Hosana blong Mi

Wan long ol fevret Niutesteman japta blong mi i tokbaot viktri blong Jisas Kraes taem i go insaed long Jerusalem. Ol man i singaot, “Hosana long Laen ya blong King Deved Hae God, yu blesem man ya we i kam long nem blong yu. Olgeta long heven oli presem nem blong yu” (Matiu 21:9). Taem i stap ridim hemia, mi tingting se: ?Wanem i hosana blong mi?

Long ful laef blong mi, mi stap pulpulum toktok. Samtaem mi kros mo mi harem nogud from se mi no save toktok long wei we mi wantem. Mi wantem blong toktok gud o blong neva toktok bakegen. Oltaem mi stap wari taem mi toktok long fored blong ol narawan o taem mi prea laod. Plante taem mi stap prea long sikret from fasin blong wet longtaem, pis mo help. Hemia i wan long ol hosana blong miwan—krae blong mi blong kam fri.

Semmak olsem Kraes i luksave ol krae blong ol pipol long Jerusalem, long semmak wei, bae Hem i luksave ol krae blong mi. Hem i no mekem mi stop blong pulpulum toktok, be Hem i givim mi paoa long ol narafala wei. Hem i helpem mi blong filim pis long ol taem we mi fraet mo i helpem mi blong luksave se voes blong mi, nomata se i nogud, i inaf, long Hem.

Yumi evriwan i gat wan samting long laef blong yumi we i mekem yumi foldaon long ol ni blong yumi. Samtaem, maet yumi filim olsem se oli no ansarem ol krae blong yumi. Be Hem i harem evri hosana. Mo long wei mo taem blong Hem we i stret evriwan, bae Hem i helpem yumi.

Long Getsemane, Kraes i bin safa from ol sin blong yumi mo i filim ol harem nogud mo hadtaem blong yumi. Hem i gohed blong gaedem mo kamfotem olgeta we oli tanem olgeta i go long Hem mo Papa long Heven. Semmak Kraes ia we i safa from yumi long Getsemane mo long kros i girap long tumb, mo i winim ded blong mekem se yumi save gat hop. Hem i Laef Bakegen long Ded mo hemia i bigfala ansa ia long evri hosana.