Stap Lan Afta We Apu Woman blong Mi I Ded

Pikja i kam long Katelyn Budge

Ded blong apu woman blong mi i bin wan jalenj long mi. Mitufala i gat wan strong rilesensip. Mi bin harem nogud tumas. Mi filim olsem se hop we mi nidim i bin lus.

Bifo hem i ded, mi no bin stap strong tumas long gospel ia blong Jisas Kraes. Mi bin stap dipen long ol testemoni blong ol narawan. Be long taem blong fas wik blong stap harem nogud, mi go long wan klas blong relijin, we wan tija i tij abaot Atonmen blong Jisas Kraes mo plan blong fasin blong sevem man blong Papa. Mi kam blong luksave se bae mi save luk apu woman blong mi bakegen. Yumi save joen bakegen long nekis laef tru long ol tempol odinens.

Hemia i mekem testemoni blong mi kam strong. Mi stat blong lukluk long Sevya blong mi Jisas Kraes mo blong lanem moa abaot gospel blong Hem . Naoia mi stap lukaotem ol ansa tru long ol skripja mo Kam Folem Mi. Mi laekem blong lisin long ol toktok blong konfrens, speseli hemia we i kam long profet, Presiden Russell M. Nelson. Taem mi lisin long ol toktok, dipen long ol skripja, prea mo tingting hevi, mo askem blong Tabu Spirit i helpem mi, testemoni blong mi i save kam strong.

Seminari i bin helpem mi blong lanem abaot mo traehad blong kam olsem Sevya blong yumi Jisas Kraes, taem mi yusum fet, lukluk ol samting long wan lukluk we i no save finis, mo lukaotem moa save tru long ol risos we oli givim.

Gat tras long Papa long Heven mo Jisas Kraes. Yu no dipen nomo long save blong yuwan be long Tufala. Tufala i save helpem yumi mo gaedem yumi tru long eni tes o hadtaem we bae yumi save fesem.