Wokbaot wetem Mi

?Oli bin askem yu finis long wan taem, blong mekem wan samting we yu no ting se yu save mekem? Maet yu filim se yu no strong o smat inaf, o yu wari se bae ol narawan oli laf mo talem nogud yu. Sapos yu bin filim olsem, yu no stap yuwan.

Plante taosen yia i pas, i gat wan man nem blong hem Inok. God i askem Inok blong prijim fasin blong sakem sin long ol pipol—sam long ol man long wol ya we oli nogud olgeta.

Inok i no ting se hem i save mekem. Hem i talem long God se hem i yang tumas, hem i nogat inaf fren, mo hem i no smat inaf (luk long Moses 6:31).

Be God i givim wan promes long Inok. Hem i talem long Inok we i fraet se, “Yu go mo mekem olsem we mi givim oda long yu blong mekem” mo “ol bigfala hil bae oli ronwe long fored blong yu, mo ol reva bae oli jenisim rod blong olgeta; mo bae yu stap wetem mi, mo bae mi stap wetem yu; from hemia, yu wokbaot wetem mi” (Moses 6:32-34).

“Wokbaot wetem mi.” Wan invitesen we i simpol, mo i naes tumas.

God i promesem Inok se sapos hem i strong inaf blong statem, bae God i stap wetem hem long evri step blong rod blong hem. God bae i givim paoa long Inok mo mekem hem i strong blong hem i mekem moa mo Hem i helpem hem blong kam moa bitim we hem i save tingbaot.

Wan long ol plante nem blong Sevya hem i Imanuel, o “God i stap wetem yumi” (Matiu 1:23). Hem i long nem mo fasin blong Lod blong Hem i wokbaot wetem yumi. Joes hem i blong yumi—?bae yumi wokbaot wetem Hem tu?

Tedei, yumi luk Inok olsem wan man blong fet mo wan bigfala profet mo lida. Be bifo long profet Inok, i bin gat wan yang Inok we i gat tu tingting long hemwan be i gohed blong jusum blong wokbaot wetem God.

Taem laef i had, taem yu filim se yu no inaf, tingbaot promes blong Lod long Inok, mo long yu. Bae Hem i wokbaot wetem yu. Bae Hem i no lego yu stap yuwan, long wan wan step we yu tekem.

Imanuel. God i stap wetem Yumi. !God i stap wetem yu!

Semmak olsem yufala ol yang man, Lod i askem Inok blong fulfilim ol impoten prishud responsabiliti. Wok blong hem i blong prijim fasin blong sakem sin long ol nogud man. Inok i talemaot ol tu tingting blong hem. “Be [mi] wan pikinini nomo,” hem i talem. “Evri pipol oli no laekem mi nating… from mi no save toktok gud; taswe, ?mi mi wokman blong yu?” (Moses 6:31).

Lod i ansa wetem paoa mo kamfot. “Yu go mo mekem olsem we mi givim oda long yu blong mekem. … Openem maot blong yu, mo toktok bae i fulap long hem…. Spirit blong mi i stap long yu… ; ol bigfala hil bae oli ronwe long fored blong yu… ; from hemia, yu wokbaot wetem mi” (Moses 6:32, 34).

Inok i lanem se taem Lod i givim yumi wan wok, yumi no mekem yumiwan. Taem yumi mekem mo kipim ol kavenan wetem Kraes, yumi wokbaot wetem Hem mo serem paoa blong Hem—yumi kam ol tul long ol han blong Hem.

Semmak olsem Inok, yu gat wan impoten rol: mekem wok blong givhan, wok long tempol, pasem sakramen, stadi ol skripja, laef folem ol gospel standet, sakem sin, stap rere blong go long misin, mo plante moa. Samtaem bae yu filim olsem hem i tumas. Maet bae yu filim se yu no gud inaf blong mekem. Hemia i ORAET. I no blong yu mekem yuwan. Hem i blong jusum naoia—tedei mo evri dei—blong wokbaot wetem God.

Wetem help blong Hem, yu save mekem evri samting. Hem bae i givim paoa long yu, fogivim yu, mo mekem yu go bitim paoa blong yuwan. !Hem i lavem yu! Olsem Yang Man Jeneral Presidensi, mifala i lavem yufala mo mifala i no save wet blong joenem yufala blong stadi long 2026 stamba toktok we i fulap long insperesen : “Wokbaot Wetem Mi.”