Yu No Nid blong Kam wan Profesonol

Ol foto i kam long Getty Images

Plante long yumi i gat eksperiens ia blong luk wan naesfala wok blong ol atis o wan samting we i mekem man i hapi mo talem long tingting blong hem: “Mi wantem mekem olsem, be mi nogat inaf talen.”

I tru se plante long ol samting we yu laekem tumas i kam long olgeta we oli bon wetem talen ia. Be bae yu sapraes blong save se plante taem i kam long wan nomol man nomo we i kasem wan tingting blong insperesen.

Wan Lata-Dei Sent we nem blong hem Larry A. Hiller i raetem “Letem ol Singsing blong Ista i Laod,” wan long ol niu hym we Jos i jes rilisim. Hem i wan profesonol long saed blong raet mo mekem ol jenis (hem i ritae nao), be hem i no wan profesonol long saed blong raetem singsing. Mo tu, hem i no wan gudfala man blong singsing o man blong plei long miusik.

Hem i wan man we i laekem miusik nomo mo i kasem wan tingting blong insperesen.

Taem hem i stap givim seves olsem wod kwaea daerekta plante yia i pas, Brata Hiller i traem blong raetem ol niu toktok blong wan olfala singsing we hem i faenem. Hem i laekem eksperiens ia mo i askem wan (woman) fren we i wok long Jos sapos hem i save long eni singsing we i nidim ol niu toktok. Fren ia i soem hem wan saon blong hym we oli mekem long ol yia 1800.

Brata Hiller i talem, “Mi sidaon wetem miusik ia mo ol toktok i kam long maen blong mi wantaem nomo: ‘Girap, ol Sent, stap glad.’ Mo stat long pat ia mi filim topik we singsing ia i nidim—wan singsing blong glad abaot Sevya.”

Hym ia oli pablisim long Ensign long 2012. Hem i gat fo ves mo hem i abaot Atonmen blong Jisas Kraes. “Hem i lukluk moa long toktok ia ‘bae yu luk olgeta we yu lavem bakegen; bae yumi laef bakegen long ded,’” Brata Hiller i talem. Taem Jos i askem blong i gat ol niu hym, oli askem Brata Hiller blong i lukluk long Ista nomo taem i raetem ol toktok blong singsing.

Afta we hem i jenisim plante long ol toktok blong singsing—nomata se fas laen, “Girap, ol Sent, stap glad,” i stap semmak—Brata Hiller i gat wan hym blong tri ves we taetol blong hem i “Letem ol Singsing Blong Ista i Laod.” !Ating bae yu singim singsing ia long sakramen miting long Ista sisen ia!

?Brata Hiller i bin kasem insperesen taem i raetem ol toktok ia?

“Hemia i wan ona,” hem i talem. “Mo yes. I bin gat ol taem we mi filim se ol tingting i stap kam nomo long maen blong mi. Hem i wan naes filing we i fulap long pis. Mo plante taem mi stap filim glad ia bakegen taem mi ridimbak wan samting we i bin tajem hat blong mi long taem ia. Hemia nomo i mekem mi filim bak ol filing ia blong testemoni. I olsem se mi stap gotru ol eksperiens ia bakegen.”

!Maet bae ol pipol i laekem hym ia, be i luk olsem man ia we i benefit long hem moa, i (dram rol) … man we i raetem! Taem yumi yusum ol talen mo tingting blong insperesen blong yumi, hemia i no blesem ol narawan nomo—i blesem yumi tu.