Kam, Folem Mi
Eksodas 12
Pasova blong Yumi—Sakramen
I gat wan koneksen bitwin Pasova blong bifo mo sakramen blong yumi blong evri wik.
Ol pikja droing oli kam long Alyssa Tallent
Bifo ol Man Isrel oli fri aot long Ijip, oli askem olgeta blong obei long sam instraksen we i kam long Lod blong mekem se enjel blong kilim man bae i no kilim ded olgeta, (luk long Eksodas 12). Afta we oli lego Ijip, ol Man Isrel oli mekem wan kakae evri yia, we oli singaotem Pasova, blong tingbaot hao Lod i mekem kavenan pipol blong Hem i go fri.
Long las wik blong laef blong Hem long wol ia, Jisas Kraes i stap long wan kakae blong Pasova. Naoia yumi singaotem kakae ia Las Sapa. Sevya i bin tekem taem ia blong soem odinens blong sakramen, we tedei yumi stap tekem evri wik. (Luk long Matiu 26:26–28; Luk 22:19–20; Doktrin mo Ol Kavenan 20:77, 79.)
Hemia i tu samting we i konektem fas Pasova, Las Sapa blong Lod, mo sakramen blong tedei we i save helpem yumi blong tingbaot fridom blong yumi tru long Sevya.
Bred
Pasova: Blong seven dei, ol Man Isrel oli kakae bred we i no solap (we i hariap blong mekem mo i no sting hariap).
Las Sapa: Jisas Kraes i brekem bred blong Pasova we i nogat is, mo i givim long ol disaepol. Hem i talem long olgeta blong kakae blong tingbaot bodi blong Hem, we Hem i save se bodi ia bae oli brekem mo bae i ded be bae i girap bakegen.
Sakramen: Yumi kakae bred blong tingbaot bodi blong Jisas Kraes.
Jisas Kraes i Pikinini Bred blong Laef. Tru long Laef Bakegen long Ded blong Hem, yumi evriwan bae i laef bakegen long ded wetem wan bodi we i stret gud evriwan mo i no save ded. Hem i mekem yumi fri aot long ded.
Blad blong Smol Sipsip
Pasova: Pasova sipsip ia i wan smol man sipsip we i klin evriwan. Oli kilim i ded, mo putum blad blong hem insaed long wan dis. Oli mekem hyssop (wan plant) i wetwet insaed long dis ia mo oli yusum blong sakem blad i go olbaot long frem blong doa aotsaed. Hemia i saen blong aotsaed we i soem kavenan pipol blong Lod blong mekem se enjel blong kilim man bae i pas ova long olgeta blong oli save fri aot long Ijip.
Las Sapa: Jisas Kraes i yusum waen blong ripresentem blad blong Hem. Hem i talem long ol disaepol blong Hem blong dring blong tingbaot blad blong Hem, we bae i ron from sin blong olgeta mo bae i stap olsem pat blong wan niu kavenan.
Sakramen: Yumi dring wota blong tingbaot blad blong Jisas Kraes.
Jisas Kraes i Smol Sipsip blong God. Blad blong Hem i ron taem Hem i stap safa from ol sin mo wiknes blong yumi. Blad blong Hem—sakrifaes blong Hem—i mekem yumi kam klin. Hem i mekem yumi fri aot long sin.