Kondisen blong rod blong Hem
Rod blong Sevya oltaem bae i no isi, be Hem bae i wokbaot wetem yumi mo lidim yumi long wea ples yumi wantem go long hem.
Ol pikja droing oli kam long Yukai Du
Yumi jusum wan rod from hem i lidim yumi i go long ples yumi wantem go long hem. Be i gat moa long wan rod we yumi stap go from. Mo tu, i gat kondisen blong rod—wan kaen graon we bae i tekem yumi go tru long hem.
Jisas Kraes Hem i invaetem yumi blong wokbaot wetem Hem (luk long Moses 6:34; Maeka 6:8; 1 Jon 2:6; Doktrin mo Ol Kavenan 19:23). Rod we Hem i invaetem yumi blong wokbaot long hem i kavenan rod—rod we i lid i go long pis, glad, mo laef we i no save finis wetem Papa blong yumi long Heven—ples we yumi wantem stap long hem.
?Be rod ia i luk olsem wanem? ?Wanem kaen rod bae yumi krosem taem yumi wokbaot wetem Sevya?
Smol
“Yufala i go insaed long stret get, mo get ia we i mo rod ia we i no isi i lidim man i go long laef” (Matiu 7:14).
Taem yu filim se rod blong Hem i had tumas, i gat risen. Smol rod i kipim yu blong no stanap long ples we bae i save mekem yu kasem kil o lus.
Stret
“Ol rod blong Hem i stret” (Alma 37:12).
Rod blong Hem i nogat kona. Hem i wan stret rod i go long gol blong yumi blong laef we i no save finis. Hem i no lidim yumi go aot long hem. Be samtaem yumi stap go aot long hem. From Atonmen blong Sevya, yumi save sakem sin kwiktaem mo gobak long rod blong Hem.
I Glis mo Samtaem I Gat Ston
“Rod [we i go hom long God] i glis mo samtaem i gat ston” (Presiden Henry B. Eyring blong Fas Presidensi, “Help Them on Their Way Home,” Apr. 2010 general conference [Ensign o Liahona, May 2010, 25]).
Blong klaem hil i save nidim efot, mo bae yu no save lukluk ova long top blong wan hil we yu stap klaem long hem. Be Sevya i givim paoa mo leftemap tingting blong yu taem yu stap traehad blong mekem ol had samting we Hem i invaetem yu blong mekem.
Ol ston long rod blong yu bae oli defren long ol narawan. Ol jalenj mo situesen blong yu hem i blong yuwan. Be Sevya Hem i bes kompanion blong yu blong go wetem mo bae Hem i helpem yu blong go tru long evri hadtaem.
I laet gud
“Tok blong yu i olsem laet, Oltaem hem i stap soemaot rod blong mi, mo i stap lidim mi” (Ol Sam 119:105). “Be sipos yumi stap wokbaot long delaet, olsem we God i stap long delaet” (1 Jon 1:7).
Taem rod blong yu i tudak, Sevya i save givim laet long wei blong yu, iven sapos hem i inaf blong wan step mo afta narawan long rod blong yu i go hom long Papa long Heven.
Sef
“Nating we mi pas long ples we i tudak olgeta, i ples blong ded, be mi mi no save fraet long wan samting, from we yu yu stap wetem mi” (Ol Sam 23:4).
Nomata se yu fraet, wari, o gat hadtaem long rod blong yu, yu sava gat pis blong save se taem yu wokbaot wetem Jisas Kraes, Hem bae i wokbaot wetem yu mo lidim yu i go sef, i gobak long Papa long Heven.