Naragsak nga Isasangbay iti Simbaan ti Rag-o

Gapu iti plano ti Nailangitan nga Amatayo iti annakna, ken gapu iti makasubbot a biag ken mision ti Mangisalakantayo, ni Jesucristo, mabalin—ken rumbeng—a datayo ti agbalin a karagragsakan a tattao ditoy daga! Adda man dagiti bagyo ti biag a sumangbay kadatayo, mabalintayo a patanoren ti dumakdakkel ken agnanayon a rikna ti rag-o ken talna gapu iti namnama ken Cristo ken pannakaawat iti lugartayo iti napintas a plano ti ragsak.

Ni Presidente Russell M. Nelson, ti senior nga Apostol ti Apo, nagsao maipapan iti rag-o nga aggapu iti biag a naisentro ken ni Jesucristo iti dandani tunggal palawag nga intedna manipud pay idi nagbalin a Presidente ti Simbaan. Nalawag ti pananggupgopna nga: “Umay ti rag-o manipud ken gapu Kenkuana. … Para kadagiti Santo iti Ud-udina nga Aldaw, ni Jesucristo ti rag-o!”

Miembrotayo iti Simbaan ni Jesucristo. Miembrotayo iti simbaan ti rag-o! Ket awan sadinoman nga ad-adda a nalawag ti rag-otayo kas tattao ngem no agtitipontayo iti tunggal Sabbath kadagiti mitingtayo iti sakramento tapno agdayaw iti pagtaudan ti amin a rag-o! Ditoy nga agtitipontayo kadagiti pamiliatayo ti ward ken branch tapno rambakan ti sakramento ti Pangrabii ti Apo, ti pannakaispaltayo iti basol ken ipapatay, ken ti nabileg a parabur ti Mangisalakan! Ditoy nga umaytayo a mangpadas iti rag-o, pagkamangan, pammakawan, panagyaman, ken pannakaibilang a masarakan babaen ken Jesucristo!

Daytoy kadi ti kaipapanan ti naummong a panagrag-o ken ni Cristo a masarakanyo? Daytoy kadi ti iyegyo? Mabalin a pagarupen a saan unay a pakainaigan daytoy kadakayo, wenno nalabit nairuamkayo lang no kasano a kanayon a maar-aramid dagiti banag. Mabalintayo amin ti tumulong, uray ania ti edad wenno ti calling-tayo, tapno agbalin a narag-o ti sacrament-tayo, a naipamaysa iti Cristo, oras a makapasangbay, nabiag nga addaan iti espiritu ti naragsak a panagraem.

Naragsak a panagraem? “Maysa kadi a banag dayta?” masaludsodyo. Wen, kasta! Ay-ayaten, raemen, ken dayawentayo ti Diostayo, ket ti panagraemtayo agayus manipud iti kararua nga agrag-o iti nawadwad nga ayat, asi, ken panangisalakan ni Cristo! Daytoy naragsak a panagraem iti Apo ti rumbeng a pakabigbigan dagiti sagrado a mitingtayo iti sakramento.

Nupay kasta, para iti adu, ti panagraem kaipapananna laeng: ti nairut a panagdalikepkep, panagdumog, panagkidem, ken agtalinaed a natalna—nga agnanayon! Makatulong daytoy a mangisuro iti nakuti nga ubbing, ngem iti panagdakkel ken panagsursurotayo, makitatayo a ti panagraem ket ad-adda pay nga amang ngem itoy. Kasta kadi ti kasasaadtayo no kaduatayo ti Mangisalakan? Saan, gapu ta “iti imatang[Na] ti pakabuklan ti rag-o”!

No kasta, para iti adu kadatayo daytoy a panagbalbaliw iti serbisiotayo iti sakramento ket agkasapulan iti aramid.

Ditayo agtataripnong iti Sabbath tapno laeng dumar-ay iti miting ti sakramento ken ma-check iti listaan. Agtitipontayo tapno agdaydayaw. Adda napateg a nagdumaan dagitoy a dua. Ti dumar-ay kaipapananna ti presensia. Ngem ti panagdaydayaw ket naigagara a panagraem ken panagrukbab iti Diostayo iti wagas a mangbalbaliw kadatayo!

No agtitipontayo a manglaglagip iti Mangisalakan ken ti pannakasubbot nga inaramidna, rumbeng nga iyanninaw iti rupatayo ti rag-o ken panagyamantayo! Insalaysay ni Elder F. Enzio Busche nga idi branch president isuna ket maysa nga ubing a lalaki iti kongregasion ti nangmatmat kenkuana iti sango ket dinamagna iti napigsa, “Ania ti ar-aramiden ti lalaki a naunget ti rupana dita ngato?” Dagiti nagtugaw iti sango—dagiti agsarita, lider, koro—ken dagiti naguummong iti kongregasion ket ipakitada iti tunggal maysa daytoy a “naragsak panangpasangbay iti simbaan ti rag-o” babaen kadagiti ebkas iti ruprupada!

Bayat ti panagkantatayo, agtitinnulongtayo kadi a mangidaydayaw iti Dios ken Aritayo uray ania ti kalidad ti timektayo, wenno agmulmulagattayo laeng wenno di a pulos nga agkanta? Nairekord iti nasantuan a kasuratan a ti kanta dagiti nalinteg ket maysa a kararag iti [Dios] a pakaragsakan ti kararuana. Isu nga agkantatayo! Ket agdaydayawtayo Kenkuana!

Isentrotayo dagiti palawag ken pammaneknektayo iti Nailangitan nga Ama ken ni Jesucristo ken ti bungbunga ti sipapakumbaba a panagbiag iti ebanghelioda, dagiti bunga a “nasam-it ngem iti amin a nasam-it.” Kalpasanna pudno nga “agpennektayo … agingga a mapnek[tayo], a di[tayon] mabisin, wenno … mawaw,” ket agbalin a nalaglag-an dagiti dagensentayo, babaen ti rag-o ti Anak.

Ti nadayag a kangrunaan a pokus ti serbisiotayo ket ti bendision ken panangawat iti sakramento a mismo, ti tinapay ken danum a mangibagi iti mangsubbot a sagut ti Apotayo ken ti panggep ti panagtitipontayo. Daytoy ti “maysa a sagrado nga oras ti naespirituan a pannakapabaro” no saksiantayo manen a situtuloktayo a mangawat iti nagan ni Jesucristo ken makitulagtayo manen ken kanayon a laglagipentayo ti Manangisalakan ken tungpalentayo dagiti bilinna.

Iti sumagmamano a panawen ti biag, mabalin a makiranudtayo iti sakramento nga addaan kadagiti nadagsen a puso ken aglaplapusanan nga awit. Iti dadduma a tiempo, makiranudtayotayo a nawaya ken nalag-an kadagiti pakaseknan ken riribuk. Nodenggentayo ti panangbendision iti tinapay ken danum ken makiranud kadagita a sagrado a pagilasinan, mautobtayo ti sakripisio ti Mangisalakan, dagiti panagsagabana idiay Getsemani, ti panagleddaangna iti krus, ken dagiti ladingit ken ut-ot nga inibturanna paraa kadatayo. Dayta ti mangpabang-arto kadagiti kararuatayo no ikonektatayo ti panagsagabatayo Kenkluana. Iti dadduma a gundaway, agsiddaawtayo a buyogen ti panagyaman iti “napipintas ken nasam-it” a rag-o no ania ti inaramid a posible ti sagut ni Jesus iti biagtayo ken iti kinaagnanayontayo! Agrag-otayo para iti dumteng pay—ti ipatpategtayo a panagtitipon manen iti dungdungnguentayo nga Ama ken nagungar a Mangisalakan.

Mabalin a nakondisiontayo a mangipapan a ti panggep ti sakramento ket agtugaw iti bangko a mangpampanunot iti amin a wagas a nariribuktayo ti napalabas a lawas. Ngem bay-an nga iturongtayo dayta nga aramid iti ulona. Iti kinaulimek, mautobtayo dagiti wagas a nakitatayo ti Apo a di agsarday a mangsurot kadatayo babaen ti naisangsangayan nga ayatna iti dayta a lawas! Mautobtayo ti kaipapanan ti “takuaten ti rag-o iti inaldaw a panagbabawi.” Makapagyamantayo iti panawen a simrek ti Mangisalakan kadagiti npnagkarigatan ken balligitayo ken dagiti gundaway a nariknatayo ti paraburna, pammakawanna, ken panangtedna iti bileg a mangparmek kadagiti rigrigattayo ken mangibaklay ikadagiti dagensentayo a siaanus ken sirarag-o.

Wen, utobentayo ti panagsagaba ken kinaawan hustisia a naipaay iti Mannubbottayo gapu iti basoltayo, mapanunottayo a nasayaat dayta a talaga. Ngem no dadduma, agtalinaedtayo sadiay—iti minuyongan, iti krus, iti uneg ti tanem. Mapaaytayo nga agpangato iti rag-o ti panagburak ti tanem, ti pannakaabak ni patay, ken ti panagballigi ni Cristo iti amin a makalapped kadatayo a manggun-od iti talna ken agsubli iti nailangitan a pagtaengantayo. Agarubos man ti luatayo ti ladingit wenno lua ti panagyaman bayat ti sakramento, agbalin koma daytoyt a nadayaw a siddaawtayo iti naimbag a damag ti sagut ti Ama nga Anakna!

Ita, para kadagiti nagannak nga addaan ubbing wenno addaan iti naisangsangayan a kasapulan, masansan nga awan ti kanito ti panagulimek ken panagutob bayat ti sakramento. Ngem iti babassit a kanito iti intero a lawas, maisuroyo babaen ti ulidan ti ayat, panagyaman, ken rag-o a mariknayo para ken manipud iti Mangisalakan bayat ti panangaywanyo iti babassit a Korderona. Awan ti masayang a panagregget itoy a pananggun-od. Kasta unay ti pannakaammo ti Dios kenka.

Kasta met iti pagtaengan, marugiantayo a pasayaaten dagiti namnamaentayo para iti panawentayo iti simbaan. Kadagiti konseho ti pamilia, mapagsasaritaan no kasano a makatulong ti tunggal maysa iti wagas a naragsak a panangpasangbay iti amin iti simbaan ti rag-o! Makapaglano ken namnamaen a maaddaantayo iti naragsak a padas iti simbaan.

Mailadawan ken parnuayen dagiti konseho ti ward ti kultura ti naragsak a panagraem iti oras ti sakramentotayo, a mangilasin kadagiti maaramat nga addang ken makita a tanda a makatulong.

Naiduma ti langa ti rag-o para iti nagduduma a tattao. Para iti dadduma, mabalin a naragsak dayta a kablaaw iti ruangan. Para iti dadduma, mabalin a panangtulong iti tattao a makarikna iti nam-ay babaen ti panagisem ken pannakiabay buyogen ti naasi ken silulukat a puso. Para kadagidiay makarikna a nabaybay-an wenno adda iti igid, napategto ti kinabara daytoy a naragsak a panangpasangbay. Kamaudiananna, damagentayo iti bagitayo no kasano ti kayat ti Mangisalakan a pagbalinan ti oras ti sakramentotayo. Kasano a kayatna a naragsak a mapasangbay, maaywanan, mataraonan, ken maayat dagiti annakna? Kasano ti kayatna a mariknatayo no mapabarotayo babaen ti pananglagip ken panagdaydayaw Kenkuana?

Iti rugi ti panagdaliasatko iti pammati, ti rag-o ken ni Jesucristo ti umuna a dakkel a natakuatak, ket binalbaliwanna ti lubongko. No diyo pay natakuatan daytoy a rag-o, rugianyon ti agsapul iti daytoy. Daytoy ket awis nga umawat iti sagut ti Mangisalakan a talna, lawag, ken rag-o—tapno agragsak, agsiddaaw, ken agrag-okayo iti tunggal Sabbath.

Iyebkas ni Ammon iti Libro ni Mormon ti rikna ti pusok no kunana:

“Ita awan kadi ti kalintegantayo nga agrag-o? Wen, awanen ti tattao nga addaan iti kalintegan nga agrag-o ngem datayo, ket malapunos ti rag-ok, uray pay iti panagpasindayagko iti Diosko; agsipud ta adda kenkuana amin a bileg, amin a nainsiriban; ken amin a pannakaawat; matukodna amin a banag, ket manangngaasi a Tao, uray pay iti pannakaisalakan, kadagiti agbabawi ken mamati iti naganna.

“Ita no panagpasindayag daytoy, agpasindayagak latta; agsipud ta daytoy ti biagko ken silawko, … daytoy ti rag-ok, ken naindaklan a panagyamanko.”

Naragsak nga isasangbay iti simbaan ti rag-o! Iti nagan ni Jesucristo, amen.