2026 Stamba Toktok blong Ol Yut
“Wokbaot wetem MI”—Bae Yumi Brekem Daon Hemia
Stamba toktok blong yia ia hem i tri toktok, be wanwan toktok ia i tijim yumi plante samting.
Semmak olsem stamba Toktok blong ol yut las yia, “Lukluk long Kraes,” stamba toktok blong yia ia—“Wokbaot wetem Mi”—hem i wan fasin blong toktok. Long laef ia, plante long yumi oli nogat janis blong luk o wokbaot wetem Sevya. ?Hem i minim wanem blong“wokbaot” wetem wan man we i no stap, long saed blong bodi”? Bae yumi brekem daon hemia.
Wokbaot
Taem Lod i singaotem Inok blong kam profet, Hem i givim hem wan promes: “Evri toktok blong yu, bae mi talem se i tru; mo ol bigfala hil bae oli ronwe long fored blong yu, mo ol reva bae oli jenisim rod blong olgeta; mo bae yu stap wetem mi, mo bae mi stap wetem yu; from hemia, yu wokbaot wetem mi” (Moses 6:34).
Sapos oli promesem yu se wokbaot wetem God i minim se bae Hem i sapotem ol toktok blong yu, muvumaot ol hadtaem long fored blong yu, mo bae Hem i stap wetem yu oltaem—?from wanem bae yu no wantem wokbaot wetem Hem?
Gudfala nius: oli promesem hemia long yu ating i no longtaem i pas olsem long las Sandei. Taem yu tekem sakramen, yu promes blong “oltaem tingbaot Hem mo holem ol komanmen blong Hem”—i minim, blong wokbaot wetem Hem. ?Mo from wanem yu mekem hemia? “Blong mekem se oltaem [yu] gat Spirit blong Hem i stap wetem [yu]” (D&C 20:77; oli ademap italik).
Yumi luk se Lod i no talem long Inok se “Stanap long ples ia mo lukluk raon wetem mi.” Hem i no talem se “Sidaon mo spel wetem mi smol taem.” Hem i talem “Wokbaot wetem mi.” Yumi mas mekem aksen folem ol filing we yumi kasem, we i pusum yumi blong mekem samting. Yumi mas mekem mo talem wanem we yumi bilivim se i raet.
Olsem Presiden Marion G. Romney (1897–1988), wan kaonsela long Fas Presidensi, i talem se “Hem i save gaedem ol step blong yumi nomo taem yumi muvum leg blong yumi.”
Be luk wanem Lod Hem i no bin talem. Hem i no talem se “Ron wetem mi.” Hem i no talem se “Jam ovarem evri hadtaem blong yu wetem mi.” Hem i no askem yumi blong “ron moa bitim paoa we yumi [gat” (Mosaea 4:27). Hem i no askem blong yumi muv oltaem long wan hae spid. Hem i no askem yumi blong no mekem mistek o blong gat tingting we i stap daon. Hem i wantem yumi blong gohed blong stap traem.
Wetem
Yumi wokbaot wetem Sevya. I no fored long Hem. !I no longwe long Hem!
Taem u wokbaot wetem wan man, yu wokbaot narasaed long olgeta. Be long fasin blong toktok ia, yumi wokbaot biaen smol long Sevya. Hem i lid, mo yumi folem Hem—kolosap.
!Taem yu wokbaot long stret rod, rod ia i no “lid” i go long Jisas—Hem tu i stap long rod ia! !Tingbaot sakramen! Lod, tru long Spirit blong Hem, bae i oltaem stap wetem yumi, taem yumi stap gohed blong invaetem Hem.
Papa long Heven mo Jisas Kraes Tufala i no wantem save wanem rod yumi tekem from Tufala i eni daereksen yumi tekem. Bae Tufala i mitim yu long weaples yu stap long hem. I nomata tu sapos yu wokbaot slo.
Mi
Yumi nidim blong tekem aksen (WOKBAOT). Yumi nidim blong mekem hemia folem ol komanmen blong God mo ol kwaet toktok blong Spirit (WETEM). Mo yumi nidim blong mekem evri samting ia wetem Jisas Kraes nomo (MI).
From se Jisas Kraes, Papa blong Hem long Heven, mo Tabu Spirit oli wan—luk long Jon 10:30; 17:21; Ol Doktrin mo Kavenan 35:2—i oraet blong talem se yu stap “wokbaot wetem God,” “wokbaot wetem Sevya,” “wokbaot wetem Spirit,” o wan tingting we i semmak olsem.)
I gat fulap voes blong folem long wol ia. I gat fulap man blong pulum tingting long sosol media, ol man we oli popula, mo ol man blong politik we bae oli laekem blong yu “wokbaot” wetem olgeta (o givim mane long olgeta). Maet wanem ol narawan i talem bae i save helpem yu, be sapos nomo i go wetem ol tijing blong Sevya.
Wokbaot wetem Hem.