Ti Plano ti Asi

Idi napalabas nga Abril, nabiit kalpasan ti naragsak a damag a nagun-od ti Simbaan ti Kirtland Temple, inawisnakami ni Presidente Russell M. Nelson nga adalen ti pangidaton a kararag ti Kirtland Temple, a nairekord iti benneg 109 ti Doktrina ken Katulagan. Ti pangidaton a kararag, kinuna ti Presidente Nelson, “ket maysa a pagsursuruan maipapan no kasano a naespirituan a mangpabileg ti templo kadatayo tapno mangsango kadagiti karit ti biag kadagitoy maudi nga aldaw.”

Siguradoak a ti panagadalyo iti benneg 109 ket nangted kadagiti insights a nangbendision kadakayo. Ita a sardam, ibinglayko ti dua a banag a nasursurok idi sinurotko iti awis ti propetatayo. Ti mangted-talna a dana a nagturong ti panagadalko ti nangipalagip kaniak a naasi ti Apo ken ti plano ti Nailangitan nga Amatayo iti pannakaisalakan ket pudno a plano ti asi.

Kas mabalin nga ammoyo, “maparegta dagiti kaaw-awag a misionario nga umawat iti endowment iti templo iti kabiitan a panawen ken dumar-ay iti templo a masansan no ipalubos ti kasasaad.” Apaman a na-endow, mabalinda pay ti “agserbi a kas temple … worker sakbay a mangrugida iti serbisio kas misionario.”

Ti panawen iti templo sakbay a sumrek iti missionary training ket mabalin a nangayed a bendision kadagiti baro a misionario no agsursuroda iti ad-adu pay maipapan kadagiti katulagan iti templo sakbay nga ibinglayda dagiti bendision dagita a katulagan iti lubong.

Ngem iti panagadal iti benneg 109, nasursurok, nga iti templo, pabilgen ti Dios dagiti baro a misionario—pudno, amintayo—iti nayon, sagrado a wagas. Iti pangidaton a kararag, a naited babaen ti paltiing, inkararag ni Propeta Joseph Smith a “no rummuar dagiti katulongam iti balaymo … nga agpaneknek iti naganmo,” ti “puspuso” ti “amin a tao” ket “mapalukneng”—agpada “dagiti naindaklan iti daga” ken “ti amin a nakurapay, agkasapulan, ken [dagiti] agsagsagaba.” Inkararagna nga “agparbeng ti dakes a panangipapanda iti kinapudno, ket magun-od dagiti taom ti pannakaawat iti imatang ti amin; tapno maammuan ti amin iti intero a daga a dakami a katulongam, nangngegmi ti timekmo ken imbaonnakami.”

Napintas daytoy a kari para iti kaaw-awag a misionario— “agparbeng ti dakes a panangipapanda iti kinapudno,” tapno “magun-od ti pannakaawat iti imatang ti amin,” ken tapno maammuan ti lubong nga imbaon ida ti Apo. Awan duadua a kasapulantayo met dagitoy a bendision. Anian a bendision no mapalukneng dagiti puso no makilangentayo kadagiti kaarruba ken katrabahuantayo. Di eksakto nga ilawlawag ti pangidaton a kararag no kasano a ti orastayo iti templo ket mapaluknengna ti puspuso ti dadduma, ngem patiek a maibegkes no kasano a ti oras iti balay ti Apo ket mapaluknengna ti bukodtayo a puspuso babaen ti panangisentrona kadatayo ken Jesucristo ken ti asina.

Idi adalek ti pangidaton a kararag iti Kirtland, nasdaawak pay a maulit-ulit nga immararaw ni Joseph iti asi—para kadagiti miembro ti Simbaan, para kadagiti kabusor ti Simbaan, para kadagiti dadaulo iti pagilian, para kadagiti nasion ditoy daga. Ket, personal unay, nagpakaasi iti Apo a manglaglagip kenkuana ken tapno kaasianna ti ay-ayatenna nga Emma ken dagiti annakda.

Kasano la ketdi ti narikna ni Joseph idi, maysa a lawas kalpasanna, iti agsapa ti Paskua ti Panagungar, Abril 3, 1836, iti Templo ti Kirtland, nagparang ti Mangisalakan kenkuana ken ni Oliver Cowdery ket, kas nairekord iti benneg 110 ti Doktrina ken Katulagan, kinunana, “Inawatko daytoy a balay, ket addanto ditoy ti naganko; agpakitaakto kadagiti taok a siaasi iti daytoy a balay.” Nalabit a naisangsangayan ti kaipapanan daytoy a kari ti asi ken Joseph. Ken kas iti insuro ni Presidente Nelson idi napalabas nga Abril, “maaramat pay iti tunggal naidaton a templo ita.”

Nakaad-adu dagiti wagas a pakasarakan ti tunggal maysa kadatayo iti asi iti balay ti Apo. Pudno daytoy manipud idi damo nga imbilin ti Apo iti Israel a mangbangon iti maysa a tabernakulo ken mangikabil iti tengngana ti “tugaw ti asi.” Iti templo, masarakantayo ti asi kadagiti katulagan nga aramidentayo. Dagita a katulagan, kas nayon iti katulagan iti panagbuniag, ibegkesnatayo iti Ama ken iti Anak ken maikkannatayo iti ad-adu a pannakagun-od iti insuro ni Presidente Nelson a “naisangsangayan a kita ti ayat ken asi … a maawagan iti hesed” iti Hebreo.

Makitatayo ti asi iti gundaway a mailantip kadagiti pamiliatayo iti agnanayon. Iti templo, maawatantayo pay a nalawlawag a ti Panagparsua, ti Pannakatnag, ti pangsubbot a sakripisio ti Mangisalakan, ken ti kabaelantayo a sumrek manen iti imatang ti Nailangitan nga Amatayo—pudno, tunggal paset ti plano ti pannakaisalakan—ket dagiti pannakaiparangarang ti asi. Mabalin a makuna a ti plano ti pannakaisalakan ket plano ti ragsak gapu ta maysa daytoy a “plano ti asi.”

Agyamanak iti napintas a kari iti benneg 110 nga iparangarang ti Apo ti Bagina iti asi kadagiti templona. Agyamanak pay iti ipalgakna no kasano nga iparangarang ti Apo ti bagina iti asi no, kas ken Joseph, agpakaasitayo.

Ti pakaasi ni Joseph Smith iti asi iti benneg 109 ket saan nga umuna a gundaway a dagiti pakaasina iti asi ti nangtignay iti paltiing. Iti Sagrado a Kakaywan, nagkararag ni ubing a Joseph saan laeng a tapno maammuanna no ania a simbaan ti pudno, ngem kinunana pay nga isu “nagpakaasi iti Apo, ta awanen ti sabali a mabalinko a papanan tapno makagun-odak iti asi.” No kaskasano ti panangbigbigna a kasapulanna ti asi a ti laeng Apo ti makaipaay ket nakatulong a nanglukat iti tawtawa ti langit. Tallo a tawen kalpasanna, nagparang ni anghel Moroni kalpasan ti kinuna ni Joseph a “kararag ken ararawna iti Mannakabalin a Dios maipaay iti pannakapakawan ti amin a basolko ken kinarasik.”

Daytoy a pagtuladan ti paltiing kalpasan iti araraw iti asi ket pamiliar iti maysa iti scriptures. Nangngeg laeng ni Enos ti timek ti Apo kalpasan ti panagkararagna para iti pammakawan. Mangrugi ti kumbersion ti ama ni Ari Lamoni iti kararagna: “Iwaksikto amin a basolko tapno maammuanka.” Mabalin a ditayo maparaburan kadagitoy met laeng a padas, ngem para kadagiti agkarkarigatan a mangrikna iti sungbat iti kararag, nga agkalkalikagum iti asi ti Apo ket maysa kadagiti kabilgan a wagas a mangrikna iti saksi ti Espiritu Santo.

Napintas a naisuro ti isu met la a prinsipio iti Moroni 10:3–5. Masansan a gupgopentayo dagitoy a bersikulo tapno maisuro a, babaen ti napasnek a kararag, masursurotayo no pudno ti Libro ni Mormon. Ngem daytoy a pananggupgop ti mangbaybay-a iti napateg nga akem ti asi. Denggen no kasano ti panangirugi ni Moroni iti balakadna: “Igunamgunamko nga inton basaenyo dagitoy a banag, … tapno malagipyo no kasano ti kinamanangngaasi ti Apo kadagiti annak ti tao, manipud iti pannakaparsua ni Adan agingga iti kanito nga awatenyonto dagitoy a banag, ket usigenyo iti puspusoyo.”

Guyugoyennatayo ni Moroni a saan laeng a basaentayo dagitoy a banag—dagiti kasuratan a dandanin rikpanna—ngem utoben pay iti puspusotayo no ania ti ipalgak ti Libro ni Mormon maipapan iti “no kasano ti kinamanangngaasi ti Apo kadagiti annak ti tao.” Daytoy ti panangutob iti asi ti Apo a mangisagana kadatayo a dawatenyo iti Dios, ti Agnanayon nga Ama, iti nagan ni Cristo, no saan a pudno dagitoy a banag.”

Bayat ti panangutobtayo iti Libro ni Mormon, mabalintayo a saludsoden: Talaga kadi a pudno, kas insuro ni Alma, a ti plano ti Dios ti asi ket mangipanamnama a mapagungarto ti tunggal tao a nagbiag ditoy daga ken maisublida iti naan-anay a bagida?” Husto kadi ni Amulek—mapennek kadi ti asi ti Mangisalakan ti amin a napait a pudno a dawdawaten ti hustisia a no saan ket obligadotayo a bayadan ket imbes ketdi a “[likmutennatayo] kadagiti takiag ti kinatalged”?

Pudno kadi, kas pinaneknekan ni Alma, a nagsagaba ni Cristo saan laeng a gapu kadagiti basoltayo no di ket gapu kadagiti “ut-ot ken rigattayo” tapno “maammuanna … no kasano a tulongan dagiti taona maibatay kadagiti kinakapuyda”? Talaga kadi a naasi unay ti Apo, kas insuro ni Ari Benjamin, a kas libre a sagut, sinubbotna “dagiti basol dagidiay … natay a dida ammo ti pagayatan ti Dios maipanggep kadakuada, wenno dida ammo a nagbasolda”?

Pudno kadi, kas kinuna ni Lehi, a “Natnag ni Adan tapno mabalin dagiti tao; ket adda dagiti tao, tapno maaddaanda iti rag-o”? Ket talaga kadi a pudno, kas pinaneknekan ni Abinadi, nga inadawna ni Isaias, a ni Jesucristo ket “nasugatan gapu kadagiti salungasingtayo, nasugatan gapu kadagiti kinadakestayo, ti pannakadusa ti talnatayo adda kenkuana; ket babaen kadagiti saplitna maagasantayo”?

Iti pakagupgopan, talaga kadi a kastoy ti asi ti plano ti Ama kas naisuro iti Libro ni Mormon? Paneknekak a kastoy ken pudno dagiti pannursuro a mangted-talna ken namnama ti asi iti Libro ni Mormon.

Kaskasdi, panunotek a mabalin a marigatan ti dadduma, iti laksid ti napudno a panagbasa ken kararagyo, a mangbigbig iti kari ni Moroni a ti Nailangitan nga Ama “iparangarangnanto kadakayo ti kinapudno daytoy, babaen ti bileg ti Espiritu Santo.” Ammok daytoy a panagkarigatan gapu ta nariknak, adu a tawenen ti napalabas, idi ti dua nga umuna a panagbasak iti Libro ni Mormon ket di nangted a dagus iti nalawag a sungbat kadagiti kararagko.

No agkarkarigatankayo, awisenkayo man mangsurot iti balakad ni Moroni a mangutob iti adu a wagas nga isuro ti Libro ni Mormon “no kasano ti kinamanangngaasi ti Apo [kadagiti] annak ti tao”? Maibatay iti padasko, sapay ta, no aramidem, makastrek iti pusom ti talna ti Espiritu Santo ket mabalinmo nga ammuen, patien, ken riknaen a pudno ti Libro ni Mormon ken ti plano ti asi nga isurona.

Ipeksak ti panagyamanko iti naindaklan a plano ti Ama ti asi ken iti kinatulok ti Mangisalakan a mangipatungpal iti daytoy. Ammok nga iparangarangna ti bagina iti asi iti nasantuan a templona ken iti tunggal paset ti biagtayo no sapulentayo. Iti nagan ni Jesucristo, amen.