Ista Evri Taem
Mekem Ista i olsem wan sisen blong hop taem yu stap kam moa kolosap long Sevya.
Ol pikja droing i kam long Toby Newsome
Long fas Ista Sandei, taem Meri Magdala mo ol narafala woman i visitim tumb blong Kraes, ol enjel i talem long mi, “Be hem i no stap long ples ia. Hem i laef bakegen finis” (Matiu 28:6). Mesej ia i givim plante hop long ol disaepol blong Hem afta we oli harem nogud from oli luk Hem i Ded long Kros.
?Gudfala nius? Mesej ia i tru yet tedei. Kraes i gohed blong laef bakegen long ded. Hem i gohed blong win ova long ded mo sin. !Mo hop ia we i kam long Laef Bakegen long Ded blong Hem i gohed blong stap blong yu—i no long Ista nomo be long evri taem!
Ista i no wan taem ia nomo we u save givim ona long Laef bakegen long Ded blong Hem. Traem sam long ol tingting ia blong mekem Ista blong yu—mo selebresen blong Ista, Atonmen blong Sevya mo Laef Bakegen long Ded blong Hem—i kam wan ful sisen blong hop mo glad.
Stadi long laef blong Sevya.
Ol skripja i wan tul we i gat paoa we i helpem yu blong save Jisas Kraes yuwan mo blong mekem fet blong yu long Hem i kam strong. Long taem blong Ista sisen, yu save mekem skripja stadi blong yu raon long las wik blong laef blong Hem o taem Hem i visitim Amerika olsem Sevya blong wol we i laef bakegen long ded. Ridim ol skripja ia we i gat paoa i save helpem yu blong filim lav blong Sevya long yu mo blong andastanem moa Atonmen mo Laef bakegen long Ded blong Hem.
sapos yu no save wij skripja blong lukluk long hem, yu save folem Ista stadi gaed long Kam, Folem Mi o ol narafala stadi gaed we oli pablisim long ChurchofJesusChrist.org.
Tekempat long Tempol Wok
Kraes we i winim ded mo save ia se bae yumi tu yumi laef bakegen long ded i “mesej ia we i fulap long glori bitim eni nara mesej long wol ia.” From Atonmen mo Laef Bakegen long Ded blong Hem, ol famli blong yumi i save stap blong oltaem, mo evri bubu blong yumi oli save gat janis blong mekem ol tabu kavenan.
Yu save selebretem Laef Bakegen long Ded blong Jisas Kraes mo gohed long wok blong Hem blong sevem olgeta long spirit presin (luk long 1 Pita 3:18–20) taem yu stap mekem famli histri mo tempol wok. Seves blong yu insaed long tempol i letem tu ol spirit ia blong jusum blong kasem ol blesing blong Atonmen blong Kraes.
Givim Seves long ol Narawan olsem we Kraes Bae I Mekem
Jisas Kraes i leftemap mo givim seves long ol narawan truaot long ministri blong Hem long Wol ia—iven taem Hem i hang long kros. Yu save onarem eksampol blong Hem taem yu stap givim seves long olgeta raon long yu olsem we bae Hem i mekem. Iven ol simpol aksen blong stap kaen olsem blong smael, lisin long ol narawan wetem tru hat, mo help raon long haos i save krietem wan ples we i gat lav blong Kraes. Taem yu givim seves long ol narawan, yufala evriwan, yu mo olgeta i save filim hop mo glad blong Ista sisen.
Minim blong Tekem Sakramen
Sevya Hemwan i mekem wan tradisen we i moa gud bitim eni nara samting blong helpem yu tingbaot Hem: sakramen. Taem yu tekem sakramen, yu stap soem se yu wantem blong “oltaem tingbaot Hem mo kipim ol komanmen blong Hem,” mo afta Hem i promes se bae yu “oltaem gat Spirit blong hem i stap wetem [yu]” (Doktrin mo Ol Kavenan 20:77). !Hemia i wan promes we i gat paoa! Taem yu tekem sakramen evri wik, yu save stat filim trutok blong promes ia long Ista mo oltaem.
Traem tingting long ministri, Atonmen mo Laef Bakegen long Ded blong Kraes taem yu stap tekem sakramen. Prea wetem tru hat, mo traem blong tingbaot olsem wanem sakrifaes blong Hem i blesem yuwan.