Panagdaydayaw

Ti maysa kadagiti kadawyan ken kapatgan a kita ti panagdaydayaw ket ti panagtataripnong iti sagrado a lugar tapno agdaydayaw. Kinuna ti Apo, “Ken tapno ad-adda a mapagtalinaedyo ti bagiyo nga awanan mulit iti lubong, mapankayo iti balay a pagkararagan ket mangidatonkayo iti sakramento iti nasantuan nga aldawko.” Daytoy, siempre, ti kangrunaan a motibotayo iti panagibangon kadagiti chapel. Ngem, no kasapulan, ti saan a naidedikar a lugar ti mausar no pagbalinentayo a nasantuan daytoy.

Ti kapatgan ket no ania ti aramidentayo no agtataripnongtayo iti aldaw ti Apo. Siempre, agkawestayo iti kasayaatan a kabaelantayo—saan a nalabes no di ket naemma tapno maipakita ti panagraem ken panagrukbabtayo iti Dios. Ti kababalintayo ket kasta met a managraem ken nadayaw. Agdaydayawtayo babaen ti pannakipagkararag; babaen ti panagkanta kadagiti himno (di lang panagdengngeg no di ket ti panagkanta iti himno); agdaydayawtayo babaen ti panangisuro ken panangsursuro iti maysa ken maysa. Kinuna ni Jesus, “laglagipenyo nga iti daytoy, ti aldaw ti Apo, idatonyo [kaipapananna, ‘idatonyo … ti panawen, talento, wenno sanikua, iti panagserbi iti Dios ken padam a tao’] ken ti sakramentoyo iti Kangatuan, a mangipudno iti basbasolyo kadagiti kabsatyo, ken iti imatang ti Apo.” Agtataripnongtayo a saan a tapno aglinglingay wenno malinglingay—kas iti maysa a banda—no di ket tapno laglagipentayo ken “ad-adda a naan-anay ti pannakaiwanwantayo” iti ebangheliona.

Iti kaudian a sapasap a komperensia, impalagip ni Elder Patrick Kearon “saantayo nga agtataripnong iti Sabbath tapno laeng tumabuno iti miting ti sakramento ken icheck dayta iti listaantayo. Agtitipontayo tapno agdaydayaw. Adda napateg a nagdumaan dagitoy a dua. Ti dumar-ay kaipapananna ti presensia. Ngem ti panagdaydayaw ket naigagara a panagraem ken panagrukbab iti Diostayo iti wagas a mangbalbaliw kadatayo!”

Ti panangipaay kadagiti Sabbath-tayo iti Apo ken dagiti panggepna ket maysa a mismo nga aramid ti panagdaydayaw. Sumagmamano a tawenen ti napalabas, napaliiw ni Elder Russell M. Nelson: “Kasano a mapasantotayo iti Aldaw ti Sabbath? Idi ubingak, inadalko ti aramid dagiti dadduma a namagtitipon kadagiti listaan ti bambanag nga aramiden ken saan nga aramiden iti Sabbath. Agingga iti saan a nabayag a nasursurok manipud kadagiti nasantuan a kasuratan a ti galadko ken ugalik iti Sabbath ti mangbukel iti maysa a pagilasinan ti nagbaetak ken ti Nailangitan nga Amak [kitaen iti Exodo 31:13; Ezequiel 20:12, 20]. Iti dayta a pannakaawat, saankon a kasapulan dagiti listaan ti aramiden ken saan nga aramiden. No nasken nga agaramidak iti maysa a pangngeddeng no ti maysa nga aktibidad maitutop man wenno saan para iti aldaw ti Sabbath, simple laeng a saludsodek nokua iti bagik, ‘Ania a pagilasinan ti kayatko nga ited iti Dios?’”

Ti panagdaydayaw iti Aldaw ti Apo ket nailasin babaen ti partikular a panangipamaysa iti naindaklan a sakripisio ni Jesucristo. Maitutop ken naisangsangayan ti panangrambaktayo iti Panagungarna iti Easter, ngem kasta met iti tunggal lawas no makiranudtayo iti sakramental nga emblema ti Pannubbotna, agraman ti Panagungarna. Para iti agbabbabawi, ti pannakiranud iti sakramento ti kangrunaan a paset ti panagdaydayaw iti Sabbath.

Ti panagdaydayaw a sangsangkamaysa kas ti “bagi ni Cristo” ket addaan iti naisangsangayan a bileg ken pagimbagan bayat ti panangisuro, panagserbi, ken panangsuportatayo iti maysa ken maysa. Makapainteres ta natakuatan iti maysa nga study a dagiti mangibilang iti naespirituan a panagbiagda kas interamente a pribado ket dida unay ipangpangruna ti naespirituan a panagdur-asda wenno ibaga a napateg ti pammatida, wenno maaddaan iti regular a debosional a panawen iti Dios. Kas maysa a komunidad dagiti Santo, agpipinnaregtatayo iti panagdaydayaw ken iti pammati.

Nupay kasta, ditay liplipatan dagiti inaldaw nga aramid iti panagdayaw nga ar-aramidentayo kas indibidual ken iti pagtaengan. Ipalagip kadatayo ti Mangisalakan, “Nupay kasta maidaton dagiti kariyo iti kinalinteg iti amin nga aldaw ken iti amin a panawen.” Nainsiriban ti kinuna ti maysa a sister, “Diak mapanunot ti napatpateg a wagas ti panagdayaw iti Dios ngem ti panangpasangbay kadagiti babassit nga annakna iti biagtayo ken aywanan ida ken isuro kadakuada iti planona para kadakuada.”

Insuro da Alma ken Amulek dagiti Zoramites a naparitan kadagiti sinagogada nga agdayaw iti Dios saan laeng a maminsan iti makalawas, no di ket kanayon, ken “iti aniaman a lugar a mabalin a pagnaedanyo.” Nagsaoda maipapan iti kararag kas panagdayaw:

“Nasken nga ibubosyo ti kararuayo iti siledyo, ken iti lugar a nalimed, ken iti langalangyo.

“Wen, ket no man saankayo nga agpakaasi iti Apo, ipalubosyo a ti puspusoyo ket mapno, agtultuloy nga agkarkararag kenkuana.”

Nagsaoda met maipapan iti panangsukimat kadagiti nasantuan a kasuratan, panangpaneknek ken Cristo, panangipakita kadagiti aramid ken serbisio a naparabur, panangawat iti Espiritu Santo, ken agbiag iti panagyaman iti inaldaw. Ibilangyo dayta a kapanunotan: “agbiag iti panagyaman iti inaldaw.” Ibagbagana ti maikadua a konseptok:

Ti pannakarikna ken pannakayebkas ti panagyaman iti Dios ket, kinapudnona, ti mamagbalin iti panagdaydayaw a naragsak a pannakapabaro imbes a maysa la dayta a pagrebbengan.

Ti pudno a panagdaydayaw kaipapananna ti panagayat iti Dios ken panangited iti pagayatantayo Kenkuana---ti kapatgan a sagut a maitedtayo. Idi naisaludsod no ania ti kadakkelan a bilin iti amin a linteg, insungbat ni Jesus, “Ayatem ti Apo a Diosmo iti amin a pusom, ken iti amin a kararuam, ken iti amin a panunotmo.” Inawaganna pay daytoy kas ti umuna a bilin.

Daytoy ti pagtuladan ti bukod a panagdayaw ni Jesus iti Ama. Ti biagna ken ti pannubbot a sakripisiona ti naidedikar iti dayag ti Ama. Nalawag a malagiptayo ti panagpakaasi ni Jesus iti tengnga ti di mailadawan a panagsagaba ken panagleddaang: “Ama, no mabalin, ilisinak iti daytoy a kopa ti panagsagaba,” ngem sipapakumbaba “nupay kasta, saan a ti pagayatak ti maaramid no di ket ti pagayatam.”

Ti panagdaydayaw ket mangikagkagumaan a tungpalen dagiti bilinna. Di tayo a maragpat ti kinaperpekto itoy a wagas iti maysa la a rabii, ngem no iti inaldaw intay “idaton a sakripiso [Kenkuana] ti nasneban [nagbabawi] a puso ken napnuan babawi [agtulnog] nga espiritu,” buniagannatayo manen iti Espirituna ken punnuennatayo iti paraburna.

Iti umuna a benneg ti Doktrina ken Katulagan, ti Apo impakaammona daytoy dakes nga aramid iti lubong:

“Ta immadayoda manipud kadagiti ordinansak, ken linabsingda ti agnanayon a katulagak;

“Dida sinapul ti Apo iti panangbangonda iti kinalintegna, ngem nagna ti tunggal tao iti bukodna a dana, ken iti kalanglanga ti diosna, a ti langana ket kalanglanga ti lubong.”

Nasayaat a lagipentayo ti ulidan ti tallo nga agtutubo a Judio da Hananias, Misael, ken Azarias, a naipan idiay Babilonia di nagbayag kalpasan a pimmanaw da Lehi ken ti pamiliana iti Jerusalem. Maysa nga opisial ti Babilonia ti nangbaliw iti naganda iti Sidrac, Mesac, ken Abednego. Idi agangay, idi nagkedked dagitoy a tallo nga agdayaw iti estatua nga impasdek ni Ari Nebucadnesar, imbilinna a maipuruakda iti umap-apuy nga urno, a kunkunana kadakuada, “Ket kitaek man no adda Dios a makaisalakan kadakayo?”

Malagipyo ti natured a sungbatda:

“No ti Dios a pagserserbianmi mabalinnakami nga isalakan iti gumilgil-ayab nga urno ken iti pannakabalinmo, aramidenna dayta.

“Ngem uray no dinakam isalakan, ammoem, … a dikam agdaydayaw iti diosmo, ket dikam agrukbab iti estatua a balitok nga impasdekmo.”

Napudot unay ti urno isu a natay dagiti nangitapuak kadakuada iti dayta, ngem saan a nadangran da Sedrac, Mesac ken Abednego. “Kinuna ni Nebucadnesar, Madaydayaw ti Dios da Sedrac, Mesac ken Abednego a … mangisalakan kadagitoy a lallaki nga agserbi ken agtalek kenkuana, … ket impustada ti biagda ngem iti agrukbab ken agdaydayaw iti sabali a dios malaksid iti Diosda.” Nagtalekda ken Jehova para iti pannakaispal, “ngem uray no saan,” kayatna a sawen, uray no ti Dios iti siribna dina linapdan ti ipapatayda, nagtalinaedda latta a napudno Kenkuana.

Agbalin nga idolo ti aniaman a maipangpangruna ngem ti panagdaydayaw iti Ama ken iti Anak. Dagiti mangilaksid iti Dios kas pagtaudan ti kinapudno, wenno saan a mamati iti aniaman a panagsungbat Kenkuana, arigna a pagbalinenda ti bagbagida kas diosda. Ti tao a mangipangpangruna iti kinamatalekna iti maysa a partido wenno panggep ngem iti panangiwanwan ti Dios ket agdaydayaw iti palso a didiosen. Uray dagiti agkunkuna nga agdaydayawda iti Dios ngem dida tungpalen dagiti bilinna ket magmagnada iti bukodda a dalan: “Asidegda kaniak iti bibigda, ngem nakayakay ti pusoda kaniak.” Ti panggep laeng ti panagdaydayawtayo ket “ti kakaisuna a pudno a Dios, ken ti pannakaammoda ken ni Jesucristo nga imbaonmo.”

Iti kamaudiananna, ti wagas ti panagbiagtayo ti kasayaatan ken kapudnuan a kita ti panagdaydayaw. Ti panangipakita iti debosiontayo kaipapananna ti panangtulad iti Ama ken iti Anak—a mangpatanor kadagiti kababalin ken karakterda iti bagitayo. No kas kunaen ti pagsasao, a ti panangtulad isu ti pudpudno a kita ti panangpadayaw, ngarud mabalintay a kunaen no maipapan iti Dios, ti panangtulad isu ti pudpudno a kita ti panagdaydayaw. Isingasing daytoy ti aktibo, agtultuloy a panagregget iti biangtayo a mangsapul iti kinasanto. Ngem ti panagbalin nga ad-adda a kas ken Cristo ket natural met a pagbanagan dagiti aramidtayo a panagdayaw. Ti ragup ti sasao ni Elder Kearon a nadakamat itay maipapan iti panagdaydayaw, “a mangbalbaliw kadatayo,” ket nakapatpateg. Ti pudno a panagdaydayaw ket mangbalbaliw.

Daytoy ti kinapintas ti dalan ti katulagan---ti dalan ti panagdaydayaw, ayat, ken kinasungdo iti Dios. Sumrektayo iti dayta a dalan babaen ti panagbuniag, nga ikaritayo nga awatentayo ti nagan ni Cristo ken tungpalentayo dagiti bilinna. Awatentayo ti sagut ti Espiritu Santo, ti mensahero ti parabur ti Mangisalakan a mangsubbot ken mangdalus kadatayo manipud iti basol no agbabawitayo. Mabalin nga ibagatayo pay ketdi nga agdaydayawtayo Kenkuana babaen ti panagbabawitayo.

Sumaruno dagiti kanayonan nga ordinansa ti priesthood ken dagiti katulagan a naaramid iti balay ti Apo a mangpasanto pay kadatayo. Buklen dagiti seremonia ken ordinansa iti templo ti nangato a kita ti panagdaydayaw.

Impaganetget ni Presidente Russell M. Nelson a “tunggal lalaki ken tunggal babai a makiraman kadagiti ordinansa ti priesthood ken mangsalimetmet kadagiti katulagan iti Dios ket addaan iti direkta a pannakagun-od iti bileg ti Dios.” Daytoy ket saan laeng a pannakabalin a magun-odtayo tapno agserbi ken mangbendision. Daytoy pay ti nadiosan a pannakabalin nga agtigtignay kadatayo a mangpasayaat ken mangdalus kadatayo. Bayat ti pannagnatayo iti dalan ti katulagan, “maipakita ti bileg ti kinadios” kadatayo.

Sapay koma ta, kas kadagiti nagkauna a Nephite ken Lamanite, “nagruknoyda iti sakaanan ni Jesus, ket … nagdaydayawda kenkuana.” Aramidentayo koma, kas imbilin ni Jesus nga, “agtamedkayonto nga agdayaw iti Ama babaen ti nagan [ti Anak].” Sapay koma ta awatentayo ti Espiritu Santo ken itedtayo ti pusotayo iti Dios, nga awanen ti sabali pay a diostayo, ken kas disipulo ni Jesucristo, tuladentayo ti kababalinna iti biagtayo. Paneknekak a no aramidentayo, mapadasantayo ti rag-o iti panagdaydayaw. Iti nagan ni Jesucristo, amen.