Trip blong go long Tempol

Pikja i kam long Katelyn Budge

I gat wan taem we mi no bin visitim tempol blong samples sikis yia. Ol yia ia oli bin ol had taem long laef blong mi from se mi lusum mama blong mi tu long taem ia. Mi bin wantem blong go long tempol, be bae i tekem wan aoa blong go, mo mi no bin gat mane blong transpot mo i nogat wan blong tekem mi i go.

Mo afta las yia oli singaotem mi blong stap olsem Yang Woman klas presiden. Taem Yang Woman lida i askem mi blong helpem hem mo planem ol aktiviti blong yia, mi talem se fas samting we mifala i sud mekem i blong go long tempol olsem wan klas. !Taem mi anaonsem hemia long ol yang woman, oli glad tumas! Plante long olgeta bae i fas taem blong olgeta blong go long tempol. Mi bin prea mo livim kakae taem mifala i stap rere from trip ia. Mi no wantem eni samting i go rong.

Long tempol, mi filim evri samting i kam laet. Mi bin mekem promes blong visitim tempol moa. Hem i wan naesfala eksperiens mo wan blesing. Mi bin glad tumas se mi mo ol dia yut blong mi, mifala i tekempat long bigfala wok blong Papa blong yumi long Heven.

Mi save se tempol i tabu haos blong Lod, wan ples we oli stap mekem ol tabu odinens long hem. Long ples ia, yumi save krae i go long Papa long Heven long prea, mo bae Hem i mekem ol samting i kam gud folem taem blong Hem, bae i fulumap yumi wetem lav, mo bae i givim yumi pis we i no save finis. Mi save se taem yumi lukluk long Kraes, bae yumi luk ol merikel we yumi nidim. Yumi ol pikinini blong Papa blong yumi long Heven we i lavem yumi, mo Hem i gat wan bigfala wok blong yumi mekem—blong tekem Isrel i kam tugeta long tugeta saed blong vel.