Oltaem Wetem Hop
Taem yumi tingting long wanem we Sevya i mekem blong yumi, yumi save gohed blong kam antap wetem save ia se Hem i stap wetem yumi oltaem.
Pikja i kam long Albert Espi
!Traem tingbaot se oli fasem ol han blong yu biaen long bak blong yu, oli fasem ol leg blong yu tugeta mo sakem yu i go long wan 2.743 meta pul! ?Wanem nao bae yu mekem? ?Bae yu traehad blong flot mo taet, o bae yu stap kwaet mo faenem wan wei aot long had situesen ia?
Ol trening ia blong kam wan Ami blong Yunaeted Stet i stap gotru hemia. Oli singaotem “skil blong sevem laef long wota.” Stamba tingting blong trening ia i blong ol ami oli pruvum se oli save sevem laef blong olgetawan long wota, long plante kaen situesen. Taem oli fasem olgeta mo sakem olgeta i go long wota, wan pat blong tes ia i mekem oli nid blong go daon olgeta long pul mo no fraet. Afta oli spring long leg blong olgeta i kambak antap blong pulum win hariap nomo afta oli gobak daon bakegen. Bae oli ripitim hemia blong sam taem.
Plante long yumi bae oli no save tekem trening blong ol Ami, be ating yumi save lanem sam samting aot long hem—mo long semmak taem ating yumi save soem gladhat blong yumi long Jisas Kraes mo Atonmen blong Hem.
Sevya blong Yu Tru Long Evri Samting
Ol Ami oli dipen long trening mo helt blong olgeta blong oli winim series tes ia—mo oli mas komplitim tes ia olgetawan nomo. Bae yumi evriwan i gotru long ol jalenj long laef, be wanem we i mekem i defren smol long ol Ami i we yumi neva go tru ol jalenj blong yumi yumiwan.
Taem sin, fraet, wari, o eni nara jalenj i fasem yumi mo yumi filim olsem yumi stap draon, yumi save tanem yumi i go long Jisas Kraes. Taem yumi filim olsem se yumi stap daon olgeta mo bae yumi nomo save kambak antap, yumi save tingbaot se Sevya i go tru long hemia finis, mo bae Hem i givim yumi paoa blong spring i kam antap, blong pulum win bakegen, mo gohed. Wetem Hem oltaem yumi gat hop.
Jisas Kraes i Sevem yu aot long sin mo ded. Jisas Kraes i Ridima blong yu taem yu foldaon long saed blong spirit mo yu nid blong kam antap moa fulwan. Jisas Kraes i Hilim yu long harem nogud long saed blong tingting, spirit, mo samtaem long saed blong bodi we Hemwan nomo i save hilim. Ol nem ia mo ol nara nem blong Jisas Kraes i poenem yumi i go long tingting ia se Hem i Man ia blong yumi lukluk long Hem, speseli taem laef i kam had.
Ista i stap kam kolosap, mo yumi selebretem Laef Bakegen long Ded blong Jisas Kraes. !Hem i stap laef! Mo from we Hem i stap laef, bae yumi laef bakegen mo gat promes blong laef we i no save finis. Be bifo Laef Bakegen long Ded blong Hem, Sevya i safa long Getsemane mo i ded long kros from yumi from Hem i lavem yumi. Hem “i bin go daon, daon bitim evri samting”—mo i no safa from ol sin blong yumi nomo, be i harem nogud long ol soa blong bodi mo fulap hadtaem mo temtesen blong evri kaen—blong mekem se bae Hem i save olsem wanem blong helpem yumi (Doktrin mo Kavenan 88:6; luk tu long Alma 7:11).
Luk Hop blong Yu long Hem
Taem Sevya i ded long kros, i nomo gat hop. Ol disaepol blong Hem oli harem nogud tumas. Oli bin stap folem Hem, biliv long Hem—mo naoia Hem i nomo stap. Taem Jisas i ledaon long wan tumb, oli harem nogud mo gat tu tingting. Be tri dei afta, long Sandei, tumb ia i emti. !Jisas Kraes i girap bakegen long ded! !Wanem we i luk olsem se i lus, i tanem i kam hop!
Sapos yu filim se yu lus mo tingting blong yu i stap daon—olsem se oli sakem yu long wan pul mo oli fasem ol han mo leg blong yu—mo yu no luk wan wei aot, tekem taem blong faenem hop long Jisas Kraes, mo tingbaot se hemia i no en yet.
Sevya i gotru long Getsemane mo kros fastaem, tri dei bifo Hem i kasem hapi Ista Sandei ia. !Nao, sapos yu stap go tru long wan hadtaem, yu no givap! Olsem Elda Josef B. Witlin (1917–2008) blong Kworom blong Olgeta Twelef Aposol i talem wan taem “Long tudak blong harem nogud blong yumi, Sandei bae i kam. … … Nomata ol harem nogud blong yumi, Sandei bae i kam.”
Tru long sakrifaes, atonmen mo Laef Bakegen long Ded blong Hem, Jisas Kraes i stap ia oltaem blong helpem yu faenem pis mo muv i go fored blong faenem moa bitim we yu save pikjarem.