Bukod a Panagsagana a Sumabat iti Mangisalakan

Patpatgek a kakabsatko, itay naglabas nga Oktubre, insuro ni Presidente Russell M. Nelson, “Itan ti panawen nga agsaganatayo para iti Maikadua a Yaay ti Apo ken Mangisalakantayo, ni Jesus a Cristo.” No isarita ni Presidente Nelson ii Maikadua a Yaay, kanayon nga addaan ti naragsak nga optimismo. Nupay kasta, imbaga kaniak itay nabiit ti ubing a babai iti Primary a madanagan tunggal madakamat ti Maikadua a Yaay. Kinunana, “Mabutengak ta mapasamakto dagiti dakes a banag sakbay nga umay manen ni Jesus.”

Saan laeng nga ubbing ti makarikna iti kastoy. Ti kasayaatan a balakad kadatayo ket ti panangsurot kadagiti pannursuro ti Mangisalakan. Saan a datdatlag wenno komplikado dagiti pammilinna. No surotentayo, saan a nasken nga agbuteng wenno madanagantayo.

Idi dandanin aggibus ti mortal a ministrona, nadamag ken Jesucristo no kaano ti yaayna manen. Iti panangsungbatna, insurona ti tallo a pangngarig, a nairekord iti Mateo 25, maipapan no kasano ti agsagana a sumabat Kenkuana—iti man Maikadua a Yaayna wenno no pumanawtayo ditoy lubong. Napateg dagitoy a pannursuro gapu ta ti bukod a panagsagana a sumabat Kenkuana ti kangrunaan iti panggep ti biag.

Immuna nga insalaysay ti Mangisalakan ti pangngarig ti sangapulo a babbalasang. Ditoy a pangngarig, napan ti sangapulo a babbalasang iti padaya ti kasar. Lima ti masirib ti nangyeg iti lana a mangpunno iti pagsilawanda, ket saan a nangyeg ti lima a maag. Idi naipakaammo ti asidegen nga isasangpet ti nobio, pimmanaw dagiti maag a babbalasang tapno gumatang iti lana. Idi nagsublida, naladaw unayen; nagserran ti ridaw iti padaya.

Inlasin ni Jesus ti tallo nga aspeto ti pangngarig a mangtulong kadatayo. Inlawlawagna:

“Ket iti dayta nga aldaw, inton umayak iti dayagko, matungpalto ti pangngarig nga imbagak maipanggep iti sangapulo a babbalasang.

“Ta isuda a masirib ken nangawat iti kinapudno, ken addaan Espiritu Santo a bagnosda, ken saanda a pinaallilaw—pudno kunak kadakayo, … agtalinaeddanto iti aldaw.”

Iti sabali a pannao, saanda a kasapulan ti agbuteng wenno madanagan gapu ta agbiag ken rumang-ayda. Agtalinaeddanto.

No masiribtayo, awatentayo ti kinapudno babaen ti panangawat iti ebanghelio ni Jesucristo babaen kadagiti ordinansa ken katulagan ti priesthood. Sumaruno, igaedtayo ti agtalinaed a maikari a kanayon a kaduatayo ti Espiritu Santo. Nasken a magun-od a saggaysa ken personal daytoy a kabaelan, in-inut. Ti agtultuloy, personal, nalimed nga aramid ti debosion ket mangawis iti Espiritu Santo a mangiwanwan kadatayo.

Ti maikatlo nga elemento nga intampok ni Jesus ket panangliklik iti allilaw. Imballaag ti Mangisalakan:

“Agannadkayo nga awan ti tao a mangallilaw kadakayo.

“Ta adunto ti umay a mangaramat iti naganko, nga agkuna, Siak ni Cristo; ket adunto ti maallilawda.”

Ammo ti Mangisalakan a padasen dagiti agpampammarang nga allilawen dagiti mismo a napili ken adu a disipulo ti maallilaw. Ditay koma patien dagiti siuulbod nga agkuna a nadiosan a sanksion wenno baro a negosio kadagiti metapora a disierto wenno nalimed a siled a pangisuruan dagiti manglimlimo.

Isuronatayo ti Libro ni Mormon no kasano a mailasintayo dagiti manangallilaw kadagiti disipulo. Kanayon nga itandudo dagiti disipulo ti panangpati iti Dios, panagserbi Kenkuana, ken panagaramid iti naimbag. Saantayo a maallilaw no agpabalakadtayo kadagiti mapagtalkan nga indibidual a mismo a napudno a disipulo ti Mangisalakan.

Maliklikantayo pay ti allilaw babaen ti regular a panagdaydayaw iti templo. Tulongannatayo daytoy a mangpatalinaed iti agnanayon a panirigan ken mangsalaknib kadatayo iti impluensia a mangsinga kadatayo iti dana ti katulagan.

Ti napateg a leksion daytoy a pangngarig ti sangapulo a babbalasang ket masiribtayo no awatentayo ti ebanghelio, kalikaguman nga addaantayo ti Espiritu Santo, ken liklikantayo ti allilaw. Di matulongan ti lima a masirib a babbalasang dagiti awanan lana; awan ti makaawat iti ebanghelio, mangawat iti Espiritu Santo a kas tarabay, ken mangliklik iti allilaw para kadatayo. Nasken nga aramidentayo daytoy para iti bagbagitayo.

Insarita ngarud ti Mangisalakan ti pangngarig dagiti talento. Itoy a pangngarig, nangted ti maysa a lalaki iti nagduduma a gatad ti kuarta, a makuna kas talento, iti tallo nga adipen. Iti maysa nga adipen inikkanna iti lima a talento, iti sabali inikkanna iti dua, ken iti maikatlo inikkanna iti maysa. Iti panaglabas ti panawen, dinoble ti immuna a dua nga adipen ti naawatda. Ngem inkali laeng ti maikatlo nga adipen ti maysa a talentona. Iti agpada nga adipen a nangdoble iti talentoda, kinuna ti lalaki, “Nasayaat ti inaramidmo, … naimbag ken mapagtalkan nga adipen: nagmatalekka iti sumagmamano a banag, pagaywanenkanto iti adu: sumrekka iti rag-o ti apom.”

Binabalaw ngarud ti lalaki ti adipen a nangikali iti talentona gapu ta “nadangkes ken nasadut.” Naikkat ti talento daytoy nga adipen, ket napapanaw. Ngem, no dinoble koma daytoy nga adipen ti talentona, naawatna koma ti isu met laeng a pammadayaw ken gunggona a kas iti dadduma nga adipen.

Maysa a mensahe daytoy a pangngarig ket namnamaen ti Dios a padur-asentayo dagiti kabaelan a naited kadatayo, ngem dina kayat nga idiligtayo dagiti kabaelantayo iti kabaelan ti dadduma. Ibilang daytoy nga insight nga impaay ti maika-18 a siglo nga eskolar a Hasidic a ni Zusya ti Anipol. Ni Zusya ket maysa a nalatak a mannursuro a nangrugi nga agbuteng idi asidegen iti ipapatay. Dinamag dagiti disipulona, “Maestro, apay nga agpigpigergerka? Nagbiagka a nasayaat; sigurado nga ikkannaka ti Dios iti dakkel a gunggona.”

Kinuna ni Zusya: “No kuna ti Dios kaniak, ‘Zusya, apay a dika sabali a Moises?’ Kunaekto, ‘Gapu ta dimo inted kaniak ti kinaindaklan ti kararua nga intedmo ken Moises.’ Ket no agtakderak iti sango ti Dios ket kunana, ‘Zusya, apay a dika sabali a Solomon?’ Kunaekto, ‘Gapu ta dimo inted kaniak ti sirib ni Solomon.’ Ket no agtakderak iti sango ti Namarsuak ket kunana, ‘Zusya, apay a saan a sika ni Zusya? Apay a di sika ti tao nga inikkak iti kapasidad a pagbalinan?’ Ah, dayta ti gapu nga agpigergerak.”

Pudno, maupay ti Dios no ditayo agpannuray iti pagimbagan, asi, ken parabur ti Mangisalakan a mangpadur-as kadagiti inted ti Dios a kabaelan nga inawattayo. Babaen ti naayat a tulongna, namnamaenna nga agbalintayo a kasayaatan mismo. Tapno mangrugitayo iti nagduduma a kabaelan ket awan pakainaiganna Kenkuana. Ket nasken daytoy kadatayo.

Kamaudiananna, insarita ti Mangisalakan ti pangngarig dagiti karnero ken kalding. Inton agsubli iti dayagna, “maummongto iti sanguananna ti amin a nasion: ket pagsisinaennanto ida, a kas iti maysa a pastor a mangbingay kadagiti karnerona kadagiti kalding: ket ipanna dagiti karnero iti kannawanna, ngem dagiti kalding iti kannigid.”

Dagiti adda iti kannawanna nagbalinda nga agtawid iti pagarianna, ket dagiti adda iti kannigidna awan ti inawatda a tawid. Ti naidumduma a kababalin ket no pinakanda Isuna idi mabisin, inikkanda Isuna iti inumen idi mawaw, pinagdagusda Isuna idi ganggannaet, kinawesanda Isuna idi lamolamo, ken sinarungkaranda Isuna idi masakit wenno naibalud.

Nariribukan ti amin, agpada dagiti adda iti kannawan nga ima ken iti kannigid nga ima. Dinamagda no kaano a nangtedda Kenkuana, wenno saan, iti taraon, inumen, ken kawes wenno natulonganda idi nalupoy. Kas sungbat, kinuna ti Mangisalakan, “Gapu iti inaramidyo iti maysa kadagitoy kanunumuan kadagitoy kakabsatko, inaramidyo met kaniak.”

Nalawag ti mensahe ti pangngarig: no agserbitayo iti dadduma, agserbitayo iti Dios; no saan, maupaytayo. Namnamaenna nga usarentayo dagiti sagut, talento, ken kabaelantayo a mangbendision iti biag dagiti annak ti Nailangitan nga Ama. Ti nadiosan a tarigagay nga agserbi iti dadduma ket nailadawan iti daniw nga insurat idi maika-19 a siglo ti mannaniw a Finnish a ni Johan Ludvig Runeberg. Maulit-ulit a nangngegmi nga agkakabsat ti daniw a “Farmer Paavo” iti unos ti kinaubingmi. Iti daniw, maysa a nakurapay a mannalon ni Paavo a nakipagnaed iti asawana ken annakna iti rehion ti dan-aw iti central Finland. Mano a tawen a nagsasaruno, nadadael ti kaaduan nga apitna, babaen man ti ayus manipud iti natunaw a niebe iti panagsusulbod, uraro iti kalgaw, wenno yelo iti nasapa nga autumn. Tunggal sumrek ti bassit nga apit, insennaay ti asawa ti mannalon, “Paavo, Paavo, sika a daksanggasat a lakay, binaybay-annatayon ti Dios.” Ni Paavo, naulimek a kinunana, “Ilaok ti ukis iti arina a rye tapno agaramid iti tinapay tapno di mabisin dagiti ubbing. Ikarigatak pay a pamagaan ti nadam-eg a talon. Subsubokennatayo ti Dios, ngem managparabur.”

Tunggal madadael dagiti apit, imbilin ni Paavo ni baketna a doblienna ti kaadu ti ukis nga ilaokna iti arina tapno malapdan ti bisin. Impasnekna pay ti nagtrabaho, a nagkali kadagiti trinsera tapno mamagaan ti danum ti daga ken maksayan ti panagayus iti talonna iti panagsusulbod ken ti yelo iti nasapa nga autumn.

Kalpasan ti adu a tawen a rigat, nakaapit ni Paavo iti nawadwad nga apit. Kinuna ti asawana, “Paavo, Paavo, naragsak dagitoy a panawen! Panawenen tapno ibelleng ti ukis, ken iluto ti tinapay a naaramid laeng iti rye.” Ngem iniggaman ni Paavo ti ima ti asawana ket kinunana, “Ilaokmo ti kagudua ti arina iti ukis, ta nagyelon ti talon ti kaarrubatayo.” Insakripisio ni Paavo ti paraburna ken ti pamiliana a mangtulong iti nagparikut ken napanglaw a kaarrubana.

Ti leksion ti pangngarig ti Mangisalakan iti karnero ken kalding ket nasken nga usarentayo dagiti sagut a naited kadatayo—panawen, talento, ken bendision—tapno agserbi kadagiti annak ti Nailangitan nga Ama, nangruna kadagiti nalupoy ken agkasapulan.

Ti awisko iti madanagan nga ubing a Primary a dinakamatko itay, ken dakayo amin, ket mangsurot ken Jesucristo ken agtalek iti Espiritu Santo a kas iti aramidenyo a mangipateg iti maysa a gayyem. Agpannuray kadagiti agayat kadakayo ken iti Mangisalakan. Agpaiwanwankayo iti Dios a mangpadur-as iti naidumduma a kabaelanyo, ken tulonganyo dagiti dadduma, uray no narigat. Nakasaganakayo a mangsabat iti Mangisalakan, ket makikadua ken Presidente Nelson a siraragsak a mangnamnama. Iti panangaramidyo, tumulongkayo a mangisagana iti lubong para iti Maikadua a Yaay ni Jesucristo, ken mabendisionankayto iti umdas a namnama a sumrek iti paginanaan ken rag-o ti Apo, ita ken iti masakbayan.

No kantaentayo ti maysa a baro a himnotayo:

Iti nagan ni Jesucristo, amen.