Pudno iti Pammati Nga Impateg Dagiti Nagannakmi

Bayat ti isasarungkarko iti Nashville Tennessee Temple para iti temple review, naaddaanak iti pribilehio a mabisita ti lugar kas paset daytoy a pagrebbengan, a mang-review itoy napintas a balay ti Apo. Nangnangruna a na-impresak iti impinta ni Mary Wanlass a maawagan iti Carry On (Agtultuloykayo) a nakabitin iti diding iti opisina ti matron.

Daytoy ti estoria ti ladawan:

“Idiay Missouri idi 1862, inkari ti 14 ti tawenna a ni Mary Wanlass iti matmatay a siumanna a babai, a siguraduenna a makagtengto ti baldado nga amana [ken ti uppat nga ub-ubing a kakabsatna] iti Valley ti Great Salt Lake. … Ni Mary ti mangiturturong ken mangpagatas kadagiti baka a mangguyguyod iti karison a nagiddaan ni tatangna, ken inaywananna dagiti … kakabsatna. Kalpasan ti inaldaw a panagdaliasatda, pakanenna ti pamiliana babaen ti panangsapulna kadagiti makan a mula, sabsabong, ken berry. Ti laeng kompasna ket ti bilin a naawatna nga agtultuloy nga agbiahe iti laud agingga nga agbalin a bantay dagiti ulep.’

“Nakadanonda iti Utah Valley iti Septiembre, kalpasan ti panagdaliasatda iti panawen ti spring ken kalgaw. Natay ni tatangna di nagbayag kalpasan a nagnaed ti pamilia idiay Utah County, a sadiay a nakiasawa ni Mary ken naaddaan iti [bukodna a] pamilia.”

Daytoy ket nakaskasdaaw a pakasaritaan ti pammati ken pigsa ti balasitang nga agtawen iti 14 a makatulong iti tunggal maysa kadatayo ita nga “agtultuloytayo laeng.”

“Agtultuloytayo laeng,” wenno naipatarus iti pagsasaok a Dutch, Gewoon Doorgaan—nga isu met ti tungpal biag nga islogan da nanang ken tatangko.

Dagiti nagannakko ken katugangak ti pioneer iti pamiliami. Binallasiwda ti bukodda a “tanap,” a kas met laeng kadagiti amin nga umay iti Simbaan iti inaldaw, ti ikub ti Apo. Saan a mainaig kadagiti baka ken karison ti estoriada ngem isu met la ti epektona kadagiti sumaruno a henerasion.

Inawatda ti ebanghelio ket nabuniaganda bayat ti kinaagtutuboda. Agpada a narigat ti panagubing dagiti nagannakko. Dimmakkel ni tatangko iti isla ti Java idiay Indonesia. Bayat ti World War II, napuwersa a naisina iti pamiliana ket naibalud iti concentration camp, a sadiay nagsagaba iti di mailadawan a rigat uray ubing pay.

Dimmakkel ni nanangko iti pamilia a nagsina dagiti nagannakna ken nagsagaba pay iti bisin ken rigat idi World War II. No dadduma masapul pay ketdi a mangan kadagiti tulip bulb. Gapu iti inaramid ni tatangna, ken ti panangdiborsiona iti inana, narigat no dadduma kenkuana a kitaen ti Nailangitan nga Ama kas naayat nga Ama.

Nagam-ammo dagiti nagannakko iti maysa nga aktibidad ti Simbaan ket di nagbayag inkeddengda ti agkasar ken mailantip iti Templo ti Bern Switzerland. Bayat nga agur-urayda iti estasion ti tren, gapu ta nabusbosdan ti naudi nga urnongdan para iti panagbiaheda iti templo, pinampanunotda no kasanoda a masuportaran ti pagbiagda ngem nagtalekda nga agsayaatto met la ti amin. Ket kasta ti napasamak!

Rinugianda a pinadakkel ti pamiliada manipud iti maysa a bassit a kuarto iti attic ti apartment iti Amsterdam. Kalpasan ti sumagmamano a tawen a panaglaba kadagiti kawesda babaen ti ima, nakaurnongda met la iti kuarta a panggatangda iti washing machine. Sakbay la unay a gumatangda, binisita ida ti bishop-da, a nagkiddaw iti kontribusion a pangibangon iti meetinghouse idiay Amsterdam. Inkeddengda nga ited ti amin nga inurnongda para iti washing machine ket intultuloyda ti naglaba babaen iti ima.

Kas maysa a pamilia, adda dagiti sumagmamano a rigat a napasaranmi, kas iti asinoman a pamilia. Dagitoy ti nangpabileg ken nangpauneg iti pammatimi ken ni Apo Jesucristo, kas idi insalaysay ni Alma ti pakasaritaanna iti anakna a ni Helaman, nga imbagana kenkuana nga isu ket “nasuportaran kadagiti pannubok ken riribuk iti tunggal kita” gapu ta nagtalek ken ni Apo Jesucristo.

Kasano a ti dua a tao a nakapadas iti nakaad-adu a pannubok idi ub-ubbingda ket nagbalin a kasayaatan a nagannak nga awanen ti sapulek pay? Simple laeng ti sungbat: naan-anay nga inawatda ti ebanghelio ket agbibiagda a mayannurot kadagiti katulaganda agingga ita!

Kalpasan ti nasurok a 65 a tawen a panagasawada, natay ni nanangko, a nagsagaba iti sakit nga Alzheimer, idi Pebrero. Ni tatangko, iti edad a 92 ken agnanaed pay laeng iti pagtaenganmi, masansan a bisitaenna agingga a natay. Adda gundaway idi a dinakamatna kadagiti addingko a dagiti nakabutbuteng a padasna iti kampo idiay Indonesia bayat ti World War II ti nangisagana kenkuana a siaanus a nangaywan ken asawana iti adu a tawen a nagsakit ken kimmapuy gapu itoy nakaam-amak a sakit ken kasta met iti aldaw nga intalekna ti pannakaaywanna iti dadduma ta saanen a mabalin nga adda isuna iti sibayna. Ti pagsasaoda idi ken agingga ita ket “Agtultuloytayo Laeng,” nga addaan iti naan-anay a kinalawag ti namnama ken Cristo tapno pagungarennakto iti maudi nga aldaw, a makipagtaeng Kenkuana nga addaan iti dayag.

Ti pammati ken pammaneknekda ti mangparegta kadagiti kaputotan a simmaruno kadakuada.

Iti purok a dimmakkelan ni baketko, dagiti nagannakna, a nasayaat a mannakimisa, inawatda ti ebanghelio idi agkabannuagda nga agassawa, ken ni baketko a dua ti tawenna ken ti kakaisuna nga anakda iti dayta a panawen. Ti desisionda nga agbalin a miembro ti Ti Simbaan ni Jesucristo dagiti Santo iti Ud-udina nga Aldaw ket dakkel ti epektona iti biagda bayat a liniklikan ida dagiti pumurok ken ti pamiliada. Adu a tawen ti kinasapulan, naayat a surat kadagiti miembro ti pamilia, ken panagserbi iti komunidad sakbay a naawatda met laeng ida.

Iti maysa a gundaway idi agserserbi ti ama ni baketko kas bishop, isu ket inakusaranda iti maysa a banag ket dagus a na-released. Nasaktan unay ti katugangak a babai isu a dinamagna ken lakayna no rumbeng nga itultuloyda ti makimisa. Insungbatna a siempre agtultuloyda a mapan iti Simbaan yantangay saan a daytoy ti simbaan dagiti tao, no di ket daytoy ti Simbaan ni Jesucristo.

Naglabas ti sumagmamano a panawen sakbay a naammuan ti kinapudno ket naaramid ti panagpadispensar. Ti narigat a kasasaadda ti nangnayon laeng iti pigsa ken kombiksionda.

Apay a di ikankano ti dadduma kadatayo ti pammati ken pammaneknek dagiti nagannaktayo a nagtalinaed a napudno iti laksid ti amin a rigatda? Pagarupentayo kadi a saan a nalawag ti pannakaawatda kadagiti bambanag? Saanda idi ken saanda a naallilaw! Nakaad-adu ti padasda iti Espiritu ket makunada a kas ken ni Propeta Joseph, “Ammok dayta, … ket diak mapaglikudan.”

Saanyo kadi a paggugusto ti kanta maipapan iti buyot ni Helaman, a masarakan iti Children’s Songbook?

Uray no saan a kasta ti kasasaad, kas iti napadasan ni nanangko idi ubing pay, mabalin nga agbalinkayo a maysa kadagiti “nagannak nga agayat iti Apo” ken mangipaay iti nalinteg a pagwadan iti dadduma.

Mariknatayo kadi a naan-anay a pudno daytoy no kantaentayo? Mariknayo kadi a dakayo ket “kas iti buyot ni Helaman” ken dakayo ti “misionario ti Apo a mangyeg ti kinapudno”? Nariknak dayta iti adu nga okasion bayat ti panangkantak itoy a kanta iti sumagmamano a setting ti FSY ken dadduma pay a panagtitipon dagiti agtutubo.

Wenno ania ti mariknatayo no kankantaentayo ti himno a “True to the Faith”?

Kadagiti tumantanor a kaputotan sadinoman ti ayanyo ken iti aniaman a kasasaadyo, agsursuro ken umawatkayo koma iti pigsa manipud iti pammati ken pammaneknek dagiti immun-una ngem dakayo. Makatulong daytoy tapno maawatanyo a tapno makagun-od wenno dumakkel ti pammaneknekyo, masapul a maaramid dagiti sakripisio ket dayta a “sakripisio iyegna dagiti bendision ti langit”

No pampanunotenyo ti sakripisio a pudno a mangbendision iti biagyo, ibilangyo koma ken ikararagyo ti awis ti propetatayo, ni Presidente Russell M. Nelson, idi kiniddawna iti “tunggal maikari, makabael nga agtutubo a lalaki nga agsagana ken agserbi iti maysa a mision. Para kadagiti babbarito a Santo iti Ud-udina nga Aldaw, pagrebbengan iti priesthood ti panagserbi kas misionario. …

“Para kadakayo … nga agtutubo ken makabael a babbai, napintas met ti mision, ngem opsional, a gundaway.”

Mabalin a maawagankayo a kas agserserbi (service) wenno mangisursuro a misionario. Agpada a tumultulong dagita dua a kita ti misionario iti maymaysa a panggep a mangyeg kadagiti kararua ken Cristo, tunggal maysa iti bukodna a naisangsangayan ken nabileg a wagas.

Kadagitoy a dua a kita ti panagserbi, ipakpakitayo nga ay-ayatenyo Isuna ken kayatyo a maam-ammo a nasaysayaat. Laglagipenyo, “Gapu ta kasano ti pannakaammo ti tao iti amo a saanna a nagpaayan, ken isu a ganggannaet kenkuana, ken adayo iti pampanunot ken panggep ti pusona?”

Datayo amin, uray no datayo ti umuna a henerasion iti ebanghelio wenno ti maikalima, nasken a damagentayo iti bagitayo, No ania dagiti estoria ti pammati, pigsa, ken celestial a panagkumit nga ipasakto iti sumaruno a henerasion?

Ituloytayo amin iti panagreggettayo a mangam-ammo iti Mangisalakantayo, a ni Jesucristo, a nasaysayaat ken pagbalinen Isuna a sentro iti biagtayo. Isu ti bato a masapul a bangonentayo tapno makapagtalinaedtayo a natibker inton dumteng dagiti narigat a panawen.

Agbalintayo koma a “napudno iti pammati nga impateg dagiti nagannaktayo, napudno iti kinapudno a gapu iti dayta a natay dagiti martir, iti bilin ti Dios, iti kararua, puso, ken ima, matalek ket agtalinaed a napudnotayo.” Iti nagan ni Jesucristo, amen.