Ista Selebresen: Ol Tru Samting Nomo
Hemia samfala samting we maet bae yu no save abaot selebresen blong Ista.
Viktri wokbaot blong Jisas i go insaed long Jerusalem, i kam long Harry Anderson
?Wanem nao yu save abaot Ista? Ating bae yu save pat ia we i impoten: hem i wan selebresen blong atonmen, sakrifaes mo Laef Bakegen long Ded blong Jisas Kraes.
Ating yu gat sam kwestin abaot Ista mo hao plante pipol i stap selebretem, mo tu from wanem yumi stap lukluk long Ista olsem we yumi stap mekem. Hemia i ol ansa blong sam long ol kwestin ia.
?Wanem i Pam Sandei mo Holi Wik?
Holi wik i selebretem las wik blong ministri blong Jisas Kraes long wol ia. Pam Sandei i fas dei blong Holi Wik. I selebretem dei ia we Jisas Kraes i win mo i wokbaot i kam insaed long Jerusalem, long wan yang dongki, mo fulfilim profesi. Ol pipol oli putum lif blong pam tri mo ol klos long graon we Hem i wokbaot long hem, mo oli singaot, “Hosana.” (Luk long Matiu 21:6–11 Hemia i bin hapen wan wik stret bifo Laef Bakegen long Ded blong Jisas Kraes, we yumi selebretem long Ista, las dei blong Holi Wik. Wik ia i kavremap tu Gud Fraedei (we yumi tingbaot Kraes we i Ded long Kros mo taem oli berem Hem).
Jisas long Getsemane, i kam long Dan Burr
?Wetaem nao ol Kristin Man oli stat blong selebretem Ista?
Eli rekod we yumi gat blong wan Ista selebresen i kam long medel blong seken handred yia (samples bitwin 160 mo 170 afta long ded blong Jisas Kraes). Be ating long taem ia ol Kristin Man oli bin stap selebretem Jisas Kraes we i Ded long Kros mo Laef Bakegen long Ded blong Hem long sam defren wei. From se olgeta we oli folem Jisas Kraes oli biliv se wok blong atonmen blong Hem, i kamtru long Laef Bakegen long Ded blong Hem, i bigfala impoten taem long histri blong man. I nomol nomo se bae oli selebretem ol taem ia stat long ol eli dei blong Kristianiti. Tedei yumi save selebretem Atonmen mo Laef Bakegen long Ded blong Kraes evri Sandei taem yumi stap tekempat long sakramen.
?From wanem deit blong Ista i muv olbaot tumas evri yia?
Hem i fasfas smol, be folem nomol taem, Ista Sandei i: fas Sandei afta long “paskal ful mun,” we i fas ful mun afta long stat blong spring long not pat blong wol (Maj 21). (Hem i moa fasfas bitim hemia, be i oraet blong eksplenem olsem.)
Risen from wanem i olsem i from tu samting we i tru: (1) Ded blong Sevya long Kros i bin hapen long taem blong Pasova, mo (2) Laef Bakegen long Ded blong Hem i bin hapen long fas dei blong wik (Sandei).
Ol eli Kristin Man oli bin stap askem sapos bae oli selebretem Ista long taem blong Pasova o long wan Sandei. Pasova i wan lafet blong ol Man Jiu we i konek wetem kalenda blong ol Man Hibru. Hem i wan kalenda we i folem mun be i no go gud wetem kalenda we i folem san we plante oli stap yusum. Long Hibru kalenda, oli selebretem Pasova long namba 14 dei blong namba seven manis. Be afta, evri tu o tri yia, hem i ademap wan ekstra manis blong holemtaet koneksen ia wetem ol sisen. Nao, blong konektem Ista mo Pasova i minim se deit bae i jam olbaot mo bae i had blong i stap long wan Sandei.
Blong stopem hemia, wan Kristin kaonsel long 325 yia afta long Ded blong Kraes i bin disaed blong joenem deit we yumi selebretem Ista long hem.
Nao, blong mekem stori i sot: Folem wei we plante Kristin Man oli yusum, Ista Sandei i save kam eli olsem long Maj 22 o i save kam let olsem long Epril 25.
Blong Tingbaot Mi, i kam long Walter Rane
?Wanem koneksen nao ol rapet mo ol eg oli gat wetem Ista?
Ol Ista rapet (o ol nara animol) we oli stap givimaot ol eg i stat long Yurop long namba 17 handred yia. Ol samting ia oli no kam antap bigwan kasem long namba 19 handred ia. Oli talem se ol man i karem ol tingting ia long ol simbol blong spring, fasin blong riniu, mo laef we i tingting blong ol man we oli no ol Kristin. Afta oli konektem ol samting ia i go long Ista mo long Laef Bakegen long Ded blong Jisas Kraes.
Jisas I Stap Kamaot long Tumb, i kam long Dan Burr
?From wanem yumi stap lukluk tumas long Ista?
Fas Presidensi i askem yumi blong mekem ol Ista selebresen blong yumi i kam moa gud. “Nomata wanem ol nara man oli bilivim o mekem, yumi sud selebretem Laef Bakegen long Ded blong Sevya blong yumi we i stap laef taem yumi stap stadi ol tijing blong Hem mo help blong putum ol Ista tradisen long sosaeti blong yumi, speseli wetem famli blong yumiwan. Mifala i jalenjem yu blong mekem olsem” (Dallin H. Oaks, “He Is Risen!: A Special Easter Season Message from the First Presidency” [vidio], Gospel Laebri).