Wan Istawe Sevya i Stamba long Hem
Mo wan Laef we Ista i Stamba long Hem
Yumi evriwan i save kasem paoa blong Sevya long saed blong kamfot mo jenis.
Ol pikja i kam long Janae Bingham
Long seminari, mifala i toktok abaot wanem i stret mining blong Ista mo olsem wanem yumi mas selebretem. I no abaot ol loli mo Ista rapet nomo—hem i abaot Sevya. Mi askem miwan, “?Wanem i sam long ol Ista tradisen mi save statem long hom blong mi we i lukluk moa long Sevya?”
Mi laekem blong bildim samting wetem ol LEGO® brikis. Mi bildimap ol brikis folem wan pikja blong Sevya we mi faenem long Gospel Laebri mo afta mi tanem i go long ol brikis instraksen. Mi wok long brikis pikja ia mo long semmak taem mi lisin long jeneral konfrens. Taem mi finis, mi hangem long haos blong mi.
Givimaot ol Brikis Pikja blong Sevya
Mo tu, mi pem wan bigfala bokis we i fulap long ol brikis pikja blong Jisas, blong Ista. Mi bin stap tingting blong haedem olgeta raon long skul. Be taem ol man long skul i luk bokis ia, oli wantem ol brikis pikja ia. Ol tija tu i askem. Mo afta ol pikinini we mi neva ting se bae oli wantem wan brikis pikja blong Jisas oli askem. I mekem se mi givimaot long evri man we mi mitim olgeta.
Sevya i no bin fraet blong toktok long eni man, iven olgeta we sosaeti blong Hem i sakemaot olgeta. Hem i mekem fren wetem olgeta. Hem i spendem taem wetem olgeta. Hem i kakae wetem olgeta. Taem mi stap givimaot ol brikis pikja ia, hemia i tijim mi blong open long ol narawan, olsem Sevya i bin mekem. Hemia i tijim mi tu se nomata se yu huia, nomata long wanem yu ting se yu mekem, oltaem i gat spes blong Jisas Kraes long laef blong yu.
Stap Jenis Tru long Sevya
Long ful laef blong mi, mi stap tingting long ?olsem wanem blong kasem Atonmen blong Sevya? Long long Ista ia, mi lanem se sapos mi mekem ol janis long laef blong mi blong kam moa olsem Sevya, gladhat blong Atonmen blong Hem bae i wok long laef blong mi. Mo sapos mi traem blong mekem ol smol jenis evri dei, bae mi stat blong kam moa gud.
Blong sam yia long laef blong mi, mi gat hadtaem wetem ponografi. Afta long wan lesen long seminari, mi kasem insperesen blong toktok long bisop blong mi. I kam moa isi blong winim hadtaem blong mi sloslo afta we mi bin talem long bisop mo ol paren blong mi, from se i had tumas blong gotru long hemia miwan.
Mi stat blong stap prea mo ridim skripja blong mi evri dei, mo mi traem blong kam kaen moa long skul. Hemia i helpem mi from mi stap lukluk moa long Sevya bitim ol sin blong mi. Mi tanem mi moa i go long Hem bitim we blong tanem mi i go long ples we mi bin stap long hem.
Tru long Atonmen blong Jisas Kraes, mi winim hadtaem blong mi wetem ponografi. Mi kam moa olsem man ia God i nidim mi blong kam olsem. Naoia mi save blesem sakramen from Sevya i jenisim mi mo i mekem mi kam klin. Mi glad blong kam klin mo yusum prishud blong blesem laef blong olgeta raon long mi.
Konektem Ista Wetem Mi
Long yia ia, long taem blong seminari, mi gat wan naes eksperiens taem mifala i bin stap tokbaot sakrifaes blong Sevya. Mi bin gat tingting ia se taem Hem i stap safa, Hem i save stopem harem nogud ia nomo eni taem. Be afta mi pikjarem Hem we i stap tingting, “No, mi nid blong gohed. Mi nid blong mekem hemia blong Ben. Ben i nidim hemia.” Long mi, tingting ia i konektem gud rilesensip blong mi wetem Sevya mo Ista.
Long nekis Ista, maet bae mi wok long wan narafala brikis pikja blong Jisas. Mi wantem tumas blong givimaot moa brikis pikja. I nomata sapos mi mekem hemia o no, be bae mi tingbaot safaring blong Kraes mo Atonmen blong Hem from mi. Tru long Hem, mi save sakem sin mo gobak long Hem wetem Papa long Heven wan dei.
Mi save se Sevya i laef mo ded from wanwan long yumi mo se Hem i save huia yumi mo wanem yumi nidim. Sapos yumi traem tru, bae yumi save kasem Paoa blong Hem blong long saed blong kamfot mo jenis, mo yumi save kam moa gud.
Hem we i raet, i stap long Aedaho, YSA.