Evri Samting I Kam Moa Gud Taem Yu Gat Tras long God

Long taem ia, mi bin stat blong gat tu tingting long tru gospel ia, long testemoni blong mi mo huia i Jisas Kraes. I kasem wan poen we mi askem miwan sapos Hem i stap laef mo mi stat blong ting se mi no biliv long God. Hat blong mi i strong mo kolkol olsem wan aes ston.

Pat ia long laef blong mi i had mo i fasfas plante. Mi ting se hem i from taem yumi stop blong biliv long Jisas Kraes mo paoa blong Hem, laef blong yumi i nomo gat mining mo i fulap long harem nogud.

Long en, papa blong mi i helpem mi blong kambak long jos bakegen. Mi kambak nomata se mi konfius yet mo mi gat fulap kwestin.

Wan dei long jos, mi luk wan posta abaot seminari. Hemia i bin pulum intres blong mi. Mi go luk bisop blong mi mo askem hem abaot hemia. Kwiktaem nomo hem i putum mi i go insaed long seminari grup jat mo talem long mi se i stat long 5:30 long moning.

I mekem se, mi statem blong atendem seminari. Hemia i helpem mi blong mekem ol niu fren mo afta mi kasem wan testemoni blong Jos mo ol skripja. Mi gat wan tija we i leftemap tingting blong klas blong mi mo i mekem mifala i kam moa gud. Mi faenemaot se blong stap stadi ol skripja i helpem yumi blong save Sevya. Blong harem testemoni blong ol narawan i defren long taem yu stap lukaotem testemoni blong yuwan tru long stadi mo fet.

Fastaem, mi save abaot Papa long Heven mo Jisas Kraes tru long wanem we ol narawan i talem long mi. Be yumi no save dipen fulwan oltaem long ol testemoni blong ol narawan. Yumi nidim blong lukaotem blong save Sevya yumiwan.

Yumi nidim blong mekem taem blong Sevya mo ol tabu samting blong mekem se yumi save kam wan long ol disaepol blong Hem. Mi lanem se yumi kam blong save Hem taem yumi:

1. Lukaotem Hem wetem wan tru tingting.

2. Ridim ol skripja.

3. Traehad blong kam moa gud long saed blong spirit.

4. Prea.

5. Go long tempol.

6. Givim seves long ol narafala man.

7. Livim kakae.

8. Folem eksampol blong Hem.

9. Gat wan gudfala hat.

10. No talem nogud o tokbaot narawan.

Ol samting ia i helpem mi blong save Sevya—mo blong kam olsem wan long ol disaepol blong Hem. Blong stap olsem wan disaepol blong Jisas Kraes hem i impoten tumas from yumi save yusum laet blong Hem blong helpem ol narawan. Tru long ol gudfala eksampol blong yumi, ol narawan i save luk olsem wanem gospel i wan blesing.

Taem mi kambak long jos, laef blong mi i nogud olgeta—mi gat tu tingting, mi nogat fren, mi nogat hop, mi no save huia mi o wanem mi mas mekem.

Naoia, gospel i stap olsem “laet” we i saenem laef blong mi mo i helpem mi blong mekem ol raet samting mo blong kam moa gud. Sapos i nogat gospel, mi no save se bae mi stap wea tedei.

Evri samting long laef i kam moa gud taem yu gat tras long God. Long taem we yu lukaotem Hem, bae yu stat blong klaem aot long hol ia mo bae ol samting i stat blong kam moa gud. Yes, bae i gohed blong gat hadtaem, be tras ia mo hat blong yu blong wantem blong bilif bae i leftemap yu sloslo. !Maet bae i tekem taem, be bae ol samting i kam moa gud!

Taem yu gat tras long Papa long Heven, bae yu save go tru long wanem samting yu stap fesem—ol jalenj, fasin blong gat tu tingting, ol problem long saed blong helt o taem yu filim se yu stap yuwan. Eksampol, yu save kasem ol gudfala mak long wan tes, mekem helt blong yu i kam moa gud, o kasem ol ansa—samtaem ol ansa we u bin stap askem taem yu gat 10 yia, semmak olsem mi—sapos yu lukaotem Hem mo gat tras long Hem.

Mi save se ol samting ia oli tru. Tangkyu long gospel, mi save talem se mi jenis. Evri samting i jenis—hat, ol tingting, ol fasin, mo ol prinsipol blong mi. Naoia mi save trutok, mo hemia i mekem evri samting oli defren. Evri samting i kam moa gud from gospel blong Jisas Kraes.