Plan blong Papa long Heven blong ol Famli

I Kam long Elda Dieter F. Uchtdorf

Blong Kworom blong Olgeta Twelef Aposol

Ol tijing, odinens mo ol kavenan blong tempol oli blesem evri famli raon long wol.

Jekob i stap drim abaot ol step i go long heven

I no longtaem i pas, mi mo Sista Uchtdorf i bin atendem baptaes blong wan long ol smol bubu pikinini blong mitufala. Taem mitufala i stap wajem ol jeneresen we oli selebretem taem ia wetem glad, mitufala i talem tangkyu long Papa long Heven from plan blong Hem blong sevem ol pikinini blong Hem. Mitufala i filim hamas famli mo ol tabu kavenan i impoten long Hem stat long stat finis.

Yumi save luk hamas hemia i impoten long ol OlTesteman skripja abaot Jekob we i fetful, mo i tekem wan longfala rod blong faenem wan waef, blong mared insaed long kavenan, mo statem wan famli. Wan naet, Jekob i stop blong spel truaot long naet be i luk ol ston nomo blong yusum olsem pilo. Hem i mas taet tumas, from afta hem i silip ded —mo afta hem i gat wan drim.

Jekob i luk “wan lada i stanap, we stamba blong hem i stap long graon, be en blong hem antap i kasem heven, mo i luk ol enjel oli stap long hem, we oli stap kamdaon, oli stap go antap.

“Nao hem i luk we Hae God i kamtru, i kam stanap klosap nomo long hem mo i talem long hem se, Mi mi Hae God, mi God blong bubu blong yu Ebraham, mo blong papa blong yu Aesak” (Jenesis 28:12–13).

Mo afta Lod i mekem sam impoten kavenan promes wetem Jekob—ol promes we Hem i bin mekem tu wetem papa mo bubuman blong Jekob, Aesak mo Ebraham, we i tekem tu:

Ol promes ia se Jekob bae i kam papa blong “plante pikinini” (Jenesis 28:3, 14).
Wan graon blong promes blong ol pikinini blong Jekob (luk long Jenesis 28:4, 13).
Ol promes se tru long Jekob mo ol “ol pikinini blong hem bambae evri famli long wol oli kasem blesing” (Jenesis 28:14; oli ademap long italik).

Eksperiens blong Jekob i tabu tumas mekem hem i talem, “Tru, ples ia, Hae God i stap long hem. … Ating ples ia, haos blong God ia. Hemia doa blong heven ia” (Jenesis 28:16–17). Mo afta, Jekob i putum nem blong ples ia Betel, we i minim “haos blong God” (luk long Jenesis 28:19, futnot a).

Ol tempol oli semmak plante olsem lada ia we Jekob i bin luk. Ol tijing, odinens, mo ol kavenan blong haos blong Lod i joenem heven mo wol. Yumi save komperem ol kavenan ia wetem ol step blong lada ia we i mekem yumi kam moa kolosap long Lod. Mo tru long seves blong yumi long ol tabu tempol, yumi blesem “evri famli long wol”—olgeta blong bifo, tedei mo long fiuja.

Wan Hapi Lukluk blong Heven

Elda Bruce C. Hafen, wan foma memba blong SDA, i bin risivim wan fon kol we i kam long edita blong nasonal nius magasin blong tokbaot wan buk we i abaot histri blong ol bilif long saed blong heven long ol defren jos.

“Olgeta we oli raetem buk ia oli faenemaot se pablik i wantem tumas blong save abaot heven—ol famli long heven,” Elda Hafen i talem. Be “plante Kristin jos oli gat smol ansa nomo abaot hemia”—be wan Jos nomo i gat evri ansa: Jos Ia blong Jisas Kraes blong Ol Lata-dei Sent.

Long Jos blong Sevya we i kambak, yumi gat ol tabu tempol. Yumi gat mared we i no save finis, wetem siling atoriti we blesing blong tufala i kasem narasaed long vel. Yumi gat promes ia blong wan fiuja we i no save finis wetem olgeta we yumi lavem long ples we Papa mo Pikinini Tufala i stap long hem. Afta long evri samting ia, olgeta we oli raetem buk ia oli endem se tingting blong ol Lata-dei Sent abaot heven i komplit fulwan—mo, bae mi ademap se, hem i tingting we i givim moa glad.

Olsem Presiden Russell M. Nelson i tijim, “Lod … i krietem wol blong mekem se yumi save kasem ol bodi blong mit mo bun mo mekem ol famli. Hem i bin putumbak Jos blong Hem blong leftemap ol famli. Hem i givim ol tempol blong mekem se ol famli oli save stap tugeta blong oltaem.”

Protektem famli

Hem i no wan sapraes se wan samting we i impoten tumas long plan blong God bae i fesem hadtaem. Presiden M. Russell Ballard (1928–2023) i talem, “Setan i save se stret mo gudfala wei blong spolem wok blong Lod i blong karemaot tingting blong mekem famli mo tabu fasin insaed long hom.”

Wetem save ia, yumi sud stap long medel blong olgeta we oli protektem famli wetem strong tingting.

?Olsem wanem nao yumi mekem hemia?

Yumi save mekem ol “smol mo simpol samting” (Alma 37:6) we i mekem ol famli rilesensip i kam strong moa. Hemia i kavremap tu ol prinsipol insaed long ofisol toktok: “Fet, prea, fasin blong sakem sin, fasin blong stap fogiv, respek, lav, fasin blong kea, wok, mo ol samting o pleplei we oli gud.” Nomata long wanem famli situesen yu stap long hem naoia, yu save soem tru ol aksen blong yu se ol famli rilesensip oli impoten long yu blong taem we i no save finis.”

Taem yumi laef folem, protektem, mo serem ol trutok we i no save finis abaot ol famli, yumi save helpem ol narawan blong luk se “famli i stamba samting long plan blong Krieta blong tabu ples we bae ol pikinini blong Hem oli go long hem blong oltaem” mo se “ol tabu tempol oli mekem i posibol blong wanwan man mo woman oli gobak stap wetem God mo blong ol famli i stap tugeta blong oltaem.”

“Mi Stap Wetem Yu”

Taem Sista Uchtdorf mo mi i wajem ol famli memba blong mitufala i mekem ol tabu kavenan wetem Papa blong yumi long Heven we i gat lav mo i no save finis, hat blong mitufala i fulap wetem glad mo tangkyu. Mitufala i glad i no from ol pikinini blong mitufala mo ol pikinini blong olgeta nomo, be tu from ol paren blong mitufala mo ol paren blong olgeta. Mitufala i tingting hevi wetem bigfala lav long hao ol gospel kavenan i mekem yumi kam wan truaot long ol jeneresen.

Ol blesing we Lod i promesem long Ebraham, Aesak, mo long Jekob long drim blong hem i abaot famli fulwan. Mo ol blesing ia i go kasem evri kavenan pikinini blong Hem—we i kavremap yu mo mi. “Luk,” Lod i talem, “mi bambae mi stap wetem yu, blong lukaot long yu, mo bambae mi tekem yu kambak long ples ia bakegen, … Bambae mi no save lego yu” (Jenesis 28:15).

Mi promesem yu se taem yu stap laef folem mo serem abaot plan blong Papa long ol famli, Hem bae i stap wetem yu, speseli taem ol hadtaem i kam long yu o long olgeta we yu lavem. Bae Hem i karem yu, leftemap yu, mo lidim yu i go long wan glad we i fulwan long Hem, wetem Pikinini blong Hem Jisas Kraes, mo wetem famli blong yu—blong taem we i no save finis.