?Wanem nao yumi save abaot Rebeka, waef blong Aesak?

Rebeka long Wel, i kam long Michael Deas

Hemia sam samting we yumi save abaot Rebeka:

Hem i gat klin fasin mo hem i naes. Luk long Jenesis 24:16.

Hem i gat kaen fasin mo strong tingting. Wokman blong Abraham i travel i go longwe blong faenem wan we boe blong Abraham, Aesak bae i maredem insaed long kavenan. Hem i stop long wel mo i prea se woman ia we bae i givim wota long hem mo long ol 10 kamel blong hem hem ia nao God i jusum blong maredem Aesak. Rebeka i bin mekem hemia. (Luk long Jenesis 24:1–28.)

Hem i gat bigfala fet. Wan dei afta, taem oli askem hem sapos hem i save folem wokman blong Abraham i gobak, Rebeka i talem yes. Hem i gat fet long Lod, we i gaedem man ia. (Luk long Jenesis 24:50–58.) Mo tu, afta long 20 yia we hem i no save gat pikinini, hem i gohed blong gat hop long ol kavenan blong hem (luk long Jenesis 25:20, 26).

Hem i kasem revelesen blong famli blong hem. Taem Rebeka i gat bel wetem twin, Lod i talem long hem, “ol fasbon bambae oli stap wok blong sekenbon” (Jenesis 25:23). Sam taem i pas, hem i luk olsem wanem fasbon twin, Esao, i no folem kaonsel blong Lod mo i no respektem raet blong hem olsem fasbon mo olsem wanem sekenbon twin, Jekob, i fetful. Rebeka i helpem Jekob blong kasem blesing blong raet ia mo i wonem hem se brata blong hem i wantem kilim hem. (Luk long Jenesis 27.)