Ol Gudfala Promes blong Plan blong Papa
Ol sol blong yumi oli mas fulap wetem tangkyu taem yumi stap tingbaot bigfala plan blong God, long yumi.
Ol pikja droing oli kam long Alyssa Petersen
Plan blong Papa long Heven i tokbaot “ol nambawan promes we oli gud tumas” (luk long 2 Pita 1:3–4) mo ol trutok we oli helpem yumi blong faenem stamba tingting mo aedentiti blong yumi we i no save finis.
Olsem we “Famli: Wan Ofisol Toktok i go long Wol” i eksplenem: “Evri famli blong man—man mo woman—oli mekem olgeta folem imej blong God. Wanwan long olgeta hem i wan spirit pikinini boe o spirit pikinini gel blong papa wetem mama long heven we oli laekem olgeta tumas, mo from we oli olsem wan spirit, wanwan long olgeta i gat gudfala fasin mo oli gat bigfala janis blong save kam olsem God.”
Papa long Heven i promesem yumi se sapos yumi folem plan blong Hem mo eksampol blong Pikinini blong hem we Hem i Lavem tumas, kipim ol komanmen, mo stanap strong long fet kasem en, bae yumi “gat laef we i no save finis, we presen ia, i presen blong God we i moa bigwan long evri narafala presen blong hem.” (Doktrin mo Ol Kavenan 14:7).
Wok blong God i lukluk nomo long gro mo fasin blong kam olsem wan god, blong ol pikinini blong Hem. Evri pat blong plan blong Hem i blong blesem yumi from “praes blong ol sol i bigwan tumas long ae [blong Hem]” (Doktrin mo Ol Kavenan 18:10).
Plan blong Papa
Long kaonsel we i stap bifo laef long wol ia, Papa long Heven i presentem plan blong Hem blong ol pikinini blong Hem oli gro mo stap hapi blong taem we i no save finis. Hem i talem long yumi se bae hem i sendem yumi i kam long wol ia blong testem yumi, blong luk sapos bae yumi obei long Hem, mo bae yumi gat “glori antap long hed blong [yumi] blong oltaem mo oltaem” (luk long Ebraham 3:24-26).
Mo afta Hem i bin talem: “?Bambae mi sendem huia? Mo wan, we i semmak long Pikinini blong Man i bin ansa se: Mi hemia. Yu sendem mi. Mo wan narawan bakegen i bin ansa mo i bin talem: Mi hemia. Yu sendem mi. Mo Lod i bin talem: Bambae mi sendem faswan i go.”
Mo sekenwan i bin kros, … mo long dei ia, plante oli bin folem hem” (Ebraham 3:27–28).
Wan plan nomo oli bin presentem—plan blong Papa. Papa blong yumi long Heven i no askem se, “?Bae yumi mekem wanem?” Hem i no askem kaonsel, advaes, o ol tingting. Stamba tingting long kwestin blong Hem i blong faenem huia blong Hem i sendem blong karem aot ol wok blong plan blong Hem.
Lusifa i no bin presentem wan plan we plante man oli vot long hem long kaonsel long Heven. !Hem i faet agens! Hem i wantem spolem fridom blong jus blong man, oli sakemaot hem mo hem i “kam Setan, … devel, papa blong evri giaman, blong trikim mo mekem evri man oli blaen, mo blong lidim olgeta oli kam prisena folem tingting blong hem” (luk long Moses 4:1, 3–4). From hem i flas, i gat hae tingting, mo i selfis, hem i faet agensem plan blong Papa.
Plan blong Papa mo Gospel blong Sevya
Plan ia i tokbaot ol wok blong Papa mo Pikinini we oli mekem evri man i save kasem ol blesing blong laef we i no save finis.
Gospel blong Jisas Kraes hem i rod ia we yumi kasem ol promes blesing long plan blong God, iven doktrin, ol prinsipol, ol odinens mo ol kavenan we yumi mas bilivim mo folem. “I no gat eni narafala nem we oli givim andanit long heven, be Jisas Kraes ia nomo … we tru long Hem ol man oli save laef” (2 Nifae 25:20). I tru se, Lod Jisas Kraes Hem i “rod ia, mo stamba blong trutok, mo stamba blong laef. I no gat man i save kam long Papa, sapos [Hem] i no tekem hem i kam” (Jon 14:6; ademap long italik).
Ol taetol blong Plan ia insaed long Buk blong Momon
Yumi lanem ol impoten trutok taem yumi faenemaot mo stadi long plante defren taetol blong plan blong Papa insaed long Buk blong Momon: Wan Narafala Testeman blong Jisas Kraes. Eksampol, tingting long sam taetol ia we oli jusum:
-
“Plan we i fulap wetem sore blong bigfala Krieta” (2 Nifae 9:6).
-
“Plan blong God blong yumi” (2 Nifae 9:13).
-
“Plan blong sevem man” (Jerom 1:2; Alma 24:14).
-
“Plan blong fasin blong pemaot man” (Alma 12:25, 26, 30, 32, 33; 42:11, 13).
-
“Plan blong restoresen” (Alma 41:2).
-
“Plan blong stap glad” (Alma 42:16).
-
“Bigfala plan blong sore” (Alma 42:31).
Wanwan long ol taetol ia i helpem yumi blong gat wan klia andastaning long ol gudfala promes blong plan blong Papa mo blong mekem lukluk blong yumi i gro, abaot ol stamba tingting mo mining blong laef blong yumi long wol ia.
I no blong nating se, taetol we oli yusum plante long Buk blong Momon blong tokbaot plan blong God (“plan blong fasin blong pemaot man”) i lukluk nomo long fasin blong pemaot man long sin mo ded we i posibol tru long Atonmen blong Jisas Kraes (luk long Alma 12:25; 33:22).
Rod Ia I Rere Finis
Ol sol blong yumi oli mas fulap wetem tangkyu taem yumi stap tingbaot bigfala plan blong God. Blong save plan blong Hem, i givim yumi wan gudfala lukluk, i mekem yumi glad moa, mo i givim paoa long yumi blong go tru long ol jalenj mo hadtaem.
Papa long Heven i wantem tumas blong yumi gobak stap wetem Hem. Hem i invaetem mo promesem ol blesing, be Hem bae i neva fosem, o stopem yumi blong yusum fridom blong mekem joes we Hem i givim long yumi. Yumi mas tekem aksen mo jus blong gobak stap wetem Hem taem yumi stap folem eksampol blong pikinini blong Hem we Hem i Lavem tumas.
“Rod ia i rere finis, mo sapos yumi lukluk, bae yumi save laef blong oltaem” (Alma 37:46;
Mi testifae wetem glad se Papa long Heven Hem i mekem tabu plan ia blong ol pikinini blong Hem. Jisas Kraes i Ridima mo Sevya blong yumi. Olsem wan long ol lata-dei Aposol blong Hem, mi witnes se i tru Hem i “rod ia, mo stamba blong trutok, mo stamba blong laef.” (Jon 14:6; ademap long italik).