Naespirituan a Mapaimbagkayo Kenkuana

Sangapulo nga agkukutel ti nangipukkaw iti Mangisalakan, “Kaasiannakami!” Ket inaramid ngarud ni Jesus. Imbagana kadakuada nga agpakitada iti padi ket, bayat ti panagturongda, naimbaganda iti sakit.

Idi nadlaw ti maysa kadakuada a naimbaganen, indaydayawna ti Dios iti napigsa a timek. Nagsubli iti Mangisalakan, nagparintumeng iti sanguananna ket nagyaman.

Ket kinuna ti Mangisalakan iti agyamyaman, “Pinaimbagnaka ta pammatim.”

Pinaimbag ni Jesucristo ti sangapulo nga agkukutel. Ngem ti maysa, a nagsubli iti Mangisalakan, immawat iti maysa a kanayonan a banag. Isu ket napaimbag iti naespirituan.

Siam nga agkukutel ti pisikal a nalaingan.

Maysa ti pisikal a nalaingan ken napaimbag iti naespirituan.

Iti panangutobko iti daytoy nga estoria, pinampanunotko no pudno ti kasunganina. No di agpada ti panangpaimbag ken kinaan-anay, kabaelanna kadi a paimbagen ti maysa a tao iti naespirituan ngem di pay a naimbagan iti pisikal ken emosional?

Paimbagen ti Apo a Mangngagas ti amin a panagsagabatayo—pisikal ken emosional—iti panawen nga inkeddengna. Ngem iti panagur-uray a maimbagan, makapagbalin kadi a naan-anay ti maysa a tao?

Ania ti kayat a sawen ti mapaimbag iti naespirituan?

Naan-anaytayo ken ni Jesucristo no maaramattayo ti kinawayatayo nga agpili a mangsurot Kenkuana iti pammati, yawattayo dagiti pusotayo Kenkuana tapno mabalbaliwanna dagitoy, tungpalen dagiti bilinna, ken makitulagtayo Kenkuana, a sipapakumbaba nga agibtur ken agsursuro kadagiti karit itoy naindagaan a kasasaad agingga nga agsublitayo iti sidongna ken maagasantayo iti amin a wagas. Makapagbalinak a naan-anay bayat nga ur-urayek ti pannakapaimbag no naimpusuan ti relasionko Kenkuana.

Ti pammati ken ni Jesucristo ket mangpataud iti namnama. Masarakak ti namnama iti panangikagumaak nga agbalin a naan-anay—kinaan-anay kas resulta iti pammati ken ni Jesucristo. Ti pammati Kenkuana paaduenna ti namnamak iti pannakaagas, ket dayta a namnama pabilgenna ti pammatik ken ni Jesucristo. Nabileg daytoy a siklo.

Imbaga ti Apo ken ni Enos a ti pammatina ti “nangpaimbag” kenkuana. Dimteng ti pannakapaimbag ni Enos idi inutobna dagiti balikas ni propeta nga amana, a ni Jacob, bayat ti panagbisinna a makaawat iti gundaway para iti biag nga agnanayon, bayat ti panagpakaasina iti Dios iti napigsa a kararag. Ket iti dayta a panagtarigagay ken kinapakumbabana, nangngegna ti timek ti Apo, a nangipakaammo a napakawanen dagiti basolna. Ket nagsaludsod ni Enos iti Apo, “Kasano a naaramid daytoy, Apo?” Ket simmungbat ti Apo, “Gapu iti pammatim ken ni Cristo, … pinaimbagnaka ta pammatim.”

Babaen ti pammatitayo ken ni Jesucristo, mabalin nga ikagumaantayo ti pannakapaimbag iti naespirituan bayat nga ur-urayen ken namnamaentayo ti pisikal ken emosional a pannakapaimbag.

Babaen ti bileg ti pannubbot a sakripisiona, ken agbabawitayo, ti Mangisalakan ket paimbagennatayo manipud iti basol, kas iti inaramidna ken ni Enos. Ti awan patinggana a Pannubbotna ket masakupna pay dagiti leddaang ken ladingittayo.

Ngem mabalin a dina ipaay ti panagimbag iti an-annayen ken sakit—napaut nga ut-ot, autoimmune disorders kas iti multiple sclerosis, kanser, anxiety, depression, ken dadduma pay. Dayta a kita ti pannakaagas ket adda iti panawen nga inkeddeng ti Apo. Ket kabayatanna, mabalintayo a pilien a maimbagan babaen ti panangipakita iti pammatitayo Kenkuana!

Ti pannakapaimbag kaipapananna ti kinakompleto ken kinaan-anay. Kas iti lima a masirib a babbalasang a napno iti lana dagiti pagsilawanda idi dimteng ti nobio, agbalintayo a naan-anay ken Jesucristo no punnuentayo ti pagsilawantayo iti manangtaraon a lana iti kumbersion Kenkuana. Iti kasta, nakasaganatayo para iti naisimbolo a pangrabii ti kallaysa, ti Maikadua a Yaayna.

Iti pangngarig, amin a sangapulo a babbalasang ket addada iti umiso a lugar, nga agur-uray iti nobio. Nagitugot ti tunggal maysa kadakuada iti pagsilawan.

Ngem idi dimteng, iti di ninamnama nga oras ti tengnga ti rabii, awan ti umdas a lana dagiti lima a maag para iti pagsilawanda. Saanda a nailadawan kas nadangkes no di ket maag. Saan a nagsagana a naimbag dagiti maag tapno agtultuloy a sumged dagiti pagsilawanda iti lana ti kumbersion.

Kas sungbat iti kiddawda a mapalubosan a sumrek iti pangrabii ti kasar, simmungbat ti nobio, “Saandak nga am-ammo.”

Ipasimudaagna, ngarud, a ti lima a masirib a babbalasang am-ammoda Isuna. Nagbalinda a naan-anay Kenkuana.

Napno dagiti pagsilawanda iti napateg a lana ti kumbersion a nangpalubos kadagiti masirib a babbalasang a sumrek iti padaya ti kasar iti makannawan nga ima ti nobio.

Kas kinuna ti Mangisalakan, “Agbalinkayo a napudno, a kanayon nga agkararag, a sigagangat ken agdardarang dagiti silawyo, ken sindianyo, tapno sisasaganakayo iti yaay ti Nobio.”

Lima a Masirib a Babbalasang, ni Ben Hammond

Maysa a natan-ok nga eskultura a mangiladawan iti Lima a Masirib a Babbalasang ti naikabil iti Temple Square iti ruar ti ruangan ti Relief Society Building ken asideg iti Templo ti Salt Lake.

Maitutop dayta a lugar a pangipakitaan iti leksion ti pangngarig. Agsipud ta no agaramid ken no agtungpaltayo kadagiti katulagan, nangnangruna dagiti magun-od iti balay ti Apo, mapunnotayo ti pagsilawantayo iti lana ti kumbersion.

Idinto nga ibagi dagiti babbai a nailadawan kas lima a masirib a babbalasang ket dida ibinglay iti lana ti kumbersionda, ibinglayda ti silawda bayat nga itag-ayda ti pagsilawanda a napno iti lana ken nakaranraniag. Kangrunaanna, nailadawanda a mangsupsuporta iti maysa ken maysa—nga agtitinnulongda ken kumitkita iti maysa ken maysa ken mangaw-awis iti dadduma nga umasideg iti lawag.

Kinapudnona, “[Datayo] ti pannakasilaw ti lubong.” Kinuna ti Mangisalakan:

“Itedkayo nga agbalin a silaw dagitoy a tao. Saan a mailinged ti siudad a naisaad iti turod.

“… Sindian[tayo] kadi ti kandela sa ikabil iti sirok ti salop? Saan, ngem iti kandelero, ket mangted iti lawag kadagiti amin nga adda iti balay;

“Ngarud bay-anyo nga agraniag ti silawyo iti sango dagitoy a tao, tapno makitada ti nasayaat nga aramidyo ket dayawenda ti Amayo nga adda sadi langit.”

Nabilintayo a mangibinglay iti silawna. Isu a pagtalinaedenyo a napno ti pagsilawanyo iti lana ti kumbersion ken Jesucristo ken sisasagana a taginayonen a sumsumged ken naraniag daytoy. Ket bay-an nga agsilnag dayta a silaw. No ibinglaytayo ti silawtayo, iyegtayo ti tulong ni Jesucristo iti dadduma, mapauneg ti kumbersiontayo kenkuana, ken agbalintayo a naan-anay uray no ur-urayentayo ti pannakapaimbag. Ket bayat nga agraniag ti silawtayo, makapagrag-otayo iti panagur-uraytayo.

Ti maysa a pagarigan iti nasantuan a kasuratan ket makatulong a mangpatibker iti prinsipio nga agbalintayo a naan-anay bayat ti kumbersiontayo ken Jesucristo ken makagun-od iti pigsa manipud Kenkuana, uray no ur-urayentayo ti pannakapaimbag.

Naaddaan ti sumagmamano a kita ti panagsagaba ni Apostol Pablo—nga inladawanna a “nasaem a sagsagabaen,” a namitlo a nagdawat iti Apo nga ikkatenna. Ket kinuna ti Apo ken ni Pablo, “Umanayen kenka ti paraburko; ta napigpigsa ti pannakabalinko no nakapsutka.” Iti dayta kinuna ni Pablo:

“Ngarud, maragsakanak unay a … mangitangsit iti aniaman a kinakapsutko tapno mariknak ti pannalaknib ti pannakabalin ni Cristo.

Ngarud agragsakak kadagiti pagkurangan, … kadagiti pannakapaay gapu ken ni Cristo: ta no nakapsutak, ngarud napigsaak.”

Isingasing ti ulidan ni Pablo nga uray iti pagkapuyantayo, ti pigsatayo ken ni Jesucristo ket agbalin a naan-anay—kaipapananna, kompleto ken naan-anay. Kadagiti makidangdangadang iti mortal a panagrigat, ken agturong iti Dios iti pammati a kas ken Pablo, umawatda iti bendision a maam-ammoda ti Dios.

Saan a naimbagan ni Pablo iti panagsagabana, ngem nagbalin a naan-anay a naespirituan ken Jesucristo. Ket uray iti panagrigatna, agraniag ti silaw iti kumbersion ken pigsana ken ni Jesucristo ken naragsak isuna. Iti Suratna kadagiti taga Filipos kinunana, “Kankanayon koma nga agrag-okayo iti Apo: kunak manen: Agrag-okayo.”

Kakabsatko, ti sungbat ket wen, mabalintay ti agbalin a naan-anay a naespirituan, bayat nga ur-urayentayo ti pisikal ken emosional a pannakapaimbag. Ti kinanaan-anay dina kayat a sawen ti pisikal ken emosional a pannakaisubli itoy daytoy a biag. Ti kinaan-anay ket resulta iti pammati ken ti kumbersion ken ni Jesucristo ken iti panangipalubos dayta a silaw ti kumbersion nga agsilnag.

“Adu dagiti maayaban ngem bassit dagiti [mangpili a] mapili.”

Amin ket maagasanto iti pisikal ken emosional iti Panagungar. Ngem pilienyo kadi itan ti agbalin a naan-anay Kenkuana?

Siraragsak nga ipakaammok a na-convert-nak ken Apo Jesucristo. Ikagkagumaak ti agbalin a naan-anay Kenkuana. Masiguradok a maisublinto ti amin a bambanag ken dumtengto ti pannakapaimbag, iti panawen nga inkeddengna, agsipud ta Isu sibibiag.

Ni Maria Magdalena ket maysa a babai a pinaimbag ni Jesucristo. Ken maysa a naan-anay a babai ken ni Jesucristo. Kas disipulona, sinurotna ti Mangisalakan iti intero a Galilea ket nagserbi Kenkuana.

Adda idi iti sakaanan ti krus, maysa a saksi iti ipapatayna.

Napan iti tanemna tapno malpasna ti pannakaisagana ti tanemna ket nasarakanna a naikkaten ti bato a kalub, ket awanen ti bangkay ti Apo. Agsangsangit ni Maria iti tanem idi dinamag kenkuana, umuna dagiti anghel ken kalpasanna ti Mangisalakan mismo, “Babai, apay nga agsangsangitka? siasino ti sapsapulem?”

Kinuna ni Maria, “Impanawda ti Apok, ket diak ammo ti nangikabilanda kenkuana.”

Ket siaayat nga inawagan ni Jesus iti naganna, “Maria.” Ket nabigbigna Isuna ket siraraem a simmungbat, “Rabboni … Maestro.”

Iti panagipadtona iti Mangisalakan, kinuna ni Isaias, “Pukawento ti Apo a Dios ni patay iti agnanayon; punasennanto amin a lua ti tunggal maysa.”

Gapu iti Panagungarna, napunas dagiti lua ni Maria. Sigurado a punasennanto met dagiti luayo.

Ni Maria ti immuna a saksi iti napagungar a Mangisalakan. Ket isu ti immuna a nangpaneknek kadagiti dadduma maipapan iti nakitana.

Sipapakumbaba nga inayonko ti pammaneknekko ken ni Maria. Nagungaren. Sibibiag ni Jesucristo. Kamaudiananna, maimbaganto ti amin, iti pisikal ken emosional, babaen Kenkuana. Ket iti panagur-uray iti dayta a pannakapaimbag, ti pammati iti Naindaklan a Mangngagas ti mamagbalin kadatayo a naan-anay iti naespirituan. Iti nagan ni Jesucristo, amen.