Domingo ket napateg iti naespirituan a menu-tayo.
Idi Nobiembre 1956, ni Ricardo Garcia ket nabuniagan idiay Chile, a nagbalin a kaunaan a kameng ti Simbaan iti pagiliak. Maysa nga aldaw sakbay a natay, imbagana iti pamilia ken gagayyemna, “Adu a tawenen ti napalabas idi inawisdak dagiti misionario nga agbalin a naragsak a kadua ti pamiliak. Naragsakak a tao. Ibagayo iti amin iti Chile a ti ebanghelio ket kinaragsak.”
Kalpasan a nataraonan iti ebanghelio ni Jesucristo, indedikar ni Ricardo ti intero a biagna iti panagserbi iti Dios ken iti kaarrubana a buyogen iti ayat. Ti ulidanna iti kinadisipulo ket nangbendision iti adu a henerasion, agraman kaniak. Insuro ni Propeta Joseph Smith a “ti tao a napno iti ayat iti Dios, saan a mapnek a mangbendision laeng iti pamiliana, no di ket agsaknap iti intero a lubong, a magagaran a mangbendision iti intero a sangataw-an.”
Panagsubli iti Nailangitan a Pagtaengantayo
Agtarigagay iti tunggal maysa kadatayo nga agsubli iti nailangitan a pagtaengantayo, ket ni Jesucristo ti nailangitan a sistema a mangiwanwan kadatayo. Isu ti dalan. Ti pannubbot a sakripisiona ti mamagbalin a posible a makaaramidtayo kadagiti sagrado a katulagan iti Dios. Apaman a makaaramidtayo kadagiti katulagan, makitatayo no dadduma ti bagitayo nga aglanglangoy a maibusor iti ayus. Ti peggad, pannakaupay, pannakasulisog, ken panagsagaba subokenna ti pammati ken naespirituan a pigsatayo. Agpatulongkayo. Maawatan ni Jesucristo dagiti pakadagsenantayo ket kanayon a sidadaan a tumulong kadatayo.
Laglagipenyo nga Isu ket pagaammo kas “maysa a tao a naliday, ken naam-ammona ti ladingit.” Insuro ti Mangisalakan, “Ditoy lubong addanto rigatyo: ngem mananginanamakayo; siak pinarmekko ti lubong.” Ti pannubbot a sakripisiona ipalubosna a mapakawan dagiti basoltayo agingga a dinan malagip ida.
Mabalin a ditay naan-anay a malipatan dagiti basoltayo kas paset ti mortal a panagsursurotayo isu a laglagipentayo saantayo nga ulitenen dagitoy. Imbes ketdi, laglagipentayo Isuna bayat ti pannakiranudtayo iti sakramento iti simbaan iti tunggal Domingo. Daytoy nga ordinansa ket napateg a paset ti panagdaydayaw ken naespirituan a panagdur-as. Dumteng ti rag-o no maawatantayo a daytoy ket saan laeng nga ordinario nga aldaw. “Naaramid ti Sabbath para iti tao,” nga addaan iti panggep a mangted kadatayo iti panaginana manipud iti lubong ken panangpabaro iti bagi ken espiritutayo.
Laglagipentayo met Isuna no mapantayo iti templo—ti balay ti Apo. Dagiti templo ti mangted kadatayo iti naun-uneg a pannakaammo ken ni Jesucristo kas sentro ti katulagantayo a mangiturong kadatayo iti biag nga agnanayon, ti kadakkelan … kadagiti sagut ti Dios.
Ti idadar-ay iti templo ti nangted kaniak iti liwliwa ken dakkel a namnama maipapan iti agnanayon a pagtungpalantayo. Napadasak dagiti nailangitan a koneksion kadagiti tattao iti agsumbangir ti belo. Nakitak dagiti makaagas a milagro kadagiti annakko, a dua kadakuada ti agbibiag nga addaan iti di makita a sakit nga agkasapulan iti panangaywan iti intero a panagbiagda.
Maragsakan ti pamiliami bayat ti panangibinglaymi iti plano ti kinaragsak. Maragsakan dagiti annakko no mangngegda a gapu ken Jesucristo, “saan nga agbayag ti rigat ken dagiti sagabaenda.” Ay-ayatenmi unay dagiti annakmi, ket ammomi nga iti maysanto nga aldaw, kas kinuna ni Presidente Jeffrey R. Holland, “agtakderdanto iti sanguanantayo a nadayag ken naindaklan, a nakaskasdaaw ti kinaperpektoda iti bagi ken panunot.” Iyasidegdatayo dagiti katulagantayo iti Dios agingga nga agbalin a posible ti imposible, a mangpunno iti tunggal espasio ti kinasipnget ken panagduadua iti lawag ken talna.
Agyamantayo ken Jesucristo, ta adda dagiti namnama ken natibker a nakaibasaran dagiti rason tapno itultuloytayo nga ayaten, ikararagan, ken suportaran dagiti ipatpategtayo.
Ammok a sibibiag Isuna. Am-ammonatayo ken ay-ayatennatayo. Isu ti silaw, ti pudno, ken ti biag ti lubong.
Awisek ti amin kadatayo ita a mangisentro iti biagtayo ken ni Jesucristo ken dagiti pannursurona. No kasta ti aramidentayo, maliklikantayo iti panangkagat kadagiti banniit (hook) ti sulisog, panaglabsing, ken panangay-ay iti bagi. Agtakdertayto a kas templo—nasantuan, natibker ken di agbaliwbaliw. Kabaelantayo nga ibturan dagiti pannubok, ket makasublitayo iti langit, agibtur ken agrag-otayo agingga iti panungpalan. Iti nagan ni Jesucristo, amen.