Ti Panagayatko iti Mangisalakan ti “Apayko”

Nadlawyo kadin a ti patpatgentayo a propeta, ni Presidente Russell M. Nelson, nga agtultuloy a mangmangted kadagiti awis kadatayo? Di nakaskasdaaw ta inawisnatayo a mangadal ken mangutob kadagiti mensahe a naibinglay iti naudi a dua a komperensia. Idi Abril 2024, kinunana, “Namnamaek nga ulitenyonto nga adalen dagiti mensahe daytoy a komperensia kadagiti umay a bulan.” Kalpasanna, idi Oktubre 2024, imbagana: “Igunamgunamko nga adalenyo dagiti mensahe [dagiti nagsarita’]. Usarenyo dagitoy kas litmus test no ania ti pudno ken saan bayat ti sumaganad nga innem a bulan.”

Dagitoy nga awis mabalin a mainayon kadagiti naimpadtuan nga awis a naawattayo iti intero a panagbiagtayo, agraman ken nangnangruna kadagiti naawattayo iti kallabes a tawtawen. Mabalin a mariknatayo wenno ipagaruptayo a dagitoy nga awis ket nasken pay a mainayon iti listaan ​​dagiti aramidentayo gapu laeng ta naawis wenno nakiddaw kadatayo nga aramiden daytoy. Ngem adda pay ngata napatpateg a kaipapananna?

Iti panangutobko daytoy ken iti amin nga awis a naawattayo, nalagipko ti maysa a banag a nasursurok ken inkeddengko iti nabayagen a panawen. Ikagkagumaak nga aramiden dagitoy a banag a napateg kaniak gapu ta ay-ayatek ti Mangisalakantayo. Daytoy ti pudno ken kabibilgan a rason no apay nga ar-aramidek ti ar-aramidek, ket nainaig iti daytoy ti panagayatko kadakayo, padak a kakabsatko.

Kas kabsatyo, namnamaek nga ibilangyo dagiti saok kas napudno nga awis tapno ikagumaanyo nga awaten ti gundaway a mangikonekta iti amin nga ar-aramidentayo iti panagayattayo iti Mangisalakan.

Ti panangaramid iti daytoy ti mangtulong kadatayo a mangawat iti pudno nga “apay” iti amin nga ar-aramidentayo kas disipulo ti Mangisalakan. Daytoy ti mangtulong kadatayo a mangpapigsa iti pannakitulagtayo iti Dios, a mangawat kadagiti nadiosan ken agnanayon a kinapudnona—dagiti agnanayon ken naan-anay a kinapudnona a di pulos agbalbaliw. Agnanayon a kinapudno a kas iti “Ta kasta la unay ti panagayat ti Dios iti lubong; nga intedna ti Anakna a Bugbugtong, tapno amin a mamati kenkuana, saan a mapukaw, no di ket adda biagna nga agnanayon.”

Makapainteres ta no dadduma gapu ta kanayon nga ar-aramidentayon ti bambanag agingga a nagbalindan a tradision, ipalubostayo dagitoy a tradision wenno aktibidad ti mangdiktar iti panagreggettayo a mangbangon iti pammati ken Jesucristo. Kasla ar-aramidentayo dagitoy a banag gapu ta adu a tawenen nga inaramidtayo dagitoy, a ditay naamiris ti epektoda iti pannakitulagtayo iti Mangisalakan.

Iti lubongtayo, masansan nga agpokustayo iti no ania ti ar-aramidentayo ken iti kanayon a panangitungpal kadagiti trabaho ken panggeptayo a tun-oyen (goals). Iti naespirituan a tay-ak, adda gundawaytayo nga agaramid iti ad-adu ngem iti panangaramid laeng iti bambanag wenno panangragpat kadagiti panggep a tun-oyen (goals) babaen ti pannakaawat iti no apay nga ar-aramidentayo dagitoy. No maawatan ken maikonektatayo a ti rason dagiti tignaytayo ket mainaig iti panagayattayo iti Mangisalakan ken ti Nailangitan nga Amatayo, babaen ti pananggun-od kadagitoy a gundaway, maawatantayo nga uray no ti panangaramid iti nalinteg a bambanag kas iti aktibidad wenno tradision ti Simbaan ken ti panangaramid kadagitoy iti umno a wagas ket nasayaat, no ikonektatayo ida iti no “apay,” mabendisionantayo a maawatan ti rason. Saan laeng a ti panangaramid iti naimbag a bambanag wenno umno; maaramidtayo pay dagitoy a husto.

Kas pagarigan, no mangaramid iti panggep a tun-oyen (goal) a mangbasa kadagiti nasantuan a kasuratan, agkararag a naimpusuan, wenno mangisagana iti aktibidad para iti pamilia wenno wardyo, ti kadi pudno a panggepyo a tun-oyen (goal) ket ti mangipatungpal laeng kadagitoy nga aramid? Wenno dagitoy kadi nga aramid ti wagas, dagiti ramit a mausaryo, tapno maragpat ti pudno a panggepyo a tun-oyen (goal)? Ti kadi panggep ket tapno laeng mangangaytayo iti maysa nga aktibidad gapu ta adun a tawen nga inar-aramidtayo daytoy ket kalpasanna, i-checktayo ti box no nakompletotayon daytoy? Wenno, manen, dagitoy kadi dagiti wagas nga us-usarentayo a mangammo, a mangrikna, ken makikonekta iti Mangisalakan?

Diyo koma tagidaksen ti ibagbagak maipapan kadagiti aktibidad ken tradision wenno panangaramid kadagiti panggep a tun-oyen (goals) ken panagregget a mangragpat kadagita; awan dakesna iti dayta. Nupay kasta, awisenkayo a manglukat iti puspuso ken pampanunotyo iti gundaway ken bendision ti pannakaawat no apay nga ar-aramidentayo dagitoy a banag ken no kasano nga ibiagtayo ti relihiontayo.

Ti kangrunaan a pagarigan ti tradision a naisentro ken ni Cristo ket ti karit ni Presidente Dallin H. Oaks a naited kadatayo amin iti biang ti Umuna a Panguluen. Kinuna ni Presidente Oaks: “Bayat ti iseserrektayo itoy baro a tawen, agsaganatayo para iti selebrasion ti Paskua ti panagungar (Easter) iti pannubbot a sakripisio ni Jesucristo. … Aniaman ti patien wenno aramiden ti dadduma, rumbeng a rambakantayo ti Panagungar ti sibibiag a Mangisalakantayo babaen ti panangadal kadagiti pannursurona ken panangtulong a mangipasdek iti tradision ti Paskua ti panagungar (Easter) iti intero a komunidadtayo, nangnangruna iti pamiliatayo.” Kas makitayo, di laeng awis ti maaddaan kadagiti tradision. Ketdi, usarentayo dagitoy a tradision kas wagas tapno masursurotayo ti ad-adu pay maipapan iti Mangisalakan ken manglaglagip iti Panagungarna.

No ad-adda a maikonektatayo ti rason iti panagayattayo iti Mangisalakan, ad-adda a maawattayo ti kasapulan wenno sapsapulentayo. Kinuna ni Presidente Nelson, “Aniaman dagiti saludsod wenno parikutyo, ti sungbat ket kanayon a masarakan iti biag ken pannursuro ni Jesucristo.” Kalpasanna intedna daytoy nga awis: “Adalenyo ti ad-adu pay maipapan iti Pannubbotna, ti ayatna, ti asina, ti doktrinana, ken ti naisubli nga ebangheliona iti pannakapaimbag ken panagdur-as. Agturongkayo Kenkuana! Surotenyo Isuna!”

Utoben daytoy iti puso ken panunotyo: Mamatikayo kadi nga adda panggep ti awis ni Presidente Nelson a tumulong kadatayo a mangisagana iti checklist no sadino ti pakaurnongantayo iti ad-adu pay a pannakaammo ken panangileppas kadagiti trabaho tapno ma-i-check-tayo ti awisna manipud iti to-do-list-tayo? Wenno aw-awisennatayo kadi a mangibilang kadagiti aspeto dagitoy agnanayon a kinapudno ken prinsipio kas gundaway a mangawat iti “apay” ken mangikonekta iti ayat ti katulagan ti Mangisalakan kadatayo bayat ti panagdaliasattayo kas disipulo iti intero a panagbiagtayo?

Palubosandak a mangiladawan ti prinsipio a kayatko nga ipaawat. Ti maysa nga opsion, a nalabit a nalabes, ket ti panangbasa lang iti maminsan a tiempo ti amin a mensahe manipud iti sapasap a komperensia, ket apaman a malpasko, i-check-ko daytoy nga awis iti to-do-list-ko ket awanen ti aramidek kadagita a nabasak. Maawatak a nakaro daytoy a senario, ngem posible dayta. Nalabit, adu ti adda iti kasasaad iti nagbaetan daytoy ken ti ideal.

Ti awis ket ti panangadal ken panangutob kadagiti mensahe manipud iti sapasap a komperensia ken usaren dagitoy tapno mangikeddeng ken maawatan no ania ti maaramidantayo tapno dumur-as.

No awatentayo ti awis, a maawatantayo ti “makagapu” iti dayta, ad-adunto ti gundawaytayo nga umas-asideg iti Mangisalakan. Mangruginton a maawatantayo a gapu ta ay-ayatek ti Mangisalakan, kayatko a maammuan ti ad-adu pay maipapan Kenkuana babaen ti panangadal kadagiti sasao dagiti sibibiag a propeta. Ket gapu ta ay-ayatek ti padak a tao, ibinglayko dagiti pannursuro dagiti propeta, mammadto, ken mammaltiing iti dadduma, mangrugi kadagiti ipatpategko.

Iti agpada a pagarigan, ar-aramidenyo ti nalinteg a banag. Iti maysa, kasla ti panggep a tun-oyen (goal) ti mausar a kas ti wagas nga inted kadatayo ti Nailangitan nga Ama ken ti Mangisalakan, nga isu dagiti mensahe a naibinglay bayat ti sapasap a komperensia. Ti maikadua a bersion sakupenna ti nauneg a bendision iti pananggun-od iti insight kadagiti kangrunaan a gapu, a mangipaay iti wagas tapno maawatan ti agnanayon a kinapudno ken bendision a naikari iti amin a mangaramid kadagiti pannursuro ken biag ti Mangisalakantayo, ni Jesucristo, kas kangrunaan a pokus ti biagda.

Patpatgek a kakabsat, namnamaek a mariknayo ken makitayo ti kinapateg ti panangikonekta kadagiti tignaytayo iti panagayattayo iti Mangisalakan. Iti globalisado a lubong, adu dagiti mangimpluensia kadakayo ken, no mabalin, iturongdakayo a mamati a di kasapulan ti sumagmamano a kangrunaan a kinapudno ti naisubli nga ebanghelio ni Jesucristo. Irugi dagitoy a timek a mangimpluensia kadakayo iti napateg a kinapudno a kasapulan iti pannakaisubli kadagitoy maudi nga aldaw, agraman ti kasapulan a maaddaan iti pagarian ti Dios ditoy daga, nga ibagi ti naisubli a Simbaan ni Jesucristo dagiti Santo iti Ud-udina nga Aldaw.

Mabalin a mangngegyo iti dadduma nga ipapilitda a ti laeng personal a relasion wenno pannakaawat iti Mangisalakan ti umdas ken di kasapulan wenno di napateg ti relihion wenno ti naisubli a Simbaan. Awisenkayo a di agdardaras a mangusig wenno di maimpluensiaan kadagitoy a makaallilaw a kapanunotan ken agbalin a naparpartak a manglagip iti imbaga ken insuro kadatayo ti Mangisalakan sipud idi un-unana a panawen---mangrugi iti panagayat ti Nailangitan nga Ama ken Jesucristo kadatayo ken mangikonekta iti panagayattayo Kadakuada kas rason a mangsurot Kadakuada.

Immay ti Dios Ama ken ti Anakna ket nakisaoda ken Joseph Smith tapno maisubli ti Simbaan ni Jesucristo ken mangirugi ti dispensasion ti pannakatungpal dagiti panawen, ti Pagarianna ditoy daga. Ngarud, Ti Simbaan ni Jesucristo dagiti Santo iti Ud-udina nga Aldaw ti wagas nga impasdek ti Nailangitan nga Ama tapno magun-od dagiti katulagan a mangpabalin kadatayo nga agsubli iti langit. Ngarud, kasapulantayo ti ad-adu pay ngem ti personal laeng a relasion iti Nailangitan nga Ama ken ti Anakna; kasapulantayo dagiti nasken nga ordinansa ti priesthood a pakaaramidantayo kadagiti katulagan Kadakuada. Daytoy ti mangipaay iti pannakitulagtayo Kadakuada ken mangipaay iti pannakagun-odtayo iti ayatda, a mamagbalin a posible a maragpat ti kangatuan a pagarian ti dayag a naisagana kadagiti amin a napudno ken matalek kadagiti katulaganda.

Iti amin a kabaelak, paneknekak ti kinapudno ken kinadiosan ti Mangisalakantayo, a ni Jesucristo. Ay-ayatennakayo. Ammona ti mapaspasamak iti biagyo. Silulukat dagiti takiagna, a mangaw-awis “Umaykayo kaniak, … ket paginanaenkayo.”

Ay-ayatek ti Mangisalakan, ket ti panagayatko kenkuana ti “apayko.” Iti nagan ni Jesucristo, amen.