Digital Lamang
Sagrado nga mga Yawe Gipahiuli diha sa Kirtland Temple
Pagkat-on mahitungod sa usa sa labing mahinamon ug mahinungdanon kaayo nga mga adlaw sa Pagpahiuli.
Gikan sa usa ka pakigpulong ngadto sa grupo sa mga historian duol sa Kirtland, Ohio, USA, niadtong Hunyo 13, 2024.
Daghang katawhan ang nakasinati og mga milagro diha sa Kirtland Temple atol sa pagpahinungod niini niadtong Marso 27, 1836. Ang uban nakakita og mga anghel, ang uban naghulagway og kahayag gikan sa kalangitan, ug ang pipila nakasinati og mga panan-awon kabahin sa Manluluwas.
Apan alang nako, kining tanan kon usahon dili makatupong sa mahangtorong kamahinungdanon sa unsay nahitabo didto niadtong Abril 3, 1836. Dili ko makahunahuna og usa ka adlaw sa nagpadayong Pagpahiuli diin mas daghan pa ang gipahiuli.
Mga Yawe sa Pagkapari
Ang pagkapari mao ang awtoridad ug gahom sa Dios. Siya naghatag og awtoridad ug gahom ngadto sa Iyang mga anak nga lalaki ug mga babaye nga molihok diha sa Iyang ngalan alang sa kaluwasan sa Iyang mga anak. Ang mga yawe sa pagkapari mao ang awtoridad sa pagdumala kon unsaon, kanus-a, ug asa gamiton ang pagkapari.
Sa wala pa ang Abril 3, 1836, ang Manluluwas mipadala og langitnong mga mensahero aron ipahiuli ang pagkapari ug piho nga mga yawe, aron nga matukod ni Joseph ang Simbahan, maorganisar ang mga katungdanan sa pagkapari, ug mobuhat sa uban nga mga tahas (tan-awa sa Doktrina ug mga Pakigsaad 20). Apan si Joseph wala pa makadawat sa tanang kinahanglanon nga mga yawe.
Niadtong Abril 3, 1836—Dominggo sa Pasko sa Pagkabanhaw—si Joseph Smith ug Oliver Cowdery miadto sa Kirtland Temple ug miduko sa hilom nga pag-ampo. Wala kita kahibalo kon unsa ang ilang giampo, apan kita nakahibalo nga ang ilang mga pag-ampo gitubag.
Nakita nila si Jesukristo kinsa mipaila sa Iyang Kaugalingon ug mipahayag, “Ang inyong mga sala napasaylo na kaninyo” (tan-awa sa Doktrina ug mga Pakigsaad 110:1–5).
Ang pahayag sa Manluluwas motabang kanato nga makasabot nga kanang bahin nga hilom nga giampo ni Joseph ug Oliver mao ang kapasayloan. Isip tubag sa ilang hangyo, si Jesus mihimo nila nga wala nay sala. Siya walay sala. Nianang higayona, sila walay sala. Ug ang templo gipahinungod, gidawat, ug gibalaan. Ang tanang butang andam na alang sa unsay hapit na mahitabo.
Human gisirad-an ang panan-awon kabahin sa Manluluwas, ang langitnong mga mensahero miabot aron ipahiuli ang sagrado nga mga yawe sa pagkapari. Importante nga masabtan nga kining gipahiuli nga mga yawe managlahi ug may kalambigitan.
Ang mga Yawe sa Pagpundok sa Israel
Una, gipahiuli ni Moises ang mga yawe sa pagkapari alang sa pagpundok sa Israel (tan-awa sa Doktrina ug mga Pakigsaad 110:11). Sa karaang panahon, tungod sa pagkamasinupakon, ang katawhan sa pakigsaad sa Dios, ang balay sa Israel, nagkatibulaag. Apan ang Dios misaad nga sila Iyang pundokon pag-usab. Pinaagi sa pagpahiuli sa Iyang Simbahan ug ebanghelyo ang Ginoo nagsugod na sa pagtuman niini nga saad.
Pinaagi sa mga yawe sa pagpundok, ang apostoles mahimo na karon nga “moabli sa ganghaan sa gingharian sa tanang dapit,” (tan-awa sa Doktrina ug mga Pakigsaad 112:17), ug ang mga anak sa Dios mahimong pundokon ngadto Kaniya.
Kabahin sa pagpundok sa Israel, si Presidente Russell M. Nelson mitudlo, “Walay laing panghitabo dinhi sa kalibotan karon nga mas importante. … Walay lain gayod.”
Ang Dispensasyon sa Ebanghelyo ni Abraham
Sunod, gipahiuli ni Elias“ang dispensasyon sa ebanghelyo ni Abraham” (tan-awa sa Doktrina ug mga Pakigsaad 110:12). Kasagaran, kita mogamit og dispensasyon aron magpasabot sa panahon, sama sa “ang dispensasyon sa kahingpitan sa mga panahon.” Apan kini mahimo usab nga magpasabot og talagsaon nga pagtugot o pribilihiyo. Pinaagi sa pakigsaad, kita nagtuo nga ang Dios misaad ni Abraham sa tanan nga anaa Kaniya. Unsa ka tinuod gayod nga talagsaong pribilihiyo! Diha sa Kirtland Temple, kini nga espesyal nga dispensasyon ug ang awtoridad sa pagpakigbahin niini gipahiuli ngadto ni Joseph Smith.
Pagpabalik sa mga Kasingkasing ug ang Gahom sa Pagselyo
Si Elijah mipakita dayon, nagpahibalo sa katumanan sa panagna ni Malaquias nga ang mga kasingkasing sa mga anak mobalik ngadto sa ilang mga amahan (tan-awa sa Malaquias 4:5–6). Si Joseph nakadungog na mahitungod niini gikan ni Moroni sa dihang siya 17 anyos pa lamang (tan-awa sa Doktrina ug mga Pakigsaad 2:1–2). Gipahiuli ni Elijah ang “mga yawe niini nga dispensasyon,” o ang gahom sa pagselyo (Doktrina ug mga Pakigsaad 110:13–16).
Ang pagpahiuli niini nga mga yawe pinaagi ni Elijah nagpasabot og labing minos duha ka butang. Una, kon unsa ang gibugkos dinhi sa yuta bugkoson usab didto sa langit (tan-awa sa Mateo 16:19). Matag mahinungdanon nga ordinansa nga atong madawat ug matag pakigsaad nga atong gisudlan pinaagi sa pagkapari dinhi nga kinabuhi pagailhon sa sunod nga kinabuhi. Ikaduha, sugod sa bana ug asawa ug molugway sa duha ka ugat (mga katigulangan) ug mga sanga (mga kaliwat), ang mga pamilya gibugkos o giselyo nga magkuyog sa kahangtoran diha sa walay kataposang pakigsaad.
Nakita ba ninyo kon sa unsang paagi nakonektar kini nga mga yawe? Si Presidente Nelson mihiusa niini sa ingon aning paagi: "Kini nga mga yawe nagtugot ni Joseph Smith—ug sa tanang misunod nga mga Presidente sa Simbahan sa Ginoo—sa pagpundok sa Israel sa duha ka habig sa tabil, sa pagpanalangin sa tanang anak sa pakigsaad uban sa mga panalangin ni Abraham, sa pagbutang og selyo sa pagmatuod sa mga ordinansa ug mga pakigsaad sa pagkapari, ug sa pagselyo sa mga pamilya sa kahangtoran. Ang gahom niini nga mga yawe sa pagkapari walay kinutoban ug talagsaon."
Ug kana ang hinungdan ngano nga ang mga panghitabo sa Kirtland Temple importante kaayo. Kadaghanan sa atong gibuhat diha sa Simbahan nga adunay mahangtorong kahulogan gihimo ubos sa awtoridad sa mga yawe nga gipahiuli niadtong Abril 3, 1836, sulod sa Kirtland Temple. Ang pagkapari ug kadtong mga yawe mas labaw pa kamahinungdanon kay sa lokasyon o sa bilding, apan ang Kirtland Temple naghatag og mahimayaong pahinumdom sa pagpakiglambigit sa Dios sa Iyang katawhan. Kini usa ka sagradong ebidensiya sa labing dako nga Pagpahiuli sukad.