Ol Samting we Oli Haed
Stap faenem Atonmen blong Sevya insaed long OlTesteman
Lukluk gud; lanem bigwan.
Sam oli ting se OlTesteman, we oli raetem bifo Sevya i bon mo i no talem nem blong Jisas Kraes, i nogat tumas samting blong talem abaot Ista. Be olsem we Buk blong Momon i mekem i klia, ol man long taem bifo oli save mo gat fet long Sevya tu (luk long Jekob 4:4).
Ol Man Isrel oli kasem tijing se stamba blong loa blong Moses i blong poenem olgeta i go long Kraes. Eksampol, taem oli kasem hiling long snek we i kakae olgeta from oli lukluk long pikja blong snek we oli mekem long bras olsem we Lod i askem Moses blong mekem. Moses i tijim olgeta se hemia i wan simbol blong Sevya, we bae i kam mo sevem olgeta aot long ol sin blong olgeta (luk long Namba 21:7–9; Alma 33:18–20).
Be from nomo se plante klia tingting oli lus long Baebol we yumi gat tedei, from ol jenis—we oli minim mo hemia we oli mestem—long plante yia i kam (luk long 1 Nifae 13:23–27).
Be sapos yu lukluk, bae yu save faenem yet plante koneksen wetem Sevya mo Atonmen blong Hem long OlTesteman. !Bae yumi tokbaot sam long olgeta!
Pam Sandei, Getsemane, mo Hadtaem
“King blong yufala i stap kam long yufala. Hem i win finis,mo i glad tumas from we hem i winim ol enemi blong hem. Be tingting blong hem i stap daon, nao i stap ron antap long wan dongki. Hem i stap ron long wan dongki we i yangfala nomo” (Sekaraea 9:9).
Hemia i hapen tru long wanem yumi save tedei olsem Pam Sandei, seven dei bifo Ista, taem Jisas i kam insaed long Jerusalem wetem viktri (luk long Matiu 21:15).
“I tru se hem i bin tekem ol soa long hat blong yumi mo hem i bin tekem ol harem nogud blong yumi; be stil, yumi ting se hem i bin kasem panis, panis ia we i kam long God, mo hem i bin gat hadtaem” (Aesea 53:4).
Long Getsemane, Sevya i safa from evri sin—mo i filim ol harem nogud, ol soa blong bodi, ol sik mo wiknes—blong evriwan we oli bin laef long wol ia mo olgeta bae oli kam afta. From hemia, Hem i save olsem wanem blong kamfotem yumi long ol hadtaem blong yumi (luk long Alma 7:11–13; luk tu long Matiu 8:17).
“Oli bin mekem nogud fasin long hem, mo oli bin givim hadtaem long hem, be stil hem i no bin openem maot blong hem; oli karem hem i go olsem wan smol sipsip we i go blong kasem ded, mo olsem wan sipsip long fored blong ol man blong katemaot hea blong sipsip, hem i no save toktok, olsem ia hem i no bin openem maot blong hem” (Aesea 53:7).
Jisas i stap kwaet nomo taem hae pris i askem kwestin long Hem (luk long Mak 14:60–61).
Jisas i Ded long Kros
“Ol man nogud oli kam hivap, oli stap raon long mi, olsem hip blong ol dog, we oli kam blong kakae mi. Olgeta oli stikim leg blong mi mo han blong mi” (Sam 22:16).
“Oli tekemaot ol klos blong mi oli seraot long olgeta, mo oli sakem daes blong luk se huia bae i tekem kot blong mi” (Sam 22:18).
“Taem mi mi hanggri, olgeta oli givim posen long mi, mo taem mi tosta, oli givim waen we i konkon long mi” (Sam 69:21).
Blong nilim man long kros i bin wan nomol wei blong kilim man i ded long taem ia, be ol soldia blong Rom oli jikim mo mekem nogud long Jisas (luk long Jon 19:1–3; Matiu 27:34–35, 48).
Laef Bakegen long Ded
“Hae God i Masta blong yumi, mo long taem ya, hem bambae i mekem we ded bambae i go lus olgeta. Bambae hem i ravemaot wota blong ae blong yufala mo bambae i tekemaot sem we yufala evriwan i stap kasem. Hem i Hae God, mo hemia tok blong Hem” (Aesea 25:8).
“Be mi mi save we God i stap long heven. Mo biaen, hem bambae i kam, i tok long saed blong mi blong talemaot we mi mi stret. Nating we sik i spolem skin blong mi finis, be long bodi ia blong mi bambae mi mi luk hem” (Job 19:25–26).
Lod Jisas Kraes i laef bakegen long ded. !Hem i laef naoia! Plante skripja mo testemoni i konfemem hemia. Antap long hemia, Papa blong yumi long Heven i save long stat finis se bae yumi nidim wan Sevya, mo Hem i bin stap rere long ol pikinini blong Hem blong welkamem Sevya stat long ol taem blong OlTesteman.