Map blong Yu I Gobak Hom
?From wanem i impoten blong andastanem plan blong fasin blong sevem man?
Pikja droing i kam long Mackenzie Alexander
Long Buk blong Momon, profet Jerom i statem rekod blong hem mo talem, “?From wanem bae mi save raet moa bitim ol samting we ol papa blong mi oli bin raetem?” ?From i no tru se oli bin soemaot plan blong fasin blong sevem man? (Jerom 1:2)
Sapos hem i ting se hemia i evri samting we yumi nidim, plan blong fasin blong sevem man hem i impoten tumas!
!Mo hem i impoten! Hem i map we i stret gud evriwan blong laef blong yumi. Presiden Russell M. Nelson, wantaem i talem se, “Blong andastanem gudfala plan blong God i karemaot ol samting we i sikret long laef mo ol samting we yumi no sua long fiuja blong yumi.”
?Olsem wanem nao map ia i save helpem yu blong go tru ol hadtaem blong laef?
?Mi Kam Wea?
God hem i Papa blong yu long Heven. Yu bin stap wetem Hem bifo yu bon i kam long wol. !Hem i lavem yu!
Elda Alan T. Phillips blong olgeta Seventi i eksplenem se, “Yu no wan mistek blong stap long laef ia, o wan we i nogat papa mo mama, o wan ansa blong wan mata, plas taem plas janis. Long ples we i gat disaen, i gat wan man blong disaen i stap.”
Taem laef i stap kam had, hem i wetem kamfot blong save se yu stap ia from wan stamba tingting mo Papa long Heven we i gat lav i stap lukaot long yu.
“?Bambae Mi Go Wea?
Yu no stap ia blong stap olsem nomo—!yu gat wan ples blong go! Papa long Heven i wantem yu blong kam hom long Hem mo kam olsem Hem. Hem i rere long plan ia blong fasin blong sevem man blong yu save kasem evri blesing blong kingdom blong Hem (luk long Doktrin mo Ol Kavenan 14:7).
Blong save abaot plan ia blong Papa long Heven, bae i helpem yu tru long laef ia. Taem yu “lukluk i go longwe” mo tingting selestial, fulap joes bae i kam isi blong mekem—hemia i tekem tu blong jusum blong folem Jisas Kraes.
?Olsem Wanem Nao Bae Mi Kasem Ples Ia?
Plan ia blong fasin blong sevem man i no soem ples nomo be i soem tu olsem wanem blong kasem ples ia.
Jisas Kraes i stret eksampol blong folem rod ia i gobak hom. Sapos yu lukluk long Hem—mo wokbaot wetem Hem—Hem bae i helpem yu blong gobak long Papa long Heven mo kam moa olsem Hem. Olsem Elda Sergio R. Vargas blong olgeta Seventi i eksplenem, “Dip insaed long wanwan long yumi i gat strong tingting blong gobak long hom blong yumi long heven, mo Jisas Kraes i rod ia blong heven we bae i lidim yumi. Hem nao i rod.”
?Bae I Olsem Wanem sapos Mi Lus?
Iven wetem wan map, bae yu save go rong. Bae yu gohed blong mekem ol mistek. !Be yu no wari! Papa long Heven i i givim wan Ridima blong oltaem yu save sakem sin, gobak long Hem, mo stap kam moa olsem Hem. Tingbaot: “Taem yumi stap long kavenan rod i no minim se bae yumi neva mekem wan mistek. Yumi stap long kavenan rod taem yumi sakem sin evri dei.”
Taem yu stadi plan blong fasin blong sevem, tingbaot se oli disaenem wetem lav. Papa long Heven i wantem yu blong kam hom. Sapos yu folem map blong Hem, bae Hem i helpem yu blong kasem ples ia.