“Umasidegkayo Kaniak”

Patpatgek a kakabsatko, pakaragsakak a makaduakayo iti daytoy sapasap a komperensia ti Ti Simbaan ni Jesucristo dagiti Santo iti Ud-udina nga Aldaw. Daytoy ti Simbaanna. Naguummongtayo kadagiti pasdek ken pagtaengan iti intero a lubong iti naganna.

Awatentayo ti naganna no sumrektayo iti pagarianna babaen iti katulagan. Isu ti nagungar ken nadayag nga Anak ti Dios. Mortaltayo, a makapadas iti basol ken ipapatay. Ngem, gapu iti ayatna iti tunggal maysa kadatayo, awisennatayo ti Mangisalakan nga umasideg Kenkuana.

Dagitoy dagiti balikasna kadatayo: “Umasidegkayo kaniak ket umasidegakto kadakayo; sapulendak a sireregta ket masapulandakto; agdawatkayo, ket umawatkayonto; agtuktokkayo ket malukatankayto.”

Adda dagiti panawen a mariknatayo nga asidegtayo iti Mangisalakan a ni Jesucristo. Ken, no dadduma bayat dagiti pannuboktayo iti biag, mapasarantayo nga adayotayo Kenkuana ken tarigagayantayo ti pammatalged nga ammona ti adda iti puspusotayo ken ay-ayatennatayo kas indibidual.

Karaman iti awis ti Mangisalakan ti wagas a panangrikna iti dayta a pammatalged. Umasidegka Kenkuana babaen ti kanayon a pananglagip Kenkuana. Sapulen Isuna a sireregta babaen ti panagadal iti nasantuan a kasuratan. Agkiddaw babaen ti naimpusuan a kararag iti Nailangitan nga Ama tapno marikna a nasingsinged iti Ay-ayatenna nga Anak.

Adda simple a wagas a mangpanunot iti daytoy. Dayta ti aramidem no naisinaka iti apagbiit kadagiti patpatgem a gayyem. Maaddaankayo iti wagas a makisarita kadakuada, ipatpategyo ti aniaman a mensahe a maawatyo manipud kadakuada, ken aramidenyo ti amin a kabaelanyo a tumulong kadakuada.

No ad-adda a mapasamak dayta, no napapaut ti panagtultuloyna, ad-adda a pumigpigsa ti begkes ti ayat, ket mariknayo nga umas-asidegkayo iti tunggal maysa. No aglabas ti adu a panawen nga awan ti napateg a komunikasion ken ti gundaway a panagtitinnulong, kumapuy ti begkes.

Ay-ayaten ni Jesucristo ti tunggal maysa kadatayo. Idiayaannatayo iti dayta a gundaway nga umas-asideg Kenkuana. Kas iti naayat a gayyem, aramidenyo daytoy iti kasta met la a wagas, babaen ti pannakiuman babaen ti kararag iti Nailangitan nga Ama iti nagan ni Jesucristo, panagdengngeg iti napateg a pannarabay ti Espiritu Santo ken panagserbi iti dadduma para iti Mangisalakan a siraragsak. Iti mabiit mariknayo dayta a bendision nga umas-asideg Kenkuana.

Idi agtutuboak, napadasak ti rag-o ti pannakisinged iti Mangisalakan—ken ti pannakisingedna kaniak—babaen dagiti simple a panagtungpal kadagiti bilin. Idi ubingak, naidiaya ti sakramento kabayatan ti maysa a miting iti rabii. Malagipko pay laeng ti maysa a rabii, nasurok a 75 a tawenen ti napalabas, idi nasipnget ken nalamiis iti ruar. Malagipko ti rikna ti lawag ken kinabara bayat ti pannakaamirisko a tinungpalko ti bilin a makitaripnong kadagiti Santo tapno makiranud iti sakramento, a makitultulag iti Nailangitan nga Amatayo a kanayon a laglagipen ti Anakna ken tungpalen dagiti bilinna.

Iti gibus ti miting iti dayta a rabii, kinantami ti himno nga “Abide with Me; ’Tis Eventide,” nga addaan kadagiti nakallalagip a balikas “O Savior, stay this night with me.”

Dagitoy a balikas ti nangyeg kaniak iti napalaus a rikna ti Espiritu, uray idi ubingak pay. Nariknak ti ayat ken ti kinasinged iti Mangisalakan iti dayta a rabii babaen ti liwliwa ti Espiritu Santo.

Kalpasan dagiti tawen kayatko a sadiwaen manen ti nariknak nga ayat ti Mangisalakan ken ti kinasinged a nariknak iti Apo kabayatan dayta a miting ti sakramento idi agtutuboak. Isu a tinungpalko ti sabali pay a simple a bilin: Sukisokek dagiti nasantuan a kasuratan.

Iti libro ni Lucas, nabasak ti maikatlo nga aldaw kalpasan ti pannakailansa ken pannakaitabonna, idi immay dagiti napudno nga adipen, gapu iti ayatda iti Mangisalakan, tapno mapulotan ti bagina. Idi sumangpetda, nasarakanda ti naipatulid a bato a nangkalub iti tanem ket nakitada nga awanen ti bagina sadiay.

Dinamag ti dua nga anghel nga adda idiay no apay a mabutengda:

“Apay apay sapulenyo kadagiti natay ti sibibiag?

“Awan ditoy, no di ket nagungaren: laglagipenyo ti insaona kadakayo idi adda pay laeng idiay Galilea,

“Kunkunana, Masapul a ti Anak ti tao mayawat kadagiti ima dagiti tao, a managbasol, ken mailansa iti krus, ken agungar iti maikatlo nga aldaw.”

Iti dayta a malem idi sumipnget, nagna ti dua a disipulo manipud Jerusalem iti dalan nga agturong iti Emaus, ket nagparang kadakuada ti nagungar nga Apo ket nakipagna kadakuada.

Ipalubos ti libro ni Lucas a makipagnatayo kadakuada iti dayta a sardam:

“Ket naaramid, nga idi agsasaoda ken agsisinnaludsodda, ni Jesus met laeng immasideg, ket nakikuyog kadakuada.

“Ngem dagiti matada nakullaapanda, tapno isu dida mailasin.

“Ket kinunana kadakuada, Ania a sarsarita dagitoy a sasawenyo iti maysa ken maysa iti panpannagnayo? Ket nagsardengda a sililiday?

“Ket simmungbat ti maysa a managan Cleofas, ket kinunana kenkuana, Siksika laeng ti sangsangaili idiay Jerusalem, a dika ammo dagiti banag a naaramid sadiay kadagitoy nga aldaw?”

Imbagada Kenkuana ti panagladingitda iti ipapatay ni Jesus idinto a ninamnamada nga Isunto ti agbalin a Mannubbot ti Israel.

Nalabit nga adda panangisakit ti timek ti nagungar nga Apo bayat ti pannakisaona kadagitoy dua a malidlidayan ken agladladingit a disipulo.

Bayat ti panagtultuloyko a nagbasa, dimteng dagitoy a balikas a nangpabara iti pusok, kas iti nariknak idi ubingak pay:

“Ket immasidegda iti purok a papananda, ket isu impakitana a kasla mapan iti ad-adayo.

“Ngem isuda inggawidda a kinunada, Agbatika kadakami: ta rumabiin ket lumabes ti orasen. Ket isu simrek a nagbati kadakuada.”

Inawat ti Mangisalakan dayta a rabii ti awis a sumrek iti balay dagiti disipulona. Nakilanglang a nangan kadakuada. Nangala iti tinapay, binendisionanna, pinisina, ket intedna daytoy kadakuada. Naluktan dagiti matada, ket nabigbigda Isuna. Kalpasanna nagawan Isuna iti imatangda.

Insurat ni Lucas para kadatayo dagiti rikna dagita a nagasat a disipulo: “Ket kinunada iti maysa ken maysa, Saan aya a rumayrayray ti pusota iti unegta, itay madama nga agsasao iti dalan ket itay ilawlawagna kadata dagiti sursurat?”

Nagdardaras ti dua a disipulo a nagsubli iti Jerusalem tapno ipakaammoda iti sangapulo-ket-maysa nga Apostol ti napasamak. Bayat ti panangibinglayda iti padasda, nagparang manen ti Mangisalakan.

Nagtakder iti tengngada ket “kinunana kadakuada, Kappia koma kadakayo.” Imbagana manen dagiti padto maipapan iti misionna a mangsubbot iti basbasol ti amin nga annak ti Amana ken tapno warwarenna dagiti pamungo ni patay.

“Ket kinunana kadakuada, Kasta ti adda a naisurat ken masapul a ti Cristo agsagaba, ken agungar kadagiti natay iti maikatlo nga aldaw:

“Ket maikaskasaba ti naganna ti panagbabawi ken ti pannakasubbot dagiti basbasol iti isu amin a nasnasion, a nangrugi iti Jerusalem.

“Ket dakayo ti makasaksi kadagitoy a banag.”

Kas met laeng kadagiti ay-ayatenna a disipulona, tunggal anak ti Nailangitan nga Ama a nangpili a sumrek babaen ti ruangan ti buniag ket adda iti katulagan nga agbalin a saksi ti Mangisalakan ken mangaywan kadagiti agkasapulan iti unos ti mortal a panagbiagtayo. Daytoy a panagkumit ket naaramid a nalawag para kadatayo babaen ti propeta ti Libro ni Mormon a ni Alma sinigsiglo ti napalabas iti Dandanum ti Mormon:

“Gapu iti tarigagayyo nga umay iti salinong ti Dios, ken maawagan a tattaona, ken siaayat a makipagbaklay iti imet ti tunggal maysa, tapno lumag-anda;

“Wen, ken siaayat a makipagladingit kadagiti agladladingit; wen, ken manglinglingay kadagiti makasapul iti pannakalinglingay, ken agtakder a saksi ti Dios iti amin a kanito ken iti amin a banag, ken iti amin a lugar …, uray pay agingga ken patay, tapno masubbotnakayo ti Dios, ket … tapno maaddaankayo iti agnanayon a biag.”

No napudnokayo kadagitoy a kari, makitayonto a tungpalen ti Apo ti karina a makikaykaysa kadakayo iti panagserbiyo, a pagbalinenna a nalag-an dagiti dadagsenyo. Maam-ammoyo ti Mangisalakan, ket inton agangay agbalinkayto a kas Kenkuana ken “naan-anay kenkuana.” Babaen ti panangtulong iti dadduma para iti Mangisalakan, makitayonto a nasingsingedkayo Kenkuana.

Adu kadakayo ti addaan kadagiti ipatpateg iti biag nga umad-adayo iti dalan nga agturong iti agnanayon a biag. Pampanunotenyo no ania pay ti maaramidyo tapno mapasubliyo ida. Makanamnamakayo nga ad-adda a mayasideg ti Apo kadakuada no agserbikayo Kenkuana a sipapammati.

Laglagipenyo ti kari ti Apo kada Joseph Smith and Sidney Rigdon idi nayadayoda kadagiti pamiliada iti panagserbida Kenkuana: “Gagayyemko a Sidney ken Joseph, naimbag dagiti kaamaanyo; addada kadagiti imak, ket tulongak ida no namnamaek a nasayaat; ta adda kaniak ti amin a bileg.”

Bayat ti panangbegkesyo kadagiti sugat dagiti agkasapulan, tulongannakayonto ti bileg ti Apo. Nakaunnat dagiti takiagna iti takiagyo a mangtulong ken magbendision kadagiti annak ti Nailangitan nga Amayo.

Tunggal natulagan a katulongan ni Jesucristo umawatto iti panangiturong ti Espiritu no bendisionan ken pagserbianda ti dadduma para Kenkuana. Ket mariknadanto ti ayat ti Mangisalakan ken masarakanda ti rag-o iti pannakisingedda Kenkuana.

Maysaak a saksi ti Panagungar ti Apo nga awan duadua akasla addaak idiay iti dayta a sardam a kaduak ti dua a disipulo iti balay iti dalan ti Emaus. Ammok a sibibiag Isuna.

Daytoy ti pudno a Simbaanna—ti Simbaan ni Jesucristo. Iti Aldaw ti Panangukom agtakdertayonto iti sanguanan ti Mangisalakan, a sangun-sango. Panawento ti dakkel a rag-o para kadagiti, ditoy a biag, immasideg Kenkuana iti panagserbina ken sigagagar a dumngeg kadagitoy a balikas: “Nasayaat ti inaramidmo, sika a naimbag ken matalek nga adipen.”

Paneknekak kas saksi ti nagungar a Mangisalakan ken Mannubbottayo, iti nagan ni Jesucristo, amen.