Digital Lamang: Mga Tubag gikan sa usa ka Apostol
Unsaon Nako sa Pagkadawat og Tabang sa Dios diha sa Akong Kinabuhi?
Nganong nagkinahanglan man kita sa tabang sa Dios? Motabang ba gihapon Siya sa Iyang mga anak? Unsaon nimo sa pagkadawat sa Iyang tabang?
Gikan sa usa ka debosyonal nga pakigpulong alang sa mga young adult sa mga Dapit sa Pasipiko ug Asya nga gihatag niadtong Enero 9, 2022.
Tugoti ko nga mangutana ninyo og tulo ka konektado nga pangutana:
-
Nganong nagkinahanglan man kita sa tabang sa Dios?
-
Motabang ba gihapon ang Dios sa Iyang mga anak?
-
Unsaon man nato paggamit sa tinubdan sa balaanong gahom sa Dios?
1. Nganong Nagkinahanglan man Kita sa Tabang sa Dios?
Ang tanan nakabati na nga nasaag o walay mahimo. Kita nakasinati nga nawad-an, kahadlok, kamingaw, ug kasakit. Kita nangita og mga tubag sa mahinungdanong mga pangutana. Atong gihinuktokan ang kahulogan sa atong pagpakabuhi ug nakigbisog kon unsaon sa pagpuyo og kinabuhi nga adunay kamahinungdanon ug bili.
Alang niining mga butanga, kita nagkinahanglan sa tabang sa Dios.
May mga higayon usab nga atong bation nga ang mga palas-anon bug-at ra kaayo aron atong dad-on nga mag-inusara. Mga higayon nga diin kita mag-atubang og mga babag nga mura og dako kaayo nga dili kita makakita og paagi aron mabuntog kini.
Alang niining mga butanga, kita nagkinahanglan sa tabang sa Dios.
Karon ako motanyag ninyo og mensahe sa kasegurohan ug paglaom.
Ang Dios buhi! Siya tinuod! Siya mao ang atong Amahan! Siya anaa didto! Siya motubag sa mga pag-ampo sa Iyang mga anak. Siya motubag sa imoha ug akoa.
Ang Langitnong Amahan mipadala sa Iyang Anak, ang atong Manluluwas ug Manunubos, aron andamon ang dalan alang kanato, Siya adunay mga tubag, Siya anaa.
2. Motabang ba Gihapon ang Dios sa Iyang mga Anak?
Ang mubo nga tubag mao ang usa ka lanog nga: Oo!
Giunsa nako pagkahibalo? Nakita nako kini! Ang Dios motabang niadtong mopaduol Kaniya uban sa pagtuo ug ligdong nga katuyoan.
Tuo, ug ikaw makahibalo. Kini tingali mura og yano, apan tinuod kini.
Moingon ka, “Gusto ko nga motuo, apan ako walay pagtuo.” Busa pagbaton og paglaom—paglaom nga ang Dios nakaila nimo, nga Siya nahigugma nimo, nga Siya mogiya ug modasig nimo.
Unsa kadako ang Iyang gugma nato?
Ang iyang kaugalingong gipahayag nga misyon—Iyang rason ug katuyoan sa pagkahimong, “[Iyang] buhat ug [Iyang] himaya” (Moises 1:39)—nakasentro sa paghimong posible alang kanato nga makapuyo uban Niya hangtod sa mga kahangtoran ug mahimong mga sumusunod sa Iyang kahalangdon ug himaya.
Ang mga panalangin sa langit wala mag-agad sa imong nahimutangan sa kalibotan. Ang Dios dili motan-aw sa imong gitas-on, gibug-aton, kahimsog, o kabtangan. Dili niya igsapayan kon asa ka nagpuyo, kon ang imo bang gisul-ob mao ang labing bag-o nga uso, o ang gidaghanon sa imong mga follower sa Instagram.
Walay bisan usa ana nga importante sa Dios.
Ang Dios motan-aw sa imong kasingkasing, ug Siya nakahibalo sa mga tinguha sa imong kasingkasing.
Ang Dios nahigugma kanimo. Oo, ikaw!
Siya nakadungog sa imong mainiton nga mga pag-ampo ug nakahibalo sa imong pagtuo, kaisog, ug kamaayo. Siya nakahibalo sa imong mga paglaom, mga pangutana, ug mga tinguha.
Siya nagmaya uban nimo sa daghang higayon nga imong nabatokan ang daotan. Siya nahimuot sa imong daghang paningkamot nga mobuhat og maayo.
Gusto Niya nga ikaw makabalik ngadto Kaniya. Ug Siya kaniadto ug sa umaabot mopadayon sa pagbulig ug pagpaputli nimo. Siya mogiya sa imong mga lakang. Pun-on Niya ang imong kalag og kahayag.
Unsaon Nimo sa Pagkadawat sa Tabang sa Dios?
Ang atong Langitnong Amahan mihatag og taas kaayo nga bili sa atong abilidad sa paghimo og atong kaugalingong mga pagpili nga Siya dili mopugos sa Iyang kabubut-on diha kanato.
Ang Langitnong Amahan mohatag sa Iyang mga anak og kagawasan sa pagpili—bisan kon kana tingali maoy hinungdan nga sila mosalikway Niya. Ang baroganan sa pagpili sa direksyon sa atong kaugalingong mga kinabuhi maoy sukaranan sa plano sa kaluwasan.
Kon kita mohimo og mga pagpili nga molapas sa tambag sa Dios, atong gipalayo ang atong mga kaugalingon gikan sa makapaputli nga impluwensiya sa Espiritu Santo. Sila nga mopatig-a sa ilang mga kasingkasing ngadto sa Dios misira sa ilang kaugalingon gikan sa kahayag sa langit.
Busa, unsa ang atong mabuhat aron makadawat sa tabang sa Dios?
Una: Mahimong lig-on nga nakaangkla diha sa bato ni Jesukristo.
Taas nga mobarog isip Iyang disipulo ni Kristo.
Higugmaa ang Dios. Ipakita kini nga gugma pinaagi sa pagtuman sa Iyang mga sugo.
Higugmaa ang imong silingan. Ipakita kini nga gugma pinaagi sa pagserbisyo ug pagbuhat kauban sa imong isig ka miyembro sa Ang Simbahan ni Jesukristo sa mga Santos sa Ulahing mga Adlaw.
Dapita ang tanan nga moduol ug motan-aw kon mahitungod sa unsa ang Iyang Simbahan ug ebanghelyo. Dapita sila nga moduol ug motabang aron himoon kini nga kalibotan nga mas maayo nga dapit. Higugmaa ug lig-ona ang usag usa. Dapita sila sa pagduol ug mahisakop niining dako nga buhat uban sa buhi nga apostoles ug mga propeta ug gipangulohan ni Jesukristo.
Sunda ang Iyang ehemplo. Paglakaw diha sa Iyang dalan. Dad-a ang Iyang ngalan diha kanimo.
Hangopa ang pagtudlo sa ebanghelyo ug pagkat-on sa ebanghelyo.
Himoa ang mga bililhong butang sa ebanghelyo nga kabahin sa imong inadlaw-adlaw nga kinabuhi.
Tinguhaa nga mahimo ug magpabiling lig-on nga nakaangkla diha sa bato ni Jesukristo!
Ikaduha: Hibaloi nga ikaw gikinahanglan.
Ayaw kabalaka tungod kay ikaw nag-inusara ug ang gidaghanon sa imong isig ka miyembro tingali gamay ra. Hinumdomi, si Joseph Smith usa ra. Ang nag-una nga Gipahiuli nga Simbahan nagsugod sa gamay nga gidaghanon sa walay kahadlok nga mga Santos.
Paghiusa niining dako nga buhat. Suportahi ang usag usa. Paghigugma, pagpakigbahin ug pagdapit niadtong naa sa imong palibot. Dapita sila sa pagduol ug pagsusi, pagduol ug pagtabang, ug pagduol ug pagpahisakop! Sunda kini nga sumbanan, ug ikaw motubo sa espirituhanong kalig-on, sa emosyonal nga kahimsog, ug kamo motubo sa gidaghanon.
Ikatulo: Salig nga ang Dios mogiya nimo.
Ablihi ang imong kasingkasing ngadto sa mga hunghong sa Espiritu.
Tinguhaa nga maputli ang imong kasingkasing ug hunahuna samtang ikaw maglakaw diha sa dalan sa pagkadisipulo, motahod sa imong sagrado nga mga pakigsaad.
Pagkonektar ngadto sa langit pinaagi sa gahom sa Espiritu Santo. Ang Espiritu Santo mao ang tinubdan sa personal nga pagpamatuod ug pagpadayag. Siya makagiya kanimo sa imong mga desisyon ug makapanalipod kanimo gikan sa pisikal ug sa espirituwal nga peligro.
Ang imong walay kahadlok ug tinuyo nga paglakaw isip disipulo ni Jesukristo modala og dagko nga mga butang diha sa imong kaugalingong personal nga kinabuhi ug mopanalangin sa imong mga pamilya, mga komunidad, ug katawhan.
Samtang ikaw mag-ampo, “Langitnong Amahan, nagkinahanglan ko sa Imong tabang!,” ang Dios maminaw nimo, ug Siya mopanalangin nimo. Kay Siya andam kanunay sa paghatag sa Iyang tabang nganha kanimo, Iyang anak.