3 wei blong No Jusum Setan mo Jusum Jisas Kraes
Blong andastanem wanem we i bin hapen long laef bifo laef long wol ia i save helpem yu blong mekem ol gudfala joes naoia.
Pikja droing i kam long Dean MacAdam
Taem Papa long Heven i talemaot plan blong Hem blong hapines mo progres blong yumi we i no save finis, Hem i promesem blong sendem wan Sevya blong helpem yumi. Taem Papa long Heven i askem se, “?Bambae mi sendem huia?” (Ebraham 3:27), Jisas Kraes, “Pikinini ia we [Papa] i Lavem Tumas mo Hem we [Papa] i bin Jusum stat long stat” (Moses 4:2), i talem, “Mi hemia. Yu sendem mi” (Ebraham 3:27). Hem i no askem eni samting, Hem i wantem nomo blong mekem tingting blong Papa (luk long Moses 4:2).
Afta Lusifa i kam. Hem tu i talem, “sendem mi” (luk long Moses 4: 1). Be Lusifa i selfis, hem no wiling blong sakrifaes from yumi. Hem i wantem ona, paoa, mo glori blong God i blong hemwan (luk long Moses 4:1). Lusifa i wantem blong spolem fridom blong mekem joes blong yumi. Olsem wanem blong hem i mekem hemia, hemia i no klia. Be yumi save se sapos i nogat fridom blong mekem joes, bae yumi no save progres mo kam olsem Papa blong yumi long Heven. Mekem se Lusifa i go agensem Papa long Heven mo no akseptem plan blong Hem.
Fasin blong go agens blong Lusifa i mekem se i gat wan faet long heven, long ples ia oli “sakemaot” hem mo hem i “kam Setan” (Moses 4:3–4). Wan pat aot long tri blong olgeta we oli bin stap long heven oli bin folem hem (luk long Doktrin mo Ol Kavenan 29:36). Be yumi bin eksasaesem fridom blong mekem joes blong yumi mo folem Jisas Kraes.
Wo we i bin stat long heven i gohed kasem tedei. Setan mo olgeta we oli folem hem i gohed blong lukaotem ol wei blong go agensem yumi. Hemia tri wei blong faenemaot trik mo ol wei blong Setan, stap longwe long trap blong hem, mo jusum Jisas Kraes truaot long laef blong yumi.
1. No Letem Rabis Fasin i Win
Sam yia i pas, wantaem mi traem blong winim ol fren blong mi long skul blong no mekem homwok blong olgeta from se mi no bin mekem blong mi. Mi mi rong, be mi ting se sapos mifala evriwan i stap long trabol, long wan wei bae mi filim gud abaot miwan. Nogud fasin blong mi ia i mekem mi tingbaot fasin blong Setan abaot yumi. From se hem i no glad, hem i wantem blong karemaot janis blong yumi blong kasem laef we i no save finis
Setan hem i no save tru long rabis fasin blong hem mekem se hem i—iven wetem save ia se bae hem i no win—wantem tumas blong “pulpulum ol wok blong tudak” (Hileman 6:28), blong hem i save spolem fulap long yumi.
Rabis fasin blong Setan hem i no plan ia we yumi jusum. Yumi save jusum fridom blong mekem joes blong yumi blong folem Jisas Kraes mo gohed blong no akseptem nogud fasin, jip fasin, mo fasin blong limitim yumiwan blong Setan. Sevya i givim laef blong Hem blong mekem se yumi save kam huia Hem i save se bae yumi kam olsem mo testem swit fasin blong laef we i no save finis.
2 Yu No Fraet
Samtaem mi stap tingting abaot from wanem tri pat blong olgeta spirit pikinini blong God oli jusum blong no akseptem plan blong Hem. Setan i save se fraet mo tu tingting i tufala wei blong lusum fet. Bae hem i traem yumi blong gat tu tingting abaot praes blong yumi o blong winim tingting blong yumi se yumi no save kam klin tru long Atonmen blong Jisas Kraes. O bae hem i save mekem yumi gat fraet abaot fasin blong sakem sin o folem plan ia blong God.
Taem yumi fesem ol tes mo hadtaem, yumi save jusum blong gat tras long plan blong God mo long Jisas Kraes. Hem i bin stap strong long evri samting blong mekem se Hem i save stap olsem paoa blong yumi taem yumi gat fraet, mo tru Hem, yumi save winim olgeta long en.
3. Glad long Evri Samting we Sevya i Givim long Yu
Papa long heven mo Jisas Kraes Tufala i stap blong leftemap mo givim paoa long yumi. ?Hu moa i talem se oli wantem helpem yumi blong kam ol bes man mo givim yumi evri samting we oli gat mo no holemtaet? !Evri samting we Papa i gat, i save kam blong yumi! Hemia oli givim long yumi tru nomo long Lod Jisas Kraes.
Taem mi tingbaot tabu fasin mo paoa blong pemaot man blong Sevya, mi wantem blong folem Hem. Jisas Kraes i stret jampion blong stret plan ia. Taem yumi jusum Hem, Hem i helpem yumi blong winim ol hadtaem, folem plan blong Papa long Heven, mo kasem tabu ples blong yumi.