Iti Mismo Nga Imatangtayo

Kakabsat, agyamanak unay a makaduakayo. Ay-ayatendakayo; agyamankami kadakayo, ken mariknami a nabendisionankami kadagiti kararagyo.

Kinuna ni Presidente Russell M. Nelson iti naudi a komperensiatayo: “Makitayo kadi ti agdama a mapaspasamak? Ikarkararagko a ditayo koma palabsen ti kinatan-ok daytoy a kanito! Ti Apo pudno a padpadarsenna ti aramidna.”

Padpadarsenna ti aramidna. Napateg ti balikas a “padpadarsen”. Isingasingna ti napartak a panaggunay, panangpadaras, ken kinaganat. Iti panagrang-ay ti Simbaan ken ti plano ni Cristo, mapaspasamak ti panangpadaras. Ket pasettayo amin daytoy.

Idi Abril 1834, idiay Kirtland, Ohio, inummong ni Propeta Joseph Smith amin nga addaan iti priesthood iti bassit a pagadalan, agarup 14 a metro (4.3 m) kuadrado. Mabalin a maikarga dagita a pagadalan iti uneg daytoy a Conference Center, ket adda pay sobrana. Kinuna ni Joseph Smith, “Maysa laeng a bassit a bilang ti Priesthood ti makitayo ditoy ita a rabii, ngem daytoy a Simbaan ti mangpunnonto iti Amianan ken Abagatan nga America—punnuennanto ti lubong.”

Maipatpatungpalen dayta a padto “iti mismo nga imatangtayo.” Ti Simbaan ni Jesucristo dagiti Santo iti Ud-udina nga Aldaw ket umad-adun iti bilang dagiti miembro ken pamilia, mision ken misionario, balay a pagmimitingan ken templo, ken iti enrolment kadagiti seminary, institute, ken unibersidadtayo iti intero a lubong.

Agyamantayo ta addatayo ditoy daga bayat ti panagadu ti bilang ken impluensia ti Simbaan, ngem nangnangruna iti puso ken biag dagiti miembrona. Maam-ammotayo kas disipulo ni Jesucristo. Ibinglaytayo dagiti pammaneknektayo maipapan Kenkuana, ti Simbaanna, dagiti wagasna, ken ti dana ti katulaganna. Datayo ti tattaona, ket isu ti Mangisalakantayo.

Masdaawak iti aw-awagan ni Presidente Nelson a “kinatan-ok daytoy a kanito” ken ipeksana ti nalaus a panagyaman iti Apo para iti aramidna. Allukoyenkayo nga agtalinaed a natibker kas disipulona, saksi iti pannakatungpal ti padto, agpadpada iti nagkauna ken agdama.

Adda dagiti sumupsupiat a mangipukkaw, “Imutektekanyo ditoy!’ ken … ‘Imutektekanyo, idiay,” kas iti inaramidda idi panawen ni Propeta Joseph Smith. Nupay kasta, agbalindanto laeng a kas listababa (footnotes) itoy natakneng nga aramid. Laglagipen dagiti balikas ni Joseph Smith: “Awan ti namulitan nga ima a makalapped iti aramid iti panagdur-as; mabalin a nainget ti pannakaidadanes, … ngem ti kinapudno ti Dios agtultuloyto a situtured, sitatakneng, ken agmaymaysa, agingga a mastrekna ti tunggal kontinente, masarungkaranna ti tunggal lugar, pagilian, ken mapangngeganna ti tunggal lapayag agingga a maipatungpalto dagiti panggep ti Dios, ket kunanto ni Jehova a nalpasen ti aramid.”

Kadagiti pagrebbengak itoy a tawen, addan tugawko iti sango ti Apo a mangpadpadaras iti aramidna. Ti Simbaan ket agbangbangon kadagiti templo iti di pay pulos napasamak a kapartak, a mangmangted kadagiti miembro iti gundaway nga agdaydayaw iti balay ti Apo. Maikadua, ti aramid ti misionario ti agum-ummong kadagiti bilang ti rekord iti ikub ti Naimbag a Pastor, ni Jesucristo. Ken maikatlo, ti edukasion ti Simbaan iti adu a kumpigurasion ket adda iti baro a kangatuan iti panangisuro kadagiti “agsapul iti daytoy a Jesus.”

Ita, adda 367 a templo ti Simbaan iti nadumaduma a tukad ti disenio, konstruksion, wenno operasion. Iti ania a panggep? Maiwaragawag ti sungbat iti tunggal templo: “Kinasanto iti Apo.” Ti templo ti manglukat iti dalan kadagiti kangatuan a bendision ti Amatayo iti Langit para kadatayo amin. Kakabsat, padpadarsentayo ti kinasantotayo no agbiagtayo a maikari iti templo, no agdaydayawtayo iti balay ti Apo, ken no makitulagtayo iti Dios para iti bagitayo ken para kadagiti kapuonantayo iti bangir ti belo.

Kinuna ni Presidente Nelson: “Kumarkaro unay dagiti panagdarup ti kabusor, iti intensidad ken iti agduduma a kita. Ti panagkasapulan iti masansan nga ipapan iti templo ket napatpateg pay ita. Ipakaasik kadakayo nga agkararagkayo a kumita no kasano a bubosenyo ti panawenyo.” Iti balayna, mariknatayo ti nasantuaan a kaadda ti Apo ken ti naindaklan a talna.

Itay naglabas a tawen, naaddaanak iti pribilehio a mangidaulo iti pannakaidaton ti Templo ti Mendoza Argentina. Iti mensahek, dinakamatko ti padto ni Elder Melvin J. Ballard idi 1926 a ti aramid ti Apo in-inut a dummakkel iti sumagmamano a panawen iti South America, “kas iti panagtubo ti kayo manipud iti bassit a bukel. Dinto dummakkel daytoy iti maysa nga aldaw,” ngem rinibu ti agkamengto iti Simbaan, ket dagiti nasion iti South America agbalindanto a “maysa a bileg iti Simbaan.” Nakitak a natungpal dayta a padto iti mismo nga imatangko.

Ti Mendoza, a maysa idi a bassit a bukel, ket nagbalin a nabileg a kayo. Maulit-ulit dayta nga irarang-ay iti intero a kontinente ken isla ti baybay.

Makitkitatayo a padpadarsen ti Apo iti trabahona kadagiti mision. Idi 2024, 80,000 a misionario ti agserserbi iti 450 a mision. Tallopulo-ket-innem kadagitoy ti baro a mision. Idi napan a tawen ti aramid ti misionario ti nangyeg iti nasurok a 308,000 a baro a miembro iti simbaan. Di laeng a dagiti bilang, ngem ti espiritu ti panaguummong ti mangyeg kadagiti kararua ken Jesucristo ken ti ebangheliona.

Mapanunotko da Apostol Brigham Young ken Heber C. Kimball, a nagbiahe kas misionario idiay British Isles idi 1839. Masakitda; pinanawanda dagiti masakit ken nakurapay a pamiliada. Nupay kasta, limmuganda iti karison ket bayat a makitkitada pay laeng dagiti ay-ayatenda, kinuna ni Heber, “Agtakderta ket paragsakenta ida.” Narigatan ti dua a timmakder ket impukkawda, “Hurrah, hurrah para iti Israel.”

Nakitak ti kasta met la a regta iti aramid ti Apo idiay Lima, Peru, idi naam-ammok dagiti misionario iti missionary training center ken dagiti mission idiay Lima. Anian a buya! Nakitak ti panangpadaras iti mismo nga imatangko. Adda itan pito a mision iti siudad laeng ti Lima.

Iti gibus ti mitingmi, adda espesial a sorpresa dagiti misionario kaniak. Timmakderda ket impukkawda, “Hurrah para iti Israel.” Diakto pulos malipatan dayta a kanito; tarigagayak nga addakayo koma amin sadiay. Iti mismo nga imatangko adda dagiti misionario a nangpanaw “kadagiti banag daytoy a lubong” tapno agserbi iti Apo ken tumulong a mangpapardas iti yaayna.

Makitkitatayo a padpadarsen ti Apo dagiti gundaway iti edukasion kadagiti miembrotayo, ken uray dagiti saantayo a kapammatian, iti intero a lubong. Maysa a banag a mangilasin kadatayo kas maysa a simbaan ket ti panangipaganetgettayo iti edukasion. Imbilin ti Apo kadagiti immuna nga aldaw ti Pannakaisubli nga “agadalkayo, uray pay ti panagadal ken kasta met ti pammati.” Mapaspasamak dayta ita ket maikari iti maysa a napigsa a “hurrah.”

Iti agdama nasurok nga 800,000 nga estudiante iti sangalubongan ti naka-ennrol iti seminary ken institute, ti kangatuan a bilang ti enrollment iti pakasaritaan ti Simbaan. Agtitipon dagiti agtutubotayo iti nadumaduma a wagas, manipud iti nasapa a bigat, aldaw, ken dagiti klase iti rabii agingga iti online ken in-home study. Isuda ti nabileg ken nalinteg a buyot, nga agpipinnapigsa bayat ti panagsursuroda ken Jesucristo, panangsurot, ken panagpaneknekda maipapan Kenkuana kas Anak ti Dios.

Idi naglabas a kalgaw, nagsaritaak iti maysa a devotional iti maysa nga arena a napno kadagiti estudiante iti seminary ken institute ken dagiti nagannakda iti University of Utah. Ti kaaddada iti miting ipamatmatna ti tarigagayda a mangammo ken sumurot ken ni Jesucristo. Nalawag ti imbagak kadagidiay nga estudiante: Itedyo iti Apo ti maipada nga oras. Imbalakadko kadakuada nga ibalanseda ti panagadalda iti pudno, nangatngato a panagsursuro, uray pay ti panagadal “iti Anak ti sibibiag a Dios.”

Kasta met laeng ti dawatek iti tunggal maysa ita: Aniaman ti adda iti “to do” list-yo, itedyo ti agpapada nga oras, saan a nawaya nga oras, iti Apo iti personal a panagadal iti nasantuan a kasuratan, panagadal ti pamilia iti Umaykayo, Sumurot Kaniak, panagkararag, dagiti calling iti Simbaan, panag-minister, pannakiranud iti sakramento, panagdaydayaw iti templo, ken panangutob kadagiti bambanag maipapan iti Dios. Kinuna ti Apo ken Mangisalakantayo, “Agsursurokayo kaniak … ket makasarakkayto iti inana a maipaay iti kararuayo.” Agtalekkayo iti balikasna. Ket itedyo Kenkuana ti pumada nga oras.

Kinuna ni Presidente Nelson: “Ipakpakaasik kadakayo a bay-anyo nga agballigi ti Dios iti biagyo. Itedyo Kenkuana ti nasayaat a bingay iti panawenyo. No aramidenyo, paliiwenyo no ania ti mapasamak iti positibo a naespirituan a momentumyo.”

Makitatayo dayta a panagrang-ay ti momentum kadagiti seminary, institute, ken unibersidad ti Simbaan. Kadagitoy nga aglawlaw, ti Apo ti prioridad. Adda koma Isuna iti tunggal maysa iti biagtayo.

Ti sabali pay a lugar a mangipakita iti dumakdakkel nga impluensia ti edukasion iti Simbaan ket ti BYU–Pathway Worldwide. Iti intero a lubong, ti enrolment ket dimmanonen iti dandani 75,000 ken agtultuloy a napartak nga umadu. Kaaduanna ket miembro, ken nasurok nga apagkatlo ti adda idiay Africa. Ti Pathway ket maipapan iti pananggun-od iti edukasion. Ti panangileppas kadagiti kurso kaipapananna ti pannakasarak iti panggedan, ket ti pannakasarak iti panggedan kaipapananna ti nasaysayaat a biag para iti pamilia ken ad-adu a gundaway nga agserbi iti Apo.

Idi nakipagkitaak iti stake presidency idiay Uganda, naammuak a nag-enrol iti BYU–Pathway ti intero a stake presidency. No ad-adda a nakasaganatayo iti temporal ken naespirituan, ad-adda a malapdantayo dagiti nasikap a panangraut ti kabusor. Laglagipenyo ti balikas ni Pedro: “Agdakdakiwas ti sairo a kabusoryo, kasla leon a ngumerngernger nga agsapsapul iti alun-onenna.”

Bigbigek nga iti naimbag a damag ti ebanghelio, adda dagiti makidangdangadang, nga addaan kadagiti karit iti pammati, panagduadua, ken saludsod a kasla awan ti sungbatda. Kakabsat, ti sungbat ket ni Jesucristo. Mangrugikayo Kenkuana. Kitaenyo ti impluensiana iti biagyo. Dumngegkayo Kenkuana. “Dikay madanagan ken mariribukan,” kinuna ni Jesus kadagiti disipulona iti maudi nga orasna idiay Getsemani, sakbay nga inawitna ti krusna kadagiti kalsada ti Jerusalem, sakbay ti Golgota, a sadiay a naileppasna ti pannubbot a sakripisiona—a ti Bugbugtong nga Anak ti Dios, laeng ti makaaramid.

Ammuenyo a maawatanna. Inawatna iti Bagina ti amin a basoltayo, biddut, panagsagaba, ken dagiti dakes unay nga aldaw tapno makadennatayo manen iti agnanayon ti Amatayo idiay Langit. Kinunana, “Kitaendak iti tunggal panunot; saankayo nga agduadua, saankayo nga agbuteng.” Ti pammati ken ni Jesucristo ti mangitag-ay kadakayo ket bedbedanna dagiti sugatyo. Agtalekkayo Kenkuana ket padarasenyo ti panagsubli “kadagiti takiag iti panagayatna.”

Ipaganetgetko manen dagiti balikas ti sibibiag a propetatayo: “Makitayo kadi ti mapaspasamak iti mismo nga imatangtayo? Ikarkararagko a ditayo koma palabsen ti kinatan-ok daytoy a kanito! Ti Apo papardasenna ti aramidna.” Sapay koma ta datayo kas disipulona ipukkawtayo, “Hurrah para iti Israel,” bayat ti panagsaganatayo iti panagsubli ti Apo ken Mangisalakantayo. Iti nagan ni Jesucristo, amen.