Panangipateg iti Biag

Intuloyna: “Nakaawatak iti nabuslon unay nga ayat ken suporta manipud iti family ward-ko. Nakaskasdaaw la unay. Nabuslon unay nga ayat ken suporta ti impakita ti bishop-[ko] ken ti presidentek ti Young Women. … Nakitak ti ima ti Apo … a mangiwanwanwan kaniak ken iti pamiliak. … Ti ward a kas iti ward-ko ket ti pamilia a kasapulan ti amin, nangnangruna ti maysa a balasang nga adda iti kasasaadko.”

Isu ken ti pamiliana ken ti family ward-na ket siaayat a nangpasangbay iti maladaga a lalaki idi Pebrero.

Kinuna ni Presidente Russell M. Nelson, “Maysa a sagudayen ti pudno ken nabiag a Simbaan ket kanayonto a maysa a naurnos a … panagkagumaan nga ag-minister kadagiti annak ti Dios … [panag-minister nga addaan ayat ken kinaasi] iti maysa a tao, kas iti inaramidna.”

No matakuatan ti maysa a balasang nga isu ket masikog, dagiti pakaseknan iti salun-at, naespirituan a pakariribukan, pannakaibabain, pakaseknan iti kuarta, saludsod iti edukasion, saan a panagkallaysa, ken kinaliday gapu iti nadadael nga arapaap, iti kanito ti saem ken riribuk, ket mangiturong iti masirib a babai nga agaramid iti maysa a banag a mangyeg iti nakaro a saem ken babawi.

Para iti asinoman nga agdengdengngeg a nakapadas iti nakaro a saem ken babawi iti panagpaikkat iti sikog wenno pannakipasetna iti aborsion, laglagipenyo koma, “Uray no ditay mabaliwan ti napalabas, kabaelan ti Dios a paimbagen ti napalabas. Maaramid ti pannakapakawan babaen ti milagro ti pangsubbot a paraburna no agsublikayo Kenkuana nga addaan iti napakumbaba ken agbabbabawi a puso.

Dua a konsepto ti masansan a nainaig iti kinasanto ti mortal a pannakayanak: biag ken panagpili. Ti biag ket maysa a kapatgan a paset ti perpekto a plano ti Amatayo, ket babaen ti bilinna ipategtayo ken salaknibantayo ti biag; ken pilientayo ti agtultuloy a biag apaman a nainaw. Ipategtayo met ti sagut ti panagpili, ti kinawaya nga agpili, a tumulong a mangpapigsa kadagiti nalinteg a pili nga inanamongan ti Dios a mangyeg iti agnanayon a ragsak.

No adda ti maysa a babai ken lalaki iti kasta a nakain-inaka a panawen, a maipaspasango iti napateg a pili, dagiti balikastayo, im-imatayo, puspusotayo---mainaig iti kinaespirituan, karirikna, ken pakaseknan iti kuarta---ket mangbendision kadakuada a makarikna iti ayat ti Mangisalakan, kas kinuna ni Presidente Henry B. Eyring, mangyeg iti nalawag ken umiso a pannakaawat kadagiti naespirituan a matada iti “no ania ti pagarupenda a makitada” iti “no ania ti dida pay a makita.”

Kinuna ni Presidente Dallin H. Oaks: “Ti panangpanunottayo iti aborsion ket saan a naibatay iti naipalgak a pannakaammo no kaano a mangrugi ti mortal a biag. … Naibatay daytoy babaen ti pannakaammotayo nga … amin dagiti espiritu nga annak ti Dios masapul nga umay ditoy daga para iti nadayag a panggep, ken ti indibidual a kinasiasino nangrugi sakbay unay ti pannakayanak ket agtultuloyto iti agnanayon.”

Ti sao ti Apo maipapan kadagiti di pay naipasngay, a naited babaen ti Umuna a Panguluen ken ti Korum dagiti Sangapulo-ket-dua nga Apostol, ket saan a pulos a nagbaliw ken mangyebkas iti balikas dagiti propeta iti las-ud dagiti panawen, a mangted iti nadiosan a kinalawag iti kiniddaw ti Apo kadatayo.

“Patien ti Simbaan ni Jesucristo dagiti Santo iti Ud-udina nga Aldaw ti kinasagrado ti biag ti tao. Ngarud, supiaten ti Simbaan ti elektibo nga aborsion para iti bukod wenno sosial a pagimbagan, ket balakadanna dagiti miembrona a dida umanamong, itrabaho, yallukoy, mangbayad wenno makipagurnos iti kasta nga aborsion.

“Palugodan laeng ti [Apo] dagiti mabalin nga eksepsion … no:

• Ti panagsikog ket bunga ti seksual a relasion ti agkabagian wenno pannakarames, wenno

• No inkeddengen ti nalaing a mangngagas nga agpeggad ti biag wenno salun-at ti ina, wenno

• Natakuatan ti nalaing a doktor nga adda nakaro a diperensia ti fetus a di mangpalugod nga agbiag ti maladaga no maipasngay.”

Innayon ti Umuna Panguluen: “Kaseriosuan a banag ti panagpaikkat iti sikog. [Uray kadagitoy a manmano a situasion] nasken a maibilang laeng no nalpasen a nakiuman dagiti tao nga agsungbat iti bishop-da ken immawatdan iti pammatalged babaen iti kararag” ken nayumandan iti sabali.

Tallopulo a tawenen ti napalabas, nangipaulog dagiti propeta ti Apo iti waragawag iti lubong. Iramanna dagitoy a balikas:

“Ipakdaarmi … imbilin ti Dios a dagiti sagrado a pannakabalin ti panagparsua ket maaramat laeng iti nagbaetan ti lalaki ken babai, mayannurot iti linteg a nagkallaysa kas agassawa.

“Ipakdaarmi a ti wagas a nakaparsuaan iti mortal a biag ket nadiosan a naisaad. Pasingkedanmi ti kinasagrado ti biag ken ti kinapategna iti agnanayon a plano ti Dios.”

Ti panangpadakkel ken panangsalaknib iti biag a di pay naipasngay ket saan a maysa a posision iti politika. Maysa dayta a moral a linteg a pinasingkedan ti Apo babaen kadagiti propetana.

Maysa a palawag ni Presidente J. Reuben Clark Jr. a nagserbi iti Umuna a Panguluen, ket ti napintas a panangiladawanna iti agtutubotayo ita: “Mabisin dagiti agtutubo ti Simbaan kadagiti banag ti Espiritu; aggagarda a masursuruan iti ebanghelio, ken kayatda nga agbalin a nalinteg ken natarnaw daytoy. Kayatda a maammuan ti maipapan iti … patpatientayo; kayatda a gun-oden dagiti pammaneknek iti kinapudno. Isuda … dagiti managdamag, agsapsapul iti kinapudno.” Agsaotayo koma a buyogen ti pammati ken pannakipagrikna kadagiti agtutubo iti pagtaengantayo, ken iti tunggal maysa kadagiti mitingtayo iti Relief Society ken elders korum, maipapan iti linteg ti kinadalus ti Apo, ti kinasanto ti biag, ken ti panangaywan kadagiti di pay naipasngay ken dagiti innada.

Maysa a sister ti nagsurat kaniak maipapan iti padasna adu a dekadan ti napalabas: “Idi agtawenak iti 17 … , nagsikogak, nga awan unay ti suporta manipud iti nobiok. Nariknak ti bain ken panagmaymaysa [ngem diak] pulos pinanunot ti [aborsion]. … [Addaanak] iti managayat a pamilia ken bishop, a kanayon a kitaek a mangiwanwan kaniak. … Immasidegak iti Dios. Inadalko dagiti nasantuan a kasuratan … ket nagkararagak [ken] nasarakak ti pigsa babaen ti Mangisalakanko ken ti proseso ti panagbabawi. … Naawatko ti sungbat [dagiti kararagko] a diak mailibak. … Maladingitanak unay, ngem ammok nga ipaamponkonto ti maladagak. … Inkararagko ti tured [ken] nariknak a silalawag ti ayat ti Mangisalakan babaen ti panagbabawi, ammok a sungbatan ti Dios … dagiti kararag ken papigsaennatayo.”

Inampon ti maysa a naayat nga agassawa ti napateg nga ubing a babai ket insuroda kenkuana ti ebanghelio. Naasawaan itan ken addaan iti napintas a bukodna a pamilia.

No dadduma, ti panangsaluad iti biag ket mabalin a kakuyog ti nakaro a rigat ken makapatuok a kinaawan talged.

Nabiit pay a nagsurat kaniak ti maysa nga agassawa nga ipatpategmi ken ni Kathy maipapan iti pannakaipasngay ti anakda.

Insurat ti ama: “[Idi ] 10 a lawas a masikog ti asawak naammuanmi nga addaan ti maladagami iti genetic condition a trisomy 21, a gagangay nga ammo a Down syndrome. Nariknami ti pressure … manipud iti tay-ak ti medisina nga ibilangmi ti aborsion. Kalpasan ti mano a lawas natakuatanmi … a ti di pay naipasngay nga anakmi … agkasapulan iti adu nga operasion iti puso iti umuna a tawen ti biagna. Iti daytoy a proseso bayat ti panagkararagmi a sipapasnek iti nadiosan a tulong, … nariknami a liniwliwanakami ti Espiritu. Naawatmi ti paltiing ken pannakaawat a ti balasangmi ket maysa nga anak ti Nailangitan nga Amatayo ken dakkel ti tarigagaymi nga agbalin a paset ti pamiliami ken umay ditoy daga.”

Insurat ti ina ti maladaga: “[Naklaatkami unay, natikawkami, ken pudno a naupaykami iti damag. … Idi 14 a lawas a masikogak, naammuanmi a ti maladagami ket aduan iti congenital a depekto iti puso, a mabalin a gapu ti ipapatay. Adu a doktor ken espesialista ti nakasaritami manipud 10 agingga iti 18 a lawas ti panagsikogko. … Iti tunggal appointment-mi, masaludsod kadakami no kayatmi nga ituloy ti panagsikog wenno paikkat. … Pinaimbag ti Mangisalakan ti pusok ken impaayannak iti talna ken ragsak maipapan iti maladagami. … [Ti Nailangitan nga Ama] impakitana kaniak iti namin-adu nga adda perpekto a planona para kaniak [ket] agtalekak Kenkuana.”

Maragsakanda a nangpasangbay iti anakda a babai a nayanak eksakto a maysa a lawasen ti napalabas ita. Kukuada isuna ken kukuana ida iti agnanayon.

Ti natibker a pammati ken naidumduma a tured ti pakabigbigan dagiti disipulo ni Jesucristo.

Iti naglabas a tawtawen, adda gundawayko a makasao dagiti lallaki ken babbai a sipapakumbaba a nagkalikagum nga agsubli iti dana ti katulagan ken kadagiti bendisionda iti priesthood ken templo adu a tawen kalpasan a napukawda ti kinamiembroda.

Iti maysa a gundaway, ininterbiuk ti maysa a lalaki iti biang ti Umuna a Panguluen para iti pannakaisubli ti priesthood ken bendisionna iti templo.

Kalpasan ti kallaysana iti nasantuan a templo, ken naaddaan iti tallo a nasisingpet nga annak, saan a napudno ti lalaki iti asawana ken iti sagrado a katulaganna. Maysa a balasang ti nagsikog ket kayatna ti aborsion.

Nagpakaasi ti nasingpet nga asawa ti lalaki iti balasang nga alaenna ti maladaga ket inkarina a padakkelenna ti ubing inton mayanakna a kadua dagiti bukodna nga annak.

Sipapanunot nga immanamong ti balasang a dina paikkat ti sikogna.

Napalabasen ti 10 a tawen. Ti napakumbaba a sister a nakatugaw iti sanguanak ket inayatna ti ubing a lalaki kas bukodna ken imbagana kaniak ti panagregget ti asawana a nagbalbaliw ken agayat ken agaywan kenkuana ken iti pamiliada. Nagsangit ti ama bayat ti panagsaona.

Kasano nga inawat daytoy natan-ok a babai ti Dios ti ubing kas bukodna ket mabalin nga inaldaw a palagip iti panangliput ti asawana kenkuana? Kasano? Gapu ta nasarakanna ti pigsa babaen ken Jesucristo ken namati iti kinasagrado ti biag, ti kinasanto ti biag. Ammona a ti di pay naipasngay nga ubing ket anak ti Dios, inosente ken nadalus.

Patpatgek a kakabsatko, ti bumasbassit nga ayat kadagiti di pay naipasngay nga ubbing iti intero a lubong ket maysa a nakaro a pakaseknan. Ipatpateg ti Dios ti biag. Daytoy ti aramidna ken gloriana ti mangipatungpal iti saan nga ipapatay ken ti agnanayon a biag dagiti annakna. Kas disipulo ni Jesucrsto, ipategtayo ti biag. “Gapu itoy mailasindanto a dakayo ti disipulok, no agiinnayatkayo.” Sapay koma ta ad-adda pay nga ibinglaytayo ti ayattayo kadagiti agkasapulan unay kadatayo. Ipeksak ti ayatko kadakayo ken ti ayat ti Nailangitan nga Amatayo kadagiti annakna nga umay ditoy daga. Iti nagan ni Jesucristo, amen.