Kas maysa a Bassit nga Ubing

Rinugian ni Jesus ti maudi a tawen ti mortal a biagna babaen ti panangpapigsana iti panagsanay dagiti Apostolna. No ti mensahe nga inyam-ammona ken ti Simbaanna a mamagtultuloy Kenkuana, ad-adu pay ti nasken a maipapuso ti 12 a gagangay a lallaki a nakaam-ammo Kenkuana iti dandani 24 a bulan.

Maysa nga aldaw nasaksian ni Jesus ti panagsusupiat ti kadagiti Sangapulo-ket-dua ket dinamagna idi agangay, “Ania ti nagsusupiatanyo?” Nabatad a nabainanda, “nagtalnada,” kuna ti rekord. Ngem daytoy katan-okan iti amin a mannursuro nadlawna ti pampanunot ti puspusoda ket nariknana ti umuna a panagtaud ti bukod a pannakkel. Isu nga “inayabanna ti maysa a bassit nga ubing, …

“Ket kinunana, Pudno kunak kadakayo, No dikayto agsubli, ken agbalin a babassit nga ubbing, dikayto sumrek iti pagarian ti langit.

“Siasinoman ngarud a mangipakumbaba iti bagina a kas iti daytoy bassit nga ubing, isu met laeng ti katan-okan iti pagarian ti langit.”

Nasken a maipalagip nga uray sakbay ti pannakayanak ni Cristo, inraman met ti sermon a pangpakada ni Ari Benjamin daytoy nauneg a masao maipapan iti kinapakumbaba ti maysa nga ubing. Kunana, “Kabusor ti Dios ti nailubongan a tao, … ket kastanto pay, iti agnanayon, … agbalin a santo babaen ti pannubbot ni Cristo nga Apo, ket agbalin a kasla ubing, natulok, … napakumbaba, … napnuan ayat, … kas iti ubing a [sumungbat] iti amana.”

Ita, madlaw nga adda sumagmamano nga ayo ti maladaga ditayo yallukoy. Duapulo-ket-lima a tawenen ti napalabas, kinagat ti tallo-ti-tawenna nga apokok ti takiag ti lima‑ti‑tawenna a kabsatna a babai. Ti manugangko a lalaki, a mangay-aywan kadagiti ubbing iti dayta a rabii, insurona iti balasangna ti amin a leksion maipapan iti pammakawan a mapanunotna, nga inggibusna a nalabit di pay ammo ti bassit a kabsatna ti rikna ti nakagat iti takiag. Naaramid dayta naamaan a komento iti agarup maysa a minuto, nalabit a maysa-ket-gudua a minuto, agingga nga adda maysa nga ikkis manipud iti pagturogan dagiti ubbing a nangipukkawan ti apokok a babai, “Mariknana itan ti sakit.”

Isu nga ania ti nasken a makitatayo kadagiti saguday ti biag dagiti ubbing? Ania ti gapu ti nagluaan ni Cristo Mismo iti makaabbukay unay nga eksena iti intero a Libro ni Mormon? Ania ti isursuro ni Jesus idi inawaganna ti nailangitan nga apuy ken dagiti mangsalsalaknib nga anghel a manglikmut kadagita nga ubbing, a mangibilbilin kadagiti nataengan a “kitaenda dagiti babassit nga annak[da]”?

Ditay’ ammo no ania ti nangtignay amin kadagita, ngem nasken a panunotek nga adda pakainaiganna iti kinadalus ken kinainosenteda, ti nainkasigudan a pakumbabada, ken no ania ti mabalin a yegna iti biagtayo no pagtalinaedentayo daytoy.

Apay a dagiti aldawtayo ti kinaawan namnama ti insao ti maysa a propeta kas “kinaubbaw dagiti kinaubbaw,”? Kasano a dayta “awan kaes-eskanna nga arapaap ken pagtangtangsit dagiti annak ti tao” ket mangilasin iti dakkel ken nalawa a pasdek, a naespirituan a natay iti parmata ni Lehi? Ken dagiti Zoramite, dayta a grupo a nagkararag iti kasta unay a kinapannakkel? Kadakuada, kinuna ni Alma, “O Dios, [agkararagda] kenka iti ngiwngiwatda, idinto a natangsitda … iti awan kaes-eskanna a bambanag iti lubong.”

Iti kasupadina, adda kadi nasamsam-it, natartarnaw, napakpakumbaba pay ngem iti kararag ti maysa nga ubing? Kasla adda langit iti siled. Pudno unay ti Dios ken ni Cristo, ngem para iti dadduma, mabalin a narabrabaw ti padas.

Kas inadaw ni Elder Richard L. Evans nasurok a 60 tawen ti napalabas: “Adu kadatayo ti agkunkuna a Kristianotayo, ngem … ditayo awaten Isuna a serioso. … Agraemtayo Kenkuana, ngem ditayo sumurot Kenkuana. … Adawentayo dagiti saona, ngem ditayo agbiag a mayannurot kadagitoy.” “Agraemtayo Kenkuana, ngem ditayo agdaydayaw Kenkuana.”

Anian a naiduma ti biag no ipatpateg ti lubong ni Jesus a nangatngato ngem iti lebel ti narugit a panagsapata sagpaminsan.

Ngem pudno nga agayat dagiti ubbing Kenkuana, ket dayta nga ayat makapagtultuloy iti dadduma a relasionda iti pagay-ayaman ti biag. Kas annuroten, uray iti kaubingan a tawtawenda, nalaka nga agayat dagiti ubbing, sidadaan a mamakawan, ken ti katawada ti siraragsak a mangrunaw iti kalamiisan, katangkenan a puso.

Bueno, agtultuloy dayta a listaan. Kinatarnaw? Talek? Tured? Kinatao?

Kaduaendak a mangbuya iti pakumbaba iti sango ti Dios nga impakita ti maysa nga agtutubo, nga ay-ayatek a gayyemko.

Idi Enero 5, 2025—91 nga aldaw ti napalabas—naited ken ni Easton Darrin Jolley ti Aaronic Priesthood ket naordenan a deacon iti Ti Simbaan ni Jesucristo dagiti Santo iti Ud-udina nga Aldaw.

Tinarigagayan ni Easton nga ipasa ti sakramento ti Pangrabii ti Apo iti nabayag a kas malagipna. Ngem daytoy a sagrado a gundaway ket nabuyogan iti buteng a mamagsakit iti tian, amangan no mapaay, matnag, a mauyaw wenno maibabain isuna ken ti pamiliana.

Kitaenyo, addaan ni Easton iti manmano ken makadadael unay a sakit, ti Ullrich congenital muscular dystrophy. Daytoy ti in-inut a nangpunno iti ubing a biagna iti nakaam-amak a pannubok bayat ti pannakadadael dagiti namnama ken arapaapna iti masakbayan. Asidegen a permanente nga agusar iti wheelchair. Saan a pagsasaritaan ti pamiliana no ania ti agur-uray kenkuana kalpasanna.

Iti Domingo kalpasan ti pannakaordenna, ipasa ni Easton ti sakramento iti umuna a gundaway. Ket ti nalimed a motibasionna ket mabalinna nga idatag ti bagina ken dagitoy a sagrado nga emblem iti amana, a bishop ti ward. Iti panangpadpadaanna iti dayta nga aramid, indawat ken impakaasina, nagsangit ken nangted iti garantia nga awan ti asinomana mangpadas a mangtulong kenkuana. Gapu iti adu a rason, a nalimed iti bagina, nasken nga aramidenna daytoy nga is-isu ken di agpatulong.

Kalpasan a pinirsay ti priest ti tinapay ken binendisionanna daytoy—maysa nga emblem a mangibagi iti napirsay a bagi ni Cristo—ni Easton, immaddang nga adda sagabaen ti bagina tapno umawat iti bandehana. Nupay kasta, adda tallo a dadakkel a pangal manipud suelo ti meetinghouse agingga iti nangato a stand. Gapuna, kalpasan a naawatna ti bandehana, nagunnat agingga a kabaelanna sana inkabil ti bandehana iti rabaw iti ngatuen ti handrail. Kalpasanna, nagtugaw iti maysa kadagiti nangatngato a pangal, babaen ti dua nga imana impangatona ti kannawan a sakana iti umuna a pangal. Kalpasanna impangatona ti kannigid a sakana iti isu met la a pangal, ken kasta pay, a siririgat, agingga nga addan iti pantok ti bukodna a tallo nga addang iti Bantay Everest.

Kalpasanna inmaniobrana ti bagina iti maysa a poste ti pasdek a pakaulianna tapno makatakder. Nagsubli isuna iti bandehana. Sumagmamano pay nga addang ket nagtakderen iti sango ti bishop, ti amana, nga, aglulua a nangbasa kadagiti matana ken nagayus iti rupana, nasken a lapdanna ti bagina a mangarakup itoy napnuan tured ken matalek nga anakna. Ket ni Easton, a sibabang-ar ken immisem iti dakkel ket mabalin a kinunana pay, “Indaydayawko [ni tatangko ken] nalpaskon ti trabaho nga [intedna] nga aramidek.”

Pammati, kinasungdo, kinadalus, panagtalek, dayaw, ken, kamaudiananna, ayat iti dayta nga ama a tinarigagayanna unay a paragsaken. Dagitoy ken sangadosena pay a kababalin aramidennatayo a mangisao pay, “Siasinoman … a mangipakumbaba iti bagina a kas iti daytoy bassit nga ubing, isu met laeng ti katan-okan iti pagarian ti langit.”

Kakabsat ken gagayyem, adda iti ngato ti listaan dagiti kapintasan a ladawan nga ammok a maladaga ken ubbing ken agtutubo a napasnek ken saan a magatadan a kas kadagiti dinakamatmi ita nga aldaw. Paneknekak a ladawan dagitoy ti pagarian ti Dios a dumrdur-as ditoy daga iti amin a pigsa ken kinapintasna.

Iti dayta isu met la nga espiritu ti pammaneknek, paneknekak nga iti kinaagtutubona, nakita ni Joseph Smith no ania ti kinunana a nakita ken nakasaritana a kinunana a kinasaona. Paneknekak a ti napakumbaba ken natarnaw a ni Russell M. Nelson ti naordenan ken naparaburan a propeta ken mammadto. Manipud iti tungpal biag a kanayon a panagbasak, paneknekak a ti Libro ni Mormon ti kapatgan a libro a nabasakon ken ti pudno a panuli a bato ti bassit a pagindegak iti pagarian ti adu a mansion. Paneknekak a ti priesthood ken kararag ti mangisubli iti biagko—ti preisthood ni Cristo ken dagiti kararagyo. Ammok a pudno amin daytoy ket paneknekak kadakayo iti nagan ti kapudnuan ken kapakumbabaan iti amin nga annak a lallaki—ti Alfa ken Omega, ti Naindaklan a Siak, ti nailansa iti krus, ti napudno a saksi—nga isu ni Apo Jesucristo, amen.