“Agsublikayo Kaniak … Tapno Maagasankayo”

Nagnaedkami idi iti pagtaengan a napalikmutan kadagiti nadaeg a kayo. Iti abay ti pagserkan adda napintas a kayo a saleng (willow). Maysa a naliday a sardam dimteng ti napigsa a bagyo, ket narpaak ti saleng. Nagidda iti daga a naparut dagiti ramutna ken nakalkaldaang ti buyana.

Nakasaganaak a mangragadi ken mangpukan iti kayo a pagsungrod idi umay nga agtartaray ti kaarrubami tapno pasardengennak. Binabalawnak gapu iti panangisukok iti kayo, ken sigaganetget a ginuyugoynakami a dimi ikkaten daytoy. Kalpasanna, intudona ti maysa a ramut nga adda pay laeng iti daga ket kinunana a no ipatakdermi ti kayo, putden dagiti sangana, ken taraonanmi, maipasdek manen dagiti ramut.

Nagduaduaak no kasano a ti maysa a kayo, a nalawag unay a natumba ken nadadael, ket posible a makalasat ken agbiag manen. Inrasonko nga uray no mangrugi manen a dumakkel, awan duadua a madin nga agbiag pay iti sumaganad a bagyo. Ngem gapu ta ammomi a patien ti kaarrubami nga adda pay masakbayan ti kayo, immanamongkami iti plano.

Ket ti resulta? Kalpasan ti mano a tiempo, nakitami dagiti pagilasinan ti biag idi mangrugin nga agramut ti kayo. Itan, kalpasan ti 12 a tawen, nagbiag ti kayo ken addaan iti natibker a ramut ken makatulong manen iti kinapintas ti buya ti daga.

Bayat ti pannakipagkitami kadagiti Santo iti intero a lubong, maipalagip kaniak daytoy a kayo ti saleng ken no kasano nga adda namnama uray no kasla napukaw ti amin. Sumagmamano idi ti napigsa ti pammaneknekda iti ebanghelio a kas iti saleng. Kalpasanna, gapu iti naidumduma a personal a rason, kimmapuy dagita a pammaneknek, a nangiturong iti pannakapukaw ti pammati. Agkagkagumaan dagiti dadduma iti pammaneknekda babaen ti pannursuro ti ebanghelio.

Kaskasdi a madagdagullit, naparegtaak kadagiti estoria ti adu a nangpili a mangpabaro iti kinadisipuloda ken agsublida iti Simbaan a pagtaenganda. Imbes nga ikkatenda ti pammatida a kas iti awan pategnan a kayo, simmungbatda ketdi kadagiti naespirituan a pannignay ken naayat nga awis nga agsubli.

Dinar-ayak ti maysa a komperensia ti stake idiay South Korea a nangibinglayan ti maysa nga agsubsubli a miembro: “Agyamanak kadagiti kakabsat iti kinatulokda a nangawat iti kinaawan pammatik ken kinakapuyko, iti panangtulongda kaniak, ken kadagiti miembro a kanayon a naimbag unay kaniak. Adu pay laeng dagiti gagayyemko a saan unay nga aktibo. Nakakatkatawa, ngem nagsasaritaanda nga agsublidan iti Simbaan tapno mapasublida ti pammatida. Panagkunak nalabit a tartarigagayanda ti pammati.”

Iti amin nga agtarigagay iti pammati, awisendakayo nga agsubli. Ikarik a mapapigsa ti pammatiyo bayat ti pannakipagdaydayawyo manen a kadagiti Santo.

Maysa a sigud a misionario manipud Africa ti nagsurat iti maysa a senior a lider ti Simbaan, a dumawdawat iti pammakawan gapu iti pannakasairna kadagiti panangisurona maipapan iti maysa a tradision ti kultura, a gapu ti ipapanawna iti Simbaan. Sipapakumbaba nga impeksana: “Nakalkaldaang ta ti kinapudno a nagsakit ti nakemko 15 a tawenen ti naglabas ket namagbayad kaniak iti dakkel unay a gatad. Adu ti napukawko—dakdakkel nga amang ngem iti impagarupko. Napalalo ti pannakapabainko iti mabalin a pasakit a gapuanak, ngem kangrunaan ti amin maragsakanak ta nasarakak ti dalanko nga agsubli.”

Kadagiti amin a makabigbig iti napukawyo awisendakayo nga agsubli tapno maramananyo manen ti narag-o a bunga ti ebanghelio.

Maysa a kabsat a babai iti Estados Unidos ti pimmanaw iti Simbaan iti adu a tawen. Ti estoriana maipapan iti panagsublina iramanna dagiti nabileg nga adalen para iti nagannak ken miembro ti pamilia a mariribukan gapu kadagiti ay-ayatenda nga umadayo. Insuratna:

“Mailistak ti adu a gapu no apay nga immadayoak iti Simbaan, iti ebanghelio, ken kasta met iti pamiliak. Ngem talaga a di napateg dagitoy. Diak idi nagaramid iti maysa a dakkel a pangeddeng a pumanaw iti Simbaan—nalabit nakaaramidak iti sangaribu a pili. Ngem maysa a banag a kanayon nga ammok ket nangaramid dagiti dadakkelko iti maysa a dakkel a pangngeddeng, ket nagtalinaedda iti daytoy. Inkeddengda nga ayatendak.

“Diak ammo no manon a lua ti nagarubos, no manon a rabii a di pannakaturog, wenno no manon a naimpusuan nga umar-araraw a balikas ti kararag ti naisawang para kaniak. Didak dinillaw kadagiti basolko; ngem ketdi, tinulongan ken inayatdak iti baet ti kinamanagbasolko. Dida imparikna kaniak a diak maawat iti pagtaenganda ken iti panagtitipon ti pamilia; aniaman dagita a rikna ket bukodko nga aramid. Ngem ketdi, nagtultuloy nga inawatdak. Nalabit a nakitada ti silawko a naglidem iti naglabas. Ngem ammoda a ti kinataok idi ket maysa laeng nga anniniwan ti no asino ti pagbalinak pay laeng.

“No kasano ti karikut ti dalanko nga umadayo iti Simbaan, kasta met ti karikut ti panagsublik. Ngem ti maysa a banag a diak marigatan iti panagsublik ket ti panagsublik iti pagtaengan a nakaikamengak.”

Ti mensahek ita ket para iti amin a naminsan idin a nakarikna iti Espiritu ngem agduadua no adda maysa a dalan a pakasublian wenno lugaryo iti naisubli a Simbaan ni Jesucristo. Para pay daytoy iti asinoman a dumani matmatnagen wenno masulisog nga umadayo.

Saan a pangkarit daytoy a mensahe, ken saan a pangkondena daytoy. Awis daytoy, a buyogen ti ayat ken napudno a tarigagay a mangawat kadakayo nga agsubli iti naespirituan a pagtaenganyo.

Inkararagko a mariknayo ti saksi ti Espiritu Santo no mangngegyo itan daytoy naayat nga awis ken natan-ok a kari manipud iti Mangisalakantayo a ni Jesucristo:

“Dikayto kadi agsubli kaniak, ken agbabawi iti basbasolyo, ken mapasurot, tapno maagasankayo?”

Tunggal lawas adu ti sumungsungbat iti awis ti Mangisalakan babaen ti panagsublida iti kinadisipulo ken panagaktibo iti Simbaan, a siuulimek ken sipapakumbaba a mangsapsapul iti pannakaagas nga inkari ni Jesus. Ket maisupadi kadagiti salaysay a no dadduma maiwarwaras, dagiti bilang ti rekord dagiti agtutubotayo ket panangpili nga agtalinaed a napigsa ken mangpadakkel iti pammatida ken ni Jesucristo.

Idi nakita ti sumagmamano a pasurot ni Jesus iti Capernaum a narigat ti pannursurona ket pinilida ti pumanaw, tinaliawna dagiti Apostolna ket dinamagna, “Umadayokayo met kadi?”

Daytoy ti saludsod a nasken a sungbatan ti tunggal maysa kadatayo no sanguentayo dagiti panawen ti pannakasubok. Ti sungbat ni Pedro ken Jesus ket napateg ken naariwawa: “Siasino pay ti papananmi? adda kenka dagiti sao a makaited iti biag nga agnanayon.”

Isu a no ibilangmo ti awis ti Mangisalakan nga agsubli Kenkuana, ania ti masursurom iti estoria ti kayo a saleng?

1. Masansan a saan a nalaka wenno nagin-awa ti panagdaliasat nga agsubli, ngem napateg. Idi nakabangon manen ti salengmi, naputed amin a sangana. Saan a napintas daytoy. Mabalin a mariknatayo met a nalupoy no ibellengtayo dagiti daan a galad ken maikkat ti pannakkeltayo. Ti panangipamaysayo iti pammatiyo ken Jesucristo ken iti ebangheliona—ti puon ken ramut—ket mangted kadakayo iti namnama ken tured nga agsubli iti dayta umuna nga addang.

2. Adu a tawen ti kasapulan tapno mapasubli ti salengmi ti sigud a pigsa ken kinapintasna. Ita, napigpigsa ken napimpintas pay daytoy ngem idi. Agan-anuskayo bayat ti panagdakkel ti pammati ken pammaneknekyo. Iraman daytoy ti saan a panagpungtot kadagiti di naannad a komento a kas iti “Sadino ti ayanmo kadagitoy amin a tawen?”

3. Saan koma a nakalasat ti saleng no awan ti kanayon a panangaywan ken pannakataraon. Taraknenyo ti pammatiyo ken pammaneknekyo bayat ti pannakiranudyo iti sakramento iti kada lawas ken panagdaydayawyo iti balay ti Apo.

4. No kasapulan ti saleng ti silnag ti init tapno dumakkel manen dagiti sanga ken bulongna, kasta met a dumakkel ti pammaneknekyo no agtalinaedkayo a sensitibo iti rikna ken saksi ti Espiritu. Agsursuro ken Amulek, a nangiladawan iti panawenna kas di unay aktibo a miembro babaen ti panagkunana, “Namin-adu a naawagannak ket diak mangngeg.”

5. Ammo ti kaarrubak ti mabalin a pagbalinan manen ti saleng. Kasta met nga ammo ti Apo ti nadiosan a potensialyo ken ti mabalin a pagbalinan ti pammati ken pammaneknekyo. Iti kaano man dinto sumuko kadakayo. Babaen ti Pannubbot ni Jesucristo, maagasan ti amin a nadangran.

Saksiak nga adda panagrag-o idiay langit gapu kadagiti agsubli. Kasapulan ken ay-ayatendakayo. Paneknekak a ni Jesucristo ti Mangisalakantayo ken bendisionanna ti amin nga agsubli Kenkuana nga addaan nain-indaklan a talna ken rag-o. Nakadiaya dagiti takiagna ti asi a nakalukat ken nakaunnat para kadakayo. Saan pay a naladaw unay ti panagsubliyo. Iti amin nga ayat iti puspusomi, pasangbayendakayo iti simbaan. Iti nagan ni Jesucristo, amen.