Pammati: Maysa a Begkes ti Panagtalek ken Kinasungdo
Agrusing ti pammati no agtalektayo ken Jesucristo ken agbukar no napudno ken nasungdotayo Kenkuana.
Idi 17 ti tawenko, nakitulagak ken ni gayyemko a ni José Luis tapno suruak nga aglangoy. Isu a maysa a bigat inusarmi ti oras tapno agpraktis. Idi malpas ti leksionmi ket panawakon iti pool, nangngegko ti panagpukkaw ti gayyemko nga agpatulong. Malmalmesen isuna iti adalem nga ungto ti pool.
Nagtappuakak iti danum ket naglangoyak a napan kenkuana bayat ti panagkararagko iti tulong. Idi iggamak ti imana a mangguyod nga ipan iti sang-at, kimmalay-at kaniak ti gayyemko iti tengngedko a diakon pakaangsan. Ita agpadakamin a malmalmes. Inkarigatak ti dumanon iti sang-at, nagkararagak iti amin a kabaelak iti milagro ti Dios. Idi kuan, in-inut ngem natalged, naiparangarang ti bileg ti Dios idi nariknak ti maysa nga ima a mangiturturong kaniak iti ababaw nga ungto ti pool, a namagtalged kadakami.
Impatalged daytoy a padas ti nauneg nga adalen nga insuro ni Presidente Russell M. Nelson: “No magun-odyo ti bileg ti Apo iti biagyo nga addaan ti kasta met laeng nga intensidad iti malmalmesen a tao no iggaman ken marigatan nga umanges, kukuamto ti bileg ni Jesucristo.”
Patpatgek nga ubbing ken agtutubo, ita kayatko a makasaritakayo maipapan iti napateg a pagbatayan ti pammati ken Jesucristo.
Ti Pammati ken Cristo Kaipapananna ti Panagtalek Kenkuana
Ania ti kaipapanan ti maaddaan pammati ken Cristo? Kaipapananna kadi a mamatitayo Kenkuana wenno adda pammaneknektayo a pudno Isuna? Mabalin a rugi dayta, ngem ad-adda pay ngem dayta. Napanunotyo kadin ti pammati kas panagtalek? Mangpanunot iti tao a pagtalkanyo unay—nalabit a maysa a miembro ti pamilia wenno gayyem. Apay a pagtalkanyo ida? Nalabit a gapu ta nakitayo ti agtultuloy nga ayat ken tulongda.
No addaantayo iti pammati ken Cristo, mabigbigtayo dagiti bendisionna ken mapadur-astayo ti panagtalek Kenkuana.
Kasano a Mapadakkelyo ti Panagtalekyo ken Cristo?
Iti nabiit pay a debosional dagiti agtutubo, naawiskayo a “mangutob iti panawen iti biagyo idi naawatyo ti sinamar ti nailangitan a lawag.” Padasenyo daytoy nga ehersisio!
Rugian babaen ti panagutob maipapan ken Cristo ken ti ragsak a yeg ti Pannubbot ken ebangheliona iti biagyo. Irekordyo pay dagiti “naespirituan a mangiladawan a lagip” no sadino nga adda sadiay ti Dios para kadakayo, dagiti ay-ayatenyo, ken para kadagiti tao iti nasantuan a kasuratan. Ita, dagitoy a pammaneknek saan a mangyeg iti bileg iti biagyo agingga nga ikitikit ida ti Espiritu kadagiti “taptapi a bato” ti pusoyo. Isu nga utobenyo ken irekordyo amin nga intuding ti Dios nga umay dagitoy a milagro iti umisu a panawen.
Sumaruno, usarenyo daytoy nga ehersisio kas gundaway nga umasideg iti Dios. Agkararagkayo iti Nailangitan nga Amayo a kasla umuna a gundaway. Iyebkasyo ti ayat ken panagyamanyo kadagiti bendisionna. Damagenyo Kenkuana no ania ti riknana kadakayo ken maipapan iti turongen ti biagyo.
No napasnek ken napakumbabakayo, mangngegyo ti sungbatna ket rugianyo ti personal ken manayon a relasion iti Nailangitan nga Ama ken ni Jesucristo. Saan laeng a dayta, ngem agbalinto a napateg iti kaipapanan dagiti ugaliyo iti relihion! Kas pagarigan, padpadaananyunto dagiti kararagyo, bukod a panagadal, ken panagdaydayaw iti templo kas gundaway nga am-ammuen ken makadennayo Ida.
Pumigsa ti Pammati nga Addaan iti Kinasungdo
Madlaw nga agrusing ti pammati no agtalektayo ken Jesucristo ken agbukar no napudno ken nasungdotayo Kenkuana. No kayatyo ti pudno a relasion ken Cristo, ipakitayo Kenkuana babaen ti panagaramid kadagiti katulagan ken panangdayaw kadakuada babaen ti kinamatalek ken kinasungdo. Ti pannakitulag ken Jesucristo ti mangbangon iti namnama. Ti panangdayaw kadakuada ti mangbangon iti pammati.
Usarek man ti bukod a pagarigan: Idi ubingak pay, nakitak ni nanangko nga agsangsangit iti maysa nga aldaw. Idi damagek no apay, siaayat a kinunana, “Nasken nga agbalinka a nasingpet nga ubing.” Nupay ammok a saan a siak ti gapu ti paglidayanna, ay-ayatek ken pagtalkak ni nanangko awan sabali ken kayatko nga aramiden a nanam-ay ti biagna. Isu a, nakaluaak ken iti amin a kinapasnek a mabalin nga adda iti nuebe anios nga ubing, inkarik kenkuana ti dayta nga aldaw a kanayon nga ikarigatak ti agbalin a kasingpetan nga anak ken maipagpannakkelnak.
Mapanunotyo kadi ti bileg nga adda iti dayta a kari—ken adda pay laeng—kaniak?
Dayta a karik kenkuana ti mangiwanwan iti biagko. Sakbay nga agdesisionak, panunotek no mangparagsak met la kenkuana dagiti tignayko. Ti begkes daytoy a kari ken ti relasionko ken ni nanangko ti nagbalin nga angkora para iti ugalik iti unos ti biagko.
Naglabas dagiti tawen, nasaysayaat a naam-ammok ni Jesucristo, ammokon no kasano nga ibatay ti pammatik Kenkuana. Nakitulagak iti Apo, ket iti panagkalikagumko a mangdayaw kadagitoy, pinakawanna dagiti basolko, inwanwanna ti biagko, ken “pinunnonak iti ayatna” agingga iti mismo a kaunggak. Intukit ni Cristo kaniak ti nauneg nga ayat, panagraem, ken kinasungdo para Kenkuana.
Maawatanyo kadi no apay a ti “pammati ti pagbatayan ti aramid” ken no “awan pammati saan a mabalin a maparagsak ti [Dios]”?
No padasenyo nga aramiden no ania ti mangparagsak Kenkuana, ibagayunto a kas ken Jose idiay Egipto idi sinulisog ti asawa ni Potifar: “Kasano ngarud a maaramidko daytoy dakkel a kinadakes, ket agbasol iti Dios?” Ket no maipasangokayo iti oposision, kunayunto a kas iti agtutubo a propeta Joseph: “Ammok dayta, ken ammok nga ammo ti Dios dayta, ket diak mapaglikudan … Ammok a no aramidek ti kasta agbasolak iti Dios.”
Isu a ti pammati ken Jesucristo ti begkes ti panagtalek a nabukel iti kinasungdo ken ayat. Iti sabali a pannao, kas panagyaman iti naasi nga ayat ti Dios (hesed), ipakitatayo ti ayattayo (emunah) babaen ti panagtungpal kadagiti bilinna.
Ikari ni Cristo: “Ti addaan kadagiti bilbilinko ket tungpalenna … ayatento ni Amak, ken isu ayatekto, ket agparangakto kenkuana.” No agkumitkayo nga agbalin a nasungdo Kenkuana, iparangarangna ti ayatna kadakayo.
Pammati iti Panangsango iti Rigat
Ngem kasano ti sungbatyo iti kakasta a dakes a kasasaad a kasapulan dagiti milagrona? Nupay di maliklikan dagiti karit ken no dadduma nakabutbuteng, magnakayo laeng a di mabuteng nga agturong Kenkuana, kas met laeng iti awis ti tema ti FSY 2025: “Kitaendak iti tunggal panunot; dikay agduadua, dikay agbuteng.”
Kasano a Magnakayo a Saan a Mabuteng nga Agturong Kenkuana?
Panunotenyo a maysakayo nga agsuksukisok iti di pay nakartaan a teritorio. Tapno maparmek dagiti lapped iti masanguanan, kasapulanyo ti pagtaudan ti lawag. Ti kinamatalekyo iti Dios ken ti kanayon a pannakilangenyo Kenkuana ti gasolina ti parolyo. Isu a no masabatyo dagiti nasipnget ken napeggad a kasasaad, imbes a sibubulsek a magnakayo nga agturong kadakuada, iddepenyo ti pagsilawanyo a napno iti lana ti pammati ken Cristo tapno mangibukbok kadagiti silnag ti namnama iti di masigurado a dana. Dagiti napalabas a padasyo ti mangpadakkel iti namnamayo a tulongannakayo ti Apo iti daliasatyo.
Kasano ti Kaadayo ti Papananyo nga Addaan iti Namnamayo ken Pammatiyo ken Cristo?
Malagipyo ti estoriak iti pool? Iti dayta a kanito ti pannakaupay, dimteng ti milagro iti wagas a ninamnamak, ngem saan nga ipasigurado ti Dios a kanayonto a mayannurot iti pagayatantayo. Nasken a maisentro ti pammatitayo ken Cristo ken ti namnamatayo iti bendisionna, no pilienna a mangipatulod kadagitoy. “Namnamaem dagiti milagro,” ngem “bay-an nga agballigi ti Dios iti biagtayo.”
Dagiti Kari ti Dios Kadagiti Napudno a Taona
Agtutubo a gagayyemko, dakkel ti ayat ken talekmi kadakayo! Dakayo ti kameng iti pamilia ti Dios ken annak ti katulagan. Mamati ken agtalekkayo ken Jesucristo. Pabaelennakayo a pudno nga agbalinkayo a disipulona.
Awisenkayo a mangrugi ita nga aldaw a mangaywan iti relasionyo ken ni Jesucristo. Agaramid iti panagkumit a dikayto pulos pumanaw Kenkuana.
Ti kinasungdo, ayat, ken talekyo ken Cristo ti mangsukog iti ugaliyo ken kinasiasinoyo kas Kenkuana. Magun-odyo iti talek ken pigsa a mangparmek kadagiti panangraut ni Satanas. Ket no agbiddutkayo, tarigagayanyo ti pammakawanna. Kamaudiananna, naraniagto ti namnamayo iti masakbayan. Agtalek kadakayo iti bilegna a mangipatungpal iti aniaman a namnamaenna kadakayo, kas iti bileg nga agsubli iti imatangna.
Paneknekak kadakayo ti rag-o nga aggapu iti panagkanta iti “kanta ti manangsubbot nga ayat” ken “nalikmutan iti agnanayon kadagiti takiag ti ayatna.” Iti sagrado a nagan ni Jesucristo, amen.